THAWJ ZAJ | KEV TSHAWB TXUJCI PUAS PAB TAU TXHUA YAM?

Kev Tshawb Txujci Tu Ncua Dabtsi?

Tau tsis ntev no muaj ntau phau ntawv tawm tshiab txog cov tub txawg tub ntse uas tsis ntseeg tias muaj vajtswv. Cov ntawv no ua rau coob leej sib cav sib ceg. David Eagleman yog ib tug uas tshawb fawb txog lub hlwb, nws hais tias thaum tibneeg nyeem cov ntawv ntawd ua rau lawv xav yuam kev tias cov tub txawg tub ntse twb paub txhij paub txhua txog lub qab ntuj khwb no lawm. Nws hais tias tsim nyog cov tub txawg tub ntse muaj lub siab nthuav ntxeev kawm txog ntau yam, rau qhov twb muaj ntau zaus uas lawv xav yuam kev lawm.

Ib tug tub txawg tub ntse tsom cov hnub qub

Ib tiam dhau ib tiam, tej tub txawg tub ntse kawm tau tej yam txawv heev thaum lawv tshawb nrhiav txog lub qab ntuj khwb. Ib co kuj yuam kev deb heev lawm thiab. Zoo li tus yawg Isaac Newton uas yog ib tug tub txawg tub ntse nto moo heev. Nws yog tus tshawb pom tias lub zog gravity rub thiab nqus kom txhua lub hnub qub thiab lub ntiajteb nyias nyob nyias chaw. Nws kuj tsim txojkev suav lej hu ua calculus, uas pab kom muaj tej koos pis tawj, tej dav hlau mus saum hli, thiab lwm yam kev kawm txog lub qab ntuj khwb no. Txawm nws ntse npaum li ntawd los nws kuj yuam kev thiab. Thaum ub nws tshawb nrhiav seb txojkev saib hnub qub thiab ua yees siv puas hloov tau txhuas thiab hlau mus ua kub.

Muaj ib tug yawg Kili tshawb txujci hu ua Ptolemy uas nyob 1,500 xyoo ua ntej Newton. Thaum ntawd tsis tau muaj koob tsom hnub qub, tiamsis nws muaj peev xwm teev cia seb thaum hmo ntuj tej hnub qub txawv txav li cas. Nws kuj yog ib tug kws tsim tej ntawv qhia kev. Txawm tias nws txawj npaum li ntawd los nws ntseeg tias tag nrho cov hnub qub saum nruab ntug kiv puag ncig lub ntiajteb no. Tus yawg Carl Sagan uas tshawb fawb seb tej hnub qub xeeb los li cas, hais tias tibneeg ntseeg yuam kev li Ptolemy qhia tau 1,500 xyoo diam. Yog li ntawd, txawm ib tug neeg ntse npaum li cas los yeej qhia tau yuam kev thiab.

Ib tug tub txawg tub ntse nyeem phau Vajlugkub

Niaj hnub no tseem nyuaj qees rau tej tub txawg tub ntse. Puas muaj leejtwg yuav tshawb tau kom paub txhij paub txhua txog lub qab ntuj khwb no? Cov tub txawg tub ntse yeej kawm tau ntau yam uas pab tau noob neej. Tiamsis kev kawm txuj kawm ci tseem tu ncua ntau yam. Tus yawg hu ua Paul Davies thiaj hais tias tsis muaj leejtwg yuav piav tau txhij txhua tias lub qab ntuj no rhawv tsim los li cas, vim neeg tej tswvyim tsis sib thooj. Muaj tseeb li ntawd tiag, neeg tsis muaj peevxwm paub txhua yam txog lub qab ntuj no. Thaum tibneeg khav tias kev kawm txuj kawm ci piav tau txhua yam txog lub qab ntuj no, tsis txhob maj ntseeg tiamsis muab luj zoo zoo tso.

Kev tshawb txujci yeej pab tsis tau peb zoo li cov nqe Vajlugkub no hais

Phau Vajlugkub hais li no txog lub qab ntuj no: “Tej no tsuas yog [Vajtswv] tej haujlwm sab nraum phij sam xwb, peb hnov txog nws yog lub suab sib ntxhi me me xwb.” (Yauj 26:14) Tseem tshuav ntau yam uas neeg tsis nkag siab. Yeej muaj tseeb li tus tubtxib Povlauj tau sau 2,000 xyoo dhau los tias: “Au Vajtswv muaj txhua yam nplua mias. Nws lub tswvyim thiab kev txawj ntse nyob tob kawg. Tej uas Vajtswv txiav txim siab mas paub tsis tag, thiab nws tej kev mas tshuaj tsis tau.”—Loos 11:33.

Kev Tshawb Txujci Pab Tsis Tau Txhua Yam

Kev tshawb txujci pab kom peb paub txog lub qab ntuj no, tej roob tej hav thiab tej tsiaj txhu. Tiamsis phau Vajlugkub pab kom tibneeg muaj kev sib haum xeeb, thiab pab kom peb txaus siab rau peb lub neej. Xav txog cov ntsiab lus nram no.

Txwv Kev Tub Sab Tub Nyiag Kev Sib Ntaus Sib Tua

Saib txojsia muaj nqes

“Tsis txhob tua neeg.”—Khiav Dim 20:13.

“Txhua tus uas ntxub nws tus kwvtij kuj yog tus uas tua neeg.”—1 Yauhas 3:15.

Nrhiav kev sib haum xeeb

“Cia li tsiv txojkev phem thiab ua qhov uas zoo, nrhiav kev hum xeeb thiab caum kom cuag.”—Ntawv Nkauj 34:14.

“Cov uas tsim kev sib hum xeeb thiab tseb txojkev sib hum yuav tau sau txojkev ncaj ncees.”—Yakaunpau 3:18.

Ntxub txojkev ua nruj ua tsiv

“[Yehauvas] tshuaj saib cov uas ncaj ncees thiab cov uas limhiam. Nws lub siab ntxub cov uas nyiam ua limhiam ntais ntuj.”—Ntawv Nkauj 11:5.

“Tsis txhob khib tu[s] neeg ua limhiam ntais ntuj, thiab tsis xaiv taug nws tej kev txoj twg kiag li, rau qhov [Yehauvas] ntxub tus neeg siab nkhaus.”—Paj Lug 3:31, 32.
Tsev Neeg Muaj Kev Zoo Siab

Mloog niam txiv lus

“Cov menyuam, nej cia li mloog niam txiv lus rau hauv tus Tswv vim qhov no raug cai lawm. ‘Koj yuav tsum hwm koj niam koj txiv.’ No yog thawj nqe kevcai uas muaj tej lus cog tseg hais tias, ‘koj thiaj li noj qab nyob zoo thiab muaj txojsia nyob ntev rau hauv lub ntiajteb.’ ”—Efexau 6:1-3.

Qhuab qhia menyuam

“Nej cov uas ua txiv, tsis txhob zes ua rau nej tej menyuam npau taws, tiamsis yuav tsum tu lawv rau hauv tus Tswv tej lus qhuab qhia thiab nws tej lus ntuas.”—Efexau 6:4.

“Nej cov uas yog txiv, nej tsis txhob zes nej tej menyuam lawv thiaj tsis poob siab.”—Khaulauxi 3:21.

Hlub thiab saib taus tus txij nkawm

“Txawm li cas kuj xij nej cov nyias yuav tsum hlub nyias tus pojniam ib yam li nej hlub nej lub cev, thiab cov pojniam los yuav tsum hwm nws tus txiv.”—Efexau 5:33.
Saib Xyuas Thiab Tu Lub Ntiajteb

Yav thaum ub Vajtswv yeej suav “txim” txhaum rau cov uas ua qias puas tsuas tebchaws Yixayee. (Yaxaya 24:5, 6) Niaj hnub no los cov uas txhob txwm rhuav lub ntiajteb kuj yuav raug txim thiab. Yehauvas “yuav rhuav tshem cov uas rhuav tshem lub ntiajteb.” (Qhia Tshwm 11:18) Tsis yog lawv yuav dim dawb dim do xwb.