Tej Uas Peb Xav Paub

Thaum Xatas hais rau Evas tias nws yeej yuav tsis tuag yog nws noj tsob txiv ntoo uas ua rau paub qhov phem thiab qhov zoo, puas yog Xatas hais tias Evas muaj ib tug ntsuj plig uas tsis txawj tuag?

Tsis yog, Dab Ntxwg Nyoog tsis tau hais rau Evas tias yog nws noj tsob txiv uas Vajtswv tsis pub noj ces thaum nws tuag tsuas yog nws lub cev xwb tiamsis nws tus ntsuj plig tseem ciaj mus nyob rau lwm qhov. Xatas siv ib tug nab los nrog Evas tham tias yog Evas noj tsob txiv ntawd ces nws yeej “yuav tsis tuag ib zaug li.” Qhov Xatas hais li no ces twb yog nws hais rau Evas tias Evas yuav nyob mus ib txhis ua neej kaj siab lug hauv ntiajteb no, tsis tos Vajtswv pab li.​—Chivkeeb 2:17; 3:3-5.

Yog txojkev ntseeg tias neeg muaj ib tug ntsuj plig uas tsis txawj tuag tsis yog pib hauv lub vaj Edees ces txojkev ntseeg no pib thaum twg los lawm? Peb tsis paub tseeb tiamsis peb paub tias thaum Dej Dag Nyab Ntiajteb rau Nau-es tiam txhua txojkev ntseeg cuav raug puas tsuaj tag lawm. Peb paub li no rau qhov tsuas yog Nau-es thiab nws tsev neeg thiaj dim thaum Dej Dag Nyab Ntiajteb xwb. Lawv puavleej teev tiam Yehauvas ces yeej tsis muaj leejtwg yuav qhia kev ntseeg cuav.

Yog li ntawd txojkev ntseeg tias neeg muaj ib tug ntsuj plig uas tsis txawj tuag yuav tsum pib tom qab Dej Dag Nyab Ntiajteb. Thaum Vajtswv ua rau ­tibneeg nyias hais nyias ib yam lus hauv Npanpee lossis Npanpiloos thiab “lawv tawg ri sua ntawm qhov chaw ntawd mus nyob thoob plaws hauv lub ntiajteb no,” ces lawv kuj coj nrog lawv txojkev ntseeg cuav tias neeg muaj ib tug ntsuj plig uas tsis txawj tuag. (Chivkeeb 11:8, 9) Txawm txojkev ntseeg cuav no yuav pib thaum twg los, peb paub tias Xatas Dab Ntxwg Nyoog uas “yog txhua tus uas dag leej txiv” yog tus qhia thiab nws zoo siab heev thaum nws pom neeg coob coob ntseeg lub tswvyim no.​—Yauhas 8:44.