Zaj 8: Xyaum Qhia Kom Tus Kawm Vajlugkub Loj Hlob
Cob Kom Tus Kawm Paub Txog Lub Koom Haum
1. Vim li cas txhua lub lim tiam, zoo rau peb qhia lawv txog Yehauvas lub koom haum?
1 Thaum peb mus qhia Vajlugkub rau tibneeg peb xav kom lawv los paub qhov tseeb thiab los koom lub koom txoos Khixatia. (Xkhy. 8:23) Phau ntawv Leejtwg Thiaj Ua Li Yehauvas Siab Nyiam? yuav pab tau peb. Thaum koj pib kawm Vajlugkub nrog ib tug twg, muab ib phau rau nws nyeem. Txhawb kom nws nyeem thoob plaws phau ntawv. Txhua lub lim tiam uas neb kawm Vajlugkub ua ke, siv ob peb feeb los nyeem thiab kawm txog Yehauvas lub koom haum.
2. Koj yuav txhawb li cas, kom tus kawm Vajlugkub tuaj kev sib txoos?
2 Kev Sib Txoos: Yog tus uas kawm Vajlugkub tuaj kev sib txoos ces nws yuav pom tias Vajtswv lub koom haum muaj nqes. (1Khl. 14:24, 25) Yog li ntawd, zoo rau koj qhia nws txog 5 txojkev sib txoos uas peb muaj txhua lub lim tiam. Piav ib lub zuj zus nws thiaj nkag siab. Qhia nws tias txhua lub lim tiam peb muaj ib zaj lus qhuab qhia rau sawvdaws mloog, ces qhia kiag lub ntsiab uas tus kwvtij yuav tham lub lim tiam ntawd rau nws paub. Nqa phau The Watchtower uas lub koom txoos yuav kawm lub lim tiam ntawd rau nws saib. Zoo rau koj nqa phau ntawv uas yuav kawm rau hmo muaj Lub Koom Txoos Kev Kawm Vajlugkub thiab. Qhia nws tias peb kuj muaj Kawm Kev Tshaj Tawm thiab muaj Kev Kawm Ua Vajtswv Tes Num. Piav seb peb kawm li cas. Yog koj muaj ib zaj lus qhia rau hmo uas kawm kev tshaj tawm, ces muab koj zaj lus qhia rau nws saib, es neb lam xyaum ua si. Tsis tas li ntawd xwb, qhia nws txog tej yam uas koj tau kawm tom kev sib txoos. Muab tej duab hauv peb cov ntaub ntawv uas qhia ntsig txog cov kev sib txoos rau nws saib. Thaum koj nrog nws kawm thawj zaug, cia li caw nws tuaj koom kev sib txoos.
3. Peb yuav qhia nws txog tej yam dabtsi hauv lub koom haum?
3 Thaum ze lub caij ua kevcai nco txog Yexus txojkev tuag, thiab yuav muaj rooj sib txoos, lossis tus kwvtij uas saib xyuas thaj tsam yuav tuaj saib lub koom txoos, ces siv sijhawm los qhia tus kawm Vajlugkub txog tej kev sib txoos ntawd. Txhawb kom nws tuaj koom peb. Tsis tas li ntawd xwb, zoo rau neb kawm cov lus nug no ib los zuj zus: Vim li cas peb hu ua Yehauvas cov Timkhawv? Vim li cas ho muab lub tsev pe hawm Vajtswv hu ua Tsev Nceeg Vaj? Cov txwj laus thiab cov tub leg num tuav haujlwm dabtsi hauv lub koom txoos? Peb luam peb cov ntaub ntawv Vajlugkub li cas? Leejtwg pab nyiaj rau lub koom haum tau siv? Tej ceg uas ncau ntawm lub koom haum, ua haujlwm dabtsi? Thiab Pab Uas Ntaus Thawj saib xyuas peb li cas?
4, 5. Peb yuav siv cov yeeb yaj kiab los qhia txog lub koom haum li cas?
4 Cov Yeeb Yaj Kiab: Yog tias peb siv cov yeeb yaj kiab, yuav pab kom tus kawm Vajlugkub pom txog Yehauvas lub koom haum. Siv cov yeeb yaj kiab hu ua, To the Ends of the Earth, Our Whole Association of Brothers, thiab United by Divine Teaching. Muaj ib tug pojniam txais peb cov ntaub ntawv Vajlugkub tau 5 lub xyoos. Tiamsis thaum nws pom daim yeeb yaj kiab hu ua Jehovah’s Witnesses—The Organization Behind the Name, ua rau nws quaj kiag. Nws hais tias nws yeej tso siab rau cov Timkhawv uas mus saib nws, tiamsis tom qab nws saib daim yeeb yaj kiab tas, nws kuj tso siab rau lub koom haum lawm thiab. Nws thiaj pib kawm Vajlugkub nrog cov Timkhawv, thiab lub lim tiam tom qab ntawd xwb, nws cia li mus koom kev sib txoos lawm.
5 Thaum peb qhia Vajlugkub rau tibneeg, cia peb siv ob peb feeb txhua lub lim tiam los qhia phau ntawv no, thiab nco ntsoov siv cov yeeb yaj kiab no. Yog peb ua li ntawd, ntev mus ntev tuaj tus kawm Vajlugkub yuav los vam khom Yehauvas lub koom haum.