Tej Uas Peb Xav Paub

Tej Lus Qhia 5:8 puas yog hais txog tibneeg tej nom tswv xwb lossis hais txog Yehauvas thiab?

Nqi Vajlugkub no hais tias: “Tsis txhob xav tsis thoob thaum koj pom nomtswv tsimtxom cov neeg pluag, tsis tsa lawv cai thiab txiav txim tsis ncaj rau lawv. Txhua tus nomtswv yeej muaj ib tug ua tus loj dua saib nws, thiab tseem muaj ib tug uas muaj meejmom siab dua saib lawv.”​—Tej Lus Qhia 5:8.

Thaum peb nyeem nqi no tej zaum peb yuav xav txog tibneeg tej nom tswv xwb. Tiamsis yog peb muab ua zoo xav ces nqi no kuj qhia txog Yehauvas thiab. Qhov no yuav txhawb tau peb lub zog heev.

Tej Lus Qhia 5:8 hais txog ib tug nom tswv uas ua tsis ncaj rau cov neeg txom nyem thiab tsim txom lawv. Tus nom tswv no yuav tsum nco ntsoov hais tias muaj ib tug siab tshaj nws thiab saib ntsoov nws. Tseem muaj lwm cov uas muaj meej mom thiab hwjchim tshaj tus ntawd thiab. Tiamsis tu siab kawg uas tibneeg tej nom tswv coj tsis ncaj, lawv tej laj mej pej xeem thiaj raug kev txom nyem.

Txawm hais tias zoo li peb lub neej tsaus ntuj nti xwb los yog peb nco ntsoov tias Yehauvas yeej paub thiab saib ntsoov tej nom tswv ntawd ces yuav txhawb tau peb lub zog. Peb thov tau Yehauvas pab peb thiab muab peb tej kev nyuaj siab tso rau nws. (Phau Ntawv Nkauj 55:22; Filipis 4:6, 7) Peb paub tias “Tus TSWV [“Yehauvas,” NWT ] yeej saib ntsoov lub ntiajteb no thiab yuav txhawb cov uas muab siab npuab nws.”​—2 Xwmtxheej Vajntxwv 16:9.

Tej Lus Qhia 5:8 tsuas qhia peb tias lub ntiajteb uas peb nyob no, txawm ib tug neeg muaj hwjchim los tseem muaj lwm tus uas muaj hwjchim tshaj nws. Tiamsis qhov tseem ceeb tshaj, nqi no pab peb nco tias tus uas muaj hwjchim loj dua ntais yog Vajtswv Yehauvas. Vajtswv Yehauvas coj ncaj ncees thiab pom peb txhua leej txhua tus. Nws tsa nws tus Tub Yexus Khetos los ua Vajntxwv kav Nws lub Nceeg Vaj. Nws tus Tub yuav coj ncaj ib yam li nws thiab.