Koj Puas Muaj Kev Ntseeg?

Yuav kom ua tau raws li Yehauvas lub siab nyiam, peb yuav tau muaj kev ntseeg. Tiam sis nyob hauv phau Vajlugkub hais tias “yeej yuav muaj ibtxhia tsis ntseeg Vajtswv Txojlus.” (2 Thexalaunikes 3:2) Thaum tus tub txib Povlauj hais li ntawd, yog nws hais txog “cov neeg siab phem thiab limhiam” uas tsim txom nws. Tiam sis thaum nws hais txog cov tsis muaj kev ntseeg, nws tsis yog hais txog cov neeg tsim txom nws xwb. Muaj ib txhia tsis kam ntseeg tias muaj ib tug Vajtswv uas tsim ib puas tsav yam. (Loos 1:20) Hos lwm cov hais tias lawv ntseeg tias muaj ib yam los sis ib tug uas muaj hwj chim heev. Txawm lawv ntseeg li ntawd los haj tseem ua tsis tau haum Yehauvas siab.

Peb yuav tsum ntseeg tias muaj Yehauvas tiag thiab nws yog tus muab nqi zog rau cov uas muaj kev ntseeg rau nws. (Henplais 11:6) Yuav kom peb muaj tau txoj kev ntseeg no, peb yuav tsum muaj Yehauvas lub hwj huam dawb huv pab peb. Yuav kom peb tau lub hwj huam dawb huv ntawd, peb yuav tau thov Yehauvas kom nws muab rau peb. (Lukas 11:9, 10, 13) Muaj dua ib yam uas pab kom peb tau lub hwj huam dawb huv ntawd yog nyeem phau Vajlugkub. Yehauvas siv nws lub hwj huam dawb huv tshoov cov uas sau phau Vajlugkub ntawd. Yog peb ua li no ces twb yog peb cia Yehauvas lub hwj huam dawb huv pab peb ua lub neej raws li Yehauvas lub siab nyiam.