Tej Uas Peb Xav Paub
Vim li cas ib txhia ho hais tias Phau Ntawv Nkauj 12:7, 8 yog hais txog “[Yehauvas] tej lus” (ntawm nqe 6) hos Vajtswv Txoj Lus Rau Cov Nyob Lub Qab Ntuj Tshiab hais tias yog hais txog “cov neeg txomnyem” (ntawm nqe 5)?
Yog nyeem cov nqe Vajlugkub ces peb yuav pom tias yog hais txog tib neeg.
Nyob rau Phau Ntawv Nkauj 12:1-4, hais tias “neeg ntiajteb cov uas ncaj ncees twb ploj tas lawm.” Ces Phau Ntawv Nkauj 12:5-8, hais ntxiv tias:
“[Yehauvas] hais tias, ‘Kuv yuav los tamsim no ntag,
rau qhov cov neeg txomnyem raug tsimtxom hnyav heev
thiab cov neeg nyuaj siab quaj tu siab kawg li.
Kuv yuav muab txojkev uas nyob tso siab lug uas lawv twb tos los tau ntev lawm rau lawv.’
[Yehauvas] tej lus cog tseg yog tej uas cia siab tau,
tej lus ntawd muaj nqis ib yam li tej nyiaj uas nchuav tawm hauv lub yeejvub xya zaus los lawm. . . .
[Yehauvas], thov tiv thaiv peb kom peb tau kev kaj siab,
thiab tsomkwm peb kom dim ntawm cov neeg siab phem.”
Nqe 5 yog hais txog tej uas Vajtswv yuav ua rau cov neeg raug kev txom nyem. Nws yuav cawm lawv.
Nqe 6 hais ntxiv tias “[Yehauvas] tej lus cog tseg yog tej uas cia siab tau, tej lus ntawd muaj nqis ib yam li tej nyiaj uas nchuav tawm hauv lub yeejvub xya zaus los lawm.” Qhov no qhia seb peb xav li cas txog Yehauvas cov lus.—Phau Ntawv Nkauj 18:30; 119:140.
Cia peb mus tshuaj ntxiv Phau Ntawv Nkauj 12:7, 8: “[Yehauvas], thov tiv thaiv peb kom peb tau kev kaj siab, thiab tsomkwm peb kom dim ntawm cov neeg siab phem.” Ob nqes no yog hais li cas tiag?
Vim nqe 7 thiab 8 hais tom qab “[Yehauvas] tej lus,” ib txhia thiaj xav tias Vajtswv tiv thaiv nws cov lus. Peb yeej paub tias Yehauvas yeej tiv thaiv phau Vajlugkub tab txawm cov uas tawm tsam nws xav txwv thiab rhuav kom puas tsuaj.—Yaxayas 40:8; 1 Petus 1:25.
Tiam sis Yehauvas yeej tiv thaiv nws cov tib neeg uas hais nyob rau ntawm nqe 5 tiag. Yehauvas twb pab thiab tseem yuav pab thiab cawm “cov neeg txomnyem raug tsimtxom hnyav heev thiab cov neeg nyuaj siab quaj tu siab kawg li.”—Yauj 36:15; Phau Ntawv Nkauj 6:4; 31:1, 2; 54:7; 145:20.
Yog li ntawd, nqe 7 thiab 8 ho hais txog dab tsi?
Yog peb ua tib zoo soj ntsuas phau ntawv nkauj ces peb yuav tauv tias yog hais txog tib neeg.
Thaum pib Phau Ntawv Nkauj 12, Daviv tham txog cov tib neeg uas teev tiam Yehauvas ruaj nreeg uas raug cov tib neeg lim hiam dag. Tom qab ntawd, peb nyeem tias Yehauvas yuav tawm tsam cov uas hais tej lus phem ntawd. Phau Ntawv Nkauj qhia rau peb tias peb yeej tso siab tau rau Vajtswv ua tus pab nws cov tib neeg vim nws tej lus yeej tseeb thiab cia siab tau.
Yog li ntawd, nqe 7 thiab 8 hais tias Yehauvas yuav tiv thaiv cov uas raug cov neeg lim hiam tau ua phem rau.
Nyob rau hauv Cov Nqe Lus Henplais, nqe 7 siv lo lus “lawv” nyob rau hauv. Thaum xub xub muab Henplais sau ua lus Kilis, nqe 7 siv lo lus “peb” ob zaug. Yog li ntawd, yuav tsum yog hais rau cov uas muab siab teev tiam Yehauvas uas raug kev txom nyem thiab raug tsim txom hnyav heev. Yog li ntawd nqe 7 thiaj hais tias Yehauvas yuav tiv thaiv txhua tus uas teev tiam Yehauvas ntawm cov neeg siab phem. (Phau Ntawv Nkauj 12:7, 8) Thaum muab Cov Nqe Lus Henplais txhais ua lus Alas, nqe ntawd siv lo lus “lawv” thiab nyeem li no tias: “Koj, au tus TSWV, yuav tiv thaiv cov ncaj ncees, koj yuav tsom kwm lawv ntawm cov neeg lim hiam tiam no mus ib txhis.” Qhov no ua pov thawj tias Phau Ntawv Nkauj 12:7, 8 tsis yog hais txog Vajtswv tej lus.
Tej no qhia tias cov uas teev tiam Yehauvas muaj kev vam kev cia siab tias Yehauvas yuav pab lawv.