Ib Txhia Ntseeg Li Cas?

Cov Hidus (Hindus)

ntseeg tias tibneeg txom nyem vim tej kev txhaum lawv ua tiam no lossis tiam nram ntej. Ces lawv yuav tau mus thawj thiab ib tiam dhau ib tiam kom txog thaum lawv ua tibneeg ncaj ncees. Thaum ntawd, lawv yuav tsis mus thawj thiab ntxiv lawm.

Cov Moxalees (Muslims)

ntseeg tias tibneeg txom nyem vim Vajtswv rau txim rau lawv lossis Vajtswv sim lawv txojkev ntseeg. Tus thawj coj ntawm lub koom haum Islamic Society of North America hais tias tibneeg txom nyem thiaj paub nco Vajtswv txiaj ntsig thiab paub hlub cov txom nyem.

Kevcai Yudais

ntseeg tias tibneeg txom nyem vim lawv tsis txawj txiav txim zoo. Cov Yudais ib txhia hais tias cov neeg zoo uas tuag lawd yuav sawv rov muaj sia tau lub neej zoo. Hos muaj ib txhia hais tias tibneeg mus thawj thiab ib tiam dhau ib tiam lawv thiaj kho tau lawv tej kev txhaum.

Kevcai Hauj Sam

ntseeg tias tibneeg yuav tau mus thawj thiab ua neej txom nyem ntsuav ib tiam dhau ib tiam mus txog thaum lawv tsis coj lub siab phem lawm. Yog li ntawd, thaum lawv ua neeg ntse, txawj xav, thiab hlub lwm tus ces lawv thiaj mus txog ntuj kag uas tsis muaj kev txom nyem lawm.

Ib Txhia Hauv Suav Teb

ntseeg tias yuav tau ua neeg zoo thiaj li tsis tshua txom nyem. Tsis tas li ntawd, ib phau ntawv uas qhia txog kev ntseeg qhia ntxiv tias twb yog vim ib leeg coj tsis ncaj rau ib leeg thiab tim txoj hmoo, tibneeg thiaj txom nyem.

Ib Txhia Hauv Afika Teb

ntseeg tias tibneeg txom nyem vim muaj tej plig los ua phem rau lawv. Lawv kuj ntseeg tias muaj tej tug tibneeg txawj ua kom yus tau zoo lossis txom nyem. Tiamsis kuj muaj cov uas txawj tawm tsam tej plig phem kom tibneeg txhob txom nyem ntxiv lawm.

Cov Ntseeg Yexus

ntseeg tias tibneeg txom nyem twb yog tim thawj nkawm niam txiv tsis mloog Vajtswv lus. Tiamsis muaj ib txhia qhia tshaj li muaj nyob hauv phau Vajlugkub, xws li cov Kav Tos Liv. Lawv ntseeg tias tibneeg txom nyem yog txom nyem rau Vajtswv thiab rau lwm tus.