2. Puas Yog Tim Tibneeg Thiaj Muaj Kev Txom Nyem?

Ua Cas Thiaj Nug Li No?

Yog tias peb rov ua rau peb txom nyem ces tej zaum peb yeej kho tau peb lub neej.

Xav Txog Qhov No

Tibneeg rov ua rau tibneeg txom nyem li cas?

Raug Kev Phem.

Lub koom haum World Health Organization hais tias ntawm 4 tug menyuam, 1 tug yeej yuav raug tsim txom. Hos hais txog pojniam ntawm 3 tug, 1 tug yeej yuav raug ntaus lossis raug yuam ua phem ua qias.
Raug Tua Tuag.

Lub koom haum World Health Organization hais tias xyoo 2016, muaj li 477,000 leej raug tua tuag thoob plaws ntiajteb. Lawv twb tsis suav cov 180,000 leej uas tuag vim muaj kev tsov kev rog.
Muaj Mob Muaj Nkeeg.

Hauv phau ntawv National Geographic, Foom Ximij (Fran Smith) sau tias: “Muaj tshaj li 1 txhiab plhom leej haus yeeb haus tshuaj. Vim li ntawd, coob leej thiaj muaj tej mob uas ua rau lawv tuag. Xws li: hlab ntsha tawg hauv hlwb, mob plawv, mob ntsws, thiab mob kheeb xawm (cancer) hauv ntsws.”
Xaiv Ntsej Xaiv Muag.

Ntses Vuaj (Jay Watts) uas yog ib tug kws kawm txog kev nyuaj siab hais tias: “Tibneeg muaj kev nyuaj siab vim lawv tsis muaj nyiaj, tsis muaj teb muaj chaw, raug lwm haiv neeg tsim txom, nyiam sib tw ua neej, thiab ib leeg saib tsis taus ib leeg tsis hais pojniam txivneej, cov muaj cov pluag huvsi.”

KAWM NTXIV

Saib zaj yeeb yaj kiab Vajtswv Tsim Lub Ntiajteb Ua Dabtsi? hauv lub vej xaij jw.org/hmn.

Phau Vajlugkub Hais Li No

Tus txivneej pw tom tsev kho mob. Nws tus pojniam nyuaj siab thaum tus kws kho mob qhia nkawd tias yuav kho tsis tau tus mob.

Ntau zaus, tim tibneeg thiaj muaj kev txom nyem.

Tej nom tswv caij tsuj tej laj mej pej xeem, tibneeg thiaj ua neej nyuaj kawg li.

“Ib txhia raug txomnyem vim kev tswjhwm ntawm cov neeg muaj hwjchim.”—TEJ LUS QHIA 8:9.

Xyaum coj zoo.

Phau Vajlugkub tej hauv paus ntsiab lus pab kom peb noj qab nyob zoo thiab nrog lwm tus sib raug zoo.

“Lub siab uas kaj nrig ua rau lub cev tsis muaj mob, tiamsis kev khib zoo ib yam li lub mob.”—PAJLUG 14:30.

“Nej yuav tsum muab nej lub siab phem, lub siab ua nruj ua tsiv thiab lub siab heev tso povtseg. Tsis txhob sib cav sib ceg, tsis txhob thuam lwm tus thiab tsis txhob xav ib yam phem hlo li.”—EFEXUS 4:31.