Muaj Kev Sib Haum Xeeb

Zam Txim Rau Lwm Tus

“Yog nej cov muaj ib tug ua txhaum rau ib tug, nej ib tug yuav tsum zam txim rau ib tug.”​—KAULAUXAIS 3:13.

Peb txhua tus yeej ua yuam kev ntau zaus. Qee zaus peb yuav ua siab lwm tus lossis lwm tus yuav ua siab peb. Yog li, peb yuav tau zam txim rau ib leeg ib tug. Yog peb zam txim peb thiaj yuav tsis ua neeg cib nyeej. Txhob ua “phem pauj phem” lossis ib sij muab cov qub lus los hais. (Loos 12:17, TT ) Ua li, yog ib tug twb ua rau peb tu siab lawm nev? Yog muaj li no, peb yuav tsum mus nrog tus ntawd tham. Neb yuav tau hais kom haum, tsis yog hais kom ib tug yeej ib tug swb.​—Loos 12:18.

Txo Hwjchim Thiab Saib Taus Lwm Tus

‛Txo hwjchim thiab txhob khav tias ib tug zoo dua ib tug.’​—FILIPIS 2:3.

Yog peb txo hwjchim thiab saib taus lwm tus luag yuav nyiam nrog peb dua. Luag yuav pom tias peb txawj xav thiab yuav tsis lam ua rau luag tu siab. Tiamsis yog peb pheej muab peb tus kheej saib hlob thiab xav kom lwm tus ua ywj peb siab xwb ces yuav muaj kev sib ntxub thiab muaj lus sib cav siv ceg. Lwm tus yuav tsis xav nrog peb ua ke thiab thaum kawg peb yuav tsis muaj phooj muaj ywg.

Txhob Xaiv Ntsej Xaiv Muag

‘Vajtswv tsis xaiv leejtwg ntsej muag. Txawm yog haiv neeg twg los xij, Vajtswv lees yuav txhua tus uas hwm Vajtswv.’​—TES HAUJLWM 10:34, 35.

Txawm koj yuav yog haiv neeg twg, hais yam lus twg, muaj thiab pluag los tus Tswv Tsim yeej saib peb zoo ib yam nkaus. “Nws tsim txhua haiv neeg los ntawm tib tug los xwb.” (Tes Haujlwm 17:26, TT ) Yog li txhua haiv neeg yeej sib txheeb sib ze. Yog peb saib taus lwm tus, peb thiab lawv yuav muaj kev kaj siab, thiab Yehauvas yuav zoo siab.

Ua Lub Siab Mos Siab Muag

“Nej yuav tsum . . . muaj lub siab mos siab muag.”​—KAULAUXAIS 3:12.

Yog peb muaj lub siab mos siab muag lwm tus yuav ncawg peb dua. Yog lwm tus xav los cuag peb los lawv yuav tsis ntshai vim lawv paub tias peb coj tau lub siab tu tu. Txawm lwm tus ua heev hlo los yog peb hais lus mos lus muag ces yuav pab tau lawv ua lub siab txias txias. Pajlug 15:1 hais tias: “Lo lus mos lus muag ua rau kev chim ploj mus, tiamsis lo lus nruj tsiv ua rau kev chim tawm tuaj.”

Ua Siab Dawb Thiab Ris Txiaj Ntsig

“Thaum yus pub rau luag yus zoo siab heev dua thaum yus tau luag li.”​—TES HAUJLWM 20:35.

Niaj hnub no coob leej tsuas ua siab hlob thiab xav txog lawv tus kheej xwb. Tiamsis yog peb ua siab dawb peb yuav muaj kev zoo siab. (Lukas 6:38) Cov neeg siab dawb muaj kev zoo siab dua vim lawv hlub tibneeg tshaj tej khoom uas lawv muaj. Qhov uas lawv hlub tibneeg li no pab tau lawv ris txiaj ntsig thaum lwm tus pub rau lawv. (Kaulauxais 3:15) Muab xav seb, ‘Koj nyiam nrog tus neeg qia dub lossis tus neeg siab dawb dua?’ Yog koj nyiam nrog tus neeg siab dawb dua ces xyaum coj li nws.​—Mathais 7:12.