Tej Twj Siv Is Taws Nej Muaj Peevxwm Txw Tau Peb Cov Menyuam

Ib txhia pom tias cov menyuam uas kov tej twj no heev dhau lawm yuav . . .

• tiv tej twj no, yog tsis tau kov tsis paub nyob.

• mus thab plaub lossis raug lwm tus thab.

• pom tej duab liab qab yoojyim heev.

TEJ UAS KOJ YUAV TSUM PAUB

KEV TIV

Tibneeg tsim nkees rau yus tua hauv yus lub twj kom yim tua yim tiv. Ib phau ntawv tau hais tias: “Tej apps uas peb theej rau hauv xov tooj yog tsim los kom peb ib sij mus kov peb lub xov tooj.” Tej tuam txhab twb muab lawv tej lag luam tso rau hauv lawm. Yog peb yim saib ntev ces lawv yim tau nyiaj ntau xwb.

MUAB XAV LI NO: Koj cov menyuam puas kov rawv lawv lub xov tooj lossis tej twj siv Is Taws Nej? Koj yuav pab lawv siv lawv lub sijhawm kom muaj nqis li cas?​—EFEXUS 5:15, 16.

THAB PLAUB

Thaum tibneeg siv Is Taws Nej yoojyim rau lawv ua ib tug neeg thab plaub lossis raug lwm tus thab.

Tos ib txhia nyiam mus thab plaub hauv Is Taws Nej los twb yog vim lawv xav nto npe. Hos ib txhia, thaum lawv mus pom tias lawv cov phoojywg ua kev lomzem es tsis caw lawv ces, lawv ho xav tias twb yog lawv cov phoojywg txhob txwm ua kom khib lawv xwb.

MUAB XAV LI NO: Koj puas qhia kom koj cov menyuam saib taus lwm tus thaum lawv mus rau hauv Is Taws Nej? (Efexus 4:31) Thaum koj cov menyuam pom tias lwm tus tsis caw lossis xam pom lawv, koj cov menyuam puas chim lossis tu siab?

DUAB LIAB QAB

Yoojyim heev rau tibneeg mus saib tej duab liab qab hauv Is Taws Nej. Txawm niam thiab txiv muab tej yam los thaiv menyuam lub twj kom duab liab qab txhob tshwm los tej duab ntawd yeej tseem tshwm tau.

Cov uas xa duab liab qab kuj ua tau txhaum kev txhaum cai thiab. Nyob rau tej lub tebchaws, nom tswv kuj txwv tsis pub xa menyuam yaus tej duab liab qab. Cov uas xa kuj yuav raug nplua thiab raug kaw los kuj muaj.

MUAB XAV LI NO: Koj yuav pab koj cov menyuam li cas kom lawv txhob mus saib lossis xa tej duab liab qab hauv Is Taws Nej?​—EFEXUS 5:3, 4.

KOJ YUAV TAU UA LI CAS

COB QHIA KOJ COV MENYUAM

Txawm menyuam txawj siv tej twj nkag mus rau hauv Is Taws Nej los, niam thiab txiv yeej yuav tau cob qhia lawv. Ib phau ntawv tau hais tias: “Yog niam thiab txiv muab xov tooj rau menyuam kov thaum yau es lawv twb tsis tau txawj siv ces kuj zoo ib yam li niam thiab txiv cia menyuam dhia rau hauv ib lub pas dej ua ntej lawv txawj ua luam dej.”

Xaiv lossis sau seb koj xav xyaum li cas.

• Qhia menyuam kom lawv saib taus lwm tus thaum lawv siv Is Taws Nej

• Pab koj tus menyuam kom txhob maj tu siab yog lwm tus tsis caw nws

• Ua txhua yam los tiv thaiv koj tus menyuam kom nws txhob mus saib tej yam uas tsis tsim nyog saib

• Ib sij tshuaj xyuas koj tus menyuam lub xov tooj

• Teem kom muaj caij muaj nyoog rau koj tus menyuam siv nws lub xov tooj

• Txwv kom menyuam txhob siv xov tooj lossis twj siv Is Taws Nej thaum hmo ntuj

• Kom txhua tus muab xov tooj cia thaum noj mov