THAUM MUAJ KEV KUB NTXHOV

1 | Saib Xyuas Koj Kev Noj Qab Nyob Zoo

VIM LI CAS?

Tej xwm txheej phem yuav ua tau rau peb muaj mob los sis lwm yam.

Thaum tib neeg raug xwm txheej, lawv yuav pib nyuaj siab. Yog lawv nyuaj siab dhau lawm, yuav ua rau lawv muaj mob.
Yog tos nco cia li muaj cua daj cua dub, av qeeg los sis kab mob kis, tej zaud yuav tsis muaj tshuaj thiab tib neeg txaus los pab sawv daws.
Tej xwm txheej phem yuav ua rau sawv daws tsis muaj nyiaj txaus los yuav zaub mov los sis tshuaj noj.

Nco Ntsoov Tias

Yog koj muaj mob thiab muaj kev nyuaj siab, koj yuav lam tau lam noj tej zaub mov uas tsis zoo. Qhov no yuav ua rau koj haj yam muaj mob tuaj.
Yog koj muaj mob cia li nrhiav kev los kho, tsis li ntawd yuav txo tau koj txoj sia.
Txawm yuav muaj teeb meem ntxhov hnyo los, yog koj noj qab nyob zoo ces koj yuav paub txiav txim dua.
Txawm koj muaj tsawg muaj ntau los koj yeej ua tau txhua yam los tiv thaiv koj txoj kev noj qab nyob zoo.

Koj Ua Tau Li Cas

Tus neeg muaj tswv yim yuav tiv thaiv nws tus kheej ua ntej teeb meem tshwm sim. Txawm yuav ua dab tsi los, nws yeej ua tib zoo ua thiab ua huv si. Qhov uas nws paub ceev faj li no yuav pab tau nws tsev neeg noj qab nyob zoo.

Sawma hais li no: “Yog peb tu peb tus kheej thiab tu vaj tu tsev huv si ces peb yuav tsis tau ib sij mus cuag kws kho mob thiab noj tshuaj.”

a Tau muab cov npe hauv zaj no ib txhia hloov lawm.

TEJ YAM UAS YUAV—Pab Tau Koj

Txawm muaj kev kub ntxhov los nco ntsoov ua tej yam no los pab kom koj noj qab nyob zoo

XYAUM NYIAM HUV

Xyaum Nyiam Huv

Phau Vajlugkub hais tias: ‘Tus neeg paub qab hau pom tej xwm uas yuav los raug nws, nws txawm zam kev lawm.’ (Pajlug 22:3) Ua tib zoo xav seb tej yam twg yuav ua rau yus raug mob los sis muaj mob.

Siv tshuaj thiab dej los ntxuav tes ua ntej yuav ua zaub mov noj thiab tom qab siv chav dej.
Tu vaj tu tsev kom huv si thiab so tej yam uas tib neeg nquag kov tsis tseg.
Txhob nyob ze tej tug uas muaj tus mob uas kis tau.

NOJ TEJ ZAUB MOV ZOO

Noj Tej Zaub Mov Zoo

Phau Vajlugkub hais tias: ‘Tsis muaj leej twg yuav ntxub nws lub cev.’ (Efexus 5:29) Yog peb hlub peb tus kheej, peb yuav ua tib zoo xav txog tej uas peb noj peb haus.

Haus dej kom txaus txaus.
Noj txiv hmab txiv ntoo thiab noj zaub.
Txhob noj tej yam uas muaj muaj roj, daw daw ntsev, los sis qab qab zib.
Txhob haus luam yeeb, haus dej haus cawv los sis haus yeeb haus tshuaj.

Kuam hais li no: “Yog peb tsis xav muaj mob, peb yuav tsum siv peb tej nyiaj txiag mus yuav tej yam khoom zoo los noj. Tsis li ntawd, peb yuav poob nyiaj mus kho mob.”

MUS TAUG KEV LOS SIS KHIAV THIAB PW KOM TXAUS

Pw Kom Txaus

Phau Vajlugkub hais tias: ‘Ib taus tes kev siab tus tseem zoo dua ob taus tes puv nkaus tej hauj lwm uas siv siav siv zog ua thiab haus cua.’ (Laj Lim Tswvyim 4:6) Peb yuav tsum muaj caij muaj nyoog los so thiab mus ua hauj lwm.

Peb yuav tsum txhob nyob nkaus xwb. Peb yuav tau mus taug kev thiab. Txawm koj laus los sis muaj mob muaj nkeeg los, yog koj siv koj lub cev mus ua yam ub yam no ces koj yuav nyob kab ntsab dua.
Mus Taug Kev Los Sis Khiav

Pw kom txaus txaus. Yog koj pw tsis txaus, muaj ib nyuag yam me me xwb los yuav ua rau koj meem txom. Tsis tas li ntawd, yog muaj dab tsi los koj yuav xav tsis tawm thiab khaws tsis tau. Ntev mus ntev tuaj, koj tseem yuav muaj mob thiab.
Teem ib lub caij kom haum rau koj mus pw. Thaum txog caij pw lawm koj yuav tsum mus pw. Thaum mus pw los pw tib lub sij hawm. Thaum sawv los sawv tib lub caij.
Ua ntej yuav mus pw, txhob saib TV los sis kov tej twj siv Is Taws Nej.
Ua ntej yuav mus pw txhob haus cawv, noj tsau tsau los sis noj tej yam uas yuav ua rau yus pw tsis tsaug zog.

Ntaj hais li no: “Thaum kuv pw txaus txaus kuv ua dab tsi los ua cus plaws, thiab kuv tsis tshua muaj mob. Tiam sis, yog kuv pw tsis txaus mas tej thaud kuv pib dias taub hau thiab mob ib ce.”