Xuas Pob Zeb Ntaus Xatefanau

TUS txivneej uas txhos caug hauv daim duab no yog leejtwg? Nws yog Xatefanau. Nws yog ib tug thwjtim uas muab siab npuab Yexus heev. Tiamsis tabtom muaj li cas rau Xatefanau hauv daim duab no? Cov txivneej no tabtom muab pob zeb ntaus nws. Vim li cas lawv ho ntxub Xatefanau ua luaj, es lawv thiaj ua phem rau nws? Cia peb kawm saib yog vim li cas.

Vajtswv tau pab Xatefanau ua tej txujci zoo kawg nkaus. Cov txivneej no tsis nyiam tej uas Xatefanau ua. Lawv thiaj nrog nws sib cam txog qhov uas nws qhia qhov tseeb rau cov tibneeg. Tiamsis Vajtswv pab Xatefanau, nws thiaj muaj tswvyim heev. Xatefanau hais tias cov txivneej no qhia tej uas cuav xwb. Qhov no ua rau cov txivneej no hajyam npau taws. Yog li ntawd, lawv thiaj ntes kiag Xatefanau, thiab hu tibneeg tuaj hais lus dag txog nws.

Tus pov thawj hlob nug Xatefanau tias: ‘Tej uas lawv hais txog koj puas muaj tseeb tiag?’ Xatefanau muab Vajtswv Txojlus los teb lawv. Thaum nws xaus lus, nws hais tias yav thaum ub kuj muaj neeg phem ntxub cov uas cev Yehauvas lus thiab. Ces nws hais ntxiv tias: ‘Nej zoo ib yam li cov neeg ntawd ntag. Nej tsis coj raws li Vajtswv tej kevcai, thiab nej muab Vajtswv tus tub qhe Yexus tua pov tseg lawm.’

Qhov no ua rau cov thawj coj no npau taws kawg li! Lawv zim hniav zog npau taws vog. Tiamsis Xatefanau tsa muag ntsia saum ntuj, thiab hais tias: ‘Ntsia saib! Kuv pom Yexus sawv ntawm Vajtswv sab tes xis nyob saum ntuj ceeb tsheej.’ Tamsim ntawd, cov txivneej muab tes pos pob ntseg thiab dhia mus rau ntawm Xatefanau. Lawv cia li muab nws cab tawm hauv lub nroog mus.

Cov txivneej muab lawv tej tsho ntev hle rau tus tub hluas Xolau saib. Koj puas pom Xolau hauv daim duab no? Cov txivneej ib txhia txawm pib xuas pob zeb ntaus Xatefanau. Xatefanau txhos caug ntua, zoo li koj pom hauv daim duab no. Ces nws thov Vajtswv tias: ‘Yehauvas, thov koj txhob rau txim rau lawv, vim lawv tau ua tej kev phem no.’ Nws paub tias muaj ib txhia raug cov thawj coj ntxias lawm xwb. Ces tom qab ntawd, Xatefanau tuag lawm.

Thaum muaj neeg ua phem rau koj, koj puas yuav ua phem rov pauj lawv, lossis thov kom Vajtswv ua phem rau lawv? Xatefanau thiab Yexus tsis ua li ntawd. Txawm tias luag ua phem rau nkawd los, nkawd ua zoo rau luag. Cia peb xyaum coj li nkawd thiab.