Koj Yeej Yuav Rov Qab Pom Cov Uas Tuag Lawm

1-3. Tus yeeb ncuab twg caum peb txhua leej txhua tus, thiab yog tias peb to taub tej uas phau Vajlugkub qhia yuav pab tau peb li cas?

MUAB ua piv txwv tias muaj ib tug yeeb ncuab limhiam heev caum koj. Tus yeeb ncuab ntawd muaj zog tshaj koj thiab khiav ceev tshaj koj. Koj paub tias nws yeej tsis hlub leejtwg li, rau qhov koj twb pom nws tua koj cov phoojywg los lawm. Txawm koj yuav khiav ceev npaum li cas los, koj yeej khiav tsis dim li. Tej zaum yuav ua rau koj tas kev cia siab. Tiamsis txawm muaj ib tug neeg los pab koj. Nws muaj zog tshaj tus yeeb ncuab ntawd, thiab nws cog lus tias nws yuav cawm koj. Qhov ntawd yuav ua rau koj zoo siab kawg li, puas yog?

² Tus yeeb ncuab ntawd caum peb txhua tus ib yam li ntawd. Zoo li peb tau kawm hauv Tshooj 6, phau Vajlugkub muab txojkev tuag piv rau ib tug yeeb ncuab. Peb tsis muaj ib tug yuav tawm tsam yeej lossis khiav dim txojkev tuag li. Coob leej twb pom tus yeeb ncuab no muab cov tibneeg uas lawv hlub tua pov tseg tas lawm. Tiamsis Yehauvas muaj hwjchim loj dua txojkev tuag. Nws yog tus los pab peb. Nws twb kov yeej tus yeeb ncuab no ntau zaus lawm. Nws cog lus tias nws yuav muab tus yeeb ncuab no rhuav tshem mus ib txhis. Phau Vajlugkub qhia li no: “Tus yeeb ncuab kawg uas yuav muab ua kom puam tsuaj yog txojkev tuag.” (1 Khaulee 15:26) Cov lus no zoo kawg li, puas yog?

³ Cia peb kawm seb tus yeeb ncuab uas yog txojkev tuag, los raug tibneeg li cas. Yog tias peb to taub qhov no ces peb yuav pom tias Yehauvas tej lus cog tseg muaj nqes heev. Tej lus cog tseg no yuav ua rau peb zoo siab. Yehauvas cog lus tias cov tuag yuav ciaj sawv rov los ua neej nyob. (Yaxaya 26:19) Tej lus cog tseg no pab tau kom peb muaj kev cia siab.

THAUM IB TUG NEEG UAS PEB HLUB TUAG LAWM

4. (1) Yexus paub tias mob siab heev thaum ib tug neeg tas sim neej. Ua li cas peb thiaj paub tias Yehauvas xav li ntawd thiab? (2) Yexus ntaus phoojywg nrog leejtwg?

⁴ Peb pom tias coob leej muaj cov neeg lawv hlub uas tau tas sim neej lawm. Lub sijhawm ntawd mob siab kawg li thiab ua rau yus tsis paub xyov yuav ua li cas. Zoo li yus yuav nyiaj tsis dhau tej kev nyuaj siab ntawd li. Thaum muaj tej ntawd, peb yuav tsum mus nrhiav kev nplig siab los ntawm Vajtswv Txojlus. (Nyeem 2 Khaulee 1:3, 4.) Phau Vajlugkub pab kom peb to taub tias Yehauvas thiab Yexus xav li cas txog txojkev tuag. Yexus coj ib yam nkaus li nws Leej Txiv. Yexus yeej paub tias mob siab npaum li cas thaum ib tug neeg uas yus hlub tas sim neej lawm. (Yauhas 14:9) Thaum Yexus mus hauv Yeluxalees, nws pheej mus xyuas Laxalau thiab Laxalau 2 tug muam, uas yog Maivliag thiab Matha. Lawv nyob ze lub zos Npethani. Yexus nrog lawv ua phoojywg zoo heev. Phau Vajlugkub hais tias: “Yexus hlub Matha thiab nws tus niam hluas thiab Laxalau heev.” (Yauhas 11:5) Tiamsis zoo li peb tau kawm hauv Tshooj 6, Laxalau txawm tuag lawm.

5, 6. (1) Thaum Yexus nrog Laxalau cov kwvtij thiab cov phoojywg uas tabtom quaj ntsuag, Yexus tau ua li cas? (2) Vim li cas qhov uas Yexus nyuaj siab quaj ntsuag ho txhawb tau peb?

⁵ Yexus xav li cas thaum nws tus phoojywg Laxalau tuag lawm? Phau Vajlugkub qhia tias Yexus mus saib Laxalau cov kwvtij thiab cov phoojywg. Lub sijhawm ntawd lawv tabtom nyuaj siab quaj ntsuag. Thaum Yexus pom lawv, nws mob siab kawg li. Phau Vajlugkub hais tias: “Yexus mob siab heev thiab nyuaj siab kawg.” Cov nqe Vajlugkub qhia tias tom qab ntawd, Yexus txawm pib “quaj.” (Yauhas 11:33, 35) Puas yog Yexus tsis muaj kev cia siab, nws thiaj quaj? Tsis yog. Yexus twb paub lawm tias nws yuav ua ib yam txujci zoo kawg nkaus. (Yauhas 11:3, 4) Tiamsis txawm li ntawd los, kev tuag tseem ua rau nws mob siab thiab tu siab kawg li.

⁶ Qhov uas Yexus nyuaj siab quaj ntsuag li ntawd txhawb tau peb li cas? Qhov ntawd qhia peb tias Yexus thiab nws Leej Txiv, Yehauvas, ntxub txojkev tuag kawg li. Vajtswv Yehauvas yeej muaj hwjchim tawm tsam thiab kov yeej tus yeeb ncuab no! Cia peb kawm seb Vajtswv yuav pub hwjchim rau Yexus los ua dabtsi.

“LAXALAU’E, CIA LI TAWM LOS”

7, 8. Thaum Laxalau tuag lawm, cov tibneeg puas muaj vam tias lawv yuav rov pom Laxalau dua, tiamsis Yexus tau ua dabtsi?

⁷ Lawv muab Laxalau log rau hauv ib lub qhov zeb. Yexus hais kom lawv muab daim lag zeb uas thaiv lub rooj ntxas tshem tawm. Tiamsis Matha hais tias kom tsis txhob tshem rau qhov Laxalau twb tuag tau 4 hnub lawm, tej zaum nws lub cev twb pib lwj lawm. (Yauhas 11:39) Rau ntawm tibneeg ces yeej tsis muaj kev cia siab li lawm.

⁸ Tom qab lawv muab daim lag zeb tshem tawm, Yexus hu nrov nrov tias: “Laxalau’e, cia li tawm los.” Ces txawm muaj li cas? “Tus tuag ntawd txawm tawm los.” (Yauhas 11:43, 44) Koj sim xav seb cov tibneeg ntawd zoo siab npaum li cas? Tag nrho cov tibneeg ntawd, tsis hais Laxalau cov kwvtij neej tsa, cov phoojywg, lossis neeg zej zog, puavleej paub tseeb tias Laxalau tuag lawm. Tiamsis zaum no, Laxalau ciaj sawv rov qab los lawm tiag. Nws tseem yog tib tug neeg qub. Tej zaum lawv yuav ntseeg tsis taus li. Peb paub tias thaum Laxalau sawv rov los, lawv yuav qawm lias nws zoo siab kawg li. Yog li ntawd, Yehauvas muaj hwjchim kov yeej txojkev tuag!

9, 10. (1) Yexus qhia li cas tias lub hwjchim tsa Laxalau sawv tsis yog los ntawm nws los? (2) Thaum peb nyeem txog tej zaj hauv phau Vajlugkub uas qhia txog thaum cov tuag sawv rov los, pab tau peb li cas?

⁹ Yexus yeej tsis tau hais tias yog nws lub hwjchim ua qhov txujci no. Ua ntej Yexus hu Laxalau tawm los, nws thov Vajtswv thiab qhia meej tias lub hwjchim tsa cov tuag sawv rov qab los yog los ntawm Yehauvas. (Nyeem Yauhas 11:41, 42.) Yehauvas tsis yog siv nws lub hwjchim los tsa cov tuag sawv zaum no xwb. Vajtswv Txojlus qhia txog 8 zaus ntxiv uas Vajtswv pub hwjchim los tsa cov tuag ciaj sawv rov qab los.a Thaum peb kawm txog tej zaj zoo li no ua rau peb zoo siab heev. Tej zaj no pab kom peb pom tias Vajtswv tsis xaiv leejtwg ntsej muag. Nws tsa cov laus cov hluas, pojniam txivneej, cov neeg Yixayee thiab lwm haiv neeg huvsi. Tej zaj zoo li no pab peb pom tias cov tibneeg muaj kev zoo siab kawg li! Zoo li thaum Yexus tsa ib tug mentxhais ciaj sawv rov los, nws niam nws txiv “phimhwj” zoo siab heev. (Malakau 5:42) Yehauvas pub lawv muaj kev zoo siab kawg li, lawv yeej yuav nco ntsoov mus li.

¹⁰ Peb paub tias thaum kawg cov uas Yexus tsa ciaj sawv rov los kuj tuag lawm thiab. Puas nkim Yexus lub sijhawm tsa lawv xwb? Tsis nkim li. Tej zaj hauv phau Vajlugkub no pab kom peb muaj kev cia siab. Peb kawm tau li cas los ntawm tej no?

KAWM TXOG COV UAS SAWV HAUV QHOV TUAG ROV QAB LOS

11. Zaj uas hais txog thaum Laxalau sawv rov qab los, pab kom peb pom tias Laj Lim Tswvyim 9:5 muaj tseeb li cas?

¹¹ Phau Vajlugkub qhia tias cov tuag “tsis paub dabtsi li lawm.” (Laj Lim Tswvyim 9:5) Cov tuag tsis ciaj sia thiab tsis mus nyob rau ib qho chaw qhov twg. Zaj uas qhia txog Laxalau pab peb pom tias muaj tseeb li ntawd tiag. Thaum Laxalau sawv rov los, nws puas tau qhia tias nws mus pom ntuj ceeb tsheej zoo li cas? Lossis nws puas hais rau cov tibneeg tias nws mus pom ntuj tawg hlawv txaus ntshai heev? Phau Vajlugkub yeej tsis qhia tias Laxalau tau hais txog tej ntawd li. Lub sijhawm uas Laxalau tuag tau 4 hnub ntawd, nws “tsis paub dabtsi li lawm.” Thaum Laxalau tuag, zoo ib yam li nws pw tsaug zog lawm xwb.​—Yauhas 11:11.

12. Ua li cas peb thiaj paub tseeb tias Yexus tsa Laxalau sawv rov qab los tiag?

¹² Peb kawm tau li cas ntxiv ntawm zaj uas qhia txog Laxalau? Peb kawm tau tias, txojkev sawv hauv qhov tuag rov qab los tsis yog ib zaj dab neeg, tiamsis yeej muaj tseeb tiag. Thaum Yexus tsa Laxalau sawv rov los, muaj tibneeg coob coob ua timkhawv pom. Txawm cov thawj coj uas ntxub Yexus los, kuj hais tsis tau tias Yexus tsis tau ua qhov txujci no. Lawv hais tias: “Peb yuav ua li cas, rau qhov tus no ua tej txujci tseem ceeb ntau heev?” (Yauhas 11:47) Coob leej mus xyuas tus txivneej uas Yexus tsa ciaj sawv rov los. Tom qab ntawd, muaj coob leej thiaj los ntseeg Yexus. Qhov uas Laxalau ciaj sawv rov los lawm ua pov thawj rau sawvdaws tias Yexus yeej yog tus uas Vajtswv txib los tiag. Tsis muaj leejtwg cav tau qhov pov thawj no. Yog li ntawd, Yudai cov thawj coj uas siab phem thiaj nrhiav kev los tua Yexus thiab Laxalau nkawd.​—Yauhas 11:53; 12:9-11.

13. Ua cas peb thiaj ntseeg tau tias Vajtswv yeej tsa tau cov tuag rov qab los tiag?

¹³ Puas tsim nyog peb ntseeg tias Vajtswv yuav tsa cov tuag sawv rov los tiag? Yeej tsim nyog peb ntseeg li ntawd, rau qhov Yexus tau qhia tias muaj ib hnub “txhua tus uas nyob hauv qhov ntxa” yuav sawv rov los. (Yauhas 5:28) Yehauvas yog tus tsim txhua yam uas muaj sia. Yog li ntawd, nws yeej pub tau txojsia rau cov uas tuag lawm. Peb yeej ntseeg tau li no. Tiamsis yuav kom nws tsa tau cov tuag nws yuav tsum nco tau tias tus neeg ntawd zoo li cas. Ua li Vajtswv puas nco qab cov neeg peb hlub uas tau tas sim neej lawm? Muab xav li no: Muaj tsheej plhom lub hnub qub saum nruab ntug uas peb suav tsis txheeb li, tiamsis Vajtswv paub txhua lub hnub qub lub npe huvsi! (Yaxaya 40:26) Yog li ntawd, Vajtswv Yehauvas yeej yuav nco tau txhua yam txog cov uas tau tas sim neej lawm. Nws yeej yuav tsa tau lawv rov los muaj txojsia dua.

14, 15. Raws li Yauj cov lus, Yehauvas puas xav tsa cov tuag rov qab los?

¹⁴ Yehauvas puas xav tsa cov tuag sawv rov qab los? Phau Vajlugkub qhia tias Yehauvas tos ntsoov lub sijhawm uas nws yuav tsa cov tuag sawv rov qab los. Muaj ib tug neeg ncaj ncees hu ua Yauj uas tau nug li no: “Yog neeg tuag lawm nws yuav rov muaj txojsia lov?” Thaum Yauj nug li no twb yog nws hais txog thaum uas nws tuag lawm, nws yuav tsum nyob hauv qhov ntxa tos txog thaum Vajtswv tsa nws sawv. Nws hais rau Yehauvas tias: “Koj yuav hu thiab kuv yuav teb koj, koj yuav xav tau tus uas koj txhais tes tsim.”​—Yauj 14:13-15.

¹⁵ Zoo ua luaj li, puas yog? Yehauvas yeej xav tsa cov tuag ciaj sawv rov qab los kawg li. Thaum peb paub li no txog Yehauvas mas nplig tau peb lub siab kawg li. Tiamsis yav tom ntej thaum Yehauvas tsa cov tuag sawv rov qab los, nws yuav tsa leejtwg, thiab nws yuav tsa lawv los nyob qhovtwg?

“TXHUA TUS UAS NYOB HAUV QHOV NTXA”

16. Vajtswv yuav tsa cov tuag sawv rov los nyob hauv ib qho chaw zoo li cas?

¹⁶ Thaum peb kawm hauv phau Vajlugkub txog cov uas tau sawv hauv qhov tuag rov los, yuav pab peb pom tias yav tom ntej Vajtswv yuav tsa cov tuag sawv li cas thiab. Thaum ub Vajtswv tsa cov tuag sawv rov los, nws tsa lawv los nyob hauv ntiajteb nrog lawv cov kwvtij phoojywg. Yav tom ntej los Vajtswv yuav ua ib yam li ntawd, tiamsis tseem yuav zoo tshaj ntawd. Zoo li peb tau kawm hauv Tshooj 3, Vajtswv lub ntsiab yog kom muab tag nrho lub ntiajteb hloov ua ib lub vaj kaj siab. Yog li ntawd, Vajtswv yuav tsis tsa cov tuag los nyob ib lub ntiajteb uas muaj kev tsov kev rog, kev tub sab tub nyiag, thiab kev mob kev nkeeg. Lawv yuav tau nyob mus ib txhis hauv lub ntiajteb no. Tibneeg yuav muaj kev thaj yeeb thiab kev zoo siab txhua qhov.

17. Vajtswv yuav tsa leejtwg sawv rov los?

¹⁷ Vajtswv yuav tsa leejtwg sawv rov los? Yexus hais tias “txhua tus uas nyob hauv qhov ntxa yuav hnov leej Tub [Yexus] lub suab thiab yuav tawm los.” (Yauhas 5:28, 29) Ib yam li ntawd, Qhia Tshwm 20:13 hais tias: “Dej hiavtxwv kuj tso cov uas tuag hauv hiavtxwv los, Txojkev Tuag thiab Tub Tuag Teb [lus Kili hais tias hai’des] kuj tso cov neeg uas tuag rau hauv los.” Lo lus Kili hai’des yog hais rau noob neej lub qhov tuag. (Mus saib zaj hu ua “Sheol Thiab Hades Yog Dabtsi?” hauv Cov Lus Qhia Ntxiv.) Lub qhov tuag yuav khoob lug cia. Tsheej plhom leej uas tau tuag rau hauv yuav tau ciaj sawv rov qab los ua neej nyob. Tus tubtxib Povlauj hais tias: “Cov ncaj ncees thiab cov tsis ncaj puavleej yuav sawv hauv qhov tuag rov los.” (Tubtxib Tes Haujlwm 24:15) Leejtwg muaj feem nrog 2 pab neeg uas Povlauj hais txog no?

18. Cov “ncaj ncees” uas yuav sawv rov qab los yog cov twg, thiab txojkev cia siab no pab tau koj li cas?

¹⁸ Cov “ncaj ncees” yog cov twg? Lawv yog cov tibneeg uas peb nyeem txog hauv phau Vajlugkub uas ua neej nyob ua ntej Yexus los rau hauv ntiajteb. Tej zaum koj yuav xav txog Nau-a, Aplahas, Xala, Mauxe, Luv, Exathaw, thiab tseem muaj coob leej ntau tus ntxiv. Lawv muaj kev ntseeg kawg li rau Vajtswv. Henplais tshooj 11 qhia txog cov pojniam thiab cov txivneej no ib txhia. Tsis tas li ntawd xwb, cov “ncaj ncees” kuj yog hais txog Yehauvas cov tub qhe uas tau tas sim neej rau peb tiam no thiab. Vim muaj txojkev cia siab tias Vajtswv yuav tsa cov tuag rov los, peb tsis tas ntshai kev ploj kev tuag.​—Henplais 2:15.

19. Cov neeg “tsis ncaj” yog cov twg, thiab Yehauvas pub lawv muaj sijhawm los ua dabtsi?

¹⁹ Tiamsis yuav ua li cas rau cov uas tsis teev tiam Yehauvas vim lawv tsis tau hnov txog nws? Cov neeg ntawd muaj tsheej plhom leej. Lawv yog cov neeg “tsis ncaj” uas Povlauj tau qhia txog. Vajtswv yeej yuav nco ntsoov lawv thiab. Lawv yuav tau sawv rov qab los thiab yuav muaj sijhawm los kawm txog tus tseem Vajtswv thiab los teev tiam nws. Lawv yuav muaj caij nyoog los koom nrog cov tibneeg ncaj ncees uas teev tiam Yehauvas. Lub caij ntawd yuav ntev ib txhiab xyoo. Lub sijhawm ntawd yuav zoo kawg li. Phau Vajlugkub muab lub caij ntawd hu ua Hnub Txiav Txim.b

20. Lub hav Gehenna yog dabtsi thiab leejtwg yuav mus rau hauv?

²⁰ Puas yog txhua leej txhua tus uas tau ua neej nyob yav tas los yuav tau sawv rov qab los? Tsis yog. Phau Vajlugkub qhia tias muaj ib txhia neeg ua txhaum loj heev, Vajtswv twb txiav txim tias lawv tsis tsim nyog tau txojsia lawm. Vajtswv yuav tsis tsa cov ntawd ciaj sawv rov los. Yexus muab cov uas raug lub txim ntawd piv rau tej yam xuam pov tseg uas yav thaum ub cov Yudai muab pov hlawv rau ib lub hav hu ua Gehenna. Lub hav ntawd nyob sab nraum lub nroog Yeluxalees. (Luka 12:5) Thaum lawv muab tej yam xuam pov tseg hlawv rau lub hav ntawd, lawv yeej muab tsis tau rov los lawm. Lub sijhawm Yexus nyob, cov neeg tuag uas cov Yudai pom tias tsis tsim nyog muab log lossis tsis tsim nyog Vajtswv tsa sawv rov los, cov ntawd kuj raug pov rau hauv thiab. Tsis muaj leejtwg yuav mus muab tau lawv lub cev rov los lawm. Vajtswv saib cov neeg limhiam ib yam li ntawd. Txawm tias Yexus tau tes haujlwm los txiav txim rau cov ciaj thiab cov tuag los, Yehauvas yog Tus Txiav Txim uas loj tshaj. (Tubtxib Tes Haujlwm 10:42) Cov neeg uas Yehauvas txiav txim tias yog neeg limhiam thiab tsis kam hloov siab, nws yeej yuav tsis tsa sawv ib zaug li.

TSA SAWV MUS NYOB SAUM NTUJ CEEB TSHEEJ

21, 22. (1) Phau Vajlugkub qhia txog lwm txojkev sawv hauv qhov tuag rov qab los twg? (2) Leejtwg yog thawj tug uas sawv rov los muaj lub cev plig?

²¹ Phau Vajlugkub kuj qhia txog ib txojkev sawv rov los muaj lub cev plig saum ntuj ceeb tsheej. Tsuas muaj 1 zaj hauv phau Vajlugkub uas qhia txog qhov no xwb. Zaj ntawd yog hais txog thaum Yexus Khetos sawv rov los muaj sia.

²² Thaum Yexus los ua tibneeg hauv ntiajteb no, luag tau muab nws tua pov tseg. Tiamsis Yehauvas tsis pub Nws tus Tub ncaj ncees nyob hauv lub qhov tuag. (Ntawv Nkauj 16:10; Tubtxib Tes Haujlwm 13:34, 35) Vajtswv tsa Yexus ciaj sawv rov los, tiamsis tsis yog tsa rov los ua ib tug tibneeg. Tus tubtxib Petus piav tias Vajtswv tsa Khetos sawv rov los muaj lub cev plig. (1 Petus 3:18, NW) Qhov no yog ib qho txujci zoo kawg li. Yexus ciaj sawv rov los ua ib tug plig muaj hwjchim kawg li! (Nyeem 1 Khaulee 15:3-6.) Yexus yog thawj tug uas ciaj sawv rov los muaj lub cev plig li no, tiamsis tseem yuav muaj ib co tom qab nws uas yuav tau ciaj sawv rov los muaj lub cev plig li ntawd thiab.​—Yauhas 3:13.

23, 24. Leejtwg yog cov uas muaj feem nrog Yexus pab yaj tsawg, thiab lawv muaj pes tsawg leej?

²³ Yexus paub tias tshuav tsis ntev, nws yuav rov mus saum ntuj ceeb tsheej. Yog li ntawd, Yexus thiaj hais rau cov uas raws nws qab tias nws yuav mus “tu chaw tseg” rau lawv. (Yauhas 14:2) Yexus muab cov uas yuav nrog nws mus nyob saum ntuj ceeb tsheej hu ua “pab nyuag yaj me me” lossis pab yaj tsawg. (Luka 12:32) Pab Khixatia tsawg tsawg no muaj pes tsawg leej? Hauv Qhia Tshwm 14:1, tus tubtxib Yauhas hais tias: “Kuv saib mas pom tus Menyuam Yaj [Yexus Khetos] sawv saum lub roob Xi-oo, thiab cov uas nrog nws ua ke muaj 144,000 leej uas muaj nws lub npe thiab muaj nws leej Txiv lub npe sau rau ntawm lawv hauv pliaj.”

²⁴ Cov tubtxib uas Yexus xaiv hauv ntiajteb no, thiab lwm cov Khixatia uas yuav mus saum ntuj muaj 144,000 leej. Lawv puavleej yuav sawv rov qab los muaj txojsia mus nyob saum ntuj ceeb tsheej. Thaum twg Vajtswv mam li tsa lawv sawv? Tus tubtxib Povlauj sau tias yuav muaj rau thaum Khetos ua Vajntxwv kav. (1 Khaulee 15:23) Peb tseem yuav kawm hauv Tshooj 9 tias peb twb nyob rau lub sijhawm ntawd lawm. Yog li ntawd, niaj hnub no tsuas tshuav tsawg tsawg leej ntawm pab 144,000 leej lawm xwb. Thaum cov ntawd tas sim neej ces Vajtswv yuav tsa lawv mus nyob saum ntuj ceeb tsheej tamsim ntawd. (1 Khaulee 15:51-55) Tiamsis noob neej feem coob yuav raug tsa sawv rov los ua neej nyob rau lub Vaj Kaj Siab hauv ntiajteb no.

25. Peb yuav kawm txog dabtsi nyob rau Tshooj 8?

²⁵ Yog li ntawd, Yehauvas yeej yuav kov yeej peb tus yeeb ncuab uas yog txojkev tuag. Kev tuag yuav raug rhuav tshem mus ib txhis li! (Nyeem Yaxaya 25:8.) Tiamsis tej zaum koj yuav xav tias, ‘Cov uas sawv rov los mus nyob saum ntuj ceeb tsheej yuav ua dabtsi xwb?’ Lawv yuav muaj feem nrog Vajtswv lub Nceeg Vaj zoo kawg nkaus saum ntuj ceeb tsheej. Peb tseem yuav kawm ntxiv txog lub tseem fwv ntawd nyob rau Tshooj 8.