Ua Li Cas Vajtswv Cia Muaj Kev Limhiam Thiab Kev Txom Nyem?

1. Vim li cas thiaj muaj kev limhiam?

Xatas tau dag ntxias noob neej, thiaj muaj tej kev limhiam tshwm los. Ua ntej Xatas ntxeev siab rau Vajtswv nws yog ib tug tubtxib saum ntuj uas zoo kawg nkaus; tiamsis nws nyob tsis ruaj “hauv qhov tseeb.” (Yauhas 8:44) Tsim nyog tibneeg pe hawm Vajtswv xwb. Tiamsis Xatas ntshaw kom tibneeg pe hawm nws. Xatas thiaj dag kom Eva txhob mloog Vajtswv lus. Adas kuj nrog Eva ntxeev siab rau Vajtswv thiab. Vim Adas tau txiav txim siab tsis mloog Vajtswv lus, noob neej thiaj raug kev txom nyem thiab kev ploj kev tuag.​—Nyeem Chiv Keeb 3:1-6, 19.

Thaum Xatas ntxias Eva ua txhaum, twb yog nws sawv tawm tsam Vajtswv lub hwjchim kav ntag. Niaj hnub no, tibneeg feem coob kuj tsis kam txais yuav Vajtswv txojkev kav. Phau Vajlugkub thiaj qhia tias Xatas yog “tus uas kav ntiajteb.”​—Nyeem Yauhas 14:30; 1 Yauhas 5:19.

2. Puas yog Vajtswv tsis txawj tsim tibneeg?

Thaum Vajtswv tsim cov tubtxib saum ntuj thiab tibneeg, lawv tsis muaj txim thiab tsis nyuaj rau lawv mloog Vajtswv lus. Txhua yam uas nws tsim tau yeej zoo kawg nkaus. (Kevcai 32:4, 5) Vajtswv tsim kom peb paub txiav txim seb peb yuav ua zoo los ua phem. Yog tias peb hlub Vajtswv tiag tiag, peb yuav txiav txim siab ua qhov zoo li nws siab nyiam.​—Nyeem Yakaunpau 1:13-15; 1 Yauhas 5:3.

3. Vim li cas Vajtswv ho cia muaj kev txom nyem los txog niaj hnub no?

Txij thaum noob neej tawm tsam Vajtswv hauv lub vaj Edee los, Yehauvas cia tibneeg kav tibneeg. Vim li cas? Nws ua li no kom sawvdaws pom tseeb tias, tibneeg txojkev kav pab tsis tau noob neej. (Laj Lim Tswvyim 7:29; 8:9) Tibneeg twb kav tau 6,000 xyoo los lawm, lawv kho tsis tau tej kev tsov kev rog, kev mob kev nkeeg, thiab kev nkhib kev nkhaus. Tag nrho tej no qhia tias tsuas yog Vajtswv txojkev kav, thiaj yuav pab tau noob neej xwb.​—Nyeem Yelemi 10:23; Khiav Dim 9:16.

Vajtswv txojkev kav yuav pab tau tibneeg lub neej. (Yaxaya 48:17, 18) Tsis ntev xwb Yehauvas yuav rhuav tshem tag nrho tibneeg tej kev nom kev tswv. Tsuas yog cov uas txais yuav Vajtswv txojkev kav thiaj tau nyob hauv lub ntiajteb no xwb.​—Yaxaya 11:9.​—Nyeem Daniyee 2:44.

Saib zaj yeeb yaj kiab Ua Li Cas Vajtswv Cia Muaj Kev Txom Nyem?

4. Vim li cas Vajtswv muaj lub siab ntev rau peb?

Vajtswv ua siab ntev rau peb, xwv peb thiaj qhia tau tias peb muaj lub siab xav teev tiam nws tiag. Xatas liam tias tibneeg tsuas teev tiam Yehauvas kom lawv tau koob hmoov xwb. Nws liam tias peb tsis hlub Vajtswv hauv nruab siab tuaj. Ua li koj puas ntseeg li ntawd? Yog tias koj coj lub neej li Vajtswv siab nyiam, qhov no yuav qhia tias koj nyiam Vajtswv txojkev kav thiab koj yeej hlub nws tiag.​—Nyeem Yauj 1:8-12; Paj Lug 27:11.

5. Peb yuav zwm rau Vajtswv txojkev kav li cas?

Yog tias peb zwm rau Vajtswv txojkev kav, peb yuav siv sijhawm los tshawb nrhiav Vajtswv Txojlus, peb thiaj paub pe hawm raws li Vajtswv siab nyiam. (Yauhas 4:23) Ib yam li Yexus, peb yuav tsum tsis txhob mus koom nrog kev nom kev tswv thiab kev tsov kev rog, thiaj qhia tias peb tsis tuaj Xatas tog.​—Nyeem Yauhas 17:14.

Xatas xav kom tibneeg koom tej kev phem kev qias. Yog li ntawd, thaum peb tsis kam ua tej ntawd, tej zaum peb cov kwvtij phoojywg yuav cem yuav thuam peb. (1 Petus 4:3, 4) Peb yuav tau txiav txim siab rau peb tus kheej. Peb puas yuav nrog cov uas hlub Vajtswv los tsis nrog? Peb puas yuav mloog Vajtswv tej kevcai los tsis mloog? Yog tias peb npuab siab rau Yehauvas tiag, ces yuav qhia tias, tej uas Xatas twv txog Vajtswv ntawd tsis muaj tseeb.​—Nyeem 1 Khaulee 6:9, 10; 15:33.

Vajtswv hlub tibneeg kawg nkaus li. Yog li ntawd, nws yeej yuav rhuav tej kev phem limhiam thiab kev txom nyem. Cov uas muaj kev ntseeg thiab zwm rau Vajtswv txojkev kav, yuav tau txojsia nyob mus ib txhis hauv ntiajteb no.​—Nyeem Yauhas 3:16.