Kide-oo Ntaus Yeej Cov Neeg Midee

Ntev mus ntev tuaj, haiv neeg Yixayee tso Yehauvas tseg zuj zus thiab mus pe hawm tej vajtswv cuav. Cov Midee thiaj tuaj tsim txom cov Yixayee tau 7 lub xyoos. Cov Midee tuaj lws cov Yixayee tej tsiaj txhu thiab muab lawv tej qoob loo ua puam tsuaj tag. Cov Yixayee mus nkaum hauv qhov zeb qhov tsua thiab nkaum pem tej roob. Lawv quaj thov Yehauvas pab. Yehauvas thiaj txib nws ib tug tubtxib saum ntuj los tshwm rau Kide-oo pom thiab hais rau nws tias: ‘Yehauvas tau xaiv koj los ua ib tug thawj tub rog siab loj siab tuab.’ Kide-oo teb tias: ‘Kuv twb tsis yog ib tug neeg tseem ceeb, kuv yuav ua li cas cawm tau cov neeg Yixayee?’

Ua li cas Kide-oo thiaj paub tias Yehauvas txib nws tiag? Kide-oo muab ib co plaub yaj tso rau hauv av thiab thov Yehauvas tias: ‘Yog thaum sawv ntxov cov plaub yaj ntub lwg tas tiamsis cov av qhuav qhawv, ces kuv yuav paub tias koj txib kuv mus cawm cov Yixayee tiag.’ Thaum tagkis, cov plaub yaj ntub lwg tas tiamsis av qhuav qhawv tsis ntub li. Kide-oo ho thov dua tias kom cov plaub yaj txhob ntub lwg es cia av ntub xwb. Tagkis kaj ntug kuj muaj raws li Kide-oo thov thiab. Zaum no Kide-oo thiaj paub tseeb tias Yehauvas txib nws tiag. Nws thiaj txhij tub rog mus ntaus cov Midee.

Yehauvas hais rau Kide-oo tias: ‘Kuv yuav pab koj ntaus yeej. Tiamsis koj cov tub rog coob dhau lawm, ntshai tsam cov Yixayee xav tias yog nej txhais tes cawm tau nej dim xwb. Hais kom cov uas ntshai rov mus tsev.’ Muaj 22,000 leej rov mus tsev, tshuav 10,000 leej xwb. Yehauvas hais tias: ‘Cov tub rog tseem tshuav coob heev. Coj lawv mus haus dej nram hav dej. Tseg cov uas tsa muag saib ib ncig thaum lawv haus dej nyob xwb.’ Muaj 300 leej xwb thiaj ua li no. Yehauvas cog lus tias tsuas yog tus puav nyuag no xwb thiaj yuav mus ntaus yeej cov Midee 135,000 leej tub rog.

Hmo ntawd, thaum ib tag hmo, Yehauvas hais rau Kide-oo tias: ‘Cia li sawv tsees mus ntaus cov Midee!’ Kide-oo muab cov tub rog ib leeg ib lub raj kub yaj thiab ib lub hub av uas muaj ib teg tsau nyob hauv. Nws hais rau lawv tias: ‘Nej saib kuv ua li cas, nej ua li ntawd.’ Kide-oo txawm tshuab raj kub yaj thiab tsoo lub hub av tawg thiab muab tes tsau thau los yoj. Peb puas leej tub rog kuj ua tib yam li Kide-oo ua. Cov Midee pab tub rog ntshai tshee hnyo khiav zom zaws. Midee cov tub rog yoob tag lawv thiaj rov sib tua tuag tas. Yehauvas pab cov Yixayee ntaus yeej kiag lawv tej yeeb ncuab lawm.