ZAJ KAWM 15

Qhia Li Koj Ntseeg Ruaj Nreeg

1 Thexalaunika 1:5

LUB NTSIAB LUS: Qhia kom luag pom tias koj muaj kev ntseeg ruaj nreeg rau qhov tseeb, thiab tej uas koj qhia yeej muaj nqes kawg li tiag.

Npaj txhij txhua. Ua tib zoo tshawb nrhiav koj zaj lus qhuab qhia ua ntej. Xav li no: Cov ntsiab tseem ceeb yog li cas? Puas tsim nyog peb ntseeg cov ntsiab no? Phau Vajlugkub ho txhawb cov ntsiab no li cas? Xyaum siv tej lus yooj yoojyim los piav tej ntsiab tob tob. Xav seb koj zaj lus qhia yuav pab tau lawv lub neej li cas. Koj yuav tsum thov Yehauvas pub lub hwj huam dawb huv pab koj.

Xyaum cev koj zaj lus qhuab qhia tom tsev ua ntej. Yog koj xyaum li no ces koj yuav cim tau cov ntsiab lus rau nruab siab, thiab yuav qhia tau npliag dua.
Hais tej lus uas qhia tias koj ntseeg. Thaum koj cev lus qhuab qhia tsis txhob qog tej ntaub ntawv xwb tiamsis qhia tawm hauv nruab siab tuaj. Siv tej lus uas qhia tias koj yeej ntseeg tej uas koj qhia ntawd tiag.—Yh. 3:3; Loos 8:38.
Kub siab lug qhia tawm hauv nruab siab tuaj. Tsa suab kom nrov sawvdaws thiaj hnov. Tsa qhov muag saib cov tibneeg uas koj qhia, tiamsis txhob ua rau lawv txaj muag.

Koj cov lus thiab koj lub suab yuav tsum qhia tias koj muaj kev ntseeg ruaj nreeg. Tiamsis txhob qhia zoo li cem luag lossis hais siab luag. Qhia kom muaj ceem tiamsis txhob yuam leejtwg. Yog koj kub siab lug qhia thiab hais lus mos lus muag yuav raug tibneeg siab dua.