ZAJ KAWM 19
Qhia Kom Raug Siab
Paj Lug 3:1
LUB NTSIAB LUS: Pab kom sawvdaws saib tej uas lawv tau hnov ntawd muaj nqes, thiab kom lawv coj lawv lub neej raws li lawv tau kawm.
XYAUM LI NO:
Pab kom tibneeg rov tshuaj lawv lub siab. Nug tej yam uas yuav ua rau lawv xav txog lawv tus kheej, kom lawv txawj tshuaj lawv lub siab.
Txhawb kom lawv mloog lus tawm hauv nruab siab tuaj. Txhawb kom tibneeg tshuaj seb yog vim li cas lawv thiaj mloog Vajtswv lus. Pab kom lawv pom tias tsim nyog peb mloog Vajtswv lus rau qhov peb hlub Vajtswv, hlub tibneeg, thiab peb saib phau Vajlugkub rau nqe. Qhia lawv tias phau Vajlugkub tsav tswvyim rau peb. Tsis txhob hais lus hnyav rau lawv lossis ua rau lawv txaj muag kom lawv lam mloog Vajtswv lus xwb. Tiamsis txhawb lawv lub zog thiab pab kom lawv zoo siab muab yam zoo tshaj plaws pub rau Yehauvas.
Pab kom lawv ntsia ntsoov Yehauvas. Qhia tias Vajtswv hlub peb nws thiaj muab phau Vajlugkub, nws tej kevcai, thiab tej hauv paus ntsiab lus los qhia peb. Tej ntawd qhia peb tias nws yog ib tug Vajtswv zoo li cas tiag. Pab kom lawv txawj xav txog Yehauvas thiab xav ua raws li nws siab nyiam.