ZAJ KAWM 21
Tab Tom Muab Txoj Xov Zoo Tshaj Tawm Li Cas?
Tsis ntev tom ntej no, Yehauvas yuav siv nws lub nceeg vaj los rhuav tshem tag rho peb tej teeb meem huv si mus. Txoj xov no zoo heev yeej tsim nyog txhua leej txhua tus paub txog. Yexus yeej xav kom cov uas raws nws qab muab txoj xov no qhia rau txhua leej txhua tus! (Mathais 28:19, 20) Yehauvas Cov Tim Khawv tau ua raws li Yexus sam hwm ntawd li cas?
1. Mathais 24:14 tab tom muaj tiav li cas niaj hnub no?
Yexus tau hais tias: “Txoj xov zoo txog Vajtswv txoj kev kav yuav raug muab tshaj tawm mus thoob plaws lub ntiaj teb.” (Mathais 24:14) Yehauvas Cov Tim Khawv yeej zoo siab hlo ua tes hauj lwm tseem ceeb no. Peb tab tom muab txoj xov zoo tshaj tawm thoob plaws lub qab ntuj ua tshaj li 1,000 tawm yam lus! Vim tes hauj lwm no ntau heev, peb yuav tau siv dag siv zog thiab ua tib zoo npaj. Tsis tas li ntawd xwb, yuav tsum muaj Yehauvas pab thiaj li yuav ua tiav.
2. Peb rau siab npaum li cas mus tshaj tawm rau tib neeg?
Peb mus qhia rau txhua qhov chaw uas muaj tib neeg. Peb kuj mus tshaj tawm ib lub tsev rau tsev zoo li cov ntseeg nyob thawj ib puas xyoo. (Tes Haujlwm 5:42) Vim peb mus qhia li no, ib lub xyoos twg peb thiaj qhia tau rau tsheej plhom leej. Peb kuj mus tshaj tawm rau ntawm tej chaw uas muaj neeg coob dua kev vim tib neeg tsis tshua nyob tsev. Peb nrhiav txhua lub sij hawm los nrog tib neeg tham txog Yehauvas thiab nws lub ntsiab.
3. Lub luag hauj lwm mus tshaj tawm txoj xov zoo yog leej twg lub?
Txhua tus tseem Khixatias yuav tsum mus qhia txoj xov zoo rau lwm tus. Peb saib tes hauj lwm no tseem ceeb kawg li. Peb mus tshaj tawm ntau npaum li peb ua tau vim peb paub tias yuav cawm tau tib neeg txoj sia. (Nyeem 1 Timaute 4:16.) Tsis muaj leej twg them peb ua tes hauj lwm no, rau qhov phau Vajlugkub hais tias: “Vajtswv pub dawb dawb rau nej mas nej cia li pub dawb dawb rau lwm tus.” (Mathais 10:7, 8) Txawm tsis yog txhua tus yuav txais yuav tej uas peb qhia los peb yeej tsis tso tseg vim peb mloog Yehauvas lus thiab xav ua rau nws zoo siab.
KAWM NTXIV
Kawm ntxiv seb Yehauvas Cov Tim Khawv rau siab npaum li cas thiaj tshaj tawm mus thoob qab ntuj thiab saib seb Yehauvas ho pab peb li cas.
Tshaj tawm mus thoob qab ntuj: (1) Teb Chaws Khauxitas Likas (Costa Rica), (2) Teb Chaws Yunathim Xatej (United States), (3) Teb Chaws Npe-nis (Benin), (4) Thaib Teb, (5) Lub Pov Txwv Yav (Yap), (6) Teb Chaws Xividees (Sweden)
4. Peb rau siab ntso qhia rau txhua tus
Yehauvas Cov Tim Khawv rau siab ntso tshaj tawm txoj xov zoo rau tib neeg txhua qhov. Saib zaj YEEB YAJ KIAB, thiab tham txog lo lus no.
Koj xav li cas txog qhov uas Yehauvas Cov Tim Khawv rau siab ntso mus tshaj tawm?
Nyeem Mathais 22:39 thiab Loos 10:13-15, thiab tham txog ob lo lus no:
Peb txoj kev mus tshaj tawm qhia tau li cas tias peb hlub peb cov neeg zej zog?
Yehauvas xav li cas rau cov uas mus tshaj tawm txoj xov zoo?—Saib nqe 15.
5. Peb nrog Vajtswv ua hauj lwm ua ke
Muaj ntau zaj uas qhia tias Yehauvas yog tus coj peb txoj hau kev mus tshaj tawm. Piv txwv li no, muaj ib hnub thaum tav su ib tug kwv tij nyob teb chaws Nus Xivleem (New Zealand) hu ua Povlauj ntsib ib tug poj niam thaum nws mus tshaj tawm ib lub tsev rau ib lub. Tag kis ntawd tus poj niam tau tuav Yehauvas lub npe thov kom muaj ib tug tuaj xyuas nws. Povlauj hais tias, “Peb txoos teev tom qab ntawd, kuv txawm mus txog ntua ntawm nws taw rooj.”
Nyeem 1 Kauleethaus 3:9, thiab tham txog lo lus no:
Tej zaj uas tau muaj zoo li zaj nyob hauv teb chaws Nus Xivleem ho qhia li cas tias Yehauvas yog tus coj peb tes hauj lwm tshaj tawm?
Nyeem Tes Haujlwm 1:8, thiab tham txog lo lus no:
Vim li cas peb cheem tsum Yehauvas txoj kev pab kom thiaj ua tiav peb tes hauj lwm mus tshaj tawm?
Koj puas paub?
Txhua lub lim tiam ntawm peb tej kev sib txoos, peb muaj kev cob qhia kom pab peb txawj mus tshaj tawm. Yog tias koj twb tau mus koom tej kev sib txoos no dua lawd, koj ho xav li cas txog tej kev cob qhia uas peb muaj no?
6. Peb mloog Vajtswv lo lus sam hwm kom mus tshaj tawm
Nyob rau thawj ib puas xyoo, muaj neeg tawm tsam Yexus cov thwj tim kom txhob mus tshaj tawm. Lawv thiaj yuav tau mus “hais plaub ntug . . . txheem txoj xov zoo” kom lawv muaj cai mus tshaj tawm. (Filipis 1:7) Yehauvas Cov Tim Khawv ua tib yam li ntawd niaj hnub no thiab.a
Nyeem Tes Haujlwm 5:27-42, thiab tham txog lo lus no:
Vim li cas peb yuav tsis tso tseg mus tshaj tawm?—Saib nqe 29, 38, thiab 39.
TEJ TUG YUAV NUG TIAS: “Vim li cas Yehauvas Cov Tim Khawv thiaj mus ib lub tsev rau ib lub?”
Koj yuav teb li cas?
KOJ KAWM TAU DAB TSI
Yexus sam hwm kom cov raws nws qab mus tshaj tawm txoj xov zoo rau txhua haiv neeg. Yehauvas pab nws cov tib neeg ua tes hauj lwm no.
Rov Tham Dua
Tau muab txoj xov zoo tshaj tawm mus thoob qab ntuj li cas?
Peb txoj kev mus tshaj tawm qhia tau li cas tias peb hlub peb cov neeg zej zog?
Koj puas xav tias peb yuav muaj kev zoo siab thaum peb mus tshaj tawm? Vim li cas koj xav li ntawd?
TSHAWB NTXIV
Saib seb Yehauvas Cov Tim Khawv mus tshaj tawm rau hauv tej nroog loj li cas.
Tshaj Tawm Ntawm Tej Chaw Uas Muaj Neeg Coob Dua Kev Hauv Paslis (5:11)
Yehauvas Cov Tim Khawv tau ua li cas los pab cov neeg thoj nam?
Mloog ib tug poj niam piav seb vim li cas nws ho zoo siab muab nws lub neej mus tshaj tawm txoj xov zoo.
Kawm ntxiv txog tej plaub ntug uas peb hais yeej kom peb thiaj tshaj tawm tau txoj xov zoo.
a Vajtswv yog tus sam hwm kom peb mus tshaj tawm. Vim li ntawd, Yehauvas Cov Tim Khawv thiaj tsis tos tej nom tej tswv tso caij es lawv mam mus tshaj tawm txoj xov zoo.