Kev Cai Raus Dej Yog Ib Lub Hom Phiaj Zoo Kawg Nkaus!

Yexus qhia tias cov Khixatias yuav tau ua kev cai raus dej. (Nyeem Mathais 28:19, 20.) Tiam sis ua kev cai raus dej yog ua li cas tiag? Thiab ib tug yuav tau ua li cas nws thiaj yuav ncav cuag lub hom phiaj ntawd?

1. Ua kev cai raus dej yog ua li cas tiag?

“Ua kev cai raus dej” yog rho ntawm lo lus Kilis uas txhais tias “muab raus” hauv dej. Thaum Yexus ua kev cai raus dej, yeej muab nws raus kiag rau hauv tus Dej Yaladees, ces nws mam “sawv hauv dej los.” (Malakaus 1:9, 10) Tib yam li ntawd, thaum cov tseem Khixatias ua kev cai raus dej los yeej muab lawv raus kiag los sis ploj ntais rau hauv dej thiab.

2. Thaum ib tug ua kev cai raus dej qhia tau li cas?

Thaum ib tug ua kev cais raus dej, nws qhia tias nws twb muab nws lub neej cob rau Vajtswv Yehauvas lawm. Nws muab nws lub neej cob rau Vajtswv Yehauvas li cas? Ua ntej ua kev cai raus dej, nws yuav tau thov Yehauvas thiab qhia rau Yehauvas tias nws yuav teev tiam Yehauvas mus ib txhis. Nws cog lus tias nws yuav pe hawm Yehauvas tib leeg xwb thiab yuav siv nws lub neej los ua Yehauvas tes hauj lwm. Nws yuav tau txiav txim siab “tsis txhob ua raws li nws lub siab nyiam” tiam sis ua raws li Yexus tej lus qhia thiab Yexus tus qauv. (Mathais 16:24) Qhov uas nws muab nws lub neej cob rau Yehauvas thiab ua kev cai rau dej qhib tau txoj hau kev rau nws los nrog Yehauvas thiab cov uas pe hawm Yehauvas sib raug zoo.

3. Ua ntej ib tug ua tau kev cai raus dej, nws yuav tau ua li cas?

Ua ntej koj ua kev cai raus dej, koj yuav tau xub kawm txog Yehauvas kom koj muaj kev ntseeg rau nws. (Nyeem Henplais 11:6.) Thaum koj yim huab paub thiab ntseeg Yehauvas, ces koj yim huab hlub nws. Thaum ntawd, koj yuav xav mus qhia rau lwm tus txog nws thiab yuav xav ua koj lub neej raws li nws tej kev cai. (2 Timaute 4:2; 1 Yauhas 5:3) Thaum ib tug ua nws lub neej “raws li Vajtswv lub siab nyiam thiab niaj hnub ua tej uas haum Vajtswv siab,” ces nws yuav xav muab nws lub neej cob rau Vajtswv thiab ua kev cai rau dej.​—Kaulauxais 1:9, 10.a

KAWM NTXIV

4. Qhov uas Yexus ua kev cai raus dej pab tau peb li cas?

Mus nyeem Mathais 3:13-17 txog qhov uas Yexus ua kev cai raus dej, thiab tham txog cov lus no:

• Yexus puas yog ib tug me nyuam mos ab thaum nws ua kev cai raus dej?

• Nws ua kev cai raus dej li cas? Puas yog cia li muab dej nchos rau nws xwb?

Tom qab Yexus ua kev cai raus dej tas, nws txawm pib ua tes hauj lwm tshwj xeeb uas Vajtswv tau muab rau nws ua hauv ntiaj teb no. Nyeem Luka 3:21-23 thiab Yauhas 6:38, thiab tham txog lo lus no:

• Tom qab Yexus ua kev cai raus dej, nws muab tes hauj lwm twg tso ua ntej hauv nws lub neej?

5. Koj yeej ncav cuag lub hom phiaj ua kev cai raus dej

Thaum thawj, tej zaum yeej tsis yooj yim rau koj muab koj lub neej cob rau Vajtswv thiab ua kev cai raus dej. Txawm li ntawd los, yog koj rau siab ntso kawm ces yuav pab tau koj txiav txim siab ua li ntawd. Yog xav paub txog ib co uas tau txiav txim siab ua li ntawd, saib zaj YEEB YAJ KIAB.

YEEB YAJ KIAB: Nrog Yehauvas Sib Raug Zoo (1:11)

Nyeem Yauhas 17:3 thiab Yakaunpaus 1:5, thiab tham txog lo lus no:

• Muaj dab tsi pab ib tug twg kom nws npaj txhij ua tau kev cai raus dej?

1. Peb muab peb lub neej cob rau Yehauvas thaum peb qhia rau nws tias peb xav teev tiam nws mus ib txhis

2. Thaum peb ua kev cai raus dej, peb qhia rau cov uas tuaj saib tias peb twb muab peb lub neej cob rau Vajtswv lawm

6. Thaum peb ua kev cai raus dej, peb los koom nrog Yehauvas tsev neeg

Thaum peb ua kev cai raus dej, peb nrog Yehauvas tsev neeg thoob qab ntuj sib koom siab ua ke. Txawm peb nyias los nyias ib lub teb chaws thiab nyias yog nyias ib haiv neeg los, peb puav leej koom tib txoj kev ntseeg thiab coj tib co kev cai. Nyeem Ntawv Nkauj 25:14 thiab 1 Petus 2:17, thiab tham txog lo lus no:

• Kev cai raus dej pab tau ib tug txoj kev sib raug zoo nrog Yehauvas thiab cov uas pe hawm nws li cas?

KOJ KAWM TAU DAB TSI

Yexus tau qhia tias cov Khixatias yuav tau ua kev cai raus dej. Yuav kom ua tau li no, nws yuav tsum muaj kev ntseeg, coj Yehauvas tej kev cai, thiab cob nws lub neej rau Yehauvas.

Rov Tham Dua

• Ua kev cai raus dej yog ua li cas, thiab vim li cas ho tseem ceeb?

• Thaum ib tug ua kev cai raus dej qhia tau li cas?

• Ua ntej yus cob yus lub neej rau Vajtswv thiab ua kev cai raus dej, yus yuav tau ua dab tsi?

TSHAWB NTXIV

Mus kawm seb ua kev cai raus dej yog ua li cas tiag.

“Ua Kev Cai Raus Dej Yog Ua Li Cas Tiag?” (Nyeem hauv jw.org/hmn)

Mus saib seb ib tug yuav tau ua tej twg ua ntej nws ua tau kev cai raus dej.

“Ua Kev Cai Raus Dej Vim Koj Hlub Yehauvas” (Phau Tsom Faj lub 3 Hlis xyoo 2020)

Nyeem txog ib tug txiv neej seb vim li cas nws ho txiav txim siab ua kev cai raus dej.

“Nkawd Xav Kom Kuv Pom Qhov Tseeb Kuv Tus Kheej” (Phau Tsom Faj lub 2 Hlis tim 1 xyoo 2013)

Xav seb vim li cas ua kev cai raus dej ho yog ib lub hom phiaj zoo thiab yuav ua li cas koj thiaj npaj tau ua li ntawd.

“Kuv Yuav Ua Kev Cai Raus Dej Los Tsis Ua?” (Kev Pab Rau Cov Hluas, Phau 2 Tshooj 37)