Phau Vajlugkub Hais Li Cas Txog Cov Muaj Txij Nkawm Thiab Tsis Muaj?

Muaj ib txhia neeg hais tias tus uas tsis muaj txij nkawm tsis muaj neej nrog luag ua thiab tsis muaj kev zoo siab. Tiam sis kuj tsis yog li ntawd, rau qhov tsis yog txhua tus uas muaj txij nkawm txawm yuav muaj kev zoo siab los sis txhua tus uas tsis muaj yuav tsis muaj kev zoo siab. Qhov tseeb tiag ces phau Vajlugkub hais tias tus muaj txij nkawm thiab tsis muaj los puav leej yog koob hmoov los ntawm Yehauvas.

1. Tus uas tsis muaj txij nkawm muaj dab tsi zoo rau nws?

Phau Vajlugkub hais tias: ‘Tus uas yuav tus ntxhais uas nws qhaib lawm, nws ua tau zoo tiam sis tus uas tsis yuav poj niam tseem haj yam ua tau zoo dua thiab.’ (Nyeem 1 Kauleethaus 7:32, 33, 38.) Vim li cas tus tsis muaj txij nkawm ho ua tau zoo dua? Vim nws tsis muaj ib tug txij nkawm rau nws txhawj txog ces nws muaj kev ywj pheej dua thiab ua tau ntau yam dua rau Yehauvas. Xws li, yog nws xav mus tshaj tawm txawv teb chaws los yooj yim dua rau nws mus. Qhov tseem ceeb tshaj yog nws muaj sij hawm ntau dua los txhawb nws txoj kev sib raug zoo nrog Yehauvas.

2. Cov txij nkawm uas sib yuav raws kev cai muaj dab tsi zoo rau lawv?

Cov uas muaj txij nkawm los yeej muaj ntau yam zoo rau lawv thiab. Phau Vajlugkub hais tias “ob leeg zoo dua ib leeg.” (Tej Lus Qhia 4:9) Yeej muaj li no tiag rau cov txij nkawm uas ua lawv lub neej li Vajtswv Txoj Lus hais. Ob niam txiv uas sib yuav raws kev cai los sis muaj ntaub ntawv sib yuav raws li nom tswv tej kev cai sib cog lus tias nkawd yuav sib hlub thiab sib hwm mus li. Nkawd yuav muaj kev sib ntseeg siab thiab nkawd lub neej los yuav ruaj khov dua cov uas cia li los nyob ua ke xwb es tsis sib yuav. Nkawd cov me nyuam los yuav muaj kev zoo siab thiab tsis txhawj txog dab tsi.

3. Yehauvas xav li cas txog kev txij nkawm?

Thaum Yehauvas muab thawj tug txiv neej thiab poj niam los sib txis ua txij ua nkawm, nws hais tias: ‘Tus txiv neej thiaj tso nws niam thiab nws txiv tseg mus nrog nws tus poj niam nyob.’ (Chivkeeb 2:24) Yehauvas xav kom ob niam txiv sib hlub thiab nyob ua ke mus tas nkawd sim neej. Nkawd tsuas sib nrauj tau thaum nkawd ib tug mus deev lwm tus lawm xwb. Thaum muaj li no ces tsuas yog tus uas tsis txhaum xwb thiaj li muaj cai nrauj los sis tsis nrauj nws tus txij nkawm.a (Mathais 19:9) Yehauvas tsuas pub cov Khixatias muaj ib tug txij nkawm xwb, nws tsis pub muaj ntau tus poj niam los sis ntau tus txiv.​—1 Timautes 3:2.

KAWM NTXIV

4. Cov uas tsis muaj txij nkawm kav tsij rau siab teev tiam Yehauvas

Yexus hais tias tus uas tsis muaj txij nkawm los kuj yog koob hmoov los ntawm Yehauvas los. (Mathais 19:11, 12) Nyeem Mathais 4:23 thiab tham txog lo lus no:

• Qhov uas Yexus tsis muaj poj niam pab tau nws mus pab lwm tus thiab teev tiam nws Leej Txiv li cas?

Cov Khixatias uas tsis muaj txij nkawm kuj siv tau lawv lub neej los ua ib yam li Yexus thiab. Saib zaj YEEB YAJ KIAB thiab tham txog lo lus no:

YEEB YAJ KIAB: Cov Tsis Muaj Txij Nkawm Uas Muab Siab Npuab Yehauvas (3:11)

• Cov Khixatias uas tsis muaj txij nkawm yuav siv lawv lub neej kom muaj nqis li cas?

Koj puas paub?

Phau Vajlugkub tsis hais tias peb yuav tsum muaj pes tsawg xyoo peb mam yuav txij nkawm. Tiam sis phau Vajlugkub txhawb kom peb tos txog thaum muaj hnub nyoog lawm thiab tsis ntshaw ua hluas lawm mam li muaj txij nkawm mas yuav zoo dua.​—1 Kauleethaus 7:36.

5. Ua zoo xaiv koj tus txij nkawm

Qhov uas koj xaiv koj tus txij nkawm yog ib qho uas tseem ceeb tshaj plaws hauv koj lub neej. Nyeem Mathais 19:4-6, 9 thiab tham txog lo lus no:

• Vim li cas ib tug Khixatias yuav tsum tsis txhob maj thiab lam tau lam yuav txij nkawm?

Phau Vajlugkub yuav pab kom koj txawj xaiv tus txij nkawm zoo. Thiab qhov tseem ceeb tshaj yog xaiv tus uas hlub Yehauvas.b Nyeem 1 Kauleethaus 7:39 thiab 2 Kauleethaus 6:14 ces tham txog ob lo lus no:

• Vim li cas peb thiaj yuav tsum yuav ib tug uas hlub Yehauvas xwb?

• Koj sim xav seb, Yehauvas yuav xav li cas yog hais tias peb mus yuav ib tug uas tsis hlub nws los ua txij nkawm?

6. Saib kev txij nkawm muaj nqis ib yam li Yehauvas saib

Cov Ixayees thaum ub, muaj ib txhia txiv neej lam tau lam nrauj lawv tus poj niam. Nyeem Malakis 2:13, 14, 16 thiab tham txog lo lus no:

• Vim li cas Yehauvas thiaj ntxub txoj kev sib nrauj uas tsis ncaj ncees?

Saib zaj YEEB YAJ KIAB thiab tham txog lo lus no:

YEEB YAJ KIAB: Kev Txij Nkawm Yog Mus Tas Ib Sim (4:30)

• Yog koj tus txij nkawm tsis teev tiam Yehauvas, koj yuav ua li cas neb ob niam txiv thiaj muaj kev zoo siab thiab ua neej nto ntsis?

7. Ua neb lub neej raws li Yehauvas txoj kev cai rau cov txij nkawm

YEEB YAJ KIAB: Peb Yeej Ua Tau Txij Nkawm Raws Li Yehauvas Txoj Kev Cai (4:14)

Nyeem Henplais 13:4 thiab tham txog lo lus no:

• Koj puas xav hais tias peb yeej ua tau li Yehauvas txoj kev cai rau cov txij nkawm?

Thaum cov Khixatias sib yuav los sis sib nrauj, Yehauvas xav kom lawv ua kom muaj ntaub muaj ntawv raws li nom tswv tej kev cai. Nyeem Titus 3:1 thiab tham txog lo lus no:

• Yog koj muaj txij nkawm, neb puas tau ua ntaub ntawv sib yuav raws li nom tswv tej kev cai?

KOJ KAWM TAU DAB TSI

Cov muaj txij nkawm thiab cov tsis muaj los puav leej yog koob hmoov los ntawm Yehauvas. Yog lawv ua li Yehauvas lub siab nyiam ces lawv yuav muaj kev zoo siab thiab txaus siab rau lawv lub neej.

Rov Tham Dua

• Tus uas tsis muaj txij nkawm yuav ua nws lub neej kom muaj nqis li cas?

• Vim li cas phau Vajlugkub thiaj hais tias peb yuav tsum yuav tus uas teev tiam Vajtswv xwb?

• Phau Vajlugkub hais tias thaum twg peb thiaj li muaj cai nrauj peb tus txij nkawm?

TSHAWB NTXIV

“Yuav tus uas ntseeg Vajtswv xwb” yog txhais li cas tiag?

“Tej Uas Peb Xav Paub” (Phau Tsom Faj lub 7 Hli tim 1 xyoo 2004)

Saib ob zaj yeeb yaj kiab no los pab koj thaum koj nyiam ib tug los sis xav yuav ib tug twg ua txij nkawm.

Nrhiav Txij Nkawm (11:53)

Saib seb vim li cas ib tug kwv tij thiaj hais tias tej uas Yehauvas muab rau nws muaj nqis tshaj tej uas nws muab tso tseg lawm.

Kuv Vam Tias Nws Yuav Kawm Vajlugkub (1:56)

Tus uas xav nrauj los sis xav sib cais ntawm nws tus txij nkawm yuav tau ua zoo xav txog dab tsi ua ntej tso?

“Saib Taus ‘Yam Uas Vajtswv Muab Lo Tsheej Xeeb Ua Ke’” (Phau Tsom Faj lub 12 Hlis xyoo 2018)