“Ua Siab Ntev Thev”
1 Vim hnub kawg rau Xatas lub sim ceeb no twb los ze lawm, yog li ntawd, tseem ceeb heev rau peb “ua siab ntev thev” tos hnub uas Yehauvas los cawm peb. Tseem ceeb heev rau peb ua siab ntev thev, rau qhov Xatas thiab nws cov dab siv ntau yam los ntxias kom peb siv peb lub sijhawm mus nrhiav tej uas peb ntshaw es peb thiaj tsis muaj sijhawm mus txhawb Yehauvas lub hwjchim kav. Xatas ua li no los ntxias kom peb qaug lossis kom txhob kub siab ua Yehauvas tes num. (Yknp. 5:7, 8; Mth. 24:13, 14) Peb yuav ua siab ntev thev rau txojke twg?
2 Tswj Peb Tus Kheej: Peb yuav tau tswj peb tus kheej, thaum peb mus qhia Vajlugkub es raug kev tsim txom lossis kev tawm tsam. Thaum peb tswj tau peb tus kheej lawd, peb yuav tsis ntshai lossis ua siab me thaum tibneeg cem peb lossis hais lus phem rau peb. (1Pt. 2:23) Yog peb tswj tau peb tus kheej, peb yuav tsis hais tej yam uas tsis zoo txog cov tibneeg uas tsis nyiam lossis ntxub tes haujlwm uas peb ua, rau qhov yog peb hais tej lus ntawd tsuas yuav txo tau peb thiab cov uas nrog peb lub zog xwb.
3 Ua Siab Ntev Tiag: Peb yuav tau ua siab ntev tiag rau cov uas xav kawm Vajlugkub tiamsis pheej tsis nyob tsev thaum peb rov mus xyuas. Tib yam li ntawd, peb yuav tau ua siab ntev tiag rau cov uas tsis tshua rau siab kawm Vajlugkub nrog peb. Yog peb ua siab ntev tiag, peb yuav pab tau coob tus los teev tiam Yehauvas. (Klt. 6:9) Muaj ib tug muam tau rov mus xyuas ib tug pojniam ntau zaus nws thiaj li kawm Vajlugkub. Thawj 5 zaug uas tus muam rov mus xyuas tus pojniam, nws tsis khoom kawm Vajlugkub rau qhov nws muaj ntau yam ua. Zaum 6 uas tus muam rov mus, los ib kob nag xob nag cua ua rau nws ntub tag thiab thaum mus txog los tus pojniam tseem tsis nyob tsev lawm thiab. Txawm li ntawd los, tus muam tsis tso tseg, nws tseem rov mus xyuas tus pojniam ntawd ib zaug ntxiv. Zaum no tus muam kuj mus ntsib tus pojniam nyob tsev thiab tus pojniam los kuj npaj siab kawm Vajlugkub. Tus pojniam kawm tau zoo heev, tsis ntev xwb, tus pojniam tau muab nws lub neej cob rau Yehauvas ua nws ib tug timkhawv.
4 Peb yeej paub tias Yehauvas hnub yeej yuav los raws sijhawm. Cia peb ua siab ntev thev tos hnub ntawd rau qhov Yehauvas ua siab ntev kom txhua tus ntxeev dua siab tshiab es los teev tiam nws. (Hnpk. 2:3; 2Pt. 3:9-15) Peb yuav tau ua siab ntev thev li Yehauvas es rau siab ntso ua nws tes haujlwm tsis txhob tso tseg. Cia li “muaj kev ntseeg thiab ua siab ntev thev” Yehauvas yeej yuav muab nqe zog rau koj vim koj rau siab ntso ua nws tes haujlwm.—Hnpl. 6:10-12.