Zaj 2—Xyaum Qhia Kom Tus Kawm Vajlugkub Loj Hlob
Npaj Ua Ntej Koj Kawm Vajlugkub Nrog Ib Tug Twg
1 Thaum peb kawm Vajlugkub nrog ib tug neeg twg, tsis yog peb tham ib nqe zuj zus thiab nthuav Vajlugkub los nyeem xwb. Peb yuav tsum ua tib zoo npaj thiab xav txog tus neeg ntawd, peb thiaj qhia raug nws siab.—P.L. 15:28.
2 Yuav Npaj Li Cas: Peb yuav tsum xub thov Yehauvas txog tus neeg uas kawm Vajlugkub ntawd, seb nws cheem tsum tej yam twg. Thov Yehauvas pab kom koj qhia Vajlugkub raug nws siab. (Khx. 1:9, 10) Yuav kom koj qhia raug lub ntsiab, siv sijhawm los xav seb zaj uas neb yuav kawm ntawd hu li cas, cov ntsiab me yog li cas, thiab muaj tej duab zoo li cas. Xav seb, ‘Lub hom phiaj ntawm zaj no yog dabtsi?’ Yog tias koj ua li no, koj yuav qhia tau cov ntsiab uas tseem ceeb xwb.
3 Ua tib zoo kawm ib nqe zuj zus tuaj. Nrhiav cov lus teb rau txhua lo lus nug, thiab kos cov lus tseem ceeb xwb. Xav seb cov nqe Vajlugkub txhawb lub ntsiab li cas, thiab npaj seb yuav nyeem cov nqe Vajlugkub twg thaum neb kawm ua ke. Kuj zoo rau koj muab tej yam uas tseem ceeb sau rau ntawm ntug ntawv. Tus uas kawm yuav tsum nkag siab tias txhua yam uas neb kawm ua ke yog rho los ntawm Vajtswv Txojlus.—1Thxk. 2:13.
4 Xav Txog Tus Uas Kawm: Thaum koj tab tom npaj, tseem ceeb rau koj ua tib zoo xav txog tus neeg uas koj qhia. Xav seb thaum neb kawm ua ke nws kheev nug txog tej yam twg, thiab yuav nyuaj rau nws nkag siab tej ntsiab lus twg. Thaum koj qhia koj yuav tsum yoog nws. Xav txog tej no: ‘Nws yuav tsum kawm txog dabtsi ntxiv nws thiaj loj hlob ntawm sab kev ntseeg? Kuv yuav qhia li cas thiaj raug nws siab?’ Koj yuav tau siv sijhawm los npaj, koj thiaj paub piav thiab ua lus piv txwv txog ib lub ntsiab lossis ib nqe Vajlugkub twg. (Nhm. 8:8) Tiamsis tsis txhob qhia txog tej yam tsis tshua phim lub ntsiab uas neb kawm txog ntawd. Tom qab neb kawm tas, siv sijhawm los nug seb nws nco tau dabtsi, nws thiaj cim tau cov ntsiab lus tseem ceeb.
5 Peb xyiv fab heev thaum muaj neeg tshiab los taug txojkev ncaj ncees thiab qhuas txog Yehauvas! (Flp. 1:11) Yuav kom muaj tau li no, peb yuav tsum ua tib zoo npaj ua ntej peb mus kawm Vajlugkub nrog tibneeg.