Tej Lus Nug Uas Peb Muaj
◼ Thaum peb tuaj kev sib txoos thiab mus tshaj tawm txoj xov zoo, puas zoo rau peb siv xov tooj ntawm tes? Tej hauv paus ntsiab lus twg pab tau peb txog qhov no?
“Muaj Caij Muaj Nyoog Rau Txhua Yam.” (L.Tsy. 3:1): Lub xov tooj ntawm tes, yog ib yam uas tibneeg siv tau los txuas lus nrog lwm tus. Tiamsis muaj tej lub sijhawm tsis zoo rau cov Khixatia siv lub xov tooj ntawm tes. Xws li lub caij peb sib txoos pe hawm Yehauvas yog lub caij peb kawm txog nws tej kevcai thiab ib leeg yuav txhawb ib leeg lub zog. (Kc. 31:12; Nt.Nk. 22:22; Loos 1:11, 12) Yog li ntawd, zoo rau peb muab peb cov xov tooj ntawm tes kaw thaum peb mus koom kev siv txoos. Tiamsis yog koj paub tias yuav muaj xwm, es luag yuav hu tuaj rau koj, zoo rau koj muab koj lub xov tooj tso kom yau thiaj tsis tab kaum lwm tus.
“Ua Txhua Yam Vim Yog Saib Rau Txoj Xov Zoo.” (1Khl. 9:23): Thaum peb mus qhia Vajlugkub puas zoo rau peb siv lub xov tooj ntawm tes? Tej lub caij kuj zoo thiab. Xws li thaum mus qhia ib lub qhov rooj rau ib lub, tej zaum tus kwvtij uas coj yuav hu mus nug seb sawvdaws mus qhia txog twg lawm. Tej zaum peb kuj kawm Vajlugkub nrog tej tug uas nyob deb heev. Kuj zoo siv lub xov tooj ntawm tes hu mus nug seb nws puas nyob tsev ua ntej. Yog peb nqa xov tooj nrog peb, nco ntsoov tsis txhob siv lub xov tooj, thaum peb tabtom nrog ib tug tswv tsev tham. (2Khl. 6:3) Lub sijhawm uas peb tos lwm tus mus qhia Vajlugkub rau ib tug twg lawm, tsis zoo rau peb hu lossis ntaus ntawv mus nrog lwm tus tham pem ua si. Tiamsis peb yuav tau siv lub sijhawm ntawd los txhawb cov kwvtij uas nrog peb qhia Vajlugkub ua ke, thiab zoo rau peb npaj seb peb yuav mus qhia li cas ntxiv.
Paub Xav Txog Lwm Tus. (1Khl. 10:24; Flp. 2:4): Ib txhia xav tias lawv mus tsis ncav txojkev sib txoos mus qhia Vajlugkub los tsis ua li cas; rau qhov lawv mam li hu mus nug seb sawvdaws mus qhia rau koog twg lawm xwb. Tiamsis tsis zoo rau peb xav li ntawd, rau qhov yog peb mus txog lig tus kwvtij yuav tau rov muab sawvdaws faib ib tom. Tej thaum peb kuj mus tau lig vim yog muaj lwm yam khuam cheem. Tiamsis, yog tias peb npaj kom mus ncav txojkev sib txoos mus qhia Vajlugkub txhua zaus, qhov no yuav qhia tias peb nco Yehauvas txiaj ntsig uas nws tau npaj tej kev sib txoos li no, thiab qhia tias peb xav txog tus kwvtij uas coj thiab txhua tus uas tuaj koom hnub ntawd.