Xyaum Cov Uas Cev Vajtswv Lus Tus Qauv—Yau-ee
1. Thaum peb mus tshaj tawm txoj xov zoo peb yuav tau xyaum Yau-ee tus qauv li cas?
1 Tus cev Vajtswv lus uas hu ua Yau-ee yog leejtwg? Hauv phau ntawv Yau-ee, Yau-ee tsuas qhia tias nws “yog Pethu-ee tus tub” xwb. (Y-ee 1:1) Qhov no qhia tias Yau-ee txo hwjchim heev, tsis xav txog nws tus kheej, tiamsis nws kub siab tshaj tawm Yehauvas txoj xov. Tib yam li ntawd, thaum peb ua Vajtswv tes num, peb yuav tsum qhuas thiab txhawb nqa Yehauvas thiab nws txojlus, tsis yog nrhiav kev los qhuas peb tus kheej. (1Khl. 9:16; 2Khl. 3:5) Thiab txoj xov uas peb tshaj tawm kuj pab tau peb muaj lub siab tuab. Tsis tas li ntawd xwb, Yau-ee zaj faj lem los kuj pab tau peb kub siab ua Vajtswv tes num thiab muaj kev cia siab.
2. Vim Yehauvas hnub twb los ze lawm, peb yuav tau ua dabtsi?
2 “Hnub Uas [Yehauvas] Teem Cia Los Ze Lawm.” (Yau-ee 1:15): Cov lus no twb sau muaj li 2,000 tawm xyoo los lawm, tiamsis tabtom muaj tshwm sim rau lub caij peb nyob no. Niaj hnub no peb yeej pom muaj li no tiag, rau qhov muaj kev phem kev qias nyob puag ncig peb. Thaum peb mus tshaj tawm txoj xov zoo los, muaj tibneeg tawm tsam thiab thuam peb. Tej no qhia tias peb nyob rau lub caij kawg lawm tiag. (2Tmt. 3:1-5; 2Pt. 3:3, 4) Vim peb twb nyob rau lub caij kawg lawm, peb yuav tau muab tes num tshaj tawm txoj xov zoo tso ua ntej hauv peb lub neej.—2Pt. 3:11, 12.
3. Ua li cas ho tseem ceeb rau peb rau siab ntso ua Vajtswv tes num ua ntej txojkev ceeblaj txom nyem loj kawg li los txog?
3 “[Yehauvas] Ua Lub Chaw Cawm Siav Rau Nws Haiv Neeg.” (Yau-ee 3:16): Thaum Yau-ee tham txog lub sijhawm uas lub ntuj thiab lub ntiajteb yuav ua zog kais yog nws tham txog Yehauvas txojkev txiav txim rau hnub uas muaj kev ceeblaj txom nyem loj kawg li. Peb zoo siab tias thaum txog hnub ntawd Yehauvas yuav cawm cov uas teev tiam nws ruaj nreeg. (QTsh. 7:9, 14) Yog peb rau siab ntso tshaj tawm txoj xov zoo, peb yuav pom Yehauvas siv nws lub dag lub zog pab peb. Qhov no yuav pab tau peb muaj kev ntseeg ces thaum kawg peb thiaj yuav nyiaj dhau txojkev ceeblaj txom nyem loj kawg li.
4. Vim li cas peb thiaj zoo siab xyiv fab ua neej tso siab plhuav rau yav tom ntej?
4 Tej txhia xav tias Yau-ee txoj xov yog ib txoj uas txaus ntshai heev, tiamsis txoj xov no pab tau Vajtswv cov tibneeg muaj kev cia siab kev cawm dim. (Y-ee 2:32) Yog li ntawd, cia peb ua li hais hauv Yau-ee 2:23 tias, “cia li zoo siab nawj, cia li xyiv fab rau hauv [Yehauvas] uas yog nej tus Vajtswv” es tso siab plhuav thiab kub siab lug tshaj tawm txoj xov zoo txog Vajtswv lub Nceeg Vaj.