Tej Lus Nug Uas Peb Muaj

◼ Thaum ib tug muam coj ib tug kwvtij nrog nws mus qhia ib tug uas kawm Vajlugkub ntawm taw rooj, puas tsim nyog nws kauv phuam?

Thaum ib tug muam qhia Vajlugkub rau ib tug tsis tu ncua lawd, nws yuav tsum kauv phuam yog tias nws coj ib tug kwvtij nrog nws mus. (1Khl. 11:3-10) Phau The Watchtower lub 7 Hli tim 15, 2002, sab 27 qhia tias: “Thaum kawm Vajlugkub uas teem muaj caij muaj nyoog thiab muaj ib tug ua tus qhia ces lub sijhawm ntawd yog ib feem ntawm tej kev sib txoos hauv lub koom txoos lawm. Yog tus qhia yog ib tug muam, es muaj ib tug kwvtij nyob ntawd, ces tus muam yuav tau kauv phuam.” Tus muam yuav tau ua li no tsis hais thaum qhia Vajlugkub hauv tsev, ntawm taw rooj, lossis lwm qhov chaw.

Tsis tas li ntawd xwb, yog tus muam qhia Vajlugkub rau ib tug ntawm taw rooj tsis cuag ncua ces nws tsis kauv phuam los tau txawm tias muaj ib tug kwvtij nrog nws mus. Thiab nws tsis tas kauv phuam thaum rov mus xyuas ib tug twg es mus qhia seb peb kawm Vajlugkub nrog tibneeg li cas lossis mus piav txog ib phau ntawv uas peb kheev siv qhia tibneeg. Cov tshaj tawm yuav tau ua zoo xyuas seb thaum twg thiaj li tsim nyog cov muam kauv phuam vim tsis paub tseeb tias cov kawm ntawm taw rooj puas xav kawm tiag, thiab vim yuav tau rov mus xyuas lawv ntau zaus xwv thiaj paub tias lawv xav kawm los tsis xav.