Daim Ntawv Caw
1. Thaum twg peb mam li mus caw tibneeg tuaj koom lub rooj sib txoos?
1 Yog koj yuav ua ib rooj mov loj rau koj cov phoojywg lossis cov txheeb ze tuaj noj uas yuav tau siv dag siv zog thiab nyiaj txiag ntau heev los npaj, koj yeej yuav kub siab heev mus caw lawv tuaj, puas yog? Lub rooj sib txoos rau xyoo no los kuj zoo tib yam li ntawd thiab, rau qhov lub koom haum tau siv dag siv zog thiab nyiaj txiag ntau heev los npaj. Peb lub lim tiam ua ntej lub rooj sib txoos, peb yuav muaj txoj koob hmoov mus caw tibneeg tuaj koom nrog peb. Yog li ntawd, yuav ua li cas es peb thiaj kub siab lug mus caw tibneeg tuaj koom?
2. Peb yuav ua li cas es peb thiaj kub siab lug mus caw tibneeg tuaj koom?
2 Yog peb ua tib zoo xav txog tej uas peb yuav mus hnov tom cov rooj sib txoos uas Yehauvas tau npaj los pab peb, ces peb yuav kub siab lug mus caw tibneeg tuaj koom. (Yxy. 65:13, 14) Peb yuav tsum nco ntsoov tias txhua xyoo peb mus caw tibneeg yeej muaj ib txhia tuaj koom peb tiamsis kuj muaj cov uas tsis tuaj thiab. (Mus saib lub ntsiab me “Tibneeg Yeej Tuaj.”) Txawm tibneeg yuav tuaj los tsis tuaj, nco ntsoov tias tes haujlwm uas peb mus caw tibneeg yuav qhuas tau Yehauvas thiab yuav pab tau lawv pom tias nws yog ib tug Vajtswv uas muaj lub siab dawb siab zoo.—Nt.Nk. 145:3, 7; QTsh. 22:17.
3. Peb yuav mus tseb daim ntawv caw li cas?
3 Cov txwj laus yuav tsum txiav txim seb lub koom txoos yuav tseb cov ntawv caw li cas thiaj tseb thoob txhua koog. Tsis tas li ntawd xwb, lawv yuav tsum txiav txim seb puas yuav muab cov ntawv caw tso rau cov uas tsis nyob tsev thiab seb puas yuav coj mus tseb rau thaum mus qhia Vajlugkub rau tom tej kev, tej kiab tej khw, thiab tej chaw uas muaj neeg coob dua kev. Thaum mus caw tibneeg rau Hnub 6 thiab Hnub 7, yog zoo tso, peb yuav tau tso Phau Tsom Faj rau tus tswv tsev thiab. Tom qab 3 lub lim tiam uas peb mus caw tibneeg tas lawm, peb yuav zoo siab heev uas peb kub siab mus caw tibneeg coob li coob tau tuaj koom lub rooj sib txoos uas Yehauvas tau npaj tseg.