Koj Yeej Txais Tau Vajtswv Tej Koob Hmoov Mus Ib Txhis

Vajtswv cog lus tias Anplahas tus xeeb ntxwv yuav coj koob hmoov los rau “txhua haivneeg uas nyob thoob ntiajteb.” (Chivkeeb 22:18) Ua li, tus xeeb ntxwv ntawd yog leejtwg?

Kwvlam li 2,000 xyoo dhau los lawm, Vajtswv pub hwjchim rau Yexus ua ntau yam txujci. Tej no qhia tias Yexus yog tus uas yuav coj koob hmoov los rau txhua haiv neeg raws li Vajtswv tau cog tseg rau Anplahas.​—Kalatias 3:14.

Thaum lwm tus pom tej txujci Yexus ua, lawv yeej paub tseeb tias nws yog tus Vajtswv xaiv. Tsis tas li ntawd, Vajtswv yuav siv Yexus los kho txhua yam kom tibneeg muaj kev zoo siab mus ib txhis. Cia peb tham seb tej txujci Yexus tau ua qhia li cas txog nws.

Yexus muaj siab mos muag, nws thiaj kho cov neeg mob.

Muaj ib zaug, ib tug txivneej mob ruas thov kom Yexus kho nws. Yexus tuav nkaus nws thiab hais tias: “Kuv txaus siab pab koj,” ces tamsim ntawd, tus txivneej tej ruas txawm zoo du lug lawm.​—Malakaus 1:40-42.

Yexus siab dawb siab zoo heev, nws thiaj pub mov rau coob leej noj.

Yexus tsis xav kom leejtwg tshaib nqhis. Yog li ntawd, nws thiaj ua txujci pub ncuav thiab ntses rau coob leej noj. (Mathais 14:17-21; 15:32-38) Tom qab sawvdaws noj tag, lawv tsau npo thiab tseem tshuav zaub mov seem ntau kawg li.

Yexus khuvleej tibneeg, nws thiaj tsa cov tuag sawv rov los.

Muaj ib tug poj ntsuam tib tug tub txawm cia li tag simneej lawm. Ces tsis muaj leejtwg los saib xyuas nws. Vim Yexus “hlub nws heev,” Yexus thiaj li tsa nws tus tub rov muaj sia dua.​—Lukas 7:12-15.