Nej Yuav Thov Vajtswv Li Cas?
Phau Vajlugkub hais tias Vajtswv Yehauvas yog tus “teb peb tej lus thov.” (Phau Ntawv Nkauj 65:2) Txawm peb yuav nyob rau rooj teb twg, qhov chaw twg los xij, txawm peb yuav thov ntsiag to lossis nrov nrov Vajtswv yeej hnov. Thaum peb thov Vajtswv, peb cia li thov li no: “Peb Leej Txiv.” (Mathais 6:9) Cia peb xyaum thov raws li hais nram no, Vajtswv thiaj mloog.
TUAV YEXUS LUB NPE THOV
“Kuv qhia tseeb rau nej hais tias yog nej tuav kuv lub npe thov ib yam dabtsi ntawm Leej Txiv, nws yeej yuav pub yam ntawd rau nej.”—Yauhas 16:23.
Yexus qhia tseeb tseeb rau peb tias Yehauvas tsis xav kom peb siv tej moj zeej, tej mlom, tej poj koob yawm txwv, tej yam nyob saum nruab ntug lossis hauv ntiajteb los thov. Yehauvas xav kom peb tuav Yexus Khetos lub npe thov nws xwb. Yog peb thov li no, peb saib taus Vajtswv tias nws cia Yexus los tuag theej tibneeg lub txhoj. Yexus hais tias: “Tsis muaj leejtwg mus cuag tau Leej Txiv, tsuas yog mus ntawm kuv mus xwb thiaj tau.”—Yauhas 14:6.
PHUA SIAB HLO RAU VAJTSWV
“Qhia nej lub siab rau nws.”—Phau Ntawv Nkauj 62:8.
Thaum peb thov Vajtswv Yehauvas, peb yuav tau txhob hais mus hais los lo qub lossis nyeem tej lus thov hauv ib phau ntawv. Yog peb xam tias muaj Vajtswv ces peb yuav thov tawm plaws hauv nruab siab tuaj.
THOV RAWS LI VAJTSWV LUB SIAB NYIAM
“Yog peb thov tej uas raws li Vajtswv lub siab nyiam, Vajtswv yeej yuav mloog peb tej lus thov.”—1 Yauhas 5:14.
Vajtswv Yehauvas hais phua hlo hauv phau Vajlugkub tias nws nyiam kom peb coj zoo li cas. Yog li ntawd, peb yuav tau rau rau siab kawm phau Vajlugkub, peb thiaj li paub qhov nws nyiam thiab nws tsis nyiam. Ces thaum ntawd, peb thiaj li yuav paub thov tau “raws li Vajtswv lub siab nyiam.”
PEB THOV TAU RAU TEJ TWG?
Tej Uas Peb Tu Ncua. Peb thov tau Vajtswv kom nws saib xyuas peb rau hnub ntawd, pub kom peb muaj noj muaj hnav, thiab muaj chaw nkaum. Peb thov tau kom nws pub laj lim tswvyim rau peb txawj txiav txim, kom peb muaj lub dag lub zog tiv dhau kev sim siab, kom peb muaj kev ntseeg, los yog kom nws zam peb lub txim.—Lukas 11:3, 4, 13; Yakaunpaus 1:5, 17.
Pab Lwm Tus. Muab xav li no tias, muaj ib tse neeg tej metub menyuam txawj txawj sib hlub sib pab. Ntshe lawv niam lawv txiv mas yuav lossis zoo siab kawg nkaus li. Tib yam nkaus li ntawd, Yehauvas yeej xav kom peb tibneeg txawj sib hlub sib pab ib yam nkaus. Ib qho peb ua tau yog thov Vajtswv pab lwm tus. Xws li, thov rau peb tus txij nkawm, tej metub menyuam, los yog cov ntseeg. Yakaunpaus hais tias: “Ib tug thov Vajtswv pab rau ib tug.”—Yakaunpaus 5:16.
Ris Vajtswv Txiaj Ntsig. Vajtswv yog tus tsim ib puas tsav yam. Nws yog tus pub peb ciaj sia ua neej nyob. Phau Vajlugkub hais tias: “Tes haujlwm zoo uas Vajtswv ibtxwm ua yog nws pub muaj tshav muaj nag kom tej qoobloo siav raws caij raws nyoog thiab pub zaub mov rau nej noj kom nej tau nyob kaj siab lug.” (Tes Haujlwm 14:17) Yog peb ua tib zoo zaum tsaws xav txog txhua yam Vajtswv tau ua ces peb lub siab yeej yuav qaug lais rau Vajtswv thiab tsa tes ua nws tsaug. Peb lub neej los yuav qhia tias peb ris Vajtswv txiaj ntsig.—Kaulauxais 3:15.
THOV KAM TIAG
Ntshe nej ib txhia twb tag kev cia siab vim tsis hnov Vajtswv teb nej tej lus thov. Yog tau muaj li no lawm los, tsis txhob ua siab deb. Vajtswv tsis tau teb, tsis tau qhia tias nws tsis nco qab nej lawm. Cia peb tham txog ob peb tug yam ntxwv seb vim li cas thiaj zoo rau peb thov tsis tseg tsis tu.
Xatij ua neej tsaus ntuj nti. Thaum nws kawm Vajlugkub, nws mam pom tias nws yuav tau thov Vajtswv tas zaj tas zog. Nws hais tias: “Kuv niaj hnub thov Vajtswv, pab tau kuv muaj kev vam kev cia siab, ua neej muaj haus paus hauv ntsis lawm. Kuv ua Vajtswv tsaug tias nws pub ib pawg ntseeg los txhawb thiab pab kuv. Kuv kaj siab lawm hov ntau.”
Ntses Nis hais tias ntshe Vajtswv yuav tsis mloog nws tej lus thov li. Tiamsis nws hais tias: “Thaum kuv ntsoos ntsoos, tu tu siab rau kuv tus kheej, kuv thov kiag Vajtswv tamsim ntawd tias vim li cas kuv thiaj pheej xav xav li ntawd. Kuv thov Vajtswv li no, ua rau kuv thiaj thim xav tias Vajtswv hlub kuv kawg nkaus li. Tab txawm kuv yuav xav ntau tsav ntau yam los, kuv thov tag thov thiab ces kuv pom tias Vajtswv Yehauvas yeej sawv nraim ntawm kuv ib sab.”
“Pom kuv tus metub kaj siab li no, mas yog ib qho koob hmoov zoo tshaj plaws . . . thiab Vajtswv teb kuv cov lus thov”
Hos thaum Ixanpees (Isabel) suab menyuam, kws tshuaj los hais rau nws tias nws tus menyuam yuav yug los cev tsis meej xeeb. Nws lub siab txawm poob nthav. Txhua tus pom nws pheej hais kom nws kav tsij muab tus menyuam rho tawm. Tiamsis nws muaj ib pluaj siab tsis kheev nws ua li ntawd. Nws hais tias: “Kuv chim chim siab, ua rau kuv xav yaj ntshis lawm xwb. Kuv thiaj thov thov kom Vajtswv pab.” Ntev mus, Ixanpees txawm yug tau nws tus metub. Nws hais tias: “Tab txawm kuv tus metub lub cev tsis meej xeeb los, nws twb ua neej los txog tav no. Kuv ntseeg tsis tau li tias, nws twb tiav menyuam hluas lawm. Nws lub neej los yeej tshav ntuj nrig. Thaum pom kuv tus metub kaj siab li no, mas yog ib qho koob hmoov zoo tshaj plaws uas Vajtswv Yehauvas muab pub kuv, thiab Vajtswv teb kuv cov lus thov.”
Thaum hnov lawv hais li no mas ua rau peb sov siab lawm hov ntau thiab peb xav yam li tus sau Phau Ntawv Nkauj tias: ‘Yehauvas, koj yeej mloog cov neeg uas tsis muab hlob tej lus thov, koj yuav txhawb lawv lub zog kom lawv ua tau lub siab ntev.’ (Phau Ntawv Nkauj 10:17) Yeej tsim nyog peb rub lub siab ntev ua tiag thov Vajtswv tsis tseg tsis tu.
Nej puas paub tias phau Vajlugkub muab Yexus cov lus thov sau tseg cia rau peb tau xyaum? Zaj tom ntej yuav qhia peb txog Yexus ib zaj lus thov seb yuav tsav tau peb lub neej li cas.