Muab daim ntawv thiab lub sam thiaj rub kom pom meej zog
1922—Tau 100 Xyoo Lawm
“VAJTSWV twb kom Yexus Khetos . . . pab peb kovyeej lawm.” (1 Kauleethaus 15:57) Cov lus no yog nqe Vajlugkub rau xyoo 1922. Nqe no pab kom Cov Tub Kawm Vajlugkub nco ntsoov tias Yehauvas yeej yuav muab nqi zog rau lawv. Nyob rau xyoo ntawd, Yehauvas yeej muab nqe zog rau lawv vim lawv kub siab lug mus qhia Vajlugkub. Nws foom koob hmoov rau lawv thaum lawv luam tej phau ntawv thiab siv xov tooj cua los tshaj tawm txoj xov zoo. Tsis tas li ntawd nyob rau xyoo ntawd, Yehauvas kuj foom koob hmoov rau lawv, lawv thiaj muaj ib lub rooj sib txoos nyob rau hauv teb chaws U.S.A. hauv lub xeev Auhaiyaum (Ohio) ntawm lub nroog Xidawm Phau-ees (Cedar Point). Lub rooj sib txoos no txhawb Yehauvas Cov Tim Khawv tes hauj lwm los txog niaj hnub niam no.
“YOG IB LUB TSWV YIM ZOO KAWG LI”
Thaum cov kwv tij nkauj muam mus qhia txoj xov zoo coob zuj zus, sawv daws xav tau ntaub ntawv ntau zuj zus. Cov kwv tij ua hauj lwm rau Npe-ee hauv Npluavlees (Brooklyn) luam Phau Tsom Faj rau sawv daws siv tiam sis lawv haj tseem siv lwm lub tuam txhab los mus luam tej phau ntawv loj. Ntev mus ntev tuaj, muaj ob peb lub hlis tej ntaub ntawv tsis txaus siv mus qhia txoj xov zoo. Yog li ntawd, Kwv Tij Luthafaw (Rutherford) thiaj hais rau Lanpaw Mateem (Robert Martin) uas yog ib tug saib xyuas chaw ua hauj lwm seb puas luam tau tej phau ntawv.
Lub tsev xauj hauv lub xeev Nus Yauj ntawm lub zos Npluavlees
Kwv tij Mateem hais tias: “Yog ib lub tswv yim zoo kawg li vim lawv qhib ib lub tsev luam ntaub ntawv.” Cov kwv tij thiaj mus xauj ib qho chaw hauv lub zos Npluavlees thiab yuav tej twj kom tau siv luam ntaub ntawv.
Vim cov kwv tij yuav luam lawv tej ntaub ntawv, muaj ib txhia txawm tsis txaus siab. Tus thawj coj ntawm ib lub tuam txhab uas peb ntiav luam ntaub ntawv rau peb txawm tuaj saib peb qhov chaw luam ntaub ntawv. Nws hais tias: “Nej sawv daws muaj tej twj zoo kawg li los luam ntaub ntawv tiam sis twb tsis muaj ib twg txawj siv li. Rau lub hlis xwb ces nej yuav muab tej twj no ua puas tag ua ib pawg lawm xwb.”
Kwv Tij Mateem hais tias, “Tej zaum kuj muaj tseeb li nws hais thiab, tiam sis nws tsis nco qab tias tus Tswv yeej ib txwm nrog nraim peb.” Kwv Tij Mateem yeej hais yog lawm. Tsis ntev tom qab ntawd, ib hnub xwb lawv luam tau 2,000 phau ntawv.
Cov kwv tij sawv ntawm cov cav luam ntawv
SIV XOV TOOJ CUA
Yehauvas cov tib neeg tsis yog muaj chaw luam ntaub ntawv tiam sis lawv kuj pib siv xov tooj cua los mus tshaj tawm txoj xov zoo. Lub 2 Hlis tim 26 xyoo 1922 uas yog Hnub 7 (Sunday) thaum yav tav su, yog thawj thawj zaug uas Kwv Tij Luthafaw tshaj tawm rau hauv xov tooj cua ntawm qhov chaw KOG nyob rau hauv lub xeev Kalifaunias (California) ntawm lub nroog Lo Eentsulem (Los Angeles). Nws zaj lus qhuab qhia hu ua “Coob Tus Uas Muaj Sia Nyob Tam Sim No Yuav Tsis Tuag Li.”
Muaj kwv lam li 25,000 leej tau tig los mloog zaj lus qhuab qhia. Muaj ib txhia kuj tau xa ntawv tuaj ua Kwv Tij Luthafaw tsaug uas nws cev zaj lus qhuab qhia ntawd. Nyob rau hauv cov ntawv no, muaj ib tug npe hu ua Vilawm Afoj (Willard Ashford) uas nyob rau hauv lub xeev Kalifaunias ntawm lub nroog Xatees Anas (Santa Ana). Nws qhuas Kwv Tij Luthafaw zaj lus qhuab qhia kawg nkaus li. Nws hais tias: “Nyob hauv peb yim neeg, muaj peb tug muaj mob thiab mus tsis taus qhov twg. Ces yog li ntawd peb yeej tuaj tsis tau tuaj mloog koj zaj lus qhuab qhia li tab txawm yog koj tuaj qhia rau hauv peb zej peb zos.”
Txhua lub lim tiam tom qab ntawd los yeej tseem siv xov tooj cua los cev lus qhuab qhia. Thaum xyoo 1922 yuav xaus, lub koom haum muab cov tib neeg mloog ntawd suav mas “muaj yuav luag li 300,000 leej tib neeg yeej tig los mloog tej lus qhuab qhia rau saum xov tooj cua.”
Sawv daws nyiam kawg nkaus li, Cov Tub Kawm Vajlugkub thiaj li ua ib lub xov tooj cua rau ntawm lub zos Xateem Ailees (Staten Island) nyob tsis deb rau ntawm lub Npe-ee ntawm Npluavlees. Tau ntau xyoo tom qab no, Cov Tub Kawm Vajlugkub thiaj siv lub xov tooj cua hu ua WBBR los tshaj tawm txoj xov zoo rau qhov txhia qhov chaw.
“ADV”
Phau Tsom Faj lub 6 Hli tim 15 xyoo 1922 tau tshaj tawm tias yuav muaj ib lub rooj sib txoos nyob rau hauv lub xeev Auhaiyaum ntawm lub nroog Xidawm Phau-ees rau thaum lub 9 Hlis tim 5 txog 13 rau tib xyoos ntawd. Cov Tub Kawm Vajlugkub zoo siab kawg nkaus li thaum lawv tuaj rau hauv lub nroog Xidawm Phau-ees.
Kwv Tij Luthafaw cev thawj zaj lus qhuab qhia tos txais sawv daws. Nws hais tias: “Kuv paub tseeb tseeb tias tus Tswv yeej yuav foom koob hmoov rau lub rooj sib txoos no thiab yuav nrov ncha moo lug qhov txhia qhov chaw thoob ntiaj teb rau tib neeg paub.” Cov kwv tij uas cev lus qhuab qhia rau hnub ntawd puav leej txhawb kom txhua tus rau siab ntso mus qhia txoj xov zoo.
Tib neeg tuaj koom lub rooj sib txoos nyob hauv lub xeev Auhaiyaum ntawm lub nroog Xidawm Phau-ees xyoo 1922
Lub 9 Hlis tim 8, muaj li 8,000 leej tuaj zaum thiab tos tsis hnyu yuav maj mloog Kwv Tij Luthafaw cev nws zaj lus qhuab qhia. Lawv xav paub seb nws yuav piav txog peb tug tsiaj ntawv “ADV” uas nyob rau hauv daim ntawv caw rau lawv paub. Muaj ib txhia ntsia mus pom ib daim ntawv loj loj dai rau saum lub sam thiaj. Muaj ib tug kwv tij npe hu ua Athaw Kholauj (Arthur Claus) nyob rau lub xeev Aukahaumas (Oklahoma) kuj tau tuaj koom lub rooj sib txoos no thiab. Nyob rau lub sij hawm ntawd, tsis muaj paj taub ces nws mus zaum tau rau ntawm ib lub rooj uas nws hnov tau zaj lus qhuab qhia meej meej.
“Peb mloog zoo zoo nws tej lus”
Tus kwv tij uas coj tshaj tawm hais tias tsis pub leej twg nkag los mus rau sab hauv thaum Kwv Tij Luthafaw cev nws zaj lus qhuab qhia xwv thiaj tsis ntshoo ntshoo ua zom zaws. Thaum 9 teev 30 sawv ntxov, Kwv Tij Luthawfaw pib cev nws zaj lus qhuab qhia. Nws thiaj hais Yexus cov lus nyob rau hauv Mathais 4:17 tias: “Vajtswv txoj kev kav twb los ze lawm.” Nws piav tias tib neeg yuav paub txog Vajtswv txoj kev kav ces nws hais tias: “Yexus tau hais tias thaum nws pib kav ces nws yuav sau nws cov tib neeg uas yog cov muaj lub siab npuab Vajtswv.”
Kwv Tij Kholauj hais tias: “Peb mloog zoo zoo nws tej lus.” Tiam sis ib sij huam xwb, Kwv Tij Kholauj txawm cia li mob. Nws twb tsis xav tawm mus sab nraud los nws yuav tau tawm. Nws paub hais tias yog nws tawm lawm, lawv yuav tsis pub nws nkag rov los.
Ib pliag tsis ntev tom qab ntawd, nws txawm rov qab xis neej me ntsis lawm. Thaum nws rov qab los ze rau ntawm chav uas tus kwv tij cev zaj lus qhuab qhia, nws txawm hnov sawv daws npuaj teg ntshoo nrooj ua rau nws mob siab heev. Yog nws yuav tau nce mus zaum puag saum ru tsev los nws yeem mus nyob saud mloog kom tag zaj lus qhuab qhia. Kwv Tij Kholauj tab tom muaj 23 xyoos. Nws tseem hluas ces nws thiaj li nce kiag ntawm sab phab ntsa mus dua puag saum ru tsev mloog tuaj. Cov qhov rais puav leej qhib thiab nyob rau saud “hnov zaj lus qhuab qhia meej dua.”
Kwv Tij Kholauj cov phooj ywg yeej nce mus nyob saum ru tsev tib yam nkaus li nws thiab. Nws ib tug phooj ywg hu ua Faleej Ntsoxees (Frank Johnson) txawm khiav khiav los hais tias, “Koj puas muaj chais na?”
Ces Kwv Tij Kholauj hais tias, “Kuv nqa tau ib rab thiab.”
Faleej txawm tias, “Twb yog Vajtswv teb peb tej lus thov. Koj puas pom daim ntawv loj loj ntawd? Mloog tus Txiav Txim cov lus zoo zoo.a Thaum nws hais tias, ‘Nej yuav tsum tshaj tawm, tshaj tawm,’ ces koj cia li txiav kiag 4 txog hlua uas dai daim ntawv.”
Kwv Tij Kholauj tuav rawv nws rab chais ntawm nws txhais tes mloog ntsoov seb thaum twg lawv kom nws txiav cov hlua. Ces Kwv Tij Luthafaw txawm piav nws zaj lus qhuab qhia los mus xaus zuj zus. Kwv Tij Luthafaw los zoo siab kawg nkaus li. Nws txawm qw nrov zus nrov zus tias: “Tuav rawv nej txoj kev ntseeg thiab ua tim khaw rau tus Tswv. Rau siab ntso qhia kam tiag mus txog thaum tsis muaj kev ntseeg cuav lawm. Mus qhia txoj xov zoo rau ntiaj tog qaum pes paub. Lub qab ntuj no yuav tsum paub hais tias Yehauvas yog Vajtswv thiab Yexus Khetos yog Vaj Ntxwv ntawm txhua tus vaj ntxwv thiab tus Tswv ntawm txhua tus tswv. Hnub no yog ib hnub tseem ceeb tshaj txhua txhia hnub. Tus Vaj Ntxwv twb kav lawm. Nej tes hauj lwm yog mus qhia txhua leej txhua tus kom paub. Yog li ntawd, cia li mus tshaj tawm, tshaj tawm, tshaj tawm, txog tus Vaj Ntxwv thiab nws lub Nceeg Vaj.”
Kwv Tij Kholauj hais tias nws thiab cov kwv tij txawm txiav cov hlua ces daim ntawv loj loj txawm maj mam poob rau hauv pem teb. Peb tug tsiaj ntawv “ADV” txhais hais tias: “Tshaj Tawm Txog Tus Vaj Ntxwv Thiab Nws Lub Nceeg Vaj.”
TES HAUJ LWM TSEEM CEEB KAWG NKAUS
Lub rooj sib txoos nyob rau hauv Xidawm Phau-ees pab tau cov kwv tij kub siab lug thiab zoo siab hlo qhia txog lub Nceeg Vaj. Muaj ib tug tho kev nyob rau hauv lub xeev Aukahaumas sau tias, “Peb mus qhia rau thaj tsam uas tib neeg ua thee thiab cov tib neeg ntawd txom nyem heev.” Nws hais tias thaum tib neeg nyeem tej lus nyob rau hauv phau ntawv Golden Age mas ua rau “lawv quaj tag li.” Nws thiaj li xaus lus tias, “Peb zoo siab kawg li uas peb mus nplig tau lawv siab.”
Cov Tub Kawm Vajlugkub thiaj li maj nroos ua li Yexus cov lus hais nyob rau hauv Lukas 10:2 tias: “Cov nplej uas zoo hlais lawm muaj ntau, tiamsis cov neeg uas hlais muaj tsawg.” Thaum xyoo ntawd yuav luag xaus, lawv kub siab lug mus tshaj tawm dua li yav thaud kom tib neeg ntiaj tog qaum pes thiaj li paub txog lub Nceeg Vaj.
a Muaj tej zaud lawv muab Kwv Tij Luthafaw hu ua “tus Txiav Txim” yeeb vim nws yog ib tug txiav txim nyob rau hauv teb chaws U.S.A. ntawm lub xeev Mixulis (Missouri).