3 | Tej Qauv Hauv Phau Vajlugkub Pab Tau Peb

PHAU VAJLUGKUB QHIA TIAS . . . Cov txiv neej thiab poj niam uas npuab siab rau Vajtswv kuj yog “neeg zoo li peb.”—YAKAUNPAUS 5:17.

Nqe No Qhia Li Cas

Phau Vajlugkub qhia txog tej tib neeg uas raug ntau yam kev nyuaj siab ntxhov plawv. Yog peb nyeem txog lawv lub neej, peb yuav pom tias tej tug kuj nyuaj siab li peb thiab.

Nqe No Pab Peb Li Cas

Peb yeej xav kom tib neeg to taub peb. Thaum peb puas siab puas ntsws, peb haj yam xav kom lwm tus to taub txog peb. Thaum peb nyeem phau Vajlugkub, peb yuav pom tias muaj cov raug kev nyuaj siab ib yam li peb. Peb yuav pom tias tsis yog peb ib leeg xwb thiaj muaj txoj kev txhawj xeeb ntxhov plawv.

Phau Vajlugkub qhia txog ntau tus uas tag kev cia siab. Puas tau muaj ib zaug uas koj xav tias koj thev tsis taus lawm? Mauxes, Eliyas, thiab Daviv kuj xav ib yam li ntawd thiab.—Teev Npe 11:14; 1 Vajntxwv 19:4; Phau Ntawv Nkauj 55:4.
Phau Vajlugkub qhia txog ib tug poj niam hu ua Hanas uas nws “ntxhov siab heev” vim nws muaj tsis taus me nyuam thiab muaj ib tug pheej txob thuam nws.—1 Xamuyees 1:6, 10.
Phau Vajlugkub qhia txog ib tug txiv neej hu ua Yauj. Txawm nws muaj kev ntseeg ruaj nreeg los, nws ntsib txoj kev nyuaj siab ntxhov plawv loj heev. Muaj ib zaug nws hais tias: “Kuv dhuav heev; kuv tsis xav ua neej nyob lawm.”—Yauj 7:16.

Yog peb kawm txog cov neeg hauv phau Vajlugkub seb lawv ua li cas los pab kom lawv txhob xav txog qhov phem, kuj yuav pab tau peb thev taus peb tej kev ntxhov siab.

Phau Vajlugkub Pab Tau Khev Veem (Kevin)

Kuv Tus Mob Ib Sij Chim Ib Sij Zoo Siab

“Thaum kuv yuav luag muaj 50 xyoo, kuv txawm muaj tus mob uas ua rau kuv ib sij chim ib sij zoo siab. Tej lub sij hawm, kuv xav tias txawm yuav nyuaj npaum li cas los kuv yeej uv taus. Tiam sis tej lub sij hawm, kuv ho xav tias lub neej no tsis muaj qab hau dab tsi li.”

Phau Vajlugkub Pab Tau Kuv

“Tus tub txib Petus tus qauv hauv phau Vajlugkub pab tau kuv kawg li. Nws ua yuam kev, ua rau nws xav tias nws tsis muaj nuj nqis. Yuav kom nws tsis txhob xav txog tej yam tsis zoo txog nws tus kheej, nws mus koom nrog tej phooj ywg uas hlub tshua txog nws. Tej hnub uas kuv tus mob ua rau kuv xav tias kuv tsis muaj nqis dab tsi, kuv ua li Petus thiab mus koom nrog kuv cov phooj ywg uas muaj lub siab xav pab kom kuv peem tiag.

“Ib tug qauv ntxiv hauv phau Vajlugkub uas txhawb tau kuv yog Vaj Ntxwv Daviv. Nws yeej nyuaj siab txog tej uas nws raug thiab nws yeej tu siab rau tej kev txhaum uas nws ua yav tas los. Kuv to taub Daviv txoj kev nyuaj siab, rau qhov tej thaum kuv kuj ua los sis hais tej yam uas kuv xav txog lig. Tej lus uas Daviv hais nyob hauv Phau Ntawv Nkauj 51 txhawb tau kuv. Nyob hauv nqe 3, Daviv hais tias: ‘Kuv lees kuv tej kev txhaum, kuv paub hais tias kuv yeej tau ua txhaum lawm.’ Thaum kuv nyuaj siab heev ces kuv xav tib yam li Daviv xav. Tab sis kuv kuj xav txog Daviv cov lus hais hauv nqe 10 tias: ‘Vajtswv, thov koj pub kom kuv muaj lub siab dawb, thiab thov koj muab lub siab tshiab rau kuv kom kuv mloog koj lus.’ Kuv siv tib co lus no taij thov Vajtswv pab kom kuv xav tau qhov zoo txog kuv tus kheej. Nyob hauv nqe 17 los kuj txhawb tau kuv thiab. Nqe no hais tias: ‘Koj yuav tsis fee plhu rau tus uas txo hwj chim thiab lees nws tej kev txhaum ib zaug li.’ Nqe no qhia tias Vajtswv yeej hlub kuv tiag.

“Yog kuv xav ntsoov txog cov qauv hauv phau Vajlugkub thiab tej uas Vajtswv tau ua los pab kuv, txhawb kom kuv muaj txoj kev cia siab rau yav tom ntej. Tej lus cog tseg hauv phau Vajlugkub yeej muaj tseeb thiab yeej pab tau kom kuv ua siab ntev thev.”