Kuv Pom Cov Ntseeg Hlob Mos Nyoos

Kuv txawm luag nrov nrov vim kuv tsis xav hais tias kuv tus npawg yuav yog ib tug neeg paub Vajtswv. Kuv thiaj nug nws tias: “Koj paub dab tsi txog phau Vajlugkub no?” Nws tsis teb kuv li. Ces nws mam li hais tias nws niam yog Yehauvas Cov Tim Khawv thiab nws niam kuj tau qhia qho me ntsis rau nws. Kuv thiaj nug kom nws piav qhia rau kuv mloog.

Wb tham lus txog ib tag hmo. Kuv tus npawg qhia kuv tias nyob hauv phau Vajlugkub, Xatas yog tus kav lub qab ntuj no. (Yauhas 14:30) Kuv nyuam qhuav hnov thawj zaug thiab ua rau kuv xav xav paub ntxiv. Kuv ib txwm hnov tias Vajtswv zoo heev thiab nws yog tus kav lub qab ntuj no tiam sis ua neej nyob, tej uas kuv hnov ntawd tsis yog lawm. Txawm kuv nyuam qhuav muaj 26 xyoo xwb los, kuv yeej pom ntau yam ua rau kuv dhuav kawg nkaus li.

Kuv txiv yog ib tug tub rog tsav dav hlau rau teb chaws Yunathim Xatej (United States). Thaum kuv tseem yog me nyuam yaus, kuv yeej paub zoo tias thaum twg tej tub rog xav siv tej hoob pob kom tua tau qas txhiab qas vam leej tuag los yeej tau. Thaum kuv tseem yog ib tug tub kawm ntawv qib siab nyob hauv lub xeev Kalifaunias (California) ces txawm muaj ntsuj rog nyob rau Nyab Laj Teb. Kuv txawm nrog cov tub ntxhais kawm ntawv tsa paib tawm tsam ntsuj rog ntawd. Tub ceev xwm nqa qw tuaj caum peb ces peb txawm khiav rau ub rau no. Peb tsis pom kev li thiab ua tsis taus pa vim cov tub ceev xwm tua ib co tshuaj pa taws tuaj ntshawb peb qhov muag. Kuj muaj neeg muab tej nom tua pov tseg thiab tib neeg sawv tawm tsam nom tswv heev kawg. Nyias muaj nyias ib txoj kev xav seb yuav kho teeb meem li cas rau li cas. Thaum ntawd, kuv tsis pom qab yuav ua zaj twg thiaj zoo.

Nyob rau xyoo 1971, kuv mus ua ib txog hauj lwm nyob rau pem Alaxakas (Alaska) qaub teb thiab kuv ua tau nyiaj ntau heev. Ces tom qab ntawd kuv txawm ya mus rau lub nroog Loodoos (London), yuav ib lub tsheb maus taus thiab caij mus rau yav qab teb. Tau ntau lub hlis tom qab, kuv mus txog Afika. Kuv tau ntsib ntau leej uas hais tias kheev lam lawv ua tau li kuv es lawv thiaj tsis nco qab lawv tej teeb meem.

Tej uas kuv pom thiab kuv tau hnov no yeej raws nkaus li tau hais nyob rau hauv phau Vajlugkub tias muaj ib tug plig phem ua tus kav lub qab ntuj no tej kev coj noj coj ua thiaj phem ua luaj li no. Kuv xav paub tias Vajtswv ho dua twg lawm?

Tau ob peb lub hlis tom qab ntawd, kuv mam li paub tias yog vim li cas. Ntev mus ntev tuaj, kuv kuj ntsib coob leej ntau tus uas tau raug ntau yam tiam sis lawv kuj muab siab rau ntseeg Vajtswv. Kuv yeej nrog lawv ua ke tsis paub dhuav li.

QAUM TEB AYALEES

Thaum kuv rov qab los txog lub nroog Loodoos, kuv thiaj hu mus nrog kuv tus npawg niam tham Vajlugkub thiab nws muab tau ib phau Vajlugkub rau kuv. Tom qab ntawd thaum kuv mus rau teb chaws Nethawlee (Netherlands) ntawm lub nroog Axitawda (Amsterdam), muaj Yehauvas Cov Tim Khawv ib tug txawm pom kuv zaum ntawm ib txoj kev uas muaj teeb ci tuaj ces nws txawm los qhia kom kuv thiaj nkag siab txog tej kuv nyeem ntawd. Ces tom qab ntawd kuv txawm mus rau ntawm lub pov txwv Ayalees (Ireland) ntawm lub nroog Dunplee (Dublin), thiab kuv mus nrhiav tau Yehauvas Cov Tim Khawv ceg Npe-ee nyob rau ntawd. Kuv mus khob khob qhov rooj. Txawm muaj ib tug txiv neej hu ua Athaw Mathai (Arthur Matthews) los qhib qhov rooj thiab nrog kuv tham. Kuv thov kom nws pab qhia Vajlugkub rau kuv thiab nws kuj pom zoo qhia.

Kuv kub siab lug kawm Vajlugkub thiab rau rau siab nyeem tej ntaub ntawv uas lub koom haum luam tawm. Kuv nyiam kawg li. Thaum kuv mus tej kev sib txoos, tej tib neeg txawj ntse twb tsis paub cuag li tej me nyuam yaus ntawd. Xws li cov me nyuam paub tias: ‘Ua li cas ho muaj kev phem? Vajtswv yog leej twg? Ua li cas tom qab ib tug tuag lawm?’ Tag nrho kuv cov phooj ywg puav leej yog Yehauvas Cov Tim Khawv. Kuv yeej tsis paub leej twg li, kuv tsuas paub lawv xwb. Lawv pab kom kuv nrog Yehauvas sib raug zoo thiab xav ua Yehauvas tes hauj lwm.

Kuv ua kev cai raus dej rau xyoo 1972. Ib xyoos tom qab xwb kuv ua ib tug tho kev thiab kuv mus rau Ayalees Qaum Teb ntawm lub nroog Nulis (Newry). Kuv mus koom nrog ib lub koom txoos uas cov ntseeg haj tseem tsawg tsawg. Kuv mus xauj ib lub tsev nyob tom ib ntav roob. Nyob rau ntawd, muaj nyuj tuaj nog zaub ces kuj thiaj li mus xyaum kuv zaj lus qhuab qhia rau nyuj mloog. Lawv kuj zom zaub mloog kuv piav rau lawv. Lawv qhia tsis tau rau kuv tias qhov twg tsis zoo tiam sis lawv kuj pab tau kom kuv txawj ntsia cov uas mloog kuv tham. Nyob rau xyoo 1974, kuv kuj rais los mus ua ib tug tho kev tshwj xeeb thiab muaj ib tug kwv tij hu ua Naintsaum Phij (Nigel Pitt) kuj nrog kuv tho kev ua ke. Wb ua kwv tij kwv npawg tau ntev heev.

Thaum lub caij ntawd, muaj teeb meem loj heev nyob rau Ayalees Qaum Teb. Muaj ib txhia hu lub teb chaws ntawd tias yog “lub teb chaws hoob pob thiab mos txwv.” Tib neeg sib ntaus sib tua ntawm tej kev tas li, neeg raug phom tas li, thiab tsheb los yeej raug nplaum es tawg nrov pes poog tas li. Tej teeb meem no puav leej chiv los ntawm tej nom tswv thiab kev ntseeg xwb. Cov Plos Tes Tas (Protestant) thiab cov Kav Tos Liv paub tias Yehauvas Cov Tim Khawv tsis tuaj ib roog nom tswv twg tog ces peb kuj mus qhia Vajlugkub ywj siab. Tej neeg zej zog paub hais tias yuav muaj xwm rau qhov twg ces lawv kuj pab ceeb toom peb kom tsis txhob mus rau qhov ntawd thiaj tsis phom sij.

Txawm li ntawd los tej thaum peb tseem mus ncaj tej qhov chaw phom sij kawg li. Muaj ib zaug Deniv Kelinkees (Denis Carrigan) uas yog ib tug tho kev, thiab kuv wb mus rau ib lub zos tsis deb tsis ze. Lub zos ntawd tsis muaj Yehauvas Cov Tim Khawv thiab wb kuj mus dua ib zaug lawm. Muaj ib tug poj niam txawm iab liam tias wb yog tub rog rau cov neeg Askiv, yeeb vim yog wb tsis hais lus thooj li lawv. Thaum nws liam txim li ntawd, ua rau wb ntshai kawg li. Nyob rau thaj chaw ntawd, yog yus lam hais lus zoo rau ib tug tub rog twg ces yus yeej raug tua kiag tam sid los sis lawv kuj xuas phom tua yus hauv caug. Wb txawm mus tos tsheb ntiav thiab nraum zoov mas no kawg li. Wb txawm pom ib lub tsheb los rau ntawm tus poj niam uas liam txim rau wb ntawd. Tus poj niam txawm los nrog ob tug txiv neej hauv tsheb tham thiab pheej taw tes tuaj rau wb. Ob tug txiv neej txawm maj mam tsav tsheb los rau ntawm wb thiab nug wb seb thaum twg tsheb ntiav mam los. Thaum lub tsheb ntiav los txog, ob tug txiv neej ntawd txawm mus nrog tus tsav tsheb tham. Wb tsis hnov xyov tej lawv hais li cas rau li cas. Tsis muaj ib tug neeg nyob rau ntawm lub tsheb ntawd li thiab ces wb txawm xav tias lawv yuav coj wb mus ua phem rau ntawm ntug zos. Tiam sis kuj tsis muaj li ntawd thiab. Thaum wb tawm hauv lub tsheb ntiav, kuv txawm nug tus tsav tsheb tias: “Puas yog ob tug txiv neej ntawd xav tsis zoo txog wb?” Nws teb hais tias: “Kuv qhia rau nkawd tias kuv paub neb yog leej twg. Txhob txhawj, tsis muaj teeb meem dab tsi los raug neb.”

Nyob rau xyoo 1976 ntawm lub rooj sib txoos hauv lub nroog Dunplee, kuv ntsib Phawlees Laumes (Pauline Lomax) uas yog ib tug tho kev tshwj xeeb tuaj teb chaws Askiv tuaj. Nws muaj kev ntseeg heev, yog neeg txo hwj chim, thiab ntxim nyiam heev. Nws thiab nws tus nus hu ua Les (Ray) ib txwm ntseeg Yehauvas. Ib xyoos tom qab xwb, Phawlees wb sib sau los ua txij ua nkawm thiab wb ua ob tug tho kev tshwj xeeb hauv lub zos Npaliminam (Ballymena) nyob Ayalees Qaum Teb.

Kuv rais ua ib tug saib xyuas thaj tsam ces kuv poj niam wb mus saib xyuas thaj tsam tau ib ntus hauv lub nroog Npelefa (Belfast), lub nroog Lododelim (Londonderry), thiab tej thaj chaw uas phom sij. Thaum pom cov kwv tij nkauj muam txoj kev ntseeg mas txhawb tau wb kawg li vim lawv tso tej kev ntseeg cuav, kev ntxub ntxaug, thiab kev xaiv ntsej muag tseg los teev tiam Yehauvas. Yehauvas yeej saib xyuas thiab tiv thaiv lawv zoo kawg li.

Kuv nyob rau hauv lub pov txwv Ayalees tau kaum lub xyoos. Nyob rau xyoo 1981, Npe-ee kuj caw kom wb mus kawm Kile-a uas yog pab 72. Thaum wb kawm tiav txoj kev kawm no tag lawm, Npe-ee kuj muab wb xa mus rau Afika sab hnub poob ntawm lub teb chaws Xiala Li-oo (Sierra Leone).

NYOB HAUV XIALA LI-OO

Wb nrog 11 tug tub txib tshaj tawm txawv teb chaws nyob ua ib tse. Peb koom ib chav ua noj, peb lub tsev dej, ob qho chaw da dej, ib lub xov tooj, ib lub cav ntxhua khaub ncaws, thiab ib lub cav ziab khaub ncaws. Hluav taws xob pheej tuag tsis so. Tej nas tsuag los nce saum ru tsev hos nab raj kub sai los kuj nkag rhuj rhuav hauv qab lawj tuaj.

Txawm qhov chaw uas peb nyob tsis zoo ua luaj twg los thaj chaw uas peb mus tshaj tawm txoj xov zoo mas neeg nyiam kawg li. Tej tib neeg yeej cuab pob ntseg mloog thaum peb muab phau Vajlugkub coj los piav rau lawv. Coob leej ntau tus qhib siab kawm thiab kuj los ntseeg Yehauvas lawm thiab. Thaum thawj, kuv yeej mus qhia Vajlugkub heev kawg li tiam sis thaum kuv muaj hauj lwm hauv ceg Npe-ee khuam tes khuam taw lawm ces kuv tsis tshua tau mus qhia Vajlugkub cuag li kuv poj niam.

Muaj coob leej kwv tij nkauj muam yeej txom txom nyem tiam sis Yehauvas yeej saib xyuas kom lawv muaj txawm peem. (Mathais 6:33) Kuv nco txog ib tug muam uas nws tsuas muaj nyiaj txaus yuav me ntsis zaub mov rau nws thiab nws cov me nyuam noj xwb tiam sis nws cia li muab rau ib tug kwv tij uas tsis muaj nyiaj mus yuav tshuaj kho nws tus npaws tshaj cum. Nyob rau tib hnub ntawd, muaj ib tug poj niam txawm los hais rau tus muam ntawd tias nws mam li them nyiaj rau tus muam ntawd ua nws cov plaub hau. Muaj ntau zaus ib leeg yeej pab ib leeg li no.

NYOB HAUV NAI NTSAW LIA

Wb nyob hauv Xiala Li-oo tau cuaj xyoos ces lub koom haum muab wb xa mus ua hauj lwm nyob rau lub Npe-ee ntawm Nai Ntsaw Lia (Nigeria). Ceg Npe-ee no loj kawg li. Kuv txoj hauj lwm tseem zoo li qub yam li thaum tseem nyob hauv Xiala Li-oo tiam sis kuv poj niam txoj hauj lwm txawv lawm. Yav thaum ub, kuv poj niam mus qhia txoj xov zoo li 130 txoos teev txhua lub hlis thiab nws qhia tau coob leej ntau tus tib neeg uas mob siab kawm Vajlugkub. Tam sim no nws tau los mus ua ib tug neeg xaws tshuab. Nws kho cov kwv tij nkauj muam tej khaub ncaws uas ntuag xov me ntsis. Kuv poj niam yeej tsis tshua xis ua tes hauj lwm no tiam sis ntev mus ntev tuaj cov kwv tij nkauj muam ua ua nws tsaug tias lawv ris txiaj ntsig kawg li. Tsis tas li ntawd, nws kheev lauj sij hawm los txhawb cov ua hauj lwm nyob hauv Npe-ee.

Tseem tshuav ntau yam wb tsis tau paub txog cov neeg Nai Ntsaw Lia. Muaj ib zaug, ib tug kwv tij txawj coj ib tug muam uas lawv nyuam qhuav txais tuaj ua hauj lwm rau hauv Npe-ee los ntsib kuv. Kuv ua nws tsaug tias nws tuaj pab peb ua hauj lwm tiam sis nws cia li khoov ntshis ti nkaus kuv ob txhais ko taw. Kuv cia li yoob tag. Ces kuv txawm xav kiag tau txog ob nqes Vajlugkub uas nyob hauv Tes Haujlwm 10:25, 26 thiab Tshwmsim 19:10. Kuv muaj ib lub siab hais tias, ‘Ntshe yuav tau hais kom nws tsis txhob ua li ntawd.’ Tiam sis kuv ho muaj dua ib lub siab tias lawv twb txais nws tuaj ua hauj lwm hauv Npe-ee ces nws yeej paub txog Vajtswv tej lus hauv phau Vajlugkub.

Kuv tsis pom qab ua li cas thiab txaj muag kawg nkaus li. Tom qab ntawd, kuv thiaj mus tshawb nrhiav. Kuv mam li paub tias tej uas tus muam no ua, nws tsuas ua raws li poj ua tseg yawm ua cia. Tej txiv neej los kuj ua tib yam nkaus li ntawd thiab. Lawv ua li no los qhia tias lawv saib taus tus neeg ntawd. Qhov lawv ua li no tsis yog kev teev tiam. Tsis tas li ntawd, kuj muaj ib txhia uas hais nyob hauv phau Vajlugkub tau coj yam li ntawd thiab. (1 Xamuyees 24:8) Kuv zoo siab uas kuv tsis hais dab tsi kom ua rau tus muam ntawd txaj muag vim kuv tsis paub lawv txoj kev cai.

Tau ntau ntau xyoo no wb ntsib coob leej ntau tus neeg Nai Ntsaw Lia uas muaj kev ntseeg kawg nkaus li. Xws li muaj ib tug npe hu ua Aixeyas Adanpaunas (Isaiah Adagbona).a Nws los ntseeg Yehauvas thaum nws tseem yog me nyuam tub hluas ces nws txawm mob ruas lawm. Lawv kuj tau muab nws xa mus nyob rau ntawm lub zos uas cov neeg mob ruas nyob. Nws tib leeg xwb thiaj yog Yehauvas Cov Tim Khawv. Txawm nws raug tawm tsam los nws haj tseem pab tau 30 leej neeg mob ruas los ntseeg Yehauvas thiab kuj tsa muaj ib lub koom txoos nyob rau ntawm thaj chaw ntawd thiab.

NYOB HAUV KHENYAM

Nyob rau xyoo 1996, lub koom haum xa wb mus rau ceg Npe-ee hauv Khenyam. Tau ntev kawg li kuv mam rov qab los txog lub teb chaws no. Wb nyob rau hauv Npe-ee. Nyob rau ib ncig thaj tsam no, muaj muaj liab. Yog cov nkauj muam nqa txiv hmab txiv ntoo ces cov liab ntawd pheej los txeeb noj. Muaj ib hnub muaj ib tug muam nyob hauv Npe-ee tsis nco qab kaw nws lub qhov rais. Thaum nws rov qab los txog tsev, nws pom ib pab niam tub txiv tub liab tab tom noj nws tej zaub mov hauv nws chav. Tus muam txawm qw nrov nrov thiab khiav tawm ntawm nws chav. Cov liab txawm quaj zom zaws thiab khiav ntawm qhov rais mus lawm.

Kuv poj niam wb mus rau lub Xivahili (Swahili) koom txoos. Tau tsis ntev xwb, lawv kom kuv ua tus coj Lub Koom Txoos Kev Kawm Vajlugkub. Kuv tsuas paub lawv yam lus me me xwb. Kuv npaj ua ntej xwv kuv thiaj nyeem tau cov lus nug. Yog cov kwv tij nkauj muam teb txawv li hais rau hauv cov ntawv ces kuv tsis paub tias lawv hais dab tsi li lawm. Kuv tsis pom qab ua li cas vim kuv twb pab tsis tau lawv pes tsawg. Kuv zoo siab tias lawv ua siab ntev thiab txo hwj chim kawg li uas cia kuv ua tus coj qhov kev sib txoos no.

NYOB HAUV YUNAITHIM XATEJ

Wb nyob hauv Khenyam yuav luag tau ib xyoos xwb. Xyoo 1997, lub koom haum xa wb mus rau lub Npe-ee hauv lub xeev Nus Yauj (New York) ntawm lub nroog Npluavlees (Brooklyn). Tam sim no wb nyob rau lub teb chaws uas tib neeg muaj txiag nplua nuj kawg li los nws kuj muaj nws lwm yam teeb meem thiab. (Pajlug 30:8, 9) Txawm li ntawd los cov kwv tij nkauj muam nyob rau ntawm no muaj kev ntseeg kawg li. Lawv siv lawv lub sij hawm thiab tej uas lawv muaj los mus txhawb nqa Yehauvas lub koom haum, tsis yog ua kom lawv huab yam muaj txiag nplua nuj ntxiv.

Tau ntau ntau xyoo no wb yeej pom peb cov kwv tij nkauj muam tuav rawv lawv txoj kev ntseeg tab txawm lawv yuav nyob qhov chaw zoo li cas los xij peem. Nyob rau Ayalees, cov kwv tij nkauj muam nyob rau ib thaj chaw uas sib ntaus sib tua kawg li los lawv tseem tuav rawv kev ntseeg. Nyob rau Afika, cov kwv tij nkauj muam txom txom nyem thiab tej txhia kuj nyob rau tej qhov uas tsis muaj lwm tus ntseeg los lawv yeej tuav rawv lawv txoj kev ntseeg. Hos nyob rau hauv Yunaithim Xatej (United States), yog ib lub teb chaws muaj txiag nplua nuj los lawv yeej tuav rawv lawv txoj kev ntseeg. Thaum Yehauvas pom nws cov tib neeg nyob rau qhov twg los haj tseem tuav rawv lawv txoj kev ntseeg rau nws mas ntshe ua rau nws zoo siab kawg li.

Lub caij lub nyoog dhau lawm ceev kawg li yam nkaus li tus “nqos ntos ntaub.” (Yauj 7:6) Tam sim no wb ua hauj lwm nyob rau hauv lub hauv paus koom haum loj hauv lub xeev Nus Yauj ntawm lub zos Vaviv (Warwick). Wb zoo siab tias wb tau ua hauj lwm nrog ib co kwv tij nkauj muam uas sib hlub sib pab heev. Wb txaus siab rau tej wb muaj thiab zoo siab txhawb nqa Yexus Khetos uas yog tus Vaj Ntxwv yuav muab nqi zog rau cov uas tuav rawv lawv txoj kev ntseeg sai sai yav tom ntej.​—Mathais 25:34.