ZAJ KAWM 30
ZAJ NKAUJ 36 Tswj Lub Siab
Peb Khaws Tau Li Cas Los Ntawm Cov Ixayees Tej Vaj Ntxwv?
“Kuv haivneeg yuav pom cov neeg ncaj ncees thiab cov neeg ua phem ua qias dua ib zaug ntxiv saib sib txawv li cas, cov neeg uas ua kuv tes haujlwm thiab cov neeg uas tsis ua, saib sib txawv li cas.”—MALAKIS 3:18.
LUB NTSIAB RAU ZAJ NO
Qhov uas peb kawm txog seb Yehauvas xav li cas txog cov Ixayees tej vaj ntxwv yuav pab tau kom peb thiaj paub seb Yehauvas xav kom peb ua li cas rau li cas thiaj haum nws siab.
1-2. Nyob hauv phau Vajlugkub hais li cas txog cov Ixayees tej vaj ntxwv?
NYOB hauv phau Vajlugkub hais tias cov vaj ntxwv uas kav cov Ixayees muaj tshaj li 40 leej.a Tsis tas li ntawd, kuj qhia txog tej yam uas lawv tau ua huv tib si. Muaj ib txhia vaj ntxwv uas coj ncaj kuj tau ua phem thiab. Xws li Vaj Ntxwv Daviv. Yehauvas hais tias: “Kuv tus tubtxib Daviv . . . hwm kuv, mloog kuv lus thiab ua raws li tej uas kuv kom nws ua.” (1 Vajntxwv 14:8) Txawm li ntawd los Daviv haj tseem deev luag poj luag sev thiab tuav hauv muab nws tus txiv tua pov tseg tom tshav rog.—2 Xamuyees 11:4, 14, 15.
2 Hos muaj ib txhia vaj ntxwv uas coj tsis ncaj kuj ho ua zoo. Xws li Lehaunpau-as. Yehauvas hais tias Lehaunpau-as “ua kev phem kev qias.” (2 Xwmtxheej Vajntxwv 12:14) Txawm li ntawd los Lehaunpau-as mloog Vajtswv lus kom cia kaum xeem Ixayees xaiv lwm tus vaj ntxwv. Nws kuj txhim kho ntau lub nroog kom tiv thaiv tau Vajtswv cov tib neeg.—1 Vajntxwv 12:21-24; 2 Xwmtxheej Vajntxwv 11:5-12.
3. Zoo rau peb kawm txog qhov lus nug twg, thiab nyob rau hauv zaj kawm no yuav tham txog dab tsi?
3 Zoo rau peb kawm txog qhov lus nug no: Yog tias cov vaj ntxwv uas kav cov Ixayees ua zoo thiab ua phem, Yehauvas ho txiav txim li cas tias tus twg yog tus muab siab npuab nws? Yog peb paub txog qhov no ces peb thiaj paub tias peb yuav tau ua li cas thiaj haum Yehauvas siab. Nyob rau hauv zaj no peb yuav tham txog peb yam uas Yehauvas xav txog thaum nws txiav txim tias tus vaj ntxwv twg yog tus zoo los sis tus phem. Qhov ib, Yehauvas saib seb tus vaj ntxwv ntawd puas hlub nws tag nrho siab ntsws. Qhov ob, thaum tus vaj ntxwv ua ib yam twg tsis yog, nws puas hloov dua siab tshiab tiag. Qhov peb, seb tus vaj ntxwv puas teev tiam Yehauvas kom raws li Yehauvas lub siab nyiam.
HLUB YEHAUVAS TAG NRHO SIAB NTSWS
4. Qhov txawv txav ntawm cov vaj ntxwv coj ncaj thiab cov vaj ntxwv coj tsis ncaj yog li cas?
4 Cov vaj ntxwv ua haum Yehauvas siab yeej hlub Yehauvas kawg lawv lub siab lub ntsws.b Vaj Ntxwv Yehausafas tus uas coj zoo yeej “nrhiav [Yehauvas] kawg siab kawg ntsws.” (2 Xwmtxheej Vajntxwv 22:9) Nyob hauv phau Vajlugkub hais li no txog Yauxiyas tias: “Tej vajntxwv uas nyob ua ntej nws tsis muaj ib tug zoo li nws uas tig kiag los cuag [Yehauvas] kawg siab kawg ntsws kawg dag kawg zog.” (2 Vajntxwv 23:25) Nyob hauv phau Vajlugkub hais li no txog Xalaumoos thaum nws ua phem tias: “Nws tsis muab lub siab npuab [Yehauvas].” (1 Vajntxwv 11:4) Thaum hais txog Anpiyas uas yog ib tug vaj ntxwv coj tsis ncaj, hauv phau Vajlugkub hais tias: “Nws lub siab tsis ncaj tsis dawb huv rau [Yehauvas].”—1 Vajntxwv 15:3.
5. Piav seb qhov uas teev tiam Yehauvas kom tag nrho lub siab lub ntsws yog li cas tiag.
5 Qhov uas ib tug twg teev tiam Yehauvas kom tag nrho lub siab lub ntsws yog li cas tiag? Nws tsis teev tiam Vajtswv kom tag kev tag cai tiam sis yog vim nws hlub thiab hwm Yehauvas. Tsis tas li ntawd, nws yeej yuav hlub thiab hwm Yehauvas mus li kom tag nws sim neej.
6. Yuav ua li cas peb thiaj hlub tau Yehauvas tag nrho peb siab ntsws? (Pajlug 4:23; Mathais 5:29, 30)
6 Cov vaj ntxwv uas coj ncaj tso yam ntxwv li cas rau peb xyaum xwv peb thiaj hlub Yehauvas tag nrho peb siab ntsws? Peb yuav tau zam tej yam ua rau peb tsis npuab siab rau Yehauvas. Xws li peb yuav tau ceev faj txog tej yam uas saib thiab mloog thaum peb nyob xwb, thiab peb yuav tau xaiv tej phooj ywg peb nrog xwv peb thiaj tsis ntshaw nyiaj txiag hauv peb lub neej. Yog peb xam pom tias muaj ib yam twg ua rau peb txoj kev hlub rau Yehauvas tsuag zuj zus ces peb yuav tau hloov peb txoj kev xav thiab tej yam peb ua sai li sai tau xwv peb txoj kev sib raug zoo nrog Yehauvas thiaj li tsis tsuag.—Nyeem Pajlug 4:23; Mathais 5:29, 30.
7. Vim li cas ho tseem ceeb rau peb tsis txhob ua tej yam uas ua rau peb txoj kev hlub rau Yehauvas tsuag?
7 Peb yuav tau tsis txhob muab peb lub siab cais ua ob sab. Yog peb tsis ceev faj, peb yuav xav hais tias vim peb kub siab lug ua Yehauvas tes hauj lwm ces tej kev phem yeej ntxias tsis tau peb. Muab ua piv txwv tias koj tab tom tu koj lub tsev. Yog koj qhib qhov rooj ces cua yuav ntsawj plua plav los rau hauv koj lub tsev. Zoo ib yam li ntawd, tej yam kev phem hauv lub qab ntuj no zoo ib yam li tej plua plav uas peb yuav tau tsis txhob pub nkag los xwv thiaj tsis ua rau peb txoj kev hlub rau Yehauvas tsuag zuj zus mus. Yog li ntawd, tsis yog kub siab lug ua Yehauvas tes hauj lwm xwb ces tau lawm tiam sis peb yuav tsum ua ntau tshaj ntawd.—Efexus 2:2.
HLOOV DUA SIAB TSHIAB
8-9. Vaj Ntxwv Daviv thiab Vaj Ntxwv Hexekhiyas coj li cas xwb thaum raug ntuas? (Saib daim duab.)
8 Vaj Ntxwv Daviv tau ua ib qho kev txhaum loj heev. Tiam sis thaum Nathas tus uas cev Vajtswv lus hais rau Daviv tias Vajtswv xav li cas, Daviv kuj txo hwj chim thiab hloov dua siab tshiab. (2 Xamuyees 12:13) Cov lus uas Daviv sau nyob rau hauv Phau Ntawv Nkauj 51 qhia tias nws yeej tu siab rau tej uas nws tau ua los lawm tiag tiag li. Daviv tsis lam ua txuj hloov dua siab tshiab kom dag tau Nathas los sis kom nws thiaj tsis raug txim.—Phau Ntawv Nkauj 51:3, 4, 17.
9 Vaj Ntxwv Hexekhiyas kuj ua txhaum Yehauvas. Nyob hauv phau Vajlugkub hais tias: “Hexekiyas khavtheeb heev, . . . [Yehauvas] thiaj chim rau nws, rau cov Yudas thiab rau cov neeg hauv lub nroog Yeluxalees.” (2 Xwmtxheej Vajntxwv 32:25) Vim li cas Hexekhiyas ho khav theeb? Tej zaud Yehauvas pub kom nws muaj txiag nplua nuj, pab nws ntaus yeej cov Axilias, los sis kho nws tus mob zoo. Tej zaud Hexekhiyas khav theeb heev nws thiaj qhia nws tej nyiaj txiag rau cov Npanpiloos paub. Yaxayas tus uas cev Vajtswv lus thiaj li qhia rau Hexekhiyas tias Vajtswv tsis txaus siab rau nws. (2 Vajntxwv 20:12-18) Hexekhiyas kuj coj li Daviv es txo hwj chim thiab hloov dua siab tshiab. (2 Xwmtxheej Vajntxwv 32:26) Thaum kawg Yehauvas kuj suav tias “Hexekiyas ua lub neej raws li [Yehauvas] lub siab nyiam.”—2 Vajntxwv 18:3.
Vaj Ntxwv Daviv thiab Vaj Ntxwv Hexekhiyas nkawd txo hwj chim thiab hloov dua siab tshiab thaum raug lwm tus ntuas (Saib nqe 8-9)
10. Vaj Ntxwv Amaxiyas coj li cas xwb thaum raug ntuas?
10 Vaj Ntxwv Amaxiyas uas kav Yudas tsis coj zoo li Daviv thiab Hexekhiyas. Nws ua lub neej raws li Yehauvas lub siab nyiam, “tiamsis nws tsis ua kawg siab kawg ntsws.” (2 Xwmtxheej Vajntxwv 25:2) Yog li ntawd, nws tau ua qhov twg tsis yog lawm? Tom qab Yehauvas pab Amaxiyas kov yeej cov Edoos, nws txawm mus txhos caug teev lawv tej dab mlom.c Thaum tus uas cev Vajtswv lus tuaj ntuas Amaxiyas, Amaxiyas tsis quav ntsej mloog thiab ntiab kom tus cev Vajtswv lus ntawd khiav tawm mus.—2 Xwmtxheej Vajntxwv 25:14-16.
11. Raws li 2 Kauleethaus 7:9, 11, peb yuav tau ua li cas Yehauvas thiaj zam peb lub txim? (Saib cov duab.)
11 Peb khaws tau li cas los ntawm cov yam ntxwv uas hais tas no? Thaum peb ua txhaum, peb yuav tau hloov dua siab tshiab thiab tsis txhob rov qab mus ua dua. Peb yuav coj li cas xwb thaum cov txwj laus los ntuas peb rau tej yam uas peb xav tias tsis loj ua luaj twg? Peb yuav tau tsis txhob xav hais tias Yehauvas tsis hlub peb lawm los sis cov txwj laus tsis nyiam peb. Txawm cov Ixayees tej vaj ntxwv uas coj ncaj los yeej yuav tau raug lwm tus ntuas. (Henplais 12:6) Thaum peb raug qhuab ntuas, peb yuav tau (1) txo hwj chim, (2) hloov tej yam peb ua, thiab (3) rau siab ntso teev tiam Yehauvas kawg peb lub siab lub ntsws. Yog peb hloov dua siab tshiab lawm tiag ces Yehauvas yeej yuav zam txim pub rau peb.—Nyeem 2 Kauleethaus 7:9, 11.
Thaum peb raug qhuab ntuas, peb yuav tau (1) txo hwj chim, (2) hloov tej yam peb ua, thiab (3) rau siab ntso teev tiam Yehauvas kawg peb lub siab lub ntsws (Saib nqe 11)f
TEEV TIAM YEHAUVAS RAWS LI NWS LUB SIAB NYIAM
12. Cov vaj ntxwv uas muab siab npuab Yehauvas txawv ntawm cov vaj ntxwv uas tsis muab siab npuab nws li cas?
12 Cov vaj ntxwv uas Yehauvas suav hais tias muab siab npuab nws yog cov uas teev tiam nws raws li nws xav kom lawv ua. Tsis tas li ntawd, lawv kuj txhawb kom Yehauvas cov tib neeg ua tib yam nkaus li ntawd thiab. Txawm lawv ua tau yuam kev raws li peb kawm los, lawv teev tiam Yehauvas ib leeg xwb thiab lawv sib zog ntsos muab tej dab mlom rhuav pov tseg.d
13. Vim li cas Yehauvas ho suav tias Vaj Ntxwv Ahaj tsis muab siab npuab nws?
13 Cov vaj ntxwv uas Yehauvas suav hais tias tsis muab siab npuab nws tej thaud lawv kuj tsis ua txhua yam phem. Xws li tom qab Vaj Ntxwv Ahaj hnov tias tau muab Nanpaus tua tuag lawm vim yog tim nws, kuj ua rau nws txo hwj chim thiab ua rau nws mluas mluas. (1 Vajntxwv 21:27-29) Nws kuj tau tsa muaj tej zej zog thiab ntaus yeej ntau ntsuj rog. (1 Vajntxwv 20:21, 29; 22:39) Tiam sis yam uas Ahaj ua phem tshaj yog cia nws tus poj niam ntxias nws mus pe hawm tej dab mlom. Nws kuj tsis kam hloov siab txog qhov no.—1 Vajntxwv 21:25, 26.
14. (1) Vim li cas Yehauvas ho suav tias Vaj Ntxwv Lehaunpau-as tsis muab siab npuab nws? (2) Feem coob cov vaj ntxwv uas tsis muab siab npuab Yehauvas coj tau sib thooj li cas?
14 Cia peb mus tham txog Vaj Ntxwv Lehaunpau-as uas tsis muab siab npuab Yehauvas. Nws yeej ua tau ntau yam zoo thaum nws kav tiam sis thaum nws roog nom tswv muaj zog heev, nws txawm tso Yehauvas tej kev cai tseg thiab mus pe tej dab mlom. (2 Xwmtxheej Vajntxwv 12:1) Nws pheej ua xyem xyav pe Yehauvas ib ntus thiab mus pe tej dab mlom. (1 Vajntxwv 14:21-24) Lehaunpau-as thiab Ahaj nkawd tsis yog ob tug vaj ntxwv uas tso Yehauvas txoj kev teev tiam tseg xwb, feem coob cov vaj ntxwv uas tsis muab siab npuab Yehauvas mus pe dab mlom thiab haj tseem txhawb kom lwm tus nrog lawv ua thiab. Rau Yehauvas mas tus vaj ntxwv zoo thiab phem ntawd yog nyob ntawm seb lawv pe hawm nws li cas.
15. Vim li cas txoj kev teev tiam tseem ceeb ua luaj rau Yehauvas?
15 Yehauvas saib txoj kev teev tiam nws tseem ceeb heev. Ib yam ntawd yog vim Yehauvas xav kom cov vaj ntxwv pab tej pej xeem teev tiam Nws raws li Nws pom zoo. Tsis tas li ntawd, cov uas teev tiam tej vajtswv cuav yeej ua tau ntau yam kev txhaum loj thiab ua tsis ncaj rau lwm tus. (Hauxeyas 4:1, 2) Ntxiv ntawd, cov Ixayees tej vaj ntxwv thiab cov neeg Ixayees puav leej muab lawv tus kheej cob rau Yehauvas. Nyob rau hauv phau Vajlugkub thiaj hais tias thaum lawv mus pe tej vajtswv cuav, zoo ib yam li lawv mus sib daj sib dee nrog lwm tus. (Yelemis 3:8, 9) Thaum ib tug tib neeg twg mus ua kev nkauj kev nraug mas ua rau nws tus txij nkawm mob siab heev. Zoo ib yam li ntawd, thaum ib tug uas muab nws tus kheej cob rau Yehauvas lawm mus pe tej vajtswv cuav mas ua rau Yehauvas mob siab heev.e—2 Kevcai 4:23, 24.
16. Yehauvas saib tus neeg ncaj ncees txawv ntawm tus neeg lim hiam li cas?
16 Peb khaws li cas los ntawm tej no? Peb yuav tau txwv txhua yam uas muaj feem nrog kev ntseeg cuav. Tsis tas li ntawd, peb yuav tau teev tiam Yehauvas raws li nws lub siab nyiam thiab rau siab ntso ua nws tes hauj lwm. Malakis tus uas cev Vajtswv lus hais meej meej txog tus neeg ncaj ncees seb nws txawv deb npaum li cas ntawm tus neeg lim hiam. Malakis sau tias: “Kuv haivneeg yuav pom cov neeg ncaj ncees thiab cov neeg ua phem ua qias dua ib zaug ntxiv saib sib txawv li cas, cov neeg uas ua kuv tes haujlwm thiab cov neeg uas tsis ua, saib sib txawv li cas.” (Malakis 3:18) Yog li ntawd, peb yuav tau tsis txhob cia ib yam dab tsi, tsis hais peb tej kev txaug kev txhaum los sis tej yam peb ua yuam kev txo tau peb kom tsis txhob teev tiam Yehauvas lawm. Thaum peb tseg tsis teev tiam Yehauvas ces yog ib qho txhaum loj heev.
17. Vim li cas peb yuav tau ua tib zoo xav txog tus neeg uas peb xav yuav ua txij ua nkawm?
17 Yog koj tab tom nrhiav ib tug txij nkawm, Malakis cov lus yuav pab kom koj nrhiav tau ib tug txij nkawm zoo rau koj. Yog tias ib tug tib neeg coj cwj pwm zoo tiam sis nws tsis teev tiam Yehauvas, Yehauvas puas suav tias nws ncaj ncees? (2 Kauleethaus 6:14) Yog koj yuav tus koj xaiv ntawd, nws puas pab kom koj rau siab ntso teev tiam Yehauvas? Nco ntsoov tias thaum ub Vaj Ntxwv Xalaumoos yuav ntau tus poj niam uas tej zaud kuj coj cwj pwm zoo tiam sis lawv tsis ntseeg Yehauvas. Ntev mus ntev tuaj lawv txawm ntxias tau Xalaumoos mus pe hawm lawv tej vaj tswv cuav.—1 Vajntxwv 11:1, 4.
18. Cov niam txiv yuav tau cob qhia lawv cov me nyuam li cas?
18 Cov niam txiv, nej kuj siv tau cov vaj ntxwv uas hais hauv phau Vajlugkub tej yam ntxwv los mus cob qhia nej cov me nyuam kom kub siab lug teev tiam Yehauvas. Pab kom nej cov me nyuam pom tias cov vaj ntxwv uas Yehauvas txaus siab rau yog cov uas teev tiam Nws thiab txhawb kom tej pej xeem teev tiam Nws. Nco ntsoov tias me nyuam kawm los ntawm tej nej hais thiab nej ua. Yog li ntawd, lawv yuav tsum pom hais tias nej saib tej yam xws li kawm Vajlugkub, mus kev sib txoos, thiab mus qhia Vajlugkub tseem ceeb heev rau nej lub neej. (Mathais 6:33) Tsis li ces nej cov me nyuam yuav lam ua Yehauvas ib tug Tim Khawv vim neb ob niam txiv ntseeg Yehauvas. Tej zaud lawv yuav xav tias teev tiam Yehauvas tsis tseem ceeb ua luaj twg los sis lawv yuav tso Yehauvas tseg los kuj muaj.
19. Cov uas tsis teev tiam Yehauvas lawm muaj kev vam kev cia siab li cas? (Saib lub ntsiab “Koj Yeej Rov Los Cuag Tau Yehauvas!”)
19 Yog ib tug twg tsis kam teev tiam Yehauvas lawm, puas yog nws yuav ua tsis tau Yehauvas ib tug phooj ywg li lawm? Nws yeej ua tau yog tias nws hloov dua siab tshiab thiab rov qab los teev tiam Yehauvas. Qhov nws yuav ua tau li no yog nws yuav tau txo hwj chim thiab cia cov txwj laus hauv lub koom txoos pab nws. (Yakaunpaus 5:14) Yeej tsim nyog rau nws ua txhua yam kom rov qab los ua Yehauvas ib tug phooj ywg dua!
20. Yog peb xyaum cov vaj ntxwv uas muab siab npuab Yehauvas ces Yehauvas yuav xav li cas txog peb?
20 Peb khaws tau li cas los ntawm cov Ixayees tej vaj ntxwv? Peb yuav zoo ib yam li cov vaj ntxwv uas muab siab npuab Yehauvas yog tias peb teev tiam Yehauvas kawg peb lub siab lub ntsws. Txawm peb ua tau yuam kev lawm los tsis txhob rov ua dua, hloov dua siab tshiab, thiab cia li kho tej yam uas yuav tau kho. Cia peb nco ntsoov tias tseem ceeb heev uas peb teev tiam Yehauvas ib leeg nkaus nkaus xwb. Yog tias koj muab siab npuab Yehauvas, nws yuav suav tias koj ncaj ncees heev rau nws.
ZAJ NKAUJ 45 Tej Nyob Nraim Nkoos Hauv Nruab Siab
a Nyob rau hauv zaj kawm no thaum hais txog “cov vaj ntxwv uas kav cov Ixayees” yog hais txog cov vaj ntxwv uas kav Yehauvas cov tib neeg, tsis hais cov uas kav ob xeem Yudas, kaum xeem Ixayees, los sis tag nrho 12 xeem.
b TXHAIS TAWM: Nyob hauv phau Vajlugkub, thaum hais txog “lub siab” yog hais txog tus neeg hauv nruab nrog. Qhov no yog yus tej kev ntshaw, kev xav, tus cwj pwm, lub siab kub lug xav ua ib yam dab tsi, thiab tej hom phiaj yus yuav ua kom tiav.
c Nyob rau lub sij hawm ntawd, lwm haiv neeg ib tug twg tej vaj ntxwv kov yeej ib lub teb chaws twg mas nws yeej mus pe lub teb chaws ntawd tej vajtswv.
d Vaj Ntxwv Axas ua txhaum loj heev. (2 Xwmtxheej Vajntxwv 16:7, 10) Tiam sis nyob hauv phau Vajlugkub hais tias Axas ua tau qhov yog rau ntawm Yehauvas. Thaum Axas raug ntuas, nws yeej tsis mloog thaum chiv thawj tiam sis tej zaum tom qab ntawd nws kuj mloog lawm. Yehauvas pom Axas ua qhov zoo ntau dua li qhov phem. Tsis tas li ntawd, Axas tsuas teev tiam Yehauvas tib leeg nkaus nkaus xwb thiab nws kuj nrhiav kev los muab tej dab mlom rhuav pov tseg kom tas.—1 Vajntxwv 15:11-13; 2 Xwmtxheej Vajntxwv 14:2-5.
e Nyob rau hauv Mauxes Txoj Kev Cai, thawj ob nqes yog txwv kom tsis pub mus pe hawm ib tug twg los sis ib yam dab tsi tshwj tsis yog Yehauvas.—Khiav Dim 20:1-6.
f COV DUAB: Ib tug txwj laus uas tseem hluas txhawj txog ib tug kwv tij vim tus kwv tij pheej haus cawv. Tus kwv tij kuj txo hwj chim mloog cov lus ntuas, hloov tej nws ua, thiab rau siab ntso teev tiam Yehauvas.