Tej Uas Peb Xav Paub
Hauv 1 Timautes 5:21 “cov timtswv ceebtsheej uas Vajtswv twb xaiv cia lawm” yog cov twg?
Povlauj sau mus rau Timautes uas yog ib tug txwj laus tias, “Timautes, koj yuav tsum ua raws li tej lus uas kuv qhia rau koj no, koj tsis txhob xaiv leejtwg ntsejmuag. Txhua yam uas koj ua, koj yuav tsum ua rau sawvdaws ib yam nkaus. Tej lus uas kuv qhia koj no, tus Tswv Yexus Khetos thiab cov timtswv ceebtsheej uas Vajtswv twb xaiv cia lawm puavleej paub huv tibsi.”—1 Timautes 5:21.
Cov tim tswv los sis cov tub txib no yog leej twg? Cov tub txib no tsis yog cov 144,000 leej. Rau qhov thaum Povlauj sau mus rau Timautes, Vajtswv tseem tsis tau tsa cov xaiv tseg mus nyob saum ntuj. Yog li ntawd, cov “timtswv ceebtsheej uas Vajtswv twb xaiv cia lawm” tsis yog cov 144,000 leej.—1 Kauleethaus 15:50-54; 1 Thexalaunikes 4:13-17; 1 Yauhas 3:2
Cov tub txib ntawd kuj tsis yog cov uas ntxeev siab rau Yehauvas lub caij muaj dej dag nyab ntiaj teb. Cov tub txib ntxeev siab ntawd tuaj Xatas tog tas lawm. Lawv yog cov dab uas Yexus tawm tsam. (Chivkeeb 6:2; Lukas 8:30, 31; 2 Petus 2:4) Yav tom ntej lawv yuav raug pov mus rau hauv lub qhov tob tob puv 1,000 xyoo ces tom qab ntawd lawv yuav raug rhuav tshem nrog Dab Ntxwg Nyoog.—Yudas 6; Tshwmsim 20:1-3, 10.
Yog li ntawd, cov tub txib uas Povlauj hais txog no yuav tsum yog cov tub txib saum ntuj uas txhawb nqa Vajtswv thiab Yexus Khetos, nqe no kuj hais txog nkawd thiab.
Cov tub txib uas muab siab npuab Yehauvas coob heev suav tsis txheeb. (Henplais 12:22, 23) Cov tub txib nyias muaj nyias ib teg hauj lwm. (Tshwmsim 14:17, 18) Nco ntsoov tias Yehauvas txib kom ib tug tub txib saum ntuj mus tua 185,000 tus tub rog Axilias. (2 Vajntxwv 19:35) Tiam sis tej zaum Yehauvas yuav txib coob tus tub txib saum ntuj mus “muab txhua tus uas txw kom tib neeg ua txhaum thiab ua lim hiam tshem tawm hauv nws lub Nceeg Vaj mus.” (Mathais 13:39-41) Hos tej zaum ib txhia yuav mus “qaws cov uas Vajtswv xaiv tseg uas nyob plaub ceg kaum ntuj los ua ke.” (Mathais 24:31) Tej zaum ib txhia yuav tsom kwm thiab tiv thaiv peb rau txhua txoj kev.—Phau Ntawv Nkauj 91:11; Mathais 18:10; muab piv rau Mathais 4:11; Lukas 22:43.
Tej zaum cov tub txib saum ntuj uas Povlauj hais txog hauv 1 Timautes 5:21 yog cov uas saib xyuas cov koom txoos. Thaum peb nyeem tag nrho tshooj no peb pom tias Povlauj ntuas cov txwj laus seb yuav leg hauj lwm li cas. Tiam sis nws kuj hais tias cov nyob hauv lub koom txoos yuav tsum hwm cov txwj laus thiab. Povlauj hais tias cov txwj laus yuav tsum txhob xaiv ntsej muag. Tsis tas li ntawd xwb, lawv yuav tsum ua tib zoo xav ua ntej lawv txiav txim rau ib yam twg. Povlauj hais tias zoo rau lawv mloog nws tej lus vim Vajtswv, Yexus Khetos, thiab cov tub txib saum ntuj ntsia ntsoov seb cov txwj laus saib xyuas lub koom txoos li cas. Cov txwj laus leg hauj lwm rau lub koom txoos tab meeg lawv. Qhov no qhia li cas rau peb? Qhia tias ib txhia tub txib saum ntuj tes hauj lwm yog los tu lub koom txoos, xws li los tiv thaiv, coj kev tshaj tawm, thiab qhia tej uas lawv pom rau Yehauvas.—Mathais 18:10; Tshwmsim 14:6.