Zoo Rau Peb Nyob Ze Cov Kwv Tij Nkauj Muam!

1-2. Yehauvas xav kom peb coj li cas rau lwm tus, thiab nws kuj xav kom peb ua dab tsi?

YEHAUVAS xav kom peb coj zoo rau txhua leej txhua tus. Thaum Yexus nyob hauv ntiaj teb no nws qhia kom peb yuav tsum hlub tej kwv tij zej zog ib yam li peb hlub peb tus kheej. (Mathais 22:37-39) Qhov no kuj yog hais rau cov uas tsis ntseeg ib yam li peb thiab. Thaum peb ua li no twb yog peb xyaum Vajtswv Yehauvas tus yam ntxwv. Nws “ua lub hnub ci rau cov neeg zoo cov neeg phem huv si. Thiab nws tso nag los rau cov neeg ncaj cov neeg nkhaus huv si.”​—Mathais 5:45.

² Txawm tias Yehauvas hlub txhua tus tib neeg los nws yim huab hlub cov uas mloog nws lus. (Yauhas 14:21) Yehauvas xav kom peb xyaum nws tus yam ntxwv es hlub cov kwv tij nkauj muam Khixatias. Nws thiaj li txhawb kom peb “ib leej yuav tsum hlub ib leeg tiag tiag” thiab “ib leeg mob siab ib leeg tiag tiag.” (1 Petus 4:8; Loos 12:10) Txoj kev hlub peb tham no yog kom peb hlub cov kwv tij nkauj muam ib yam li tej nruab ze los sis tej phooj ywg uas peb niaj hnub nrog.

3. Peb yuav tau nco ntsoov li cas txog kev hlub?

³ Peb txoj kev hlub rau lwm tus muab piv ib yam li tej tshuaj rau qaib uas cog rau tej tog vaj tog tsev uas peb yuav tau tu ntshis thiaj zoo taus. Tus tub txib Povlauj ntuas cov Khixatias li no: “Cov ntseeg ib tug yuav tsum hlub ib tug ib yam li kwvtij sib hlub.” (Henplais 13:1) Yehauvas xav kom peb nyias nthua ntshis nyias txoj kev hlub rau lwm tus. Nyob rau hauv zaj kawm no yuav tham seb vim li cas peb yuav tau nyob ze cov kwv tij nkauj muam thiab seb peb yuav ua tau li ntawd li cas mus li.

VIM LI CAS PEB YUAV TAU NYOB ZE COV KWV TIJ NKAUJ MUAM?

4. Raws li Phau Ntawv Nkauj 133:1, yuav ua li cas peb thiaj saib peb ib tsoom kwv tij nkauj muam rau nqi? (Saib cov duab.)

⁴ Nyeem Phau Ntawv Nkauj 133:1. Peb yeej xav ib yam li tus sau phau ntawv nkauj tau hais tias nrog cov neeg uas hlub Yehauvas ua phooj ywg yeej “zoo” thiab ua rau yus “muaj kev zoo siab heev.” Zoo ib yam li ib tug tib neeg uas saib tsob ntoo uas nws muaj tsis muaj nuj nqis vim niaj hnub nyob rau ntawd, tej zaud peb kuj saib cov kwv tij nkauj muam tsis khuab qhov muag ua luaj twg vim peb pom lawv txhua lub lim tiam. Yuav ua li cas peb thiaj saib lawv rau nqi? Peb txoj kev hlub rau cov kwv tij nkauj muam yuav loj zuj zus yog tias peb siv sij hawm los xav tias lawv tseem ceeb npaum li cas hauv lub koom txoos thiab rau peb.

5. Thaum tib neeg pom peb ib leeg hlub ib leeg, ho pab tau lawv li cas?

⁵ Muaj tej tug uas tuaj peb tej kev sib txoos thawj zaug nyiam qhov uas peb ib leeg hlub ib leeg kawg li. Thaum lawv pom li ntawd mas ua rau lawv pom tias peb thiaj yog cov tseem Khixatias. Yexus hais tias: “Yog nej sib hlub li no ces sawv daws yuav paub tias nej yog kuv cov thwj tim.” (Yauhas 13:35) Cia peb mus tham txog ib tug ntxhais kawm ntawv qeb siab hu ua Tshaitas (Chaithra). Nws kawm Vajlugkub nrog Yehauvas Cov Tim Khawv. Nws kuj kam nrog lawv mus lub rooj sib txoos. Tom qab thawj hnub, nws hais rau tus qhia Vajlugkub rau nws tias: “Kuv niam thiab kuv txiv twb tsis puag kuv ib zaug li. Tiam sis thawj hnub kuv nrog nej mus twb muaj neeg puag kuv 52 zaug lawm! Kuv xam pom tias Yehauvas siv nws cov tib neeg los qhia nws txoj kev hlub rau kuv mas kuv nrog lawv ua ke tsis dhuav li.” Tshaitas kuj rau siab kawm Vajlugkub thiab ua kev cai raus dej rau xyoo 2024. Zaj no qhia tau tias thaum lwm tus pom peb tes hauj lwm, xws li qhov uas peb ib leeg hlub ib leeg ces yuav rub tau kom lawv los nrog peb teev tiam Yehauvas ua ke.​—Mathais 5:16.

6. Nyob ze cov kwv tij nkauj muam ho tiv thaiv tau peb li cas?

⁶ Qhov uas peb nyob ze cov kwv tij nkauj muam yuav tiv thaiv peb. Povlauj hais li no rau cov Khixatias tias: “Nej ib leeg yuav tsum niaj hnub pab ib leeg . . . yog nej ua li ntawd, kev txhaum yuav ntxias tsis tau nej ib tug twg ua neeg tawv ncauj.” (Henplais 3:13) Yog tias peb txoj kev ntseeg tsuag lawm es peb tsis xav ua li Yehauvas lub siab nyiam ces tej zaum Yehauvas yuav rub cov kwv tij nkauj muam lub siab kom pab txhawb peb lub zog. (Phau Ntawv Nkauj 73:2, 17, 23) Tej kev txhawb yam li no yeej pab tau peb lawm hov ntau.

7. Kev hlub pab tau kom muaj kev sib koom siab li cas? (Kaulauxais 3:13, 14)

⁷ Peb muaj ib feem nrog cov tib neeg uas sib zog ntsos txhawb nqa kom ib leeg hlub ib leeg. Yog li ntawd, peb thiaj tau txais ntau yam koob hmoov. (1 Yauhas 4:11) Xws li kev hlub pab kom peb “ib leeg ua siab ntev rau ib leeg.” Ua li no peb thiaj sib koom siab. (Nyeem Kaulauxais 3:13, 14; Efexus 4:2-6) Ces thaum peb mus rau peb tej kev sib txoos, sawv daws puav leej coj cwj pwm zoo zoo, tsis thooj li lwm pab lwm pawg hauv ntiaj teb no.

IB LEEG HWM IB LEEG

8. Yehauvas pab kom peb muaj kev sib koom siab li cas?

⁸ Tos peb muaj txoj kev sib koom siab nrog peb cov kwv tij nkauj muam thoob qab ntuj los, yeeb vim yog muaj Yehauvas. Txawm peb yog noob txaug neeg txhaum los Yehauvas yog tus pab kom peb muaj kev sib haum xeeb. (1 Kauleethaus 12:25) Nyob hauv phau Vajlugkub hais tias: “Vajtswv twb qhia rau nej lawm hais tias ib tug yuav tsum hlub ib tug.” (1 Thexalaunikes 4:9) Raws li nqe no hais, Yehauvas qhia meej meej seb peb yuav ua li cas rau li cas ib leeg thiaj yuav nyob ze tau rau ib leeg. Yuav kom peb ua tau raws li Yehauvas cob qhia, peb yuav tau ua tib zoo tshuaj nws Txoj Lus thiab muab coj los siv rau hauv lub neej. (Henplais 4:12; Yakaunpaus 1:25) Yehauvas Cov Tim Khawv yeej xyaum coj lub neej yam li no.

9. Loos 12:9-13 pab kom peb ib leeg hwm ib leeg li cas?

⁹ Vajtswv Txoj Lus cob qhia kom peb ib leeg nyob ze tau rau ib leeg li cas? Cia peb ua tib zoo tshuaj Povlauj cov lus nyob rau hauv Loos 12:9-13. (Nyeem.) Nyob rau cov nqe no Povlauj hais tias “cia li xub hwm luag, txhob tos luag hwm yus.” Nws yog hais li cas tiag? Nws tus nru lus yog peb yuav tau ntaus thawj hlo “mob siab” lwm tus xws li zam lwm tus lub txim, txawj tos txais qhua, thiab zoo siab pub rau lwm tus. (Efexus 4:32) Tsis txhob tos kom cov kwv tij nkauj muam los cuag koj tiam sis koj yuav tau “xub” mus cuag lawv. Yexus hais tias: “Thaum yus pub rau luag, yus zoo siab dua li thaum luag pub rau yus.”​—Tes Hauj Lwm 20:35.

10. Ua li cas peb thiaj yog ib tug neeg nquag pab lwm tus? (Saib daim duab.)

¹⁰ Tom qab kiag uas Povlauj hais kom peb xub hwm luag, nws txhawb kom peb “cia li nquag ua hauj lwm, txhob tub nkeeg.” Ib tug neeg nquag yeej kub siab lug ua hauj lwm. Thaum txib kom nws ua ib yam twg los nws yeej ua tiav tag nrho. Nyob hauv Pajlug 3:27, 28 hais tias: “Yog muaj tej yam uas koj pab tau lwm tus, cia li pab tsis txhob muab khaws cia.” Yog li ntawd, thaum peb pom ib tug twg xav tau kev pab, peb yuav tau maj nroos mus pab nws. Peb yuav tau tsis txhob ua lub siab hnyav thiab tsis txhob nkaum tes es muab tso rau lwm tus.​—1 Yauhas 3:17, 18.

11. Dab tsi ho pab tau kom peb ib leeg nyob ze ib leeg?

¹¹ Ib yam uas peb hwm lwm tus yog maj nroos zam tus ntawd lub txim thaum nws ua tau ib yam twg yuam kev rau peb. Nyob hauv Efexus 4:26 hais tias: “Yog thaum twg nej chim, nej tsis txhob pub qhov uas nej chim ntawd ua rau nej ua txhaum thiab tsis txhob chim tas hnub.” Vim li cas ho hais li ntawd? Nqe 27 hais tias “tsis txhob cia dab Ntxwgnyoog tau kev ntxias nej.” Nyob hauv Vajtswv Txoj Lus, Vajtswv yeej txhawb kom peb zam lwm tus lub txim tag los rov zam dua. Nyob hauv Kaulauxais 3:13 hais tias “nej ib tug yuav tsum zam txim rau ib tug.” Yog peb sib zam ces peb yuav sib raug zoo dua. Thaum peb ua li no ces peb coj raws li Efexus 4:3 uas hais tias: “Vajtswv [lub hwj huam] twb ua rau nej sib raug zoo lawm, thiab qhov uas nej sib raug zoo ntawd, twb rub nej los nyob ua ke sib haum lawm.” Yog li ntawd, txoj kev sib zam yeej pab tau kom Yehauvas cov tib neeg huab yam sib koom siab thiab nyob kaj siab lug.

12. Yehauvas pab kom peb zam lwm tus lub txim li cas?

¹² Tej zaum yuav nyuaj rau peb zam cov ua tau yuam kev rau peb lub txim. Tiam sis Vajtswv lub hwj huam dawb huv yuav pab tau peb. Tom qab Povlauj txhawb kom peb “mob siab” lwm tus thiab “nquag ua hauj lwm,” nyob hauv phau Vajlugkub hais ntxiv tias: “Cia lub hwj huam dawb huv txhib ntshis koj.” Nqe no qhia tias Vajtswv lub hwj huam dawb huv kuj ua tau rau kom peb kub siab lug xav ua qhov zoo. (Loos 12:11) Yog li ntawd, Vajtswv lub hwj huam dawb huv yeej pab tau kom peb txawj mob siab lwm tus thiab txaus siab hlo zam lwm tus lub txim. Vim li no peb thiaj yuav tau thov kom Yehauvas pab peb.​—Lukas 11:13.

“NEJ TSIS TXHOB SIB CAIS UA PAB UA PAWG”

13. Dab tsi ho cais tau peb kom ua pab ua pawg?

¹³ Nyob hauv lub koom txoos yeej muaj ntau haiv neeg thiab ntau xeem neeg uas nyias loj hlob txawv nyias. (1 Timautes 2:3, 4) Tej thaud peb yuav txiav txim siab ua ub ua no tsis thooj li lwm tus uas tsis tau hla Vajtswv tej kev cai. Xws li tej khaub ncaws peb hnav, xaiv kev kho mob los sis tej yam peb saib thiab mloog. Yog peb tsis ua zoo faj, tej thaud peb yuav cia tej no los muab peb cais. (Loos 14:4; 1 Kauleethaus 1:10) Vajtswv xav kom peb ib leeg hlub ib leeg. Yog li ntawd, peb tsis txhob muab tej yam uas peb nyiam coj los yuam kom lwm tus ua ib yam li peb ua.​—Filipis 2:3.

14. Peb yuav tau ua dab tsi, thiab vim li cas?

¹⁴ Koj yuav tau nrhiav kev los txhawb lwm tus txhua lub sij hawm xwv koj thiaj pab tau kom cov nyob hauv lub koom txoos txhob cais ua pab ua pawg. (1 Thexalaunikes 5:11) Tsis ntev tas los no ib co tib neeg uas tsis tau mus kev sib txoos thiab tshaj tawm tau ntev loo los sis cov uas raug tshem tawm kuj rov qab los nrog peb pe hawm Yehauvas. Peb yeej tos txais lawv txhua tus! (2 Kauleethaus 2:8) Muaj ib tug muam uas tsis tuaj kev sib txoos thiab mus tshaj tawm tau 10 xyoo rov qab tuaj hauv lub Tsev Nceeg Vaj. Nws hais tias, “Txhua tus luag ntxhi tos txais kuv.” (Tes Hauj Lwm 3:19) Qhov uas sawv daws coj li no pab tau nws li cas? Nws hais tias, “Zoo yam li Yehauvas pab kom kuv rov qab muaj kev zoo siab.” Thaum peb txhawb lwm tus li hais no ces twb yog peb cia Khetos siv peb mus pab nplig “cov uas khwv iab khwv daw thiab ris nra hnyav hnyav.”​—Mathais 11:28, 29.

15. Muaj dab tsi ntxiv yuav pab tau kom lub koom txoos sib koom siab? (Saib daim duab.)

¹⁵ Ib qho uas pab tau kom peb muaj kev sib koom siab yog maj mam xav maj mam hais peb tej lus. Zoo ib yam li ib tug ua zaub mov noj nyiam saj nws tej khoom noj ua ntej nws muab rau lwm tus noj, peb los yuav tau ua tib zoo xaiv peb tej lus ua ntej peb yuav hais rau lwm tus. (Yauj 12:11; Phau Ntawv Nkauj 141:3) Peb xav kom thaum peb hais ib los twg mas txhawb tau lwm tus lub zog, ua rau lawv zoo siab, thiab “muaj nqis rau cov uas mloog.”​—Efexus 4:29.

16. Leej twg yog cov uas yuav tau nco ntsoov hais lus los txhawb lwm tus?

¹⁶ Cov txiv tsev thiab cov niam txiv yuav tau ua tib zoo xaiv lawv tej lus kom thiaj txhawb tau lwm tus. (Kaulauxais 3:19, 21; Titus 2:4) Tsis tas li ntawd, cov txwj laus los yuav tau ua tib zoo hais thiab txhawb Yehauvas cov yaj. (Yaxayas 32:1, 2; Kalatias 6:1) Nyob hauv Pajlug 15:23 hais tias: “Lo lus teb zoo ua rau luag zoo siab.”

“PEB YUAV TSUM PAB LAWV” THIAJ YOG KEV HLUB

17. Yuav ua li cas peb thiaj qhia tau tias peb hlub cov kwv tij nkauj muam tawm plaws hauv nruab siab tuaj?

¹⁷ Tus tub txib Yauhas txhawb kom peb “tsis txhob hlub luag ntawm lub ncauj lo lus xwb; tiamsis peb yuav tsum pab lawv.” (1 Yauhas 3:18) Peb yuav tau hlub cov kwv tij nkauj muam tawm plaws hauv nruab siab tuaj. Yuav ua li cas peb thiaj txawj hlub tau lawv? Yog peb yim nrog lawv ua ke ces peb yim ncawg lawv zuj zus thiab peb txoj kev sib hlub yuav tawg paj txi txiv. Yog li ntawd, lauj sij hawm los nrog lawv ua ke xws li ntawm kev sib txoos, mus tshaj tawm txoj xov zoo los sis mus xyuas lawv. Yog peb ua li no ces twb yog peb cia Vajtswv cob qhia peb kom txawj hlub lwm tus. (1 Thexalaunikes 4:9) Ntxiv ntawd, peb yuav pom tias ‘nyob ua ke li tej kwvtij yog ib qho uas zoo thiab ua rau [peb] muaj kev zoo siab heev.’​—Phau Ntawv Nkauj 133:1.