Peb Yeej Coj Tau Dawb Huv

1. Coob leej ntau tus xav li cas?

LUB qab ntuj no puv ntia txojkev plees kev yi. Tej kev lag kev luam, tej ntaub tej ntawv, tej nkauj, thiab tej yeeb yaj kiab nyiam tso tawm kev plees kev yi ntau xwb. Coob leej kuj xav tias tsis txhaum rau lawv nrog ib tug uas tsis yog lawv tus txij nkawm pw ua ke. Lawv ntseeg tias txivneej deev txivneej, pojniam deev pojniam yeej tsis txhaum dabtsi li. (Ntawv Nkauj 12:8) Tiamsis Yehauvas yuav pab kom peb coj tau lub neej zoo haum nws siab. Txawm tias tej kev plees kev yi nyob puag ncig peb los, peb yeej coj tau lub neej dawb huv.​—Nyeem 1 Thexalaunika 4:3-5.

2, 3. (1) Vim li cas peb yuav tsum tswj peb lub siab? (2) Peb yuav kawm txog dabtsi hauv zaj no?

² Yuav kom peb ua tau haum Yehauvas siab, peb yuav tsum ntxub txhua yam uas Yehauvas ntxub. Vim peb yog neeg txhaum, tej zaum peb yuav muaj ib nplooj siab uas ntshaw kev plees kev yi. Txojkev plees kev yi zoo ib yam li tej rau sua uas ntxias kom peb mag ntxiab. Yog peb lub siab pib ntshaw tej yam tsis dawb huv, peb yuav tsum tswj peb lub siab tiag. Txhob xav txog tej yam phem li ntawd. Yog peb tsis tswj peb lub siab tiag, ntev mus tej uas peb ntshaw ntawd yuav huam loj tuaj ces yuav coj peb mus ua txhaum. Phau Vajlugkub thiaj qhia tias: “Thaum xeeb txojkev ntshaw lawm kuj yug tau txojkev txhaum los.”​—Nyeem Yakaunpau 1:14, 15.

³ Yog peb tsis ceev faj ces peb yuav pib ntshaw tej yam uas txhaum rau Vajtswv. Tej kev ntshaw ntawd muaj peevxwm nrhau cag rau hauv peb lub siab. Thiaj li tseem ceeb ua luaj rau peb tswj peb lub siab thiab muab tej kev ntshaw ntawd dob pov tseg. Yog tias peb tswj peb lub siab, ces peb yuav tsis qaug rau kev plees kev yi thiab raug lwm yam kev nyuaj siab. (Kalatia 5:16) Peb yuav kawm txog 3 yam hauv zaj no: (1) peb txojkev sib raug zoo nrog Yehauvas; (2) tej lus ntuas hauv phau Vajlugkub; thiab (3) kev pab los ntawm cov Khixatia uas paub tab. Peb yam no yuav pab kom peb txhob xav txog tej yam uas tsis dawb huv.

“TXAV LOS ZE VAJTSWV”

4. Thaum peb txav ze rau Yehauvas, peb yuav coj li cas?

⁴ Phau Vajlugkub qhia tias cov uas xav txav ze rau Vajtswv yuav tsum ‘ntxuav lawv txhais tes’ thiab ‘ntxuav lawv lub siab kom dawb huv.’ (Yakaunpau 4:8) Yog peb xav txav ze rau Yehauvas thiab nrog nws ntaus phoojywg ces peb yuav coj li cas? Peb yuav ua neeg dawb huv kom Vajtswv txaus siab rau peb. Tsis yog peb lam coj zoo sab nraud xwb, tiamsis peb yuav tau tswj peb lub siab kom xav txog tej yam dawb huv thiab. (Ntawv Nkauj 24:3, 4; 51:6; Filipi 4:8) Yehauvas paub tias tibneeg txhaum yeej muaj ib nplooj siab uas ntxhi tas zog kom mus ua kev phem kev qias. Twb yog vim li ntawd peb thiaj nrog peb lub siab sib qhau tas zog. Peb xav muab tej yam phem ntawd dob pov tseg, xwv thiaj tsis nrhau cag hauv peb nruab siab. Peb yeej tsis xav ua rau Yehauvas tu siab rau peb.​—Chiv Keeb 6:5, 6.

5, 6. Kev thov Vajtswv pab tau peb li cas?

⁵ Yog tias peb thov Yehauvas tsis tseg tsis tu, nws yuav pab peb kov yeej nplooj siab uas ntshaw ua phem. Nws yuav pub nws lub hwj huam dawb huv rau peb kom peb ua tau neeg dawb huv. Cia li qhia rau Yehauvas tias peb xav tau lub siab dawb huv uas nws pom zoo. (Ntawv Nkauj 19:14) Peb yuav tsum txo hwjchim thov kom Yehauvas tshuaj peb lub siab, seb puas muaj ib yam dabtsi rub tau peb mus ua txhaum. (Ntawv Nkauj 139:23, 24) Kuj zoo rau peb thov Yehauvas pab kom peb khiav deb ntawm tej kev phem kev qias, peb thiaj coj tau zoo txawm tias nyuaj npaum li cas los xij.​—Mathai 6:13.

⁶ Thaum tibneeg tsis tau paub txog Yehauvas, feem coob nyiam ua tej yam uas Yehauvas ntxub. Thaum peb los paub Yehauvas lawd, tej zaum peb lub siab tseem tshua txog tej ntawd. Tiamsis Yehauvas yeej pab tau peb. Xav txog lub sijhawm uas Vajntxwv Davi nrog Npasenpa ua txhaum kev nkauj kev nraug. Davi lees txim rau Yehauvas thiab taij thov kom Yehauvas zam nws lub txim. Nws thov kom Yehauvas “tsim lub siab dawb huv rau hauv” nws, xwv nws thiaj mloog Yehauvas lus. (Ntawv Nkauj 51:10, 12) Tej zaum lub siab uas ntshaw kev phem kev qias muaj zog heev. Tiamsis Yehauvas tseem muaj zog tshaj lub siab ntawd thiab. Yehauvas yuav pab kom peb tswj peb lub siab thiab muaj lub siab xav mloog Nws lus tiag.​—Ntawv Nkauj 119:133.

“XYAUM RAWS LI TEJ LUS NTAWD”

7. Vajtswv Txojlus pab tau peb li cas?

⁷ Yehauvas teb peb tej lus thov li cas? Thaum peb nyeem phau Vajlugkub twb yog Nws teb peb tej lus thov. Hauv phau Vajlugkub peb kawm txog Vajtswv lub tswvyim dawb huv. (Yakaunpau 3:17) Yog peb nyeem phau Vajlugkub txhua txhua hnub ces pab tau kom peb txojkev xav dawb huv. (Ntawv Nkauj 19:7, 11; 119:9, 11) Vajtswv Txojlus muaj tej qauv uas yuav pab peb kov yeej lub siab uas ntshaw ua phem ua qias.

8, 9. (1) Vim li cas ib tug tub hluas thiaj qaug rau kev plees kev yi? (2) Paj Lug tshooj 7 pab kom peb ceev faj dabtsi?

⁸ Paj Lug 5:8 ceeb toom kom peb tsis txhob qaug rau kev nkauj kev nraug. Paj Lug tshooj 7 piav txog ib tug tub hluas uas taug kev mus ze ib tug pojniam lub tsev. Tus pojniam ntawd sawv ntawm txojkev tshuam thiab hnav khaub ncaws zoo li tus poj muag cev. Thaum tus pojniam pom tus tub hluas, nws txawm ntsiab nkaus thiab nwj kiag tus tub hluas. Tus hluas thiaj qaug siab lias rau tus pojniam ntawd thiab nrog nws pw ua ke. Puas yog tus tub hluas txhob txwm mus ua txhaum li ntawd? Tsis yog. Tiamsis thaum nws lub siab pib ntshaw ua plees ua yi nws tsis muab txojkev ntshaw ntawd dob tawm hauv nws lub siab, nws thiaj ua txhaum. Zaum no nws yuav raug kev nyuaj siab ntau yam. Kheev nws paub tias nws yuav ua txhaum loj li ntawd, tej zaum nws twb tsis mus ncaj tus pojniam ntawd txojkev!​—Paj Lug 7:6-27.

⁹ Ib yam li tus tub hluas ntawd, yog tias peb tsis xyuam xim thiab tsis pom txog tej kev nyuaj siab uas yuav raug peb, ces yoojyim heev rau peb qaug siab rau kev plees kev yi. Muab xav li no, ib txhia nyiam saib this vis (TV) thaum hmo ntuj. Tej zaum lawv tsis paub xyov yuav saib dabtsi, lawv thiaj nias ib tshooj rau ib tshooj. Tiamsis peb yuav tsum ceev faj, rau qhov yav lig luag kheev tso tawm tej zaj ntsig txog kev nkauj kev nraug. Thaum siv Is Taws Nej los, tsis txhob lam tau lam nias mus rau tej lub Vej xaij uas yus tsis paub. Muaj tej lub Vej xaij uas koj nrog tau lwm tus sib txuas lus, tiamsis cov Vej xaij ntawd siv tej duab plees plees los tshaj kev lag kev luam. Muaj ib co kuj nias yuam kev rau tej lub Vej xaij uas tso tej duab liab qab. Nco ntsoov tias peb lub siab yuav ntshaw tej uas peb qhov muag pom. Thaum kawg tej uas peb ntshaw yuav coj peb mus ua txhaum ntag.

10. Vim li cas tsis zoo rau tej txivneej thiab pojniam lam sib thab ua si? (Saib daim duab ntawm sab 18.)

¹⁰ Phau Vajlugkub qhia tias tej pojniam thiab txivneej yuav tsum coj li cas kom raug ntsej raug muag. (Nyeem 1 Timaute 5:2.) Cov Khixatia tsis lam tau lam thab lossis zes ib tug uas tsis yog lawv tus txij nkawm. Lawv kuj tsis lam thab ib tug uas lawv tsis xav yuav tiag. Ib txhia xav tias txawm yog lawv nyob ti ti rau ib tug twg los yeej tsis txhaum dabtsi, tsuas yog tsis kov nws xwb. Tiamsis tsis muaj tseeb li ntawd. Yog tias ib tug pojniam thiab ib tug txivneej twg pheej sib tawb sib thab, ces ntev mus ntev tuaj nkawd yuav ua txhaum. Twb muaj li no ntau zaus lawm.

11. Peb kawm tau li cas los ntawm Yauxej?

¹¹ Yauxej tseg tus qauv zoo heev rau peb. Pautifa tus pojniam xav ntxias kom Yauxej nrog nws pw. Yauxej tsis kam ua txhaum li ntawd. Txawm li ntawd los Pautifa tus pojniam niaj hnub taij kom Yauxej “nrog nws nyob.” (Chiv Keeb 39:7, 8, 10) Muaj ib yawg tshawb fawb Vajlugkub hais tias Pautifa tus pojniam vam tias tshuav nkawd 2 leeg nyob xwb ces Yauxej yuav pib nyiam nws thiab xav nrog nws pw ua ke. Tiamsis Yauxej twb txiav txim siab lawm tias nws yuav tsis thab Pautifa tus pojniam li. Nws thiaj tsis pub nws lub siab ntshaw nrog tus pojniam ntawd ua ke. Thaum kawg, Pautifa tus pojniam ntsiab nkaus Yauxej lub tsho yuav txhom nws tiamsis Yauxej “nti ua lub tsho hle kiag rau hauv tus pojniam ntawd txhais tes thiab khiav tawm rau nraum zoov lawm.”​—Chiv Keeb 39:12.

12. Tej uas peb qhov muag pom ntxias tau peb lub siab yuam kev li cas?

¹² Yexus ceeb toom tias tej uas peb qhov muag pom muaj peev xwm ntxias tau peb lub siab yuam kev. Nws hais tias: “Txhua tus uas saib ib tug pojniam twg thiab xav ntxias nws mas twb deev tus pojniam ntawd hauv lub siab lawm.” (Mathai 5:28) Vajntxwv Davi ua li ntawd nws thiaj poob kev txhaum ntag. Thaum Davi nyob saum txheej tsev las tshav, nws “pom ib tug pojniam da dej.” Tsim nyog nws fee plhu rau lwm qhov tiamsis nws pheej ntsia thiab xav txog tus pojniam ntawd. (2 Xamuyee 11:2) Tus pojniam ntawd twb muaj txiv lawm tiamsis vim Davi lub siab pib ntshaw nrog tus pojniam ntawd ua ke thaum kawg nws thiaj coj tus pojniam ntawd los rau hauv nws tsev thiab ua nkauj ua nraug.

13. Vim li cas tseem ceeb rau peb cog lus nrog peb 2 lub qhov muag thiab peb yuav ua li ntawd li cas?

¹³ Yuav kom peb kov yeej lub siab ntshaw kev plees kev yi, peb yuav tsum xyaum Yauj tus qauv. Yauj hais tias nws twb cog lus nrog nws 2 lub qhov muag lawm tias nws yuav tsis ntsia thiab tsis xav phem txog tej ntxhais nkauj xwb dawb huv. (Yauj 31:1, 7, 9) Zoo rau peb coj li ntawd thiab. Txhob ntsia thiab xav phem txog ib tug neeg twg. Hauv lub qab ntuj no tibneeg tso tej duab liab qab hauv Is Taws Nej. Lub qab ntuj kuj siv tej duab ua nkauj ua nraug los tshaj kev lag kev luam thiab. Yog peb lam mus tom thawj tej duab zoo li ntawd, txhob saib ib muag kiag li. Cia li fee plhu rau lwm qhov tamsid.

14. Peb yuav tsum ua li cas peb thiaj ua tau neeg dawb huv?

¹⁴ Tej uas peb kawm tas los no ua rau koj xav li cas xwb? Tej zaum muaj tej yam uas peb yuav tsum tau hloov peb lub siab. Yog muaj tej yam phem uas koj yuav tsum tso tseg, cia li tso tseg tamsim no. Tsis txhob laug caij! Tsis txhob ncua cia! Cia li khaws tej uas Vajtswv Txojlus qhia, peb thiaj zam dhau kev plees kev yi es coj lub neej dawb huv.​—Nyeem Yakaunpau 1:21-25.

“HU COV UAS SAIB XYUAS PAWG NTSEEG”

15. Yog peb lub siab ho ntshaw tej yam tsis zoo, vim li cas peb yuav tsum nrhiav kev pab ntawm lwm tus?

¹⁵ Yog tias peb lub siab ho ntshaw tej kev sib daj sib dee uas phau Vajlugkub txwv, ces zoo rau peb nrhiav kev pab los ntawm ib tug Khixatia uas paub tab hauv lub koom txoos. Lawv thiaj paub muab phau Vajlugkub los pab peb. Yeej yog ib yam txaj muag heev, tiamsis tseem ceeb rau peb nrhiav kev pab. (Paj Lug 18:1; Henplais 3:12, 13) Cov Khixatia uas paub tab yuav pab koj hloov tau koj lub siab. Yog tias koj hloov raws li phau Vajlugkub qhia ces koj yuav tau nrog Yehauvas ua phoojywg.

16, 17. (1) Cov txwj laus pab tau cov uas muaj lub siab ntshaw kev plees kev yi li cas? (2) Vim li cas tseem ceeb rau cov uas saib tej duab liab qab nrhiav kev pab tamsim no?

¹⁶ Cov txwj laus hauv lub koom txoos muaj tswvyim pab peb. (Nyeem Yakaunpau 5:13-15.) Tau ntau xyoo, muaj ib tug tub hluas hauv tebchaws Brazil ntshaw tej yam uas tsis zoo. Nws hais tias: “Kuv paub tias tej uas kuv lub siab ntshaw txhaum Yehauvas, tiamsis kuv txaj muag qhia lwm tus paub.” Muaj ib tug txwj laus pom tias tus tub hluas ntawd cheem tsum kev pab. Nws thiaj txhawb kom tus tub hluas cia cov txwj laus pab nws. Tus tub hluas hais tias: “Cov txwj laus ua tib zoo hais kuv xwb. Twb tsis tsim nyog lawv ua zoo npaum li ntawd rau kuv. Lawv ua tib zoo mloog seb kuv muaj teeb meem dabtsi. Lawv muab Vajlugkub los qhia meej rau kuv tias Yehauvas tseem hlub kuv, thiab lawv thov Vajtswv pab kuv. Vim lawv ua li ntawd thiaj yoojyim zog rau kuv yoog raws li cov lus ntuas hauv phau Vajlugkub.” Thaum tus tub hluas ntawd pom tias nws txojkev sib raug zoo nrog Yehauvas muaj zog dua lawm, nws thiaj hais tias: “Kuv pom tias tseem ceeb heev rau peb nrhiav kev pab los ntawm lwm tus, peb tsis tas ris peb lub nra ib leeg xwb.”

¹⁷ Yog leejtwg pheej saib tej duab liab qab, cia li nrhiav kev pab tamsim no, tsis txhob ncua sijhawm. Tus uas tsis nrhiav kev pab sai, tsuas cia txojkev ntshaw ntawd nrhau cag tob ntxiv rau hauv nws lub siab xwb. Thaum kawg nws yuav ua txhaum. Tsis yog nws tsim teeb meem rau nws xwb, tiamsis kuj ua rau lwm tus thuam Yehauvas thiab. Twb yog vim li ntawd coob leej ntau tus thiaj thov kev pab los ntawm cov txwj laus. Lawv mloog cov txwj laus tej lus qhuab ntuas kom lawv thiaj ua tau haum Yehauvas siab thiab tau nyob hauv lub koom txoos.​—Ntawv Nkauj 141:5; Henplais 12:5, 6; Yakaunpau 1:15.

TXIAV TXIM SIAB UA LUB NEEJ DAWB HUV!

18. Peb yuav tsum txiav txim siab ua li cas?

¹⁸ Xatas lub qab ntuj tsuas muaj kev plees kev yi ntau zuj zus xwb. Tiamsis Yehauvas cov tub qhe yuav tsum kho lawv lub siab tiag kom xav txog tej yam dawb huv xwb. Yehauvas txaus siab heev thaum nws cov tub qhe coj lub neej dawb huv li ntawd. Cia peb txav ze Yehauvas, xyaum raws li nws tej lus ntuas hauv phau Vajlugkub, thiab nrhiav kev pab los ntawm lub koom txoos. Yog peb ua li no ces peb yuav muaj kev zoo siab thiab peb yuav kaj siab teev tiam Yehauvas. (Ntawv Nkauj 119:5, 6) Yav tom hauv ntej thaum Yehauvas muab Xatas tshem tawm peb yuav tau nyob mus ib txhis hauv ib lub qab ntuj uas dawb huv tiag tiag li.