Kuv Yuav Nrhiav Tau Kev Vam Kev Cia Siab Qhov Twg?

Phau Vajlugkub qhia li no

Phau Vajlugkub qhia tias Vajtswv xav kom peb “muaj kev cia siab rau yav tom ntej.”a (Yelemis 29:11) Tseeb tiag, qhov uas Vajtswv pub phau Vajlugkub rau peb twb yog vim “Vajtswv Txoj Lus pab kom peb thev taus thiab txhawb tau peb lub zog, peb thiaj muaj chaw vam rau yav tom hauv ntej.” (Loos 15:4) Thaum peb kawm ntxiv mus, peb yuav pom tias Phau Vajlugkub tej kev taw qhia yuav pab tau peb ua lub neej muaj kev cia siab rau tam sim no thiab rau yav tom ntej uas phau Vajlugkub cog lus tseg tias peb yuav muaj lub neej uas zoo tshaj plaws.

Nyob rau sab no

• Phau Vajlugkub qhia peb li cas txog kev vam kev cia siab?

• Phau Vajlugkub qhia txog tej kev cia siab twg rau noob neej?

• Cov nqe Vajlugkub uas qhia txog kev vam kev cia siab

Phau Vajlugkub qhia peb li cas txog txoj kev vam kev cia siab?

Thaum phau Vajlugkub qhia tias peb yuav tau ua li cas rau li cas peb lub neej thiaj yuav zoo dua tuaj ces twb yog phau Vajlugkub pab kom peb muaj kev vam kev cia siab rau yav tom hauv ntej ntag. Cia peb kawm me ntsis txog qho no.

• Cia phau Vajlugkub coj koj txoj hau kev. Phau Ntawv Nkauj 119:105 hais tias: “Koj txojlus zoo ib yam li lub teeb uas taws ua kuv ntej thiab ci rau kuv txoj haukev.” Lub teeb uas ci lam lug ua tau ob yam. Nws ci rau peb pom kev ntawm peb xub ntiag thiab ci mus rau tom hauv ntej hauv txoj kev uas peb mus ntawd. Tib yam li ntawd, phau Vajlugkub tej hauv paus ntsiab lus pab kom peb paub daws tej teeb meem uas peb niaj hnub raug ib hnub tas ib hnub tuaj, es peb thiaj muaj kev vam kev cia siab rau yav tom hauv ntej. Tej uas phau Vajlugkub qhia pab tau peb rov tuaj zog thiab “ua rau lub siab xyiv fab.” (Phau Ntawv Nkauj 19:7, 8) Tsis tas li ntawd, phau Vajlugkub kuj qhia txog Vajtswv lub ntsiab rau noob neej thiab rau lub ntiaj teb yam tom ntej. Qhov kev cia siab no, pab tau peb muaj kev xyiv fab thiab txaus siab rau peb lub neej.

• Cia lwm tus pab koj. Thaum peb xav tias yuav tsis muaj leej twg pab daws tau peb tej teeb meem, ces tej zaum peb yuav tsis xav nrog peb tsev neeg los sis phooj ywg ua ke lawm. Phau Vajlugkub qhia tias qhov uas ua li no tsis zoo kiag li, rau qhov lub tswv yim no yuav ua rau ib tug twg txiav txim yuam kev los sis ua tau tej yam uas rhuav ntsej muag los kuj muaj. (Pajlug 18:1) Cov neeg uas hlub yus yuav pab kom yus paub txiav txim mus rau qhov zoo. Tej zaum lawv kuj muaj ib lub zoo tswv yim los pab daws ib qho teeb meem uas tsis yooj yim daws thiab. (Pajlug 11:14) Txawm pab tsis tau dab tsi kiag los, qhov uas lawv hais lus nplig peb siab xwb twb txhawb tau peb lub zog kom ua tiag thev dhau peb tej teeb meem lawm.​—Pajlug 12:25.

• Thov Vajtswv. Phau Vajlugkub hais tias: “Cia li muab nej tej kev nyuaj siab tso rau [Yehauvas], nws yuav tsomkwm nej, nws yeej ibtxwm tsis tso cov neeg ncaj ncees tseg.”b (Phau Ntawv Nkauj 55:22) Yehauvas yog “tus Vajtswv uas pab nej muaj kev vam.” (Loos 15:13) Koj yeej thov tau Vajtsw txog koj “tej kev nyuaj siab,” thiab tso siab tias Vajtswv yeej txhawj txog koj. (1 Petus 5:7) Phau Vajlugkub qhia tias: “Nws yuav txhawb nej lub zog kom nej nyob ruaj nrees.”​—1 Petus 5:10.

• Cia tej kev sim siab txhawb koj txoj kev vam kev cia siab kom ruaj khov. Phau Vajlugkub cog lus tias: “tus uas mloog [Vajtswv] lus, tus ntawd yuav nyob khov kho thiab tso siab plhuav tsis ntshai ib yam dabtsi li.” (Pajlug 1:33) Thaum cua daj cua dub los raug ib tug poj niam hu ua Ma·nka·liv (Margaret) lub tsev es ua rau txhua yam puas tsuaj tag. Txawm li ntawd los, nws tsis cia tej ntawd ua rau nws nyuaj siab. Tiam sis nws kawm tau ib yam uas muaj nqi heev. Nws kawm tau tias tej khoom ub khoom no tsuas yog nyob ib vuag dua xwb. Tom qab ntawd, nws thiaj txiav txim siab hlo muab tej uas nws pom tias muaj nqi tshaj saib tseem ceeb dua, xws li nws tsev neeg, nws cov phooj ywg, nws txoj kev siab raug zoo nrog Vajtswv, thiab txoj kev vam kev cia siab ua hais hauv phau Vajlugkub.​—Phau Ntawv Nkauj 37:34; Yakaunpaus 4:8.

Phau Vajlugkub muaj kev vam kev cia siab li cas rau noob neej?

Phau Vajlugkub cog lus tias tshuav tsis ntev xwb, Vajtswv yuav muab lub ntiaj teb kho dua tshiab thiab noob neej yuav muaj ib lub neej uas zoo heev. Tej teeb meem uas noob neej raug niaj hnub nim no qhia tias peb twb nyob rau “tiam kawg” lawm tiag. (2 Timautes 3:1-5) Tsis ntev tom ntej no, Vajtswv yuav los kho noob neej tej teeb meem thiab rhuav tshem tej kev tsis ncaj ncees thiab kev txom nyem mus. Vajtswv txoj kev kav uas kav thoob plaws lub qab ntuj los sis hu ua Vajtswv lub Nceeg Vaj yuav los kho tej no. (Daniyees 2:44; Tshwmsim 11:15) Yexus hais txog lub Nceeg Vaj ntag thaum nws thov Vajtswv hais tias: “Thov koj lub Nceeg Vaj los kav. Thov kom txhua yam hauv ntiaj teb muaj tiav raws li koj lub siab nyiam ib yam li saum ntuj.”​—Mathais 6:9, 10.

Vajtswv lub ntsiab rau noob neej twb yeej hais meej meej hauv phau Vajlugkub lawm. Saib seb Vajtswv lub Nceeg Vaj los sis Vajtswv txoj kev kav yuav rhuav tshem tej yam twg mus :

• Tsis muaj kev tshaib kev nqhis lawm. Lub ntiaj teb “muaj qoobloo sau.”​—Phau Ntawv Nkauj 67:6.

• Tsis muaj kab mob kev nkeeg lawm. “Yuav tsis muaj leejtwg nroo hais tias, ‘Kuv muaj mob.’”​—Yaxayas 33:24.

• Tsis muaj kev ploj kev tuag lawm. Vajtswv “yuav so lawv tej kua muag huv tibsi mus. Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm. Tej uas sawvdaws ibtxwm muaj los twb ploj tas lawm.”​—Tshwmsim 21:3, 4.