Yog Koj Tsis Xav Ua Neej Nyob Phau Vajlugkub Puas Pab Tau Koj?
Phau Vajlugkub qhia li no
Yeej pab tau. Phau Vajlugkub yog “Vajtswv tus uas txhawb cov neeg uas poob siab lub zog” phau ntawv. (2 Kauleethaus 7:6) Txawm phau Vajlugkub tsis yog ib phau ntawv kho mob los, yeej pab tau coob tus uas tsis xav ua neej nyob. Kuj yuav pab tau koj thiab.
Hauv phau Vajlugkub puas muaj cov uas tsis xav ua neej nyob lawm?
Cov nqe Vajlugkub twg txhawb tau cov uas tsis xav ua neej nyob?
Yuav ua li cas yog koj tus phooj ywg hais tias nws tsis xav ua neej nyob lawm?
Phau Vajlugkub qhia li cas?
● Piav koj tej kev nyuaj siab rau lwm tus.
Phau Vajlugkub hais tias: “Muaj qee leej phoojywg tseem sib raug zoo dua tej kwvtij txheeb.”—Pajlug 18:24.
Qhov no txhais tias: Peb yuav tsum thov kev pab ntawm lwm tus thaum peb nyuaj siab los sis raug kev txom nyem.
Yog koj tsis qhia koj tej kev nyuaj siab rau luag ces koj yuav haj yam ntxhov siab xwb, tiam sis yog koj qhia rau luag koj yuav kaj siab tuaj thiab yuav hloov tau koj txoj kev xav.
Sim ua li no: Kav tsij mus nrog koj tsev neeg los sis koj ib tug phooj ywg tham.a Koj kuj muab koj tej kev nyuaj siab sau rau hauv ib phau ntawv los tau thiab.
● Mus cuag kws kho mob.
Phau Vajlugkub hais tias: “Cov neeg tsis muaj mob yeej tsis mus cuag kws kho mob, cov uas muaj mob thiaj mus xwb.”—Mathais 9:12.
Qhov no txhais tias: Thaum peb muaj mob peb yuav tsum mus cuag kws kho mob.
Qhov uas koj tsis xav ua neej nyob tej zaum yog vim tus mob nyuaj siab. Tsis txhob txaj muag mus cuag kws kho mob, rau qhov tus kws kho mob yuav pab tau koj kaj siab tuaj.
Sim ua li no: Mus cuag kws kho mob sai li sai tau.
● Nco ntsoov tias Vajtswv mob siab koj.
Phau Vajlugkub hais tias: “Tsib tug noog tsev, luag muag ob xub xwb puas yog? Txawm yog ib tug noog tsev xwb los Vajtswv yeej saib ntsoov. . . . Nej tsis txhob ntshai; nej muaj nqis heev dua ntau tus noog tsev.”—Lukas 12:6, 7.
Qhov no txhais tias: Vajtswv saib koj muaj nuj nqis heev.
Txawm tsis muaj leej twg to taub koj los, Vajtswv yeej paub zoo txog koj tej kev nyuaj siab. Txawm koj tsis xav ua neej nyob lawm los Vajtswv tseem saib koj txoj sia muaj nqis heev. Phau Ntawv Nkauj 51:17 hais tias ‘Vajtswv yuav tsis fee plhu rau tus uas’ tas kev cia siab. Vajtswv hlub koj heev nws xav kom koj muaj txoj sia nyob mus ntxiv.
Sim ua li no: Mus nyeem seb phau Vajlugkub muaj tej pov thawj twg qhia tias Vajtswv yeej hlub koj. Xws li mus nyeem Phau Tsom Faj Phau 3 Xyoo 2018.
● Thov Vajtswv.
Phau Vajlugkub hais tias: “Vajtswv yog tus uas niaj hnub tsomkwm nej, yog li ntawd nej cia li muab nej tej kev nyuaj siab huv tibsi tso plhuav rau Vajtswv.”—1 Petus 5:7.
Qhov no txhais tias: Vajtswv xav kom koj qhia txhua yam rau nws thiab qhia tias dab tsi ua rau koj nyuaj siab.
Vajtswv yuav pub koj muaj lub siab tus thiab pub lub zog kom koj thiaj thev taus koj tej kev nyuaj siab. (Filipis 4:6, 7, 13) Vajtswv pab tus uas thov nws tawm hauv lub siab dawb paug tuaj.—Phau Ntawv Nkauj 55:22.
Sim ua li no: Kav tsij thov Vajtswv. Tuav Yehauvas lub npe thov thiab qhia koj tej kev nyuaj siab rau nws. (Phau Ntawv Nkauj 83:18) Thov nws pab koj nyiaj dhau koj tej kev nyuaj siab.
● Xav ntsoov txog tej kev cia siab hauv phau Vajlugkub.
Phau Vajlugkub hais tias: “Qhov uas peb cia siab no zoo ib yam li tus tswg uas muaj hlua khi peb lub siab kom nyob ruaj ruaj.”—Henplais 6:19.
Qhov no txhais tias: Peb lub siab xav mus xav los cuag li lub nkoj raug cua ntsawj hauv hiav txwv. Tiam sis yog peb xav ntsoov rau tej kev cia siab hauv phau Vajlugkub ces yuav pab peb tswj tau peb lub siab thiab ua taus lub siab tus.
Txoj kev cia siab no tsis yog lam cia siab qhuav xwb. Yeej yuav muaj raws li Vajtswv tau cog tseg tias peb yuav tsis raug kev txom nyem li lawm.—Tshwmsim 21:4.
Sim ua li no: Yog xav paub ntxiv txog tej kev cia siab uas phau Vajlugkub qhia txog, mus nyeem zaj hu ua “Muaj Kev Cia Siab Rau Lub Neej Yav Pem Suab.”
● Ua tej uas koj nyiam.
Phau Vajlugkub hais tias: “Kev zoo siab ua hauv tshuaj kuab muaj tsuas rau koj lub cev.”—Pajlug 17:22.
Qhov no txhais tias: Thaum peb ua tej uas peb nyiam yeej ua rau peb zoo siab thiab kaj siab tuaj.
Sim ua li no: Xav seb koj nyiam ua dab tsi. Koj puas nyiam mloog tej nkauj txhawb siab, nyeem tej ntawv txhawb zog, los sis lwm yam. Yog koj pab lwm tus txawm pab ntau pab tsawg los koj yuav muaj kev zoo siab dua thiab.—Tes Haujlwm 20:35.
● Saib xyuas koj tus kheej kom zoo.
Phau Vajlugkub hais tias: “Yog peb xyaum khiav los sis xyaum ua li ub li no yuav muaj nqis mentsis rau peb lub cev.”—1 Timautes 4:8.
Qhov no txhais tias: Yog peb khiav thiab ua ub ua no, pw kom txaus thiab noj tej zaub mov zoo, yuav pab tau peb noj qab nyob zoo.
Sim ua li no: Mus taug kev ua si ib hnub twg li 15 feeb.
● Nco ntsoov tias thaum lub caij nyoog hloov lawm txhua yam yuav hloov thiab.
Phau Vajlugkub hais tias: “Nej twb tsis paub hais tias xyov tagkis nej txojsia yuav zoo li cas.”—Yakaunpaus 4:14.
Qhov no txhais tias: Tej teeb meem uas koj muaj txawm yuav loj thiab tshem tsis tau los tej zaum tsuas yuav muaj ib nyuag ntu xwb.
Txawm hnub no yog ib hnub tsaus ntuj nti rau koj xwb los tag kis yeej yuav kaj tuaj. Yog li ntawd, kav tsij peem kam tiag. (2 Kauleethaus 4:8) Tej uas ua rau koj nyuaj siab yeej txawj ploj mus. Tiam sis yog koj txov koj txoj sia ces koj lub neej tsuas tas li ntawd lawm xwb.
Sim ua li no: Mus nyeem txog tej tug hauv Vajlugkub uas txeev qaug zog thiab tsis xav ua neej nyob, saib seb dab tsi pab tau lawv. Xws li cov qauv nram no.
Hauv phau Vajlugkub puas muaj cov uas tsis xav ua neej nyob lawm?
Hauv phau Vajlugkub yeej muaj ib txhia uas tsis xav ua neeg nyob. Vajtswv tsis thuam lawv tiam sis nws pab lawv. Vajtswv kuj yuav pab koj thiab.
Eliyas
● Eliyas yog leej twg? Nws yog ib tug cev Vajtswv lus uas muaj lub siab tawv qhawv. Txawm li ntawd los, nws kuj qaug zog thiab. Yakaunpaus 5:17 hais tias: “Eliyas yog ib tug neeg zoo li peb xwb.”
● Ua cas Eliyas ho tsis xav ua neej nyob lawm? Eliyas xav tias ntshe tsuas tshuav nws tib leeg lawm xwb, nws ntshai thiab xav tias nws tsis muaj nqis dab tsi li lawm. Nws thiaj hais rau Yehauvas tias: “Cia li rho kuv txojsia mus.”—1 Vajntxwv 19:4.
● Dab tsi pab tau Eliyas? Eliyas piav nws tej kev nyuaj siab rau Yehauvas. Yehauvas txhawb nws li cas? Yehauvas nplig Eliyas siab thiab ua rau Eliyas pom tias Nws muaj hwj chim npaum li cas. Vajtswv kuj hais rau Eliyas tias Eliyas muaj nqis heev rau Nws thiab txib ib tug los pab Eliyas ua hauj lwm.
▸ Mus nyeem txog Eliyas: 1 Vajntxwv 19:2-18.
Yauj
● Yauj yog leej twg? Yauj yog ib tug neeg nplua nuj thiab hlub nws tsev neeg heev, nws yog ib tug neeg ncaj ncees uas teev tiam tus tseem Vajtswv.
● Ua cas Yauj ho tsis xav ua neej nyob lawm? Ib ntsais muag xwb Yauj lub neej cia hloov hlo lawm. Nws tej nyiaj txiag thiab tej qhov txhia chaw poob tag, nws tej me tub me nyuam los raug tej xwm phem tuag tas. Nws kuj raug ib tug mob uas ua rau nws nyob txom nyem ntsuav. Tsis tas li ntawd xwb, luag kuj liam tias twb yog tim Yauj thiaj muaj tej xwm phem li no. Yauj hais tias: “Kuv dhuav heev; kuv tsis xav ua neej nyob lawm.”—Yauj 7:16.
● Dab tsi pab tau Yauj? Yauj thov Vajtswv thiab nrog lwm tus tham. (Yauj 10:1-3) Yauj tau kev txhawb zog ntawm nws tus phooj ywg Elihus, Elihus hmov tshua Yauj, nws pab Yauj hloov Yauj txoj kev xav. Qhov pab tau Yauj tshaj yog Yauj mloog Vajtswv tej lus ntuas thiab txais nws txoj kev pab.
▸ Mus nyeem txog Yauj: Yauj 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Mauxes
● Mauxes yog leej twg? Mauxes yog cov neeg Ixayees thaum ub ib tug thawj coj thiab yog ib tug cev Vajtswv lus uas ncaj ncees.
● Ua cas Mauxes ho tsis xav ua neej nyob lawm? Mauxes tuav ib tes hauj lwm hnyav heev, nws pheej raug cov Ixayees yws tas li. Nws qauv zog heev nws thiaj thov Vajtswv tias: “Thov koj cia li muab kuv tua povtseg tamsim no.”—Teev Npe 11:11, 15.
● Dab tsi pab tau Mauxes? Mauxes qhia nws tej kev nyuaj siab rau Vajtswv. Vajtswv thiaj txib neeg los pab Mauxes kom nws hauj lwm sib zog.
▸ Mus nyeem txog Mauxes: Teev Npe 11:4-6, 10-17.
a Yog koj xav txov koj txoj sia es tsis pom qab piav rau leej twg, cia li hu mus rau lub koom haum uas pab cov muaj kev nyuaj siab.