Yuav Ua Li Cas Koj Thiaj Tsis Saib Tej Twj Tseem Ceeb Dua Koj Tus Txij Nkawm

Tej twj ntawm tes yeej pab tau koj txoj kev txij nkawm, tiam sis kuj yuav rhuav tau koj txoj kev txij nkawm thiab. Ua li, tej twj cuam tshuam koj txoj kev txij nkawm li cas?

• Yuav tsum nkag siab

• Yuav ua li cas

• Ib txhia niam txiv hais li cas

• Yuav nrog koj tus txij nkawm tham li cas

Yuav tsum nkag siab

• Yog koj txawj siv tej twj ces yuav txhawb tau koj txoj kev txij nkawm. Xws li, ib txhia txij nkawm siv xov tooj sib txuas lus thaum nkawd nyias mus nyias lawm.

  

  Yaunathas hais tias: “Koj tsuas ntaus kiag tias ‘kuv hlub koj’ los sis ‘kuv nco koj’ rau koj tus txij nkawm xwb ces twb ua rau neb sib raug zoo lawm ntau.”

• Yog koj tsis ceev faj tej twj yuav rhuav tau koj txoj kev txij nkawm. Xws li, ib txhia saib xov tooj los sis tej twj ntawm tes heev dhau lawm, lawv thiaj tsis muaj sij hawm los nrog lawv tus txij nkawm nyob ua ke.

  Ntsulixam (Julissa) hais tias: “Kuv paub tias yog kuv tsis txhob kov kov xov tooj no, ntshe kuv tus txiv kuj yuav los nrog kuv tham pem thiab.”

• Ib txhia hais tias txawm lawv siv tej twj los lawv tseem nrog tau lawv tus txij nkawm tham pem. Ib tug tshawb fawb hu ua Selis Tawkaum (Sherry Turkle) hais tias tib neeg xav yuam kev tias lawv thooj txhij ua ntau yam los tau. Tiam sis txawm tib neeg xav li ntawd los qhov uas peb thooj txhij ua ntau yam yeej tsis zoo. Nws hais ntxiv tias “peb haj yam ua ntau peb haj yam ua tsis tau ib qho zoo li.”a

  Xalas hais tias: “Qhov uas kuv tau nrog kuv tus txiv tham mas yog ib qho zoo kawg nkaus li, tiam sis yog nws ho ua lwm yam thiab nrog kuv tham thiab, ces cuag li nws twb tsis xam tias muaj kuv.”

Ua cas ho tseem ceeb: Yog koj txawj siv tej twj ces yuav txhawb tau neb txoj kev txij nkawm, tiam sis yog koj tsis ceev faj ces yuav tsim teeb meem rau neb lub cuab lub yig.

Yuav ua li cas

Ua tib zoo saib seb yam twg tseem ceeb dua. Phau Vajlugkub hais tias yuav tsum “paub tias yam twg yog yam uas tseem ceeb dua ntais.” (Filipis 1:10) Nug koj tus kheej li no, ‘Puas yog kuv thiab kuv tus txij nkawm wb tsuas pom kov xov tooj xwb es tsis muaj sij hawm los nyob ua ke lawm?’

Mathais hais tias: “Tu siab heev thaum yus pom ib tug nrog ib tug noj mov ua ke tiam sis nyias tsuas taum nyias lub twj xwb. Kuv tsis xav quav xov tooj li ntawd tsam ho plam yam tseem ceeb tshaj uas yog kuv txoj kev sib raug zoo nrog kuv tus txij nkawm.”

Teem sij hawm siv. Phau Vajlugkub hais tias: “Nej yuav tsum ceevfaj thiab ua zoo. Tsis txhob ua li cov neeg ruam, tiamsis nej yuav tsum ua li cov neeg uas muaj tswv yim. Nej yuav tsum siv txhua lub sijhawm kom muaj nqis.” (Efexus 5:15, 16) Nug koj tus kheej li no: ‘Yog lwm tus ntaus ntawv los sis xa lus tuaj rau kuv, yog tsis maj yuav teb kiag, kuv puas kam teem sij hawm teb rau lwm lub caij?’

Yaunathas hais tias: “Qhov uas pab tau kuv mas yog kuv muab kuv lub suab xov tooj kaw es thaum kuv khoom kuv mam li saib. Tej uas luag ntaus tuaj thiab sau e-mail tuaj feem ntau twb tsis maj yuav teb tam sid.”

Txhob cia hauj lwm tab kaum koj. Phau Vajlugkub hais tias: “Muaj caij muaj nyoog rau txhua yam.” (Tej Lus Qhia 3:1) Nug koj tus kheej li no: ‘Kuv puas siv kuv lub xov tooj ua hauj lwm thaum kuv nrog kuv tsev neeg nyob tom tsev ua ke? Yog muaj li ntawd, qhov no puas tsim teeb meem rau wb ob niam txiv? Ua li, kuv tus txij nkawm ho xav li cas?’

Mathais hais tias: “Tej twj ntawm tes pab tau peb ua hauj lwm txhua lub sij hawm tsis hais nruab hnub hmo ntuj. Kuv thiaj yuav tau tswj kuv tus kheej tsis txhob kov xov tooj ua hauj lwm thaum kuv nrog kuv poj niam nyob ua ke.”

Nrog koj tus txij nkawm tham seb nej yuav siv tej twj li cas. Phau Vajlugkub hais tias: “Yus tsis txhob xam pom yus zoo xwb, tiam sis yus yuav tsum xam pom lwm tus zoo thiab.” (1 Kauleethaus 10:24) Nrog koj tus txij nkawm tham seb neb ib leeg yuav siv tej twj npaum li cas, puas muaj tej yam uas neb yuav tau hloov. Neb kuj muab lub ntsiab me, yuav nrog koj tus txij nkawm tham li cas hauv zaj no los sib tham.

Daniyias (Danielle) hais tias: “Kuv thiab kuv tus txiv wb tsis zais siab li, yog leej twg kov xov tooj los sis tej twj ntau dhau lawm wb yeej hais hlo. Wb paub tias tej no yuav tsim tau teeb meem rau wb, yog li ntawd wb ib leeg thiaj xam pom ib leeg.”

Ua cas ho tseem ceeb: Yog koj tsis ceev faj ces tej twj yuav tswj tau koj lub neej.