Peb Muaj Tau Kev Vam Kev Cia Siab Txawm Tias Muaj Xwm Txheej Phem

“Lub sijhawm uas ntiajteb yuav kawg yuav muaj kev ntxhov siab heev.”​—2 TIMAUTES 3:1.

KOJ puas tau hnov txog los sis pom tej xwm txheej phem no?

● Ib tug mob phem heev uas ua rau coob tus tuag.

● Kev tshaib kev nqhis ua rau tsheej pua tus tuag.

● Av qeeg tua tau txhiab tus tuag thiab ua rau coob tus tej vaj tse puas tas.

Hauv phau ntawv no koj yuav nyeem ntxiv txog tej xwm txheej zoo li no. Koj yuav kawm tias phau Vajlugkub twb qhia tias tej no yuav muaj tshwm sim rau “lub sijhawm kawg.”a

Tej zaum koj twb pom tej xwm txheej li no lawm. Yog li lub hom phiaj rau phau ntawv no tsis yog ua kom koj ntseeg tias koj nyob rau ib lub ntiaj teb muaj kev phem ntau yam tiam sis los pab kom koj muaj kev cia siab. Rau zaj lus faj lem uas muaj tiav zuj zus no qhia tias peb nyob rau tiam kawg lawm. Muaj ib txhia tib neeg tsis ntseeg tias peb nyob rau “lub sijhawm kawg.” Tiam sis phau ntawv no yuav pab peb pom vim li cas peb thiaj ntseeg tau tias tej kev txom nyem hauv ntiaj teb no yuav tsis muaj ntxiv lawm thiab peb yuav tau ib lub neej zoo yav tom ntej.

[Cov lus hauv qab taw qhia]

Zaj Lus Faj Lem 1. Av Qeeg

“Yuav muaj av qeeg loj heev.”​—LUKAS 21:11.

● Thaum Vinim (Winnie) muaj tshaj li 1 xyoos ntau nws raug cawm los ntawm ib co tshaj tawm xov xwm txog av qeeg nyob hauv teb chaws Haiti. Nws dim dhau av qeeg tiam sis nws niam thiab txiv tsis dim.

QHOV NO QHIA LI CAS? Thaum muaj av qeeg loj heev hauv lub teb chaws Haiti rau lub 1 Hlis 2010, muaj tshaj li 300,000 tau tuag thiab muaj tshaj li 1 plhom cov tib neeg uas lawv tej vaj tse puas tas. Txawm av qeeg no loj thiab txaus ntshai heev los tsis yog tib qhov xwb vim tias muaj li 18 cov av qeeg uas tau tshwm sim thoob plaws ntiaj teb nyob rau lub 4 Hlis 2009 mus txog rau lub 4 Hlis 2010.

IB TXHIA HO XAV LI CAS? Tsis muaj av qeeg tshaj li yav tas los tiam sis yog vim tias muaj tej twj uas qhia tau tias muaj av qeeg, peb thiaj li paub xwb.

QHOV NO PUAS MUAJ TSEEB? Xav li no, phau Vajlugkub tsis qhia tias yuav muaj pes tsawg av qeeg rau lub sij hawm kawg tiam sis yeej qhia tias “yuav muaj av qeeg loj” tshwm sim “txhua qhov.” Yog li, qhov no yeej qhia rau peb tias peb nyob rau lub sij hawm kawg.​—Malakaus 13:8; Lukas 21:11.

KOJ XAV LI CAS? Puas yog peb pom av qeeg loj li phau Vajlugkub qhia?

Tsis yog av qeeg xwb ua pov thawj tias peb nyob rau lub sij hawm kawg. Cia peb mus nyeem txog faj lem ob seb hais li cas ntxiv.

[Cov lus rho hauv zaj no]

“Cov av qeeg loj tau tsim kev txom nyem ntau heev.”

[Credit Line rau cov duab]

© William Daniels/​Panos Pictures

Zaj Lus Faj Lem 2. Kev Tshaib Kev Nqhis

“Yuav muaj kev tshaib kev nqhis.”​—MALAKAUS 13:8.

● Muaj ib tug txiv neej mus nrhiav zaub mob noj hauv lub zos hu ua Khualatantsi (Quaratadji) hauv teb chaws Nai Ntsaw (Niger). Tsis tas li ntawd, nws cov kwv cov muam thiab nws cov txheeb ze kuj ntsib kev tshaib kev nqhis thiab khiav tuaj nhriav zaub mov noj. Tus txiv neej ntawd pw ib leeg ntawm daim ntaub pua hauv pem teb. Yog vim li cas ho pom nws ib leeg xwb? Muaj ib tug tswv zos hu ua Sidi qhia tias, “Tus txiv neej no ntsia tsis taus nws tsev neeg vim nws nhriav tsis tau zaub mov los yug lawv.”

QHOV NO QHIA LI CAS? Nyob thoob plaws ntiaj teb, muaj ze li 690 plhom cov tib neeg tsis muaj txaus noj txaus haus txhua txhua hnub. Nyob teb chaws Afika hauv tiaj suab puam Xahalas muaj txog li 235 plhom cov tib neeg yeej muaj kev tshaib kev nqhis tas li. Yuav kom peb to taub muab xav li no muaj ib tsev neeg uas muaj leej txiv, leej niam, thiab tus me nyuam. Tiam sis tsuas muaj zaub mov txaus rau ob tug neeg noj xwb, leej twg yog tus yuav tsis tau noj? Puas yog leej txiv, leej niam, los sis tus me nyuam? Txhua txhua hnub ib tsev neeg twg yuav tau txiav txim siab tias tus twg yuav tau noj los sis tus twg yuav tsis tau noj.

IB TXHIA HO XAV LI CAS? Yog muab hais los lub ntiaj teb no muaj peev xwm ua tau zaub tau mov txaus rau txhua leej txhua tus noj. Tsuas yog tib neeg yuav tsum tau ua tib zoo saib xyuas faib kom sawv daws tau noj tau haus xwb.

QHOV NO PUAS MUAJ TSEEB? Yeej muaj tseeb, niaj hnub nim no cov tswv teb yeej ua tau qoob tau loo kom txaus xa mus rau qhov txhia qhov chaw. Tsuas yog tej nom tswv yuav tau saib xyuas thiab faib zaub mov kom txhua leej txhua tus nyob thoob ntiaj teb tau noj thiaj tsis muaj kev tshaib kev nqhis. Txawm li ntawd los, tau ntau ntau xyoo tib neeg twb siv zog ua kom muaj li no los lawv ua tsis tau li.

KOJ XAV LI CAS? Puas muaj raws li Malakaus 13:8 hais? Txawm tias yuav muaj tej twj uas yooj yim siv ua qoob loo ntau zuj zus los, puas tseem muaj kev tshaib kev nqhis nyob thoob plaws ntiaj teb?

Av qeeg thiab kev tshaib kev nqhis feem ntau tsim tau lwm yam teeb meem uas phau Vajlugkub twb qhia ua ntej txog lawm.

[Cov lus rho hauv zaj no]

“Yog vim tsis muaj txaus noj txaus haus, thaum coob tus me nyuam uas muaj mob ntsws, mob raws plab thiab mob lwm yam kab mob thiaj li tau tuag.”​—ES VESNAMEE (ANN M. VENEMAN), TUS QUB SAIB XYUAS TXOG ME NYUAM TEJ NYIAJ NYOB HAUV KOOM HAUM NTIAJ TEB.

[Credit Line rau cov duab]

© Paul Lowe/​Panos Pictures

Zaj Lus Faj Lem 3. Kab Mob Kev Nkeeg

“Yuav muaj mob thoob plaws txhua qhov huv tibsi.”​—LUKAS 21:11

● Npooxalim (Bonzali) uas yog ib tug saib xyuas kev noj qab haus huv nyob hauv ib lub teb chaws hauv Afika uas muaj kev tsis sib haum xeeb sib ntaus sib tua. Nws ua li nws ua tau los pab cov neeg khawb thee hauv nws lub zos rau qhov muaj cov neeg tuag vim tus kab mob hu ua Monpaws Himolavntsim Fivaws (Markburg Hemorrhagic Fever)a. Nws thov kev pab ntawm cov nom tswv nyob hauv ib lub nroog loj tiam sis lawv tsis teb nws li. Tau 4 hlis tom qab, lawv mam tuaj pab tab sis Npooxalim twb tuag lawm. Nws tau kis tus kab mob Monpaws los ntawm cov neeg khawb thee uas nws pab.

QHOV NO QHIA LI CAS? Tej kab mob xws li mob ntsws muaj dej, raws plab, mob Ej (AIDS) los sis HIV, mob ntsws qhuav, thiab mob npaws yog cov uas ua rau neeg tuag coob txhua xyoo. Nyob rau xyoo 2004 tsib hom kab mob uas hais no ua rau tib neeg tuag tshaj li 10 plhom. Yog muab laij los ces ib xyoo twg muaj txog li ib tug neeg tuag txhua txhua 3 chib.

IB TXHIA HO XAV LI CAS? Muaj tib neeg coob zuj zus tuaj, yog li ntawd yuav muaj kab mob ntau zuj zus tuaj thiab yuav sib kis yooj yim dua.

QHOV NO PUAS MUAJ TSEEB? Muaj tseeb tias muaj neeg coob ntau zuj zus lawm xwb tiag. Tiam sis tib neeg kuj muaj peev xwm kuaj tau, tswj, thiab kho tej kab mob. Yog li tsim nyog tib neeg tsis tshua muaj mob muaj nkeeg lawm? Tiam sis tsis muaj li ntawd.

KOJ XAV LI CAS? Puas yog tib neeg muaj mob txom nyem ntsuav raws li phau Vajlugkub tau qhia lawm?

Av qeeg, kev tshaib kev nqhis, thiab kab mob kev nkeeg ua rau tib neeg coob coob tau raug kev txom nyem. Muaj tsheej plhom tib neeg raug kev tsim txom los ntawm cov tib neeg uas tiag mas yuav tsum tiv thaiv lawv. Cia peb mus saib seb phau Vajlugkub qhia tias yuav muaj dab tsi tshwm sim ntxiv.

[Cov lus hauv qab taw qhia]

[Cov lus rho hauv zaj no]

“Yeej txaus ntshai kawg li thaum ib tug tsov ntxhuav los sis ib tug tsiaj qus tom neeg tuag, tib yam li ntawd ib tug kab mob phem txov txoj sia hauv peb lub nrog cev yeej txaus ntshai tib yam nkaus.”​—MAIS KAUM AUXATAWHOOS (MICHAEL OSTERHOLM), IB TUG KWS TSHAWB FAWB TXOG KAB MOB

[Credit Line rau cov duab]

© William Daniels/​Panos Pictures

Zaj Lus Faj Lem 4. Tib Neeg Yuav Tsis Txawj Sib Hlub

“Lawv yuav tsis sib hlub.”​—2 TIMAUTES 3:1-3

● Khij (Chris) ua hauj lwm rau cov tib neeg uas raug kev ua nruj ua tsiv hauv lub cuab lub yig nyob hauv teb chaws Ve-o (Wales) qaum teb. Khij hais tias, “Muaj ib tug poj niam uas kuv twb tau pom nws dua lawm, thaum nws tuaj nws raug ntaus sab heev kuv twb cwj tsis tau nws lub ntsej muag li. Hos muaj ib co poj niam siab ntsws puas tag ua rau lawv twb ntsia tsis taus qhov twg li tsuas ntsia ntsoov hauv av xwb.”

QHOV NO QHIA LI CAS? Nyob hauv ib lub teb chaws hauv Afika, muaj txog li 1 tug ntawm 3 tug poj niam raug yuam ua phem ua qias thaum lawv tseem yog me nyuam yaus. Muaj ib txoj kev soj ntsuam hauv tib lub teb chaws no pom tau tias coob tus txiv neej xav tias lawv yeej muaj cai ntaus lawv cov poj niam. Txawm li ntawd los, tsis yog cov poj niam thiaj raug kev ua nruj ua tsiv hauv lub cuab lub yig xwb. Xws li, nyob hauv teb chaws Kanada (Canada) 3 tug txiv neej ntawm 10 tus raug lawv tus khub ua nruj ua tsiv rau.

IB TXHIA HO XAV LI CAS? Lawv hais tias yeej ib txwm muaj kev ua nruj ua tsiv hauv lub cuab lub yig. Tsuas yog niaj hnub nim no tib neeg hais tawm ntau dua yav tag los xwb.

QHOV NO PUAS MUAJ TSEEB? Yeej muaj tseeb tias tib neeg hais tawm txog kev ua nruj ua tsiv hauv lub cuab lub yig dua yav tag los. Tiam sis qhov no puas qhia tau tias hauv lub cuab lub yig tsis muaj kev ua nruj ua tsiv lawm? Tsis yog li ntawd. Tib neeg haj yam tsis txawj sib hlub hauv tsev neeg lawm.

KOJ XAV LI CAS? Puas muaj tiav raws li 2 Timautes 3:​1-3 hais? Puas yog coob leej tsis muaj kev hlub rau lawv tsev neeg lawm?

Zaj lus faj lem 5 yuav qhia txog lub ntiaj teb. Cia peb mus kawm seb phau Vajlugkub hais li cas.

[Cov lus rho hauv zaj no]

“Feem ntau cov tib neeg uas raug kev ua nruj ua tsiv hauv lub cuab lub yig tsis mus qhia tej tub ceev xwm. Ib tug poj niam twg tsawg kawg los raug ntaus txog li ntawm 35 zaug ua ntej nws mam mus qhia rau tub ceev xwm.”​—IB TUG POJ NIAM SAWV CEV RAU KEV UA NRUJ UA TSIV HAUV TEB CHAWS VE-O (WALES).

Zaj Lus Faj Lem 5. Tib Neeg Ua Rau Lub Ntiaj Teb Puas Tsuaj

“[Vajtswv] yuav rhuav cov neeg uas ua rau lub ntiajteb no puastsuaj mus!”​—TSHWMSIM 11:18.

● Muaj ib tug yawm txiv uas yog xeem Pelis (Pirri) uas ua hauj lwm ua cawv toov laj hauv lub zos Khaphaus (Kpor) teb chaws Nai Ntsaw Lia (Nigeria). Nws ua tsis tau nws txoj hauj lwm vim muaj roj nchuav rau hauv tus dej Nai Ntsaw Dauthas (Niger Delta) uas txuas mus rau dej hiav txwv loj. Nws hais tias, “Ua rau tej ntses tuag tas, tsis zoo rau peb siv ntxuav peb lub cev, thiab ua rau cov dej tsis huv lawm. Kuv tsis pom qab khwv noj khwv haus li lawm.”

QHOV NO QHIA LI CAS? Raws li ib co neeg tshawb fawb nhriav tau, muaj tshaj li 6 plhom tej khoom pov tseg uas tib neeg muab cuam rau hauv dej hiav txwv txhua xyoo. Lawv kuj pom tias 50 feem pua yog tej khoom yas uas muaj peev xwm yuav ntab nyob tsheej puas xyoo ua ntej mam lwj tau. Tib neeg ua rau lub ntiaj teb puas tsus tsis huv thiab tseem muab tej hav zoov hav ntoo thiab dej hiav txwv lws tsis txuag kiag li. Muaj ib co kev kawm tshawb pom tias yog tib neeg siv tej khoom ntiaj teb xws li tej xyoob tej ntoo tau ib lub xyoo lawm ces yuav kom tej khoom ntawd rov ciaj dua tshiab tuaj yuav tau tos li ib lub xyoo thiab 5 lub hlis. Ib tsab ntawv xov xwm hauv teb chaws Auxitalia (Australia) tau hais tias, “Yog tias pheej yuav muaj tib neeg coob zuj zus thiab pheej siv tej khoom ntiaj teb ntau zuj zus li niaj hnub nim no xwb ces ntshe tib neeg yuav cheem tsum ob lub ntiaj teb thaum txog xyoo 2035 thiaj li yuav txaus rau sawv daws nyob thiab siv.”

IB TXHIA HO XAV LI CAS? Tib neeg yeej txawj ntse thiab muaj peev xwm heev. Yog li no tib neeg yeej kho tau kom lub ntiaj teb nyob huv si.

QHOV NO PUAS MUAJ TSEEB? Muaj coob tus neeg los sis tej pab neeg uas yeej xav kho tej huab cua thiab tej cheeb tsam ib puag ncig hauv lub ntiaj teb. Txawm li ntawd los lub ntiaj teb haj yam puas tsuaj loj zuj zus xwb.

KOJ XAV LI CAS? Yog li puas tsim nyog Vajtswv yog tus uas pab cawm lub ntiaj teb kom tsis txhob puas tsuaj mus, ib yam li nws tej lus cog tseg uas nws tau hais?

Peb twb tau kawm txog 5 zaj lus faj lem lawm, tiam sis phau Vajlugkub tseem qhia ntxiv txog tej yam zoo uas yuav muaj rau tiam kawg. Cia peb mus kawm txog ib lub ntsiab ntawm zaj lus faj lem 6.

[Cov lus rho hauv zaj no]

“Thaum ntej kuv daim av zoo nkauj ntsuab xiab tiam sis nim no muaj tej khoom pov qias tsus nyob rau hauv lawm xwb.”​—ELEE TEENPAW (ERIN TAMBER), IB TUG NYOB HAUV CEG HIAV TXWV, TEB CHAWS UNITED STATES, TXOG XWM TXHEEJ PHEM XYOO 2010 UAS ROJ NCHUAV RAU CEG HIAV TXWV HAUV MEV TEB (MEXICO).

[Credit Line rau cov duab]

U.S. Coast Guard photo

Zaj Lus Faj Lem 6. Tshaj Tawm Txoj Xov Zoo Thoob Plaws Ntiaj Teb

“Txoj xov zoo txog Vajtswv txoj kev kav yuav raug muab tshaj tawm mus thoob plaws lub ntiaj teb.”​—MATHAIS 24:14.

● Vailatias (Vaiatea) nyob rau hauv ib lub pov txwv hauv koog pov txwv hu ua Tumauthus (Tuamotu) ntawm dej Hiav Txwv Pas Xis Fiv (Pacific Ocean) uas nyob deb heev thiab tsis tshua muaj neeg nyob. Nyob ntawm thaj tsam no muaj 80 lub pov txwv tiam sis tsuas muaj txog li 16,000 laj mej pej xeem nyob rau hauv xwb. Txawm li ntawd los, tseem muaj Yehauvas Cov Tim Khawv mus qhia txoj xov zoo rau Vailatias thiab cov neeg zej zog. Vim li cas Yehauvas Cov Tim Khawv thiaj mus nrhiav tej neeg uas nyob deb ua luaj? Vim lawv xav qhia txoj xov zoo txog Vajtswv txoj kev kav rau txhua tus tsis hais lawv nyob deb los sis nyob ze.

QHOV NO QHIA LI CAS? Txoj xov zoo txog Vajtswv txoj kev kav raug muab tshaj tawm mus thoob plaws lub ntiaj teb. Nyob rau hauv xyoo 2010 nkaus xwb, Yehauvas Cov Tim Khawv twb tau tshaj tawm txog li 1,000 plhom txoos teev rau 236 lub teb chaws. Qhov no qhia tau tias txhua tus Tim Khawv tau mus tshaj tawm 30 feeb txhua txhua hnub. Yog li tau 10 lub xyoo dhau los no, cov Tim Khawv tau luam tawm thiab yais tawm tej ntaub ntawv Vajlugkub ntau tshaj li 20,000 plhom.

IB TXHIA HO XAV LI CAS? Twb tau muab txoj xov zoo hauv phau Vajlugkub tshaj tawm tau tsheej txhiab xyoo los lawm.

QHOV NO PUAS MUAJ TSEEB? Yeej muaj tseeb tias muaj lwm cov tib neeg tshaj tawm txog txoj xov zoo hauv phau Vajlugkub thiab. Txawm li ntawd los, lawv tsuas tshaj tawm ib ntus thiab rau tej thaj chaw xwb. Tiamsis, Yehauvas Cov Tim Khawv tshaj tawm thoob plaws ntiaj teb mus rau tsheej plhom tib neeg. Txawm yuav muaj tej nom tswv thiab tej pab tib neeg sawv tawm tsam Yehauvas cov tib neeg npaum li cas los lawv yeej uv thiab ua siab ntev tshaj tawm txoj xov zoo.a (Malakaus 13:13) Tsis tas li ntawd, Yehauvas Cov Tim Khawv siv lawv lub sij hawm, yais tej ntaub ntawv Vajlugkub thiab ua Vajtswv tes hauj lwm pub dawb xwb. Tes hauj lwm tshaj tawm no yog txhawb nqa los ntawm tej nyiaj siab dawb.

KOJ XAV LI CAS? Txoj xov zoo txog Vajtswv txoj kev kav puas tau muab tshaj tawm thoob plaws ntiaj teb? Qhov uas zaj lus faj lem no muaj tiav zuj zus puas qhia tias yuav muaj yam zoo nyob rau yav tom ntej?

[Cov lus hauv qab taw qhia]

[Cov lus rho hauv zaj no]

“Peb yeej yuav kub siab lug mus tshaj tawm txoj xov zoo txog Vajtswv txoj kev kav thiab siv txhua txoj hau kev mus nrhiav tib neeg raws li uas Yehauvas pom zoo.”​—YEHAUVAS COV TIM KHAWV PHAU TXWM XYOO 2010.

Lub Neej Zoo Tab Tom Los Yuav Txog!

“Cov neeg siab phem nyob ib ntu xwb lawv yuav puastsuaj mus. . . Tiamsis cov neeg txo hwjchim yuav muaj teb muaj chaw, muaj kev thajyeeb thiab kev tau zoo nyob kaj siab lug.”​—PHAU NTAWV NKAUJ 37:10, 11.

KOJ puas xav kom muaj tiav raws li nqe Vajlugkub uas hais saum no? Peb tso siab tau tias tshuav tsis ntev lawm xwb yeej yuav muaj tiav raws li ob nqe no hais.

Tej zaj uas peb nyuam qhuav kawm tas los no tsuas tham txog ib cov lus faj lem hauv phau Vajlugkub uas qhia tias peb nyob rau tiam kawg lawm tiag. (2 Timautes 3:1-5) Vajtswv tshoov tib neeg sau txog cov lus faj lem hauv phau Vajlugkub uas qhia txog tej xwm txheej no kom peb thiaj muaj kev cia siab. (Loos 15:4) Thaum muaj tiav raws li cov lus faj lem tau qhia tseg lawm ces qhia rau peb tshuav tsis ntev lawm xwb tej kev phem peb muaj niaj hnub nim no yuav dua mus.

Tom qab lub sij hawm kawg yuav muaj li cas? Vajtswv lub Nceeg Vaj yuav kav tag nrho noob neej. (Mathais 6:9) Cia peb mus kawm seb phau Vajlugkub qhia tias yuav zoo li cas thaum Vajtswv kav:

● Kev tshaib kev nqhis yuav ploj mus. “Thov kom lub tebchaws ntawd muaj nplej ntsu nplua mias, thov kom muaj qoobloo puv nkaus saum tej pov roob.”​—Phau Ntawv Nkauj 72:16.

● Kab mob kev nkeeg yuav ploj mus. “Cov neeg uas nyob hauv peb lub tebchaws yuav tsis muaj leejtwg nroo hais tias, ‘Kuv muaj mob.’”​—Yaxayas 33:24.

● Yuav kho lub ntiaj teb kom rov zoo nkauj tuaj. “Tiaj suabpuam thiab lub tebchaws uas qhuav nkig nkuav yuav zoo siab heev, thiab yuav muaj paj tawg ntsa iab rau saum tej av qhuav.”​—Yaxayas 35:1.

Tej lus no yog ib cov lus faj lem uas yuav muaj tiav raws li phau Vajlugkub tau cog lus tseg. Yog koj xav paub ntxiv Yehauvas Cov Tim Khawv zoo siab hlo yuav pab kom koj tso siab tau tias lub neej uas zoo kawg nkaus tab tom los yuav txog.