Yexus caij tus nees luav muaj tsim ntxiag mus rau hauv Yeluxalees

Tej Lus Faj Lem Txog Tus Mexiyas Puas Qhia Tias Yexus Yog Tus Mexiyas Tiag?

Phau Vajlugkub qhia li no

Thaum Yexus tseem nyob hauv ntiaj teb nws yeej tau ua tiav raws li tej lus faj lem txog tus Mexiyas uas yog tus “Vajtswv xaiv los ua tus thawjtswj,” thiab yog “neeg ntiajteb tus Cawmseej.” (Daniyees 9:25; 1 Yauhas 4:14) Thiab tom qab Yexus tuag lawm los, Yexus tseem ua tiav raws li cov lus faj lem txog tej uas tus Mexiyas yuav tau ua.—Phau Ntawv Nkauj 110:1; Tes Haujlwm 2:34-36.

Lo lus “Mexiyas”txhais li cas?

Lo lus Henplais Ma·shiʹach (Mexiyas) thiab lo lus Kili Khri·stos (Khetos) ob lo lus no txhais hais tias “tus uas xaiv tseg.” Yog li ntawd, “Yexus Khetos” txhais hais tias “Yexus tus uas xaiv tseg,” los sis “Yexus tus Mexiyas.”

Hauv phau Vajlugkub, thaum xaiv ib tug neeg los tuav ib teg hauj lwm tseem ceeb uas muaj hwj chim ces yuav tau muab roj hliv rau saum tus uas tau xaiv ntawd lub taub hau. (Levis Kevcai 8:12; 1 Xamuyees 16:13) Vajtswv xaiv Yexus los uas tus Mexiyas—yog ib teg hauj lwm uas tseem ceeb heev. (Tes Haujlwm 2:36) Thaum Vajtswv xaiv Yexus, nws tsis yog muaj roj hliv rau Yexus taub hau tiam sis Vajtswv muab lub hwj huam dawb huv rau Yexus.—Mathais 3:16.

Puas yog tias yuav tsum muaj ob peb tug thiaj li muaj tiav raws li tej lus faj lem?

Tsis yog. Thaum ib tug twg nias nws lub taub teg, lub taub teg ntawd tsuas qhia txog tus neeg ntawd xwb. Ces ib yam li ntawd, cov lus faj lem uas yuav tsum muaj tiav los kuj taw mus rau ib tug Mexiyas los sis tus Khetos xwb. Txawm li ntawd los, Phau Vajlugkub ceeb toom peb tias “Rau qhov yuav muaj cov Khetos cuav thiab cov uas ua txuj cev Vajtswv lus sawv los ua ntau yam txuj ci tseem ceeb ntxias tib neeg yuam kev, tsis hais cov uas xaiv tseg tib si.”—Mathais 24:24.

Puas yog tus Mexiyas tseem yuav tshwm los rau yav tom ntej?

Tsis yog. Phau Vajlugkub twb qhia lawm tias tus Mexiyas yuav yug los rau hauv Ixayees tus Vajntxwv Daviv caj ces. (Phau Ntawv Nkauj 89:3, 4) Txawm yog li ntawd los, tej ntaub ntawv keeb kwm uas qhia cov Yudais tej npe ib tiam dhau ib tiam mus txog ntua Daviv tiam tau ploj tag lawm. Tej zaum thaum cov Loos tuaj txeeb tau lub nroog Yeluxalees rau xyoo 70a ces tej ntaub ntawv ntawd raug puas tsuaj tag lawm. Txij thaum ntawd los yeej tsis muaj leej twg muab tau pov thawj los qhia tias Yexus yeej yog yug ntawd Daviv caj ces los tiag. Yexus cov yeeb ncuab yeej tsis muaj ib tug cam yeej tias Yexus tsis yog yug ntawd Daviv caj ces los txawm tias yeej muaj cov ntaub ntawv keeb kwm uas qhia txog lawv tej yawg koob rau lub sij hawm uas Yexus nyob.—Mathais 22:41-46.

Muaj pes tsawg zaj lus faj lem txog tus Mexiyas nyob hauv Phau Vajlugkub?

Cov lus faj lem txog tus Mexiyas muaj ntau heev suav tsis txheeb li. Muaj tej zaj lus faj lem thaum nyeem txog txawm tias tsis hais lub npe kiag los yeej paub tias yog hais txog tus Mexiyas ntag. Zaj uas nyob ntawm Yaxayas 53:2-7 hais txog tej uas tus Mexiyas yuav tau raug. Tej zaum yuav muaj ib txhia xav tias tag nrho zaj no yog tib zaj lus faj lem txog tus Mexiyas xwb, hos tej zaum lwm tus yuav xav tias zaj no yog hais txog ntau zaj lus faj lem uas nyias muaj nyias.

Tej zaj lus faj lem txog tus Mexiyas uas muaj tiav rau ntawm Yexus

Zaj lus faj lem	Nyob ntawm	Muaj tiav
Anplahas cov xeeb ntxwv	Chivkeeb 22:17, 18	Mathais 1:1
Anplahas tus tub Ixaj cov xeeb ntxwv	Chivkeeb 17:19	Mathais 1:2
Yug los ntawm xeem Yudas caj ces	Chivkeeb 49:10	Mathais 1:1, 3
Los ntawm Vajntxwv Daviv caj ces	Yaxayas 9:7	Mathais 1:1
Yug los ntawm ib tug nkauj xwb	Yaxayas 7:14	Mathais 1:18, 22, 23
Yug hauv lub zos Npelehees	Mikhas 5:2	Mathais 2:1, 5, 6
Tis lub npe hu ua Emanu-eesb	Yaxayas 7:14	Mathais 1:21-23
Lub neej thaum chiv thawj	Yaxayas 53:2	Lukas 2:7
Coob tus me nyuam mos raug tua tom qab Yexus yug	Yelemis 31:15	Mathais 2:16-18
Tawm hauv Iyiv teb los	Hauxeyas 11:1	Mathais 2:13-15
Hu ua tus neeg Naxalesc	Yaxayas 11:1	Mathais 2:23
Txib tus tub xa xov los ua ntej	Malakis 3:1	Mathais 11:7-10
Raug xaiv uas tus Mexiyas xyoo 29 T.Q.Y.d	Daniyees 9:25	Mathais 3:13-17
Vajtswv lees tias Yexus yog nws tus tub	Phau Ntawv Nkauj 2:7	Tes Haujlwm 13:33, 34
Ua siab kub lug rau Vajtswv lub tuam tsev	Phau Ntawv Nkauj 69:9	Yauhas 2:13-17
Tus uas tshaj tawm txoj xov zoo	Yaxayas 61:1	Lukas 4:16-21
Qhov tshaj tawm hauv Kalilais yog qhov kaj ci lam lug	Yaxayas 9:1, 2	Mathais 4:13-16
Tus uas ua txuj ci tseem ceeb li Mauxes	2 Kevcai 18:15	Tes Haujlwm 2:22
Ib yam Li Mauxes, nws qhia raws li Vajtswv hais	2 Kevcai 18:18, 19	Yauhas 12:49
Kho coob tus neeg muaj mob zoo	Yaxayas 53:4	Mathais 8:16, 17
Tsis yog ua kom tib neeg qhuav nws	Yaxayas 42:2	Mathais 12:17, 19
Hlub tshua cov neeg muaj kev txom nyem nyuaj siab	Yaxayas 42:3	Mathais 12:9-20; Malakaus 6:34
Qhia Vajtswv Txoj Kev Ncaj Ncees	Yaxayas 42:1, 4	Mathais 12:17-20
Tus Tuav Xam uas zoo kawg nkaus	Yaxayas 9:6, 7	Yauhas 6:68
Qhia Vajtswv Yehauvas Lub Npe	Phau Ntawv Nkauj 22:22	Yauhas 17:6
Siv lus piv txwv los qhia	Phau Ntawv Nkauj 78:2	Mathais 13:34, 35
Tus Thawj Coj	Daniyees 9:25	Mathais 23:10
Coob tus tsis ntseeg nws	Yaxayas 53:1	Yauhas 12:37, 38
Lub pob zeb dawm taw	Yaxayas 8:14, 15	Mathais 21:42-44
Neeg tsis lees paub	Phau Ntawv Nkauj 118:22, 23	Tes Haujlwm 4:10, 11
Neeg ntxub txawm tsis tau ua txhaum	Phau Ntawv Nkauj 69:4	Yauhas 15:24, 25
Caij tus nees luav muaj tsim ntxiag mus rau hauv Yeluxalees	Xakhaliyas 9:9	Mathais 21:4-9
Me nyuam yaus qhuas nws	Phau Ntawv Nkauj 8:2	Mathais 21:15, 16
Tus uas sawv cev rau Yehauvas lub npe	Phau Ntawv Nkauj 118:26	Yauhas 12:12, 13
Yexus ib tug thwj tim ntxeev siab rau nws	Phau Ntawv Nkauj 41:9	Yauhas 13:18
Them 30 lub nyiaj kom ntxeev siabe	Xakhaliyas 11:12, 13	Mathais 26:14-16; 27:3-10
Cov phooj ywg tau muab nws tso tseg	Xakhaliyas 13:7	Mathais 26:31, 56
Tib neeg ua tim khawv cuav los tawm tsam nws	Phau Ntawv Nkauj 35:11	Mathais 26:59-61
Tsis hais ib los teb cov iab hiam nws	Yaxayas 53:7	Mathais 27:12-14
Neeg nto qaub ncaug rau nws	Yaxayas 50:6	Mathais 26:67; 27:27, 30
Raug ntaus taub hau	Mikhas 5:1	Malakaus 15:19
Raug nplawm	Yaxayas 50:6	Yauhas 19:1
Tsis tawv nyom cov uas nplawm nws	Yaxayas 50:6	Yauhas 18:22, 23
Cov nom tswv koom siab tawm tsam nws	Phau Ntawv Nkauj 2:2	Lukas 23:10-12
Muab nws txhais tes thiab ko taw ntsia ntawm tus ncej ntoo	Phau Ntawv Nkauj 22:16	Mathais 27:35; Yauhas 20:25
Muab nws cov khaub ncaws los ua kev twv txiaj yuam pov	Phau Ntawv Nkauj 22:18	Yauhas 19:23, 24
Nrog cov neeg txhaum tuag ua ke	Yaxayas 53:12	Mathais 27:38
Raug luag thuam, saib tsis taus	Phau Ntawv Nkauj 22:7, 8	Mathais 27:39-43
Ris neeg txhaum lub txim	Yaxayas 53:5, 6	1 Petus 2:23-25
Cuag li Vajtswv tso nws tseg lawm	Phau Ntawv Nkauj 22:1	Malakaus 15:34
Muab kua txiv hmab qaub xyaw kua iab rau haus	Phau Ntawv Nkauj 69:21	Mathais 27:34
Nqhis dej heev ua ntej kiag nws siav tu	Phau Ntawv Nkauj 22:15	Yauhas 19:28, 29
Tso phluav txoj sia rau Vajtswv	Phau Ntawv Nkauj 31:5	Lukas 23:46
Tso nws txoj sia tseg	Yaxayas 53:12	Malakaus 15:37
Muab tus nqi txhiv los ntxuav kev txhaum	Yaxayas 53:12	Mathais 20:28
Tej pob txha tsis lov ib tug	Phau Ntawv Nkauj 34:20	Yauhas 19:31-33, 36
Xuas hmuv nkaug	Xakhaliyas 12:10	Yauhas 19:33-35, 37
Faus nrog cov nplua nuj	Yaxayas 53:9	Mathais 27:57-60
Tsa hauv qhov tuag ciaj sawv rov los	Phau Ntawv Nkauj 16:10	Tes Haujlwm 2:29-31
Muaj dua ib tug los hloov tus uas ntxeev siab chaw	Phau Ntawv Nkauj 109:8	Tes Haujlwm 1:15-20
Zaum ntawm Vajtswv sab xis	Phau Ntawv Nkauj 110:1	Tes Haujlwm 2:34-36

a McClintock thiab Strong’s Cyclopedia hais tias: “Tej zaum cov neeg Yudais tej npe uas qhia txog Daviv caj ces tau ploj ua ntej lub sij hawm Yeluxalees raug puas tsuaj es tsis yog tom qab ntawd.”

b Lub npe Henplais Emanu-ees, txhais hais tias “Vajtswv nrog nraim peb,” yog lub npe uas phim Yexus tes hauj lwm los ua tus Mexiyas kawg li. Qhov uas Yexus los yug rau hauv ntiaj teb no thiab nws tes hauj lwm qhia tias Vajtswv yeej nrog nraim cov uas teev tiam Vajtswv.—Lukas 2:27-32; 7:12-16.

c Lo lus “Naxales” yog los ntawm lo lus Henplais neʹtser, uas txhais tias “tus ntsuag.”

d Yog xav paub ntxiv txog qhov uas tus Mexiyas tshwm rau xyoo 29 T.Q.Y., mus nyeem zaj uas hu ua “Daniyee Zaj Lus Faj Lem Txog Tus Mexiyas.”

e Zaj faj lem no nyob rau hauv phau Xakhaliyas, tiam sis tus tub txhib Mathais qhia tias “muaj tiav raws li Vajtswv tau hais rau Yelemis tus uas cev Vajtswv lus.” (Mathais 27:9) Phau Vajlugkub muaj ib ntu uas hu ua “Cov Cev Vajtswv Lus”. (Lukas 24:44) Tej zaum nyob rau hauv ntu ntawd, tau muab phau Yelemis tso ua ntej lwm phau ces Mathai thiaj tsuas siv phau “Yelemis” los hais txog tag nrho cov ntawv uas kuj muaj phau Xakhaliyas nyob rau hauv thiab.