ZAJ KAWM 34
Kawm Ntawm Phau Vajlugkub Tej Lus Faj Lem
“Tsuas yog cov neeg txawj ntse thiaj yuav totaub xwb.”—DANIYEES 12:10.
ZAJ NKAUJ 98 Vajtswv Tshoov Neeg Sau Nws Txojlus
ZAJ NO THAM TXOG DAB TSI?a
1. Yuav ua li cas peb thiaj yuav nyiam kawm cov lus faj lem hauv phau Vajlugkub?
KWV TIJ Npees (Ben) hais tias, “Kuv nyiam kawm cov lus faj lem hauv phau Vajlugkub heev.” Koj puas nyiam kawm li nws thiab? Los sis koj tsis nyiam kawm vim koj xav tias kawm lus faj lem nyuaj heev? Tiam sis yog koj kawm thiab paub tias yog vim li cas Yehauvas thiaj muab tej lus faj lem sau cia rau hauv phau Vajlugkub ces tej zaum koj kuj yuav xav kawm thiab.
2. Zaj no peb yuav kawm txog dab tsi?
2 Hauv zaj no peb yuav kawm seb yog vim li cas thiaj zoo rau peb kawm cov lus faj lem hauv phau Vajlugkub thiab peb yuav kawm li cas peb thiaj to taub. Peb kuj yuav kawm ob zaj lus faj lem hauv phau Daniyees tias thaum peb to taub ob zaj lus faj lem no yuav pab tau peb li cas tam sim no.
VIM LI CAS THIAJ ZOO RAU PEB KAWM COV LUS FAJ LEM?
3. Yuav kom peb to taub cov lus faj lem peb yuav tau ua li cas?
3 Yuav kom peb to taub cov lus faj lem hauv phau Vajlugkub peb yuav tau thov lwm tus pab peb. Muab piv txwv tias koj mus rau ib thaj tsam uas koj tsis tau mus dua tiam sis koj tus phooj ywg uas nrog koj mus paub thaj tsam ntawd zoo heev thiab nws paub cov kev nyob ntawd tias txoj twg mus rau qhov twg ces koj yeej zoo siab heev uas muaj nws nrog koj. Yehauvas zoo li tus phooj ywg ntawd. Nws paub yav tom hauv ntej yuav zoo li cas. Yog peb xav kom peb to taub cov lus faj lem ces peb yuav tau txo hwj chim thiab thov nws pab peb.—Daniyees 2:28; 2 Petus 1:19, 20.
Kawm cov lus faj lem yuav pab kom peb paub npaj rau tej uas yuav muaj tshwm sim los rau yav tom hauv ntej (Saib nqe 4)
4. Vim li cas Yehauvas thiaj muab cov lus faj lem sau cia rau hauv phau Vajlugkub? (Yelemis 29:11) (Saib daim duab.)
4 Cov niam cov txiv tsuas xav kom lawv cov me nyuam muaj lub neej zoo siab xwb. Yehauvas los kuj xav kom peb muaj lub neej zoo siab thiab. (Nyeem Yelemis 29:11.) Tiam sis Yehauvas tsis zoo li tib neeg, nws paub tseeb tias yav tom hauv ntej yuav zoo li cas thiab yeej muaj tiag li nws hais. Yehauvas muab cov lus faj lem sau cia rau hauv phau Vajlugkub los twb yog nws hlub peb thiab xav kom peb paub txog tej xwm txheej tseem ceeb uas yuav muaj tshwm sim rau yav tom hauv ntej, thiab yuav tshwm sim los li cas kom peb thiaj li paub npaj tam sim no. (Yaxayas 46:10) Tiam sis yuav ua li cas peb thiaj paub tseeb tias yuav muaj tiag li cov lus faj lem hais?
5. Cov hluas yuav xyaum tau Mas tus qauv li cas?
5 Thaum peb cov me nyuam mus kawm ntawv, muaj cov uas tsis nyiam thiab saib tsis taus phau Vajlugkub coob heev. Lawv yuav hais ntau yam thiab yuav ua ntau yam uas ua rau peb cov me nyuam xav tias xyov lawv txoj kev ntseeg puas yog qhov tseeb. Ib tug tub hluas hu ua Mas (Max) hais tias, “Thaum kuv nyuam qhuav tiav hluas, kuv txawm pib xav tias xyov tej uas kuv niam thiab kuv txiv nkawd qhia kuv puas yog txoj kev ntseeg tseeb thiab phau Vajlugkub puas yog Vajtswv Txoj Lus tiag.” Nws niam thiab nws txiv ua li cas xwb? Nws hais tias, “Nkawd tsis chim rau kuv. Tiam sis kuv paub tias nkawd yeej txhawj txog kuv heev.” Mas niam thiab txiv ua zoo muab phau Vajlugkub los teb nws tej lus nug. Mas los kuj ua li nws ua tau thiab. Nws hais tias, “Kuv rau rau siab kawm cov lus faj lem thiab mus tham nrog lwm cov hluas hauv lub koom txoos txog tej uas kuv kawm. Nim no, kuv thiaj ntseeg tias phau Vajlugkub yeej yog Vajtswv Txoj Lus tiag.”
6. Piav seb koj yuav tau ua li cas yog koj tseem ua xyem xyav, thiab piav seb vim li cas koj thiaj yuav tau ua li ntawd.
6 Yog hais tias koj ho ua xyem xyav tias xyov tej uas phau Vajlugkub hais puas yog qhov tseeb tiag li Mas los tsis txhob txaj muag. Tiam sis koj yuav tau ua zoo tshuaj xyuas seb koj yuav ua li cas koj thiaj li paub qhov tseeb. Qhov uas peb pheej ua xyem xyav ntawd zoo ib yam li xeb, yog peb muaj ib yam uas muaj nqis heev rau peb pib xeb lawm tiam sis peb tsis kho thaum ntxov ces ntev mus xeb yeej yuav muab noj puas tsuaj tag. Yuav kom koj tsis poob kev ntseeg, koj yuav tau ua tib zoo xav li no, ‘Kuv puas ntseeg tias tej uas phau Vajlugkub hais txog yav tom hauv ntej yuav muaj tiag?’ Yog hais tias koj tseem ua xyem xyav ces kav tsij rau rau siab kawm txog tej lus faj lem uas twb muaj tiav lawm. Peb mam li tham ntxiv seb koj yuav li ntawd li cas.
PEB YUAV KAWM COV LUS FAJ LEM LI CAS?
Yuav kom peb tso siab tau rau Yehauvas li Daniyees, peb yuav tau txo hwj chim thiab ua tib zoo kawm kom peb to taub cov lus faj lem kom zoo zoo (Saib nqe 7)
7. Peb yuav xyaum Daniyees tus qauv li cas thaum peb kawm cov lus faj lem? (Daniyees 12:10) (Saib daim duab.)
7 Thaum peb ua zoo tshuaj xyuas Daniyees tus qauv yuav pab kom peb paub seb peb yuav kawm cov lus faj lem li cas. Daniyees kawm cov lus faj lem vim nws xav paub qhov tseeb. Nws kuj txo hwj chim thiab, vim nws paub tias yog nws npuab siab rau Yehauvas thiab mloog Yehauvas lus ces Yehauvas yeej yuav pab kom nws to taub cov lus faj lem. (Daniyees 2:27, 28; nyeem Daniyees 12:10.) Tej Daniyees ua qhia tias nws tso siab plhuav tias Yehauvas yuav pab nws. (Daniyees 2:18) Nws ua zoo kawm thiab tshawb nrhiav Vajtswv Txoj Lus uas muaj rau nws lub sij hawm ntawd. (Yelemis 25:11, 12; Daniyees 9:2) Peb yuav xyaum Daniyees tus qauv li cas?
8. Vim li cas ib txhia thiaj kawm txog cov lus faj lem?
8 Ua zoo xav seb yog vim li cas koj thiaj xav kawm txog cov lus faj lem. Puas yog koj kawm vim koj xav paub qhov tseeb? Yog koj kawm vim koj xav pauv qhov tseeb ces Yehauvas yeej yuav pab koj. (Yauhas 4:23, 24; 14:16, 17) Tiam sis muaj ib txhia, lawv tsuas kawm kom nrhiav kom tau pov thawj tias phau Vajlugkub tsis yog Vajtswv Txoj Lus xwb. Lawv ua li ntawd vim lawv tsis xav ua li phau Vajlugkub hais tiam sis lawv xav ua tus uas txiav txim siab rau lawv tus kheej tias yam twg zoo yam twg phem. Twb yog li ntawd thiaj tseem ceeb heev rau peb ua zoo xav seb yog vim li cas peb thiaj xav kawm cov lus faj lem. Thiab peb yuav ua li cas peb thiaj yuav to taub.
9. Piav seb peb yuav tau ua li cas peb thiaj yuav to taub cov lus faj lem.
9 Peb yuav tau txo hwj chim. Yehauvas cog lus tias nws yuav pab tus uas txo hwj chim. (Yakaunpaus 4:6) Yog li peb yuav tau thov Yehauvas pab peb kom peb to taub cov lus faj lem. Thiab yog peb txo hwj chim ces peb kuj yuav ua zoo kawm seb tus qhev ncaj thiab ntse qhia li cas txog cov lus faj lem. (Lukas 12:42) Yehauvas yog tus Vajtswv uas nws ua dab tsi los nws ua muaj hauv paus hauv ntsis, peb thiaj paub tias nws tsuas siv ib lub koom haum los sis ib txoj hau kev xwb los pab peb to taub qhov tseeb hauv phau Vajlugkub.—1 Kauleethaus 14:33; Efexus 4:4-6.
10. Koj kawm tau li cas los ntawm Exathaws?
10 Peb yuav tau ua zoo tshawb nrhiav. Xav seb koj xav paub zaj lus faj lem twg ces xub kawm zaj ntawd ua ntej. Tus muam Exathaws (Esther) xav paub txog cov lus faj lem uas qhia tias tus Mexiyas yuav los rau thaum twg. Nws hais tias, “Thaum kuv muaj 15 xyoos, kuv pib tshawb nrhiav seb puas muaj pov thawj tias cov lus faj lem no yeej yog sau ua ntej yug Yexus tiag.” Thaum nws nyeem cov kauj ntawv uas luag nrhiav tau ntawm Hiav Txwv Tuag tas nws mam li ntseeg. Nws hais ntxiv tias, “Muaj ib txhia yeej sau ua ntej yug Yexus tiag, kuv thiaj ntseeg tias cov lus faj lem ntawd yuav tsum yog los ntawm Vajtswv los. Muaj tej thaum kuv yuav tau nyeem ntau ntau zaus kuv thiaj to taub.” Exathaws zoo siab heev uas nws lauj sij hawm los ua zoo tshawb nrhiav li ntawd. Nws kuj tshawb nrhiav txog lwm zaj lus faj lem ib yam li ntawd thiab. Nws hais tias, “Twb yog kuv ua li ntawd, kuv thiaj paub tseeb tias tej uas phau Vajlugkub hais yeej muaj tiag.”
11. Yog peb kawm es peb paub tias yeej muaj tseeb li phau Vajlugkub hais yuav pab tau peb li cas?
11 Thaum peb pom tias ib co lus faj lem hauv phau Vajlugkub twb muaj tiav lawm ces peb yuav tso siab rau Yehauvas thiab xav ua li nws hais. Cov lus faj lem kuj yuav pab kom peb tos ntsoov rau yav tom hauv ntej txawm hais tias niaj hnub no peb yuav raug kev sim siab li cas los xij. Tam sim no peb yuav kawm txog Daniyees ob zaj lus faj lem uas tab tom muaj tshwm sim rau tiam peb nyob no. Yog peb to taub ob zaj lus faj lem no ces peb thiaj yuav paub tias peb yuav ua peb neej li cas tam sim no.
TXHAIS KO TAW UAS MUAJ HLAU THIAB AV NPLAUM
12. Txhais ko taw uas muaj hlau thiab av nplaum piv txwv txog dab tsi? (Daniyees 2:41-43)
12 Nyeem Daniyees 2:41-43. Hauv zaj npau suav uas Daniyees txhais rau Vaj Ntxwv Nenpukajnexales, tus mlom uas vaj ntxwv pom txhais ko taw “muaj hlau thiab av nplaum sib xyaw ntxaws.” Thaum peb muab zaj lus faj lem no piv nrog lwm zaj lus faj lem hauv phau Daniyees thiab phau Tshwmsim ces peb thiaj to taub tias txhais ko taw no yog hais txog teb chaws Yunaithim Xatej (United States) thiab teb chaws Askiv sib koom tes li nkawd yog ib lub teb chaws xwb. Lub teb chaws no yog lub uas muaj zog tshaj hauv ntiaj teb niaj hnub no. Txawm li los, Daniyees hais tias “lub tebchaws ntawd ib txhia muaj zog thiab ib txhia tsis muaj zog.” Ib txhia tsis muaj zog vim cov neeg hauv lub teb chaws ntawd “yuav koom tsis tau ua ke.”b
13. Zaj lus faj lem no pab kom peb to taub txog tej yam tseem ceeb twg?
13 Peb kawm tau ntau yam los ntawm tej uas Daniyees piav txog tus mlom. Tiam sis tshwj xeeb tshaj mas yog txhais ko taw. Thawj yam uas peb paub tias teb chaws Yunaithim Xatej thiab Askiv muaj zog heev yog thaum muaj Ntsuj Rog Thoob Qab Ntuj Zaum 1 thiab Zaum 2. Thaum ntawd, nkawd yog ob lub teb chaws uas muaj zog tshaj cov teb chaws uas muaj yeej rau ob ntsuj rog ntawd. Tiam sis txij thaum ntawd los, nkawd zog txawm pib ntaug zuj zus vim tej pej xeem ib leeg sawv tawm tsam ib leeg thiab tawm tsam tej nom tswv. Yam ob, nkawd yog lub tseem fwv kawg uas muaj zog tshaj plaws kav hauv ntiaj teb no ua ntej Vajtswv lub Nceeg Vaj los rhuav tej tseem fwv hauv qab ntuj no kom puas tsuaj tas. Txawm yog muaj tej thaum yuav muaj tej lub teb chaws sawv tawm tsam ob lub teb chaws no los yuav tsis muaj lub los hloov nkawd. Peb paub li ntawd rau qhov lub pob zeb loj loj uas piv txwv txog Vajtswv lub Nceeg Vaj yuav los tsoo tus mlom txhais ko taw uas yog piv txwv txog teb chaws Yunaithim Xatej thiab teb chaws Askiv tawg ntsoog ntxaws.—Daniyees 2:34, 35, 44, 45.
14. Thaum peb to taub zaj lus faj lem txog txhais ko taw hlau thiab av nplaum yuav pab kom peb txiav txim siab tau zoo li cas?
14 Yog peb ntseeg tias yeej yuav muaj tiag tiag li Daniyees zaj lus faj lem hais ces peb yuav tsis mus vuag kom peb nrog luag muaj qhov txhia qhov chaw hauv ntiaj teb no uas tsis ntev xwb twb yuav ploj tas mus. (Lukas 12:16-21; 1 Yauhas 2:15-17) Yog peb to taub zaj lus faj lem no kuj yuav pab kom peb kub siab lug mus tshaj tawm thiab qhia qhov tseeb rau lwm tus thiab. (Mathais 6:33; 28:18-20) Thaum peb kawm zaj lus faj lem me ntsis li no lawm, koj puas ntseeg tias twb tshuav tsis ntev lawm Vajtswv lub Nceeg Vaj yuav los rhuav tib neeg tej tseem fwv hauv ntiaj teb no kom puas tsuaj tas? Yog koj ntseeg no, tej uas koj txiav txim siab ua puas qhia tias koj ntseeg li ntawd?
TUS VAJ NTXWV QAUM TEB THIAB TUS VAJ NTXWV QAB TEB
15. Niaj hnub no leej yog tus vaj ntxwv qaum teb thiab leej twg yog tus vaj ntxwv qab teb? (Daniyees 11:40)
15 Nyeem Daniyees 11:40. Daniyees tshooj 11 tham txog ob tug vaj ntxwv sib txeeb ua tus kav lub qab ntuj no. Thaum peb muab zaj lus faj lem no coj mus piv rau lwm zaj hauv phau Vajlugkub peb thiaj pom tias tus vaj ntxwv sab qaum teb yog tham txog lub teb chaws Lav Xias thiab tsoom teb chaws uas koom tes nrog nws. Hos tus vaj ntxwv sab qab teb yog tham txog lub teb chaws Yunaithim Xatej thiab Askiv thiab cov teb chaws uas koom tes nrog nkawd.c
Thaum tus vaj ntxwv qaum teb thiab tus vaj ntxwv qab teb sib ua rog, peb yuav tsis ntshai thiab peb txoj kev ntseeg yuav ruaj khov tuaj yog peb paub tias tej nkawd ua ntawd yog ua kom muaj tiav li cov lus faj lem hais xwb (Saib nqe 16-18)
16. Yehauvas cov neeg uas nyob hauv qab tus vaj ntxwv qaum teb txoj kev kav ntsib tej teeb meem zoo li cas?
16 Yehauvas cov neeg uas nyob hauv qab tus vaj ntxwv qaum teb kev tswj hwm niaj hnub raug nws tsim txom. Lawv raug ntaus thiab raug ntes mus kaw vim lawv txoj kev ntseeg. Tiam sis tej no yeej tsis ua rau lawv ntshai thiab tseem ua rau lawv haj yam muaj txoj kev ntseeg ntxiv xwb vim lawv paub tias tej uas lawv raug muaj raws nraim li Daniyees zaj lus faj lem hais.d (Daniyees 11:41) Thaum peb paub li no yuav pab kom peb tuav rawv peb txoj kev vam khom thiab muab siab npuab rawv Yehauvas.
17. Yehauvas cov neeg uas nyob hauv qab tus vaj ntxwv qab teb txoj kev kav ntsib tej teeb meem zoo li cas?
17 Yav tas los, tus vaj ntxwv qab teb los yeej tsim txom Yehauvas cov neeg thiab. Xws li thaum muaj Ntsuj Rog Thoob Qab Ntuj Zaum 1 thiab Zaum 2, peb cov kwv tij coob tus raug kaw hauv tsev loj cuj vim lawv tsis kam mus ua rog thiab ib co me nyuam raug rho tawm tsev kawm ntawv vim lawv tsis kam hwm tus chij. Ntau ntau xyoo tsis ntev los no, Yehauvas cov neeg kuj raug lwm yam kev sim siab thiab. Muaj piv txwv li no, thaum txog caij xaiv nom xaiv tswv, muaj tej tug Khixatia yeej xav nrog luag mus pov ntawv rau ib tug nom los sis ib pab nom tswv uas lawv nyiam. Thiab txawm yog nws tsis mus pov ntawv xaiv nom kiag los tej zaum nyob hauv nws lub siab nws twb tuaj ib tug tog lawm. Twb yog li ntawd thiaj tseem ceeb heev rau peb yuav tsum ceev faj tias txhua yam uas peb ua thiab peb tej kev xav yuav tsum qhia tias peb yeej tsis tuaj cov nom tswv leej twg tog li.—Yauhas 15:18, 19; 18:36.
18. Peb yuav ua li cas thaum tus vaj ntxwv qaum teb thiab tus vaj ntxwv qab teb muaj kev sib cov nyom? (Saib daim duab.)
18 Cov uas tsis ntseeg tias yuav muaj li phau Vajlugkub tej lus faj lem hais yuav ntshai heev thiab tsis paub yuav ua li cas thaum tus vaj ntxwv qab teb thiab tus vaj ntxwv qaum teb sib cov nyom. (Daniyees 11:40) Ob tug vaj ntxwv no tus twg los yeej muaj hoob pob nus qhias (nuclear) txaus tua txhua yam uas muaj sia hauv qab ntuj no tuag tag. Tiam sis peb paub tias Yehauvas yuav tsis pub kom muaj li ntawd. (Yaxayas 45:18) Yog li peb thiaj tsis ntshai thaum tus vaj ntxwv qaum teb thiab tus vaj ntxwv qab teb muaj kev sib cov nyom. Tiam sis thaum muaj li ntawd yuav ua kom peb txoj kev ntseeg haj yam ruaj khov xwb. Vim tej uas nkawd ua ntawd qhia tias twb ze ze lub sim ceeb no kawg lawm.
CEEV FAJ ZOV TOS SEB COV FAJ LEM YUAV MUAJ TIAV LI CAS
19. Peb yuav tsum paub li cas txog cov lus faj lem hauv phau Vajlugkub?
19 Txawm Daniyees yog tus sau cov lus faj lem no los nws twb tsis paub tias yuav muaj tiav li cas ces peb los yeej tsis paub ib yam nkaus. (Daniyees 12:8, 9) Txawm li ntawd los peb paub tias cov lus faj lem ntawd yeej yuav muaj tiav xwb xwb li. Thiab peb tso siab tias thaum txog caij txog nyoog lawm Yehauvas yeej yuav qhia rau peb paub li nws ua yav tas los.—Amaus 3:7.
20. Cov lus faj lem twg yuav muaj tiav sai sai tom ntej no, thiab peb yuav tau ua li cas mus ntxiv?
20 Thaum sawv daws hnov tej nom tswv hais tias “peb tau zoo noj thiab tau zoo nyob kawg li lawm” ces thaum ntawd tej nom tswv yuav pib tawm tsam tej kev ntseeg cuav thiab ua kom lawv puas tsuaj tag. (1 Thexalaunikes 5:3; Tshwmsim 17:16, 17) Tom qab ntawd tej nom tswv yuav pib tawm tsam Vajtswv cov neeg. (Exekees 38:18, 19) Thaum no yog thaum uas ntsuj rog Amankedoos uas yog ntsuj rog kawg pib. (Tshwmsim 16:14, 16) Peb tso siab tau tias tej no yeej yuav muaj tshwm sim los sai sai tom ntej no. Ua ntej hnub ntawd los txog, cia peb niaj hnub ua peb Leej Txi Yehauvas tsaug thiab ceev faj zos tos seb cov lus faj lem yuav muaj tshwm sim li cas thiab kub siab lug mus pab lwm tus kom lawv ceev faj zov tos ib yam li peb thiab.
ZAJ NKAUJ 95 Paub Vajtswv Txoj Lus Zuj Zus
a Txawm yav tom hauv ntej yuav phem npaum li cas los peb tso siab tias peb yuav muaj kev zoo siab. Peb ntseeg tau li no los twb yog peb kawm thiab to taub cov lus faj lem hauv phau Vajlugkub. Hauv zaj no peb yuav kawm tias yog vim li cas peb yuav tsum kawm kom peb to taub cov lus faj lem hauv phau Vajlugkub. Thiab peb yuav kawm me ntsis txog ob zaj lus faj lem uas Daniyees sau seb yuav pab tau peb li cas thaum peb to taub ob zaj lus faj lem no.
b Mus saib zaj kawm “Vajtswv Lub Nceeg Vaj Twb Kav Lawm” nqe 10 hauv Phau Tsom Faj lub 7 Hli xyoo 2022.