Kev Ntseeg Cuav Ua Puas Tsuas Vajtswv Lub Npe Li Cas?

Ib txhia tau hais tias, ‘Yog tias Vajtswv yog txoj kev hlub tiag, ces ua cas cov uas lees tias lawv ntseeg Vajtswv ho ua ntau yam phem ua luaj?’ Tos lawv xav li no los yeeb vim yog cov kev ntseeg no tsuas yog kev ntseeg cuav xwb, lawv thiaj ua puas tsuas Vajtswv lub koob lub npe lawm. Tej uas lawv hais thiab ua, dag tib neeg ntau yam txog Vajtswv. Lawv ua puas tsuas Vajtswv li cas? Vajtswv xav li cas txog tej uas lawv tau ua ntawd? Nws yuav ua li cas rau cov neeg uas ua puas tsuas nws lub koob lub npe?

1. Kev ntseeg cuav qhia li cas thiaj puas tsuas Vajtswv lub npe?

Kev ntseeg cuav tau “muab Vajtswv txojlus tseeb hloov ua lus dag.” (Loos 1:25) Ib yam uas ntau txoj kev ntseeg tsis qhia lawv cov tswv cuab yog Vajtswv lub npe. Tiam sis, phau Vajlugkub hais tias peb yuav tsum siv Vajtswv lub npe. (Loos 10:13, 14) Tsis tas li ntawd, cov thawj coj ntawm cov kev ntseeg ntawd kuj qhia tias thaum muaj ib qho xwm txheej phem twg ces twb yog Vajtswv pom zoo ntag. Tiam sis tej uas lawv hais ntawd yeej tsis muaj tseeb. Vajtswv yeej tsis tau tsim kom muaj tej kev phem no kiag li. (Nyeem Yakaunpaus 1:13.) Vim muaj li no, thiaj tsis yooj yim rau tib neeg los cuag Vajtswv.

2. Kev ntseeg cuav ua li cas thiaj puas tsuas Vajtswv lub npe?

Tej kev ntseeg cuav yeej tsis hlub tib neeg npaum li Vajtswv Yehauvas hlub. Phau Vajlugkub hais tias kev ntseeg cuav “tej kev txhaum twb tib mus nto ntuj lawm.” (Tshwmsim 18:5) Los tau tsheej pua xyoo tav li no, tej kev ntseeg tau koom tes nrog tej nom tej tsw, txhawb kev tso kev rog, thiab tso cai tua tsheej plhom tus neeg pov tseg. Ib txhia thawj coj ntawm tej kev ntseeg xav muaj lub neej nplua nuj, lawv thiaj hais kom lawv cov tswv cuab muab nyiaj rau lawv. Tej uas lawv ua no qhia tias lawv tsis paub Vajtswv thiab tsis muaj cai sawv Vajtswv cev.​—Nyeem 1 Yauhas 4:8.

3. Vajtswv xav li cas txog kev ntseeg cuav?

Yog tias tej uas kev ntseeg cuav no ua rau koj chim, koj xav tias puas ua rau Yehauvas npau taws thiab? Yehauvas yeej hlub tshua tib neeg, tiam sis nws tsis txaus siab rau cov thawj coj ntawm tej kev ntseeg vim lawv ua puas tsuas nws lub npe thiab saib tsis taus lawv cov tswv cuab. Yehauvas cog lus tias nws yuav muab kev ntseeg cuav rhuav tshem kom “tsis muaj leejtwg pom” ib zaug ntxiv li lawm. (Tshwmsim 18:21) Tshuav tsis ntev lawm xwb, Vajtswv Yehauvas yuav ua kom tag nrho tej kev ntseeg cuav puas tsuaj mus huv tib si.​—Tshwmsim 18:8.

KAWM NTXIV

4. Vajtswv tsis txais yuav txhua txoj kev ntseeg

Coob tus ntseeg tias tej kev ntseeg tsuas zoo li ntau txoj kev uas puav leej coj mus txog Vajtswv. Tiam sis puas muaj tseeb li ntawd? Nyeem Mathais 7:13, 14 thiab tham txog lo lus no:

• Phau Vajlugkub hais li cas txog txoj kev uas coj mus tau txoj sia?

Saib zaj YEEB YAJ KIAB, thiab tham txog lo lus no.

YEEB YAJ KIAB: Vajtswv Puas Txais Yuav Txhua Txoj Kev Ntseeg?​—Saib Ib Vuag (3:22)

• Phau Vajlugkub puas hais tias muaj ntau txoj kev ntseeg uas ua haum Vajtswv siab?

5. Kev ntseeg cuav qhia tsis tau Vajtswv txoj kev hlub

Kev ntseeg cuav ua puas tsuas Vajtswv lub npe rau ntau txoj ke. Ib txoj uas phem kawg nkaus yog qhov uas lawv koom tes nrog kev tso kev rog. Mus saib zaj YEEB YAJ KIAB txog qhov no thiab tham txog 2 lo lus no.

YEEB YAJ KIAB: Kev Ntseeg Cuav Kev Koom Tes Nrog Nom Tswv (2:22)

• Ntau txoj kev ntseeg cuav coj li cas thaum muaj Ntsuj Rog Thoob Qab Ntuj Zaum 2?

• Koj xav li cas txog tej uas lawv tau ua ntawd?

Nyeem Yauhas 13:34, 35 thiab 17:16. Thiab tham txog ob lo lus no:

• Yehauvas xav li cas thaum tej kev ntseeg koom tes nrog kev tsov kev rog?

• Muaj ntau yam kev phem los yeeb vim yog kev ntseeg cuav xwb. Koj tau pom tej yam twg uas lawv tau ua uas qhia tias lawv tsis muaj kev hlub li Vajtswv?

6. Vajtswv xav pab tib neeg dim ntawm kev ntseeg cuav

Nyeem Tshwmsim 18:4,a thiab tham txog lo lus no:

• Thaum koj paub tias Vajtswv xav pab tus neeg uas kev ntseeg cuav tau dag ntxias lawm, ho ua rau koj xav li cas xwb?

7. Kav tsij kawm ntxiv txog tus Vajtswv tseeb

Tej kev phem uas kev ntseeg cuav hais thiab ua puas ua rau koj xav phem txog Vajtswv? Sim xav hais tias muaj ib tug tub uas tsis yeem mloog nws txiv tej lus, khiav tawm tsev, thiab mus ua ib lub neej tsis zoo. Nws txiv yeej tsis pom zoo rau tej uas nws ua ntawd. Yog li, puas zoo rau peb liam tias twb yog tim leej txiv es tus tub thiaj mus ua lub neej ua dog ua dig?

• Puas tsim nyog rau peb tso tseg tsis kawm ntxiv txog Yehauvas vim tej kev phem uas kev ntseeg cuav tau ua?

KOJ KAWM TAU DAB TSI

Kev ntseeg cuav tau ua puas tsuas Vajtswv lub koob lub npe los ntawm tej lawv tau qhia thiab ua uas phem kawg li. Vajtswv yuav ua kom kev ntseeg cuav puas tsuaj mus.

Rov Tham Dua

• Koj xav li cas txog tej uas kev ntseeg cuav tau qhia thiab tau coj?

• Yehauvas xav li cas txog kev ntseeg cuav?

• Vajtswv yuav ua li cas rau kev ntseeg cuav?

TSHAWB NTXIV

Kawm seb ob yam uas ntau txoj kev ntseeg tau ua tsis haum Vajtswv siab yog dab tsi.

“Txhua Txoj Kev Ntseeg Puas Zoo Ib Yam Nkaus? Lawv Puas Coj Mus Txog Vajtswv Huv Si?” (Nyeem hauv jw.org/hmn)

Vim li cas Yehauvas xav kom peb nrog lwm tus pe hawm nws ua ke?

“Puas Tsim Nyog Peb Koom Ib Txoj Kev Ntseeg Uas Qhia Muaj Chaw Txawb Chaw Rau?” (Nyeem hauv jw.org/hmn)

Ib tug xib hwb txoj kev ntseeg ua rau nws ntxhov siab heev. Tiam sis, qhov no txwv tsis tau kom nws kawm tau qhov tseeb txog Vajtswv.

“Ua Cas Ib Tug Xib Hwb Ho Tawm Hauv Nws Pawg Ntseeg Lawm?” (Tsim Dheev! lub 2 Hlis xyoo 2015)

Kev ntseeg tau dag ntau yam txog Vajtswv. Kawm qhov tseeb txog peb yam uas lawv tau dag ntawd.

“Tej Lus Dag Uas Ua Rau Tib Neeg Hlub Tsis Tau Vajtswv” (Phau Tsom Faj lub 11 Hlis tim 1 xyoo 2013)