Muab Koj Lub Neej Cob Rau Yehauvas Thiab Ua Kev Cai Raus Dej

Koj yuav tsum muab koj lub neej cob rau Yehauvas ua ntej tso, koj mam li ua tau kev cai raus dej. Thaum koj muab koj lub neej cob rau Yehauvas, koj thov thiab cog lus rau nws tias koj yuav teev tiam nws tib leeg xwb thiab yuav muab siab npuab rawv nws. (Phau Ntawv Nkauj 40:8) Thaum koj ua kev cai raus dej, koj qhia rau sawv daws paub tias koj twb muab koj lub neej cob rau Yehauvas lawm. Qhov uas koj ua li no yeej yog ib qho uas tseem ceeb tshaj plaws thiab yuav hloov hlo koj lub neej. Tiam sis yog vim li cas koj thiaj xav muab koj lub neej cob rau Yehauvas thiab ua kev cai raus dej?

1. Vim li cas peb thiaj muab peb lub neej cob rau Yehauvas?

Phau Vajlugkub txhawb kom peb ‘hlub Yehauvas uas yog peb tus Vajtswv kawg siab kawg ntsws, kawg plab kawg plawv thiab kawg peb lub dag lub zog.’ (Malakaus 12:30) Peb muab peb lub neej cob rau Yehauvas los twb yog vim peb hlub Nws. (1 Yauhas 4:10, 19) Yog li ntawd, peb tej lus thiab tej uas peb ua yuav tsum qhia tias peb hlub Vajtswv Yehauvas. Zoo ib yam li ob niam txiv uas sib hlub heev nkawd thiaj li sib yuav, ces twb yog peb hlub Yehauvas peb thiaj muab peb lub neej cob rau nws thiab ua kev cai raus dej.

2. Yehauvas cog lus tias cov uas ua kev cai raus dej lawm yuav tau txais tej koob hmoov zoo li cas?

Thaum koj ua kev cai raus dej ces koj los ua Yehauvas tsev neeg lawm. Yehauvas yuav yog koj txiv thiab thaum koj pom tias nws hlub koj heev koj haj yam yuav hlub nws thiab muaj kev sib raug zoo nrog nws. (Nyeem Malakis 3:16-18.) Tsis tas li ntawd xwb, koj yuav muaj ib cuab kwv tij nkauj muam coob coob thoob plaws ntiaj teb uas hlub Yehauvas thiab hlub koj. (Nyeem Malakaus 10:29, 30.) Tiam sis ua ntej koj muab koj lub neej cob rau Yehauvas thiab ua kev cai raus dej, koj yuav tsum kawm kom koj paub Yehauvas thiab hlub nws thiab muaj kev ntseeg rau nws tus Tub. Thaum koj ua kev cai raus dej, phau Vajlugkub hais tias txoj kev cai raus dej yuav pab koj ‘dim koj lub txim’ thiab koj yuav tau txoj sia nyob mus ib txhis.​—1 Petus 3:21.

KAWM NTXIV

3. Peb txhua tus yuav tsum xaiv seb peb yuav teev tiam leej twg

Cov Ixayees thaum ub ib txhia xav tias lawv pe hawm Vajtswv Yehauvas thiab tus vajtswv cuav Npa-as ua ke los tau. Tiam sis Yehauvas xa Eliyas mus qhia rau lawv hais tias lawv ua tsis tau li ntawd. Nyeem 1 Vajntxwv 18:21 thiab tham txog lo lus no:

• Cov Ixayees yuav tsum txiav txim siab li cas?

Zoo ib yam li cov Ixayees thaum ub, peb yuav tsum xaiv seb peb yuav teev tiam leej twg. Nyeem Lukas 16:13 thiab tham txog ob lo lus no:

• Vim li cas peb thiaj pe hawm tsis tau Yehauvas thiab lwm tus neeg los sis lwm yam dab tsi ua ke?

• Peb yuav ua li cas qhia rau Yehauvas tias nws yog tus uas peb pe hawm?

4. Ua zoo xav txog Yehauvas txoj kev hlub

Yehauvas muab ntau yam zoo pub rau peb. Yog li, peb yuav ris nws txiaj ntsig li cas? Saib zaj YEEB YAJ KIAB.

YEEB YAJ KIAB: Muab Tej Koj Muaj Fij Rau Vajtswv (3:04)

Tej uas Yehauvas ua qhia rau koj tias nws hlub koj yog dab tsi? Nyeem Phau Ntawv Nkauj 104:14, 15 thiab 1 Yauhas 4:9, 10 thiab tham txog ob lo lus no:

• Tej uas Yehauvas muab rau koj uas ua rau koj ris nws txiaj ntsig yog dab tsi?

• Koj xav li cas rau tej uas Yehauvas muab rau koj?

Thaum muaj neeg muab ib yam uas peb nyiam heev pub rau peb, peb yeej ua nws tsaug thiab nco nws txiaj ntsim. Nyeem 2 Kevcai 16:17 thiab tham txog lo lus no:

• Thaum koj xav txog txhua yam uas Yehauvas ua rau koj, koj xav ua dab tsi rov rau nws?

5. Koj yuav tau txais koob hmoov ntau ntawm Yehauvas thaum koj muab koj lub neej cob rau nws

YEEB YAJ KIAB: Kuv Lub Neej Yog Ncaws Pob Xwb (5:45)

• Tus txiv neej hauv zaj yeeb yaj kiab no nyiam ncaws pob heev tiam sis yog vim li cas nws thiaj li muab tso tseg lawm?

• Nws txiav txim siab muab nws lub neej cob rau Yehauvas thiab tsis ncaws pob lawm. Koj xav, nws txiav txim siab puas zoo?

Ua ntej Povlauj los ua ib tug Khixatias, nws xav tau txoj hauj lwm zoo thiab muaj koob muaj npe, nws thiaj mus kawm cov Yudais tej kev cai ntawm ib tug xib hwb uas nto moo heev. Nws puas khuv xim thaum nws muab tag nrho tej ntawd tso pov tseg thiab los ua ib tug Khixatias? Nyeem Filipis 3:8 thiab tham txog cov lus no:

• Vim li cas Povlauj thiaj hais tias tej uas nws muab tso tseg lawd tsuas zoo li tej yam uas muab xuam pov tseg?

• Povlauj muab tej ntawd tso tseg lawm es nws ho tau dab tsi?

• Koj puas pom lwm txoj hau kev ua neej uas zoo tshaj qhov uas koj siv koj lub neej los teev tiam Yehauvas?

KOJ KAWM TAU DAB TSI

Peb hlub Yehauvas, peb thiaj muab peb lub neej cob rau nws thiab ua kev cai raus dej.

Rov Tham Dua

• Vim li cas thiaj tsim nyog peb pe hawm Yehauvas tib leeg thiab hlub nws kawg siab kawg ntsws?

• Yehauvas foom koob hmoov li cas rau cov uas ua kev cai raus dej ua nws cov Tim Khawv?

• Koj puas xav muab koj lub neej cob rau Yehauvas?

TSHAWB NTXIV

Saib seb vim li cas ib tug poj niam hu nkauj thiab ib tug txiv neej uas cuam pob thiaj li muab nkawd lub neej cob rau Yehauvas.

Kev Pab Rau Cov Hluas​—Kuv Xav Tau Lub Neej Zoo Li Cas?​—Lub Neej Yav Tas Los (6:54)

Sim xav seb muaj dab tsi ntxiv ua rau peb xav muab peb lub neej cob rau Yehauvas.

“Vim Li Cas Koj Thiaj Muab Koj Lub Neej Cob Rau Yehauvas?” (Phau Tsom Faj lub 1 Hlis tim 15 xyoo 2010)

Thaum koj saib zaj no, ua zoo saib seb cov uas muab lawv lub neej cob rau Yehauvas lawm muaj kev zoo siab npaum li cas.

Kuv Lub Neej Muab Cob Rau Koj (4:30)

Hauv zaj “Kuv Xav Tau Ntau Ntau Xyoo Lawm Tias ‘Vim Li Cas Peb Thiaj Yug Los Ua Neeg?’” nyeem seb ib tug poj niam ua li cas xwb, thaum nws pom tias yam twg tseem ceeb tshaj hauv nws lub neej.

“Vajlugkub Kho Tau Lub Neej” (Phau Tsom Faj lub 11 Hlis tim 1 xyoo 2012)