Koj Puas Zoo Siab Hloov?
1. Vim li cas peb yuav tau hloov thiab hloov tej twg?
1 Lub qab ntuj no tsuas pom hloov tas zaj tas zog. Yog li ntawd, peb yuav tau hloov tej uas peb qhia thiab tej uas peb hais thaum peb mus tshaj tawm txoj xov zoo. Ua li, koj puas zoo siab hloov?
2. Vim li cas peb yuav tau hloov kom peb caum cuag Yehauvas lub koom haum?
2 Tej Uas Koj Qhia: Lub koom txoos Khixatia yeej ib txwm hloov kom raws caij raws nyoog. Thawj zaug uas Yexus xa nws cov thwjtim mus tshaj tawm, nws tau hais kom lawv tsis txhob nqa hnab thoob puab lossis hnab tawv. (Mth. 10:9, 10) Tiamsis tom qab no Yexus kuj tau hloov nws cov lus lawm, vim nws paub tias nws cov thwjtim yuav ntsib kev tawm tsam thiab lawv yuav mus qhia rau ntau lub tebchaws. (Lk. 22:36) Ib puas xyoo dhau los no, Yehauvas lub koom haum tau siv ntau yam los tshaj tawm txoj xov zoo kom pab tau tibneeg nyob txhua lub caij lub nyoog, xws li tseb ntawv, tso xov tooj cua, thiab siv paj taub. Niaj hnub no los Yehauvas lub koom haum haj tseem hloov qees kom phim lub caij lub nyoog no. Vim tibneeg tsis tshua nyob tsev, yog li ntawd lub koom haum thiaj txhawb kom peb siv txhua lub sijhawm uas peb muaj qhia Vajlugkub rau txhua tus uas peb ntsib, tsis yog mus qhia ib lub tsev rau ib lub xwb. Thiab lub koom haum kuj txhawb kom peb mus qhia ib lub tsev rau ib lub thaum yuav tsaus ntuj rau qhov muaj ib txhia tsis xyeej nyob tsev thaum nruab hnub. Thaum Yehauvas cov log tsheb uas yog nws lub koom haum hloov, koj puas hloov kom koj caum cuag thiab?—Exkh. 1:20, 21.
3. Yog peb paub yoog tus tswv tsev yuav pab tau peb qhia Vajlugkub li cas?
3 Tej Uas Koj Hais: Cov tibneeg uas nyob ib ncig koj txhawj xeeb txog dabtsi xwb? Puas yog kev noj kev haus, lub cuab lub yig, los yog kev tsov kev rog? Zoo rau peb paub txog tej teeb meem uas cov tibneeg nyob ib ncig peb tau ntsib xwv peb thiaj paub npaj tej lus uas peb yuav hais kom pab tau lawv. (1Khl. 9:20-23) Thaum cov neeg uas peb nrog tham qhia lawv tej kev txhawj xeeb rau peb, zoo rau peb nrog lawv tham txog tej ntawd es tsis txhob tham txog tej uas peb tau npaj lawm.
4. Vim li cas peb yuav tsum maj nroos hloov raws lub koom haum?
4 Tshuav tsis ntev xwb lub qab ntuj no twb yuav dua mus thiab txojkev ceeblaj txom nyem loj kawg li twb los yuav txog. “Lub sijhawm uas teem cia twb tag zuj zus lawm.” (1Khl. 7:29) Yog li ntawd, tseem ceeb heev rau peb hloov raws lub koom haum, tsis txhob ua siab qeeb, xwv peb thiaj ua tas peb txoj haujlwm nyob rau lub sijhawm kawg no.