Tej Uas Peb Xav Paub
Vim li cas thaum Mathai thiab Luka nkawd sau txog Yexus lub neej thaum yau, nyias piav nyias lawm ib yam?
Thaum Mathai thiab Luka nkawd sau txog Yexus lub neej thaum yau, nkawd ib leeg piav txawv ib leeg vim Mathai sau txog tej uas Yauxej tau ntsib, Luka sau txog tej uas Maivliag tau ntsib.
Tej uas Mathai sau, feem ntau yog hais txog Yauxej. Mathai piav txog thaum Yauxej paub tias Maivliag xeeb tub nws xav li cas. Mathai kuj sau txog Yauxej zaj npau suav thiab sau tias nws tau ua raws li tus tubtxib saum ntuj hais rau nws. (Mathai 1:19-25) Nws kuj qhia txog lub caij uas ib tug tubtxib saum ntuj ceeb toom Yauxej kom coj nws tsev neeg khiav mus nram Iyi tebchaws, thiab Yauxej tau ua li cas. Mathai kuj qhia txog Yauxej zaj npau suav uas ib tug tubtxib saum ntuj kom nws rov qab mus rau Yixayee tebchaws, Yauxej thiaj coj nws tsev neeg mus nyob hauv Naxale. (Mathai 2:13, 14, 19-23) Hauv Mathai tshooj 1 thiab 2, pom Yauxej lub npe 11 zaug tiamsis pom Maivliag lub 9 zaug xwb.
Thaum Luka sau nws phau ntawv, nws piav txog Maivliag ntau xwb. Nws piav txog thaum Maivliag pom tus tubtxib Kali-ee thiab thaum Maivliag mus xyuas Elixanpe. Luka kuj sau txog Maivliag tej lus qhuas Yehauvas. (Luka 1:26-56) Luka sau txog Xime-oo cov lus uas nws hais rau Maivliag tias Yexus yuav raug luag tsim txom. Luka yog tus piav txog lub caij Yexus muaj 12 xyoos es lawv tsev neeg mus pe hawm Vajtswv nram lub tuam tsev. Luka tsis sau Yauxej tej lus li, tiamsis nws sau Maivliag cov lus cia. Peb pom tias Maivliag xav ntsuj ntsoov txog tej uas tshwm sim rau lub caij ntawd. (Luka 2:19, 34, 35, 48, 51) Hauv Luka tshooj 1 thiab 2, pom Maivliag lub npe 16 zaug tiamsis tsuas pom Yauxej lub 3 zaug xwb. Peb pom tias Mathai piav txog Yauxej ntau thiab Luka piav txog Maivliag ntau.
Mathai thiab Luka nyias qhia nyias tias Yexus caj ces ncau li cas los. Mathai sau txog caj ces ntawm Yauxej los uas qhia tias Yexus yog tus muaj feem nyob Vajntxwv Davi lub zwm txwv. Davi tus tub Xalaumoo yog Yauxej yawg koob. (Mathai 1:6, 16) Luka sau txog caj ces ntawm Maivliag uas qhia tias Yexus yeej yog Davi xeeb ntxwv ntawm “sab nqaij tawv.” (Loos 1:3) Davi tus tub Nathas yog Maivliag yawg koob. (Luka 3:31) Tiamsis vim li cas Luka ho tsis sau tias Maivliag yog Heli tus ntxhais? Vim tias tej ntaub ntawv yav thaud tsuas suav cov tub npe xwb. Yog li, thaum Luka sau tias Yauxej yog Heli tus tub, tej neeg tiam ntawd yeej paub tias yog Heli tus vauv.—Luka 3:23.
Tej uas Mathai thiab Luka sau txog Yexus qhia tias Yexus yeej yog tus Mexiyas uas Vajtswv cog tseg. Txhua tus yeej paub zoo tias Yexus los ntawm leejtwg caj ces los, cov Falixai thiab cov Xadukai los yeej tsis cav tias nws yog leejtwg caj ces. Tej uas Mathai thiab Luka sau txog Yexus tus caj ces yeej txhawb tau peb txojkev ntseeg heev. Tej no qhia meej rau peb tias Vajtswv tej lus cog tseg txog yav tom hauv ntej yeej yuav muaj tiav xwb xwb li.