Ua Kevcai Raus Dej Vim Koj Hlub Yehauvas

1, 2. Raws li Tes Haujlwm 8:27-31, 35-38, ua cas tus nom Ethi-aupias thiaj ua kevcai raus dej?

KOJ puas xav ua kevcai raus dej los ua Khetos ib tug thwjtim? Coob tus twb ua kevcai raus dej lawm vim lawv hlub Vajtswv thiab ris nws txiaj ntsig. Cia peb tham txog ib tug nom uas ua haujlwm rau tus poj vajntxwv Ethi-aupias.

² Nyeem Tes Haujlwm 8:27-31, 35-38. Tus nom Ethi-aupias nyuam qhuav mus pe hawm Yehauvas nram lub nroog Yeluxalees los. Nws tau tso nws tej qub kevcai tseg los nrog Vajtswv haivneeg teev tiam Vajtswv Yehauvas ua ke. Ua cas nws thiaj ua li ntawd? Vim nws hlub Yehauvas. Tsis tas li ntawd xwb tus nom Ethi-aupias nyiam Vajtswv Txojlus heev. Thaum nws tabtom caij lub tsheb nees rov qab mus rau tebchaws Ethi-aupias, nws nyeem Yaxayas cov lus. Thiab thaum Filis nrog nws tham txog Yexus, ua rau nws nco Yexus txiaj ntsig. Thaum nws paub tias nws yuav tsum ua kevcai raus dej los ua Khetos ib tug thwjtim nws txawm ua kiag li ntawd vim nws hlub Yehauvas.​—Mathais 28:19.

3. Vim li cas thiaj nyuaj rau tej tug ua kevcai raus dej? (Mus saib lub ntsiab me “Koj Lub Siab Zoo Li Cas?”)

³ Thaum koj hlub Yehauvas ces koj yuav xav ua kevcai raus dej. Tiamsis tej thaud muaj tej yam hauv koj lub siab yuav cheem tsis pub koj ua kevcai raus dej. Tej yam ntawd yog dabtsi? Tej zaum kuj yog koj hlub koj tsev neeg thiab koj cov phoojywg uas tsis tau paub Yehauvas, koj thiaj ntshai tsam yog koj ua kevcai raus dej ces lawv yuav tu siab thiab chim rau koj. (Mathais 10:37) Lossis tej zaum koj lub siab tseem ntshaw ua tej yam uas Vajtswv tsis pom zoo thiaj tsis yoojyim rau koj tso tej ntawd tseg. (Phau Ntawv Nkauj 97:10) Lossis koj ib txwm ua tej koob tsheej txuam nrog kev ntseeg cuav uas lomzem heev, thiaj nyuaj heev rau koj tso tej ntawd tseg. (1 Kauleethaus 10:20, 21) Txawm li cas los, koj yuav tsum xav seb qhovtwg tseem ceeb tshaj rau koj.

TUS PEB YUAV TSUM HLUB TSHAJ PLAWS

4. Qhov uas yuav pab koj ua kevcai raus dej yog dabtsi?

⁴ Ua ntej koj kawm Vajlugkub nrog Yehauvas Cov Timkhawv tej zaum koj twb nyiam phau Vajlugkub thiab hlub Yexus lawm. Nimno koj paub cov Timkhawv thiab nyiam nrog lawv ua ke. Tiamsis qhov no yuav tsis ua rau koj muab koj lub neej cob rau Yehauvas thiab ua kevcai raus dej. Qhov uas yuav pab koj ua kevcai raus dej yog qhov uas koj hlub Vajtswv Yehauvas. Thiab thaum koj ua kevcai raus dej tas lawm los kev hlub rau Yehauvas yuav pab koj muab siab npuab nws. Yog koj hlub Yehauvas kawg siab kawg ntsws ces yuav tsis muaj ib yam dabtsi txwv tau kom koj tsis txhob teev tiam nws.

5. Hauv zaj no peb yuav kawm txog dabtsi?

⁵ Yexus hais tias peb yuav tsum hlub Yehauvas kawg siab kawg ntsws, kawg plab kawg plawv thiab kawg peb lub dag lub zog. (Malakaus 12:30) Peb yuav tsum ua li cas peb thiaj hlub thiab hwm Yehauvas? Thaum peb xav txog tias Yehauvas hlub peb npaum li cas ces yuav ua rau peb hlub nws thiab. (1 Yauhas 4:19) Hauv zaj no peb yuav kawm txog yam puav uas yuav pab kom peb hlub Yehauvas thiab ua kevcai raus dej.

6. Raws li Loos 1:20, ib qho uas yuav pab peb kawm paub txog Yehauvas yog dabtsi?

⁶ Kawm paub txog Yehauvas los ntawm tej uas nws tsim. (Nyeem Loos 1:20; Tshwmsim 4:11) Tej xyoob ntoos nroj tsuag thiab tej tsiaj txhu uas Yehauvas tsim qhia tias Yehauvas muaj tswvyim heev. Xav seb Yehauvas tsim tau peb lub cev zoo npaum li cas. (Phau Ntawv Nkauj 139:14) Xav seb Yehauvas tsim lub hnub muaj zog npaum li cas. Lub hnub tsuas yog ib lub ntawm tsheej qas txhiab qas vam lub hnub qub saum nruab ntug xwb.b (Yaxayas 40:26) Thaum koj xav txog tej uas Yehauvas tsim yuav ua rau koj hajyam hwm nws. Qhov uas peb paub tias Yehauvas muaj tswvyim thiab muaj hwjchim yeej tseem ceeb heev tiamsis yuav kom peb muaj kev hlub rau Yehauvas thiab xav ua nws tus phoojywg peb yuav tsum paub nws ntau tshaj ntawd.

7. Yuav kom peb hlub Yehauvas peb yuav tsum ntseeg li cas?

⁷ Koj yuav tsum ntseeg tias Yehauvas yeej hlub koj tiag tiag. Puas nyuaj rau koj ntseeg tias tus Tswv Tsim lub ntuj thiab lub ntiajteb xam pom koj thiab hmov tshua koj? Yog tias nyuaj, nco ntsoov tias Yehauvas “yeej nyob tsis deb ntawm peb txhua tug.” (Tes Haujlwm 17:26-28) Nws ‘paub txhua yam uas koj xav’ thiab cog lus tias “yog koj mus cuag nws, nws yuav zoo siab txais yuav koj.” (1 Xwmtxheej Vajntxwv 28:9) Qhov uas koj kawm Vajlugkub los twb yog Vajtswv rub koj los cuag nws. (Yauhas 6:44) Thaum koj pom tias Yehauvas tau ua ntau yam rau koj ces koj yuav hajyam hlub nws.

8. Peb yuav tsum ua dabtsi yog peb nco Vajtswv txiaj ntsig rau nws txojkev hlub?

⁸ Yog peb nco Vajtswv txiaj ntsig rau nws txojkev hlub ces peb yuav thov nws thiab qhia siab rau nws. Thaum peb qhia peb tej kev nyuaj siab rau nws thiab ua nws tsaug rau tej nws tau ua rau peb ces peb yuav hajyam hlub nws ntxiv. Thiab thaum peb pom tias nws teb peb tej lus thov, peb txojkev sib raug zoo nrog nws yuav ruaj khov zuj zus tuaj. (Phau Ntawv Nkauj 116:1) Peb yuav pom tias Yehauvas yeej paub peb zoo. Tiamsis yuav kom peb txav ze rau Yehauvas peb yuav tsum rau siab ntso kawm Vajlugkub peb thiaj paub nws txojkev xav thiab seb nws xav kom peb ua dabtsi.

9. Yog koj saib phau Vajlugkub rau nqi ces koj yuav ua dabtsi?

⁹ Saib phau Vajlugkub muaj nqis. Tsuas yog phau Vajlugkub xwb thiaj qhia qhov tseeb txog Yehauvas thiab nws lub ntsiab rau koj. Yog koj saib phau Vajlugkub rau nqi ces koj yuav niaj hnub nyeem phau Vajlugkub, koj kuj yuav ua tib zoo npaj ua ntej koj kawm nrog tus qhia Vajlugkub rau koj thiab muab tej koj tau kawm coj los siv rau koj lub neej. (Phau Ntawv Nkauj 119:97, 99; Yauhas 17:17) Yog li, koj puas niaj hnub nyeem phau Vajlugkub thiab?

10. Ib qho zoo heev txog phau Vajlugkub yog dabtsi?

¹⁰ Ib qho zoo heev txog phau Vajlugkub yog phau Vajlugkub muaj cov neeg uas tau nrog Yexus ua ke thiab lawv qhia txog tej Yexus ua. Tsuas yog phau Vajlugkub xwb thiaj qhia qhov tseeb txog tej uas Yexus tau ua rau koj. Thaum koj kawm txog tej uas Yexus hais thiab ua, koj yuav xav paub nws ntxiv thiab ua nws tus phoojywg.

11. Yuav ua li cas peb thiaj paub hlub Yehauvas?

¹¹ Hlub Yexus. Yog koj hlub Yexus ces koj yuav hlub Yehauvas. Vim li cas? Vim Yexus coj zoo ib yam nkaus li nws Txiv. (Yauhas 14:9) Yog li ntawd thaum koj paub Yexus zoo ces koj yuav to taub Yehauvas thiab nco nws txiaj ntsig. Xav txog cov neeg txom nyem, cov muaj mob muaj nkeeg thiab cov tiv thaiv tsis tau lawv tus kheej, txawm luag tej saib tsis taus lawv los Yexus hlub lawv heev. Thiab xav seb thaum koj ua li Yexus hais ho pab tau koj li cas.​—Mathais 5:1-11; 7:24-27.

12. Thaum koj kawm txog Yexus yuav ua rau koj xav ua dabtsi?

¹² Thaum koj ua tib zoo xav txog qhov uas Yexus zoo siab hlo tuag theej koj lub txhoj ces koj txojkev hlub rau nws yuav ntau zuj zus tuaj. (Mathais 20:28) Koj yuav xav tso koj tej kev txhaum tseg thiab nrhiav kev zam txim ntawm Yehauvas. (Tes Haujlwm 3:19, 20; 1 Yauhas 1:9) Thaum koj hlub Yexus thiab Yehauvas ces koj yuav xav nrog cov uas hlub nkawd ua ke thiab.

13. Yehauvas yuav pab koj li cas?

¹³ Hlub cov uas hlub Yehauvas. Koj tsev neeg thiab koj tej phoojywg uas tsis paub Yehauvas yuav tsis to taub tias yog vim li cas koj thiaj xav muab koj lub neej cob rau Yehauvas. Lawv yuav tawm tsam koj los kuj muaj thiab. Tiamsis Yehauvas yuav pab koj. Cov kwvtij nkauj muam hauv lub koom txoos yuav zoo ib yam li koj tsev neeg. Yog koj nrog nraim lawv ces lawv yuav hlub thiab txhawb koj. (Malakaus 10:29, 30; Henplais 10:24, 25) Tej zaum ntev mus ntej tuaj koj tsev neeg kuj yuav los teev tiam Yehauvas thiab coj raws li Yehauvas tej kevcai.​—1 Petus 2:12.

14. Raws li 1 Yauhas 5:3, koj puas pom tias Yehauvas tej kevcai yeej zoo tiag?

¹⁴ Hwm Yehauvas tej kevcai thiab muab coj los siv. Thaum koj tsis tau paub Yehauvas koj muaj koj ib txoj kevcai taug tiamsis thaum koj los paub Yehauvas lawm koj pom tias nws txoj thiaj yog txoj zoo. (Phau Ntawv Nkauj 1:1-3; nyeem 1 Yauhas 5:3.) Xav txog thaum koj ua raws li Yehauvas tej kevcai rau cov txiv, cov pojniam, cov ua niam ua txiv, thiab cov menyuam puas pab tau koj? (Efexus 5:22–6:4) Koj puas pom tias thaum koj xaiv tej phoojywg li Yehauvas qhia, koj coj tau tus cwj pwm zoo dua? Nimno koj puas muaj kev zoo siab dua? (Pajlug 13:20; 1 Kauleethaus 15:33) Thaum peb ua li Yehauvas tej kevcai yeej zoo dua tiag.

15. Yog muaj tej hauv paus ntsiab lus hauv phau Vajlugkub uas koj tsis paub coj los siv hauv koj lub neej, koj yuav ua li cas?

¹⁵ Yog muaj tej hauv paus ntsiab lus hauv phau Vajlugkub uas koj tsis paub coj los siv hauv koj lub neej, koj yuav ua li cas? Yehauvas lub koom haum tsim tau tej ntaub ntawv Vajlugkub los piav los qhia kom koj to taub phau Vajlugkub thiab paub tias yam twg phem yam twg zoo. (Henplais 5:13, 14) Thaum koj nyeem tej ntaub ntawv no thiab pom tias phau Vajlugkub tej hauv paus ntsiab lus yeej pab tau koj tiag ces yuav ua rau koj xav los koom nrog Yehauvas lub koom haum.

16. Yehauvas lub koom haum zoo li cas?

¹⁶ Nyiam thiab txhawb Yehauvas lub koom haum. Yehauvas sau nws cov neeg los ua ntau ntau lub koom txoos. Thiab nws tus tub Yexus ua tus thawj saib xyuas tag nrho cov koom txoos. (Efexus 1:22; 5:23) Yexus xaiv cov xaiv tseg ib txhia ua pab ntaus thawj thiab coj Vajtswv cov neeg ua nws tes haujlwm niaj hnub no. Yexus hu lawv ua “tus tubtxib uas ncaj thiab muaj tswvyim” lossis tus qhev ncaj thiab ntse. Lawv lub luag haujlwm yog pab kom koj txav ze rau Vajtswv thiab tiv thaiv koj txojkev sib raug zoo nrog nws. (Mathais 24:45-47) Tus qhev ncaj thiab ntse saib xyuas kom muaj cov txwj laus uas paub tab thiab paub Vajlugkub zoo los saib xyuas thiab tiv thaiv koj. (Yaxayas 32:1, 2; Henplais 13:17; 1 Petus 5:2, 3) Cov txwj laus yuav ua li lawv ua tau los pab koj thiab txhawb koj txojkev sib raug zoo nrog Yehauvas. Tiamsis tseem tshuav ib qho uas lawv yuav pab koj thiab, lawv yuav pab kom koj paub mus qhia lwm tus txog Yehauvas.​—Efexus 4:11-13.

17. Raws li Loos 10:10, 13, 14, vim li cas peb thiaj mus qhia lwm tus txog Yehauvas?

¹⁷ Pab lwm tus kom paub hlub Yehauvas. Yexus sam hwm kom nws cov thwjtim mus qhia lwm tus txog Yehauvas. (Mathais 28:19, 20) Tej zaum peb tsuas ua li Yexus hais kom tas kevcai xwb. Tiamsis thaum koj hlub Yehauvas lawm, koj yuav xav ib yam li tus tubtxib Petus thiab Yauhas hais no: “Tej uas wb hnov thiab wb pom lawm, wb yeej yuav qhia, wb tsis npog li.” (Tes Haujlwm 4:20) Thaum peb mus coj tau lwm tus los paub Yehauvas yeej ua rau peb zoo siab kawg li. Xav seb Filis zoo siab npaum li cas thaum nws pab tau tus nom Ethi-aupias los paub qhov tseeb thiab ua kevcai raus dej! Yog koj xav ua Yehauvas ib tug Timkhawv ces koj yuav tau xyaum ua li Filis thiab mus qhia txoj xov zoo li Yexus sam hwm. (Nyeem Loos 10:10, 13, 14.) Thaum ntawd koj yuav xav ib yam li tus nom Ethi-aupias hais no: “Muaj dabtsi khuam cheem ua rau kuv ua tsis tau kevcai raus dej?”​—Tes Haujlwm 8:36, TT.

18. Zaj tom ntej peb yuav tham txog dabtsi?

¹⁸ Yog koj xav tias koj yuav ua kevcai raus dej, koj yuav tsum ua zoo xav ua ntej tso. Yog vim li cas? Rau qhov ua kevcai raus dej yog ib qho uas tseem ceeb tshaj plaws hauv koj lub neej. Koj yuav tsum paub tias kevcai raus dej yog dabtsi thiab thaum koj ua kevcai raus dej tas lawm yuav zoo li cas. Zaj tom ntej no peb yuav tham txog 2 qho no.