ZAJ KAWM 37
Phau Vajlugkub Hais Li Cas Txog Hauj Lwm Thiab Nyiaj Txiag?
Koj puas tau txhawj txog hauj lwm thiab nyiaj txiag dua li? Yeej tsis yooj yim rau peb mus khwv los yug peb thiab teev tiam Yehauvas kom kawg siab kawg ntsws, tiam sis phau Vajlugkub yuav pab tau peb.
1. Phau Vajlugkub hais li cas txog hauj lwm?
Vajtswv xav kom peb txaus siab rau peb tes hauj lwm. Phau Vajlugkub hais tias: ‘Yam uas zoo tshaj plaws rau tib neeg yog txaus siab rau tej uas nws khwv tau los.’ (Tej Lus Qhia 2:24) Yehauvas nquag heev. Yog peb xyaum Yehauvas es ua neeg nquag thiab rau siab mus khwv los yug peb tsev neeg ces peb yuav ua rau nws zoo siab thiab peb los kuj yuav muaj kev zoo siab thiab.
Peb yeej yuav tsum mus khwv peb thiaj muaj noj muaj haus tiam sis tsis txhob cia peb txoj kev khwv noj khwv haus los cuam tshuam peb txoj kev pe hawm Yehauvas. (Yauhas 6:27) Yog peb muab peb txoj kev pe hawm Yehauvas ua qhov tseem ceeb tshaj txhua tsav txhua yam ces nws cog lus tias nws yeej yuav tsis pub peb tu ncua ib yam dab tsi li.
2. Peb yuav tsum saib nyiaj txiag zoo li cas?
Phau Vajlugkub hais tias nyiaj txiag yeej pab tau peb. Tiam sis phau Vajlugkub kuj hais tias yog peb muaj nyiaj txiag nkaus xwb, peb yuav tsis muaj kev zoo siab. (Tej Lus Qhia 7:12) Twb yog vim li ntawd, phau Vajlugkub thiaj hais kom peb tsis txhob ntshaw nyiaj txiag tiam sis kom peb ‘cia li zoo siab rau tej uas peb muaj.’ (Nyeem Henplais 13:5.) Yog peb txaus siab rau tej uas peb muaj ces peb yuav tsis muaj kev ntxhov siab. Peb yuav tsis tshuav luag nuj luag nqi thiab peb yuav tsis ntshaw ub ntshaw no. (Pajlug 22:7) Peb yuav tsis qaug rau kev twv txiaj yuam pov thiab tsis qaug rau luag tej kev dag ntxias kom peb poob nyiaj.
3. Peb yuav siv nyiaj txiag mus pab lwm tus li cas?
Yehauvas yog ib tug Vajtswv siab dawb siab zoo. Thaum peb “ua neeg siab dawb siab zoo” ces twb yog peb xyaum ua li Yehauvas. (1 Timautes 6:18) Peb muab tau nyiaj txiag mus pab lub koom txoos thiab peb cov kwv tij nkauj muam uas raug kev txom nyem. Txawm peb muab tau ntau tau tsawg los tsis tseem ceeb rau Vajtswv Yehauvas. Qhov tseem ceeb rau nws yog qhov uas peb muaj lub siab dawb paug pub rau lwm tus. Yog peb muaj lub siab dawb paug pub rau lwm tus ces peb yeej yuav muaj kev zoo siab dua.—Nyeem Tes Haujlwm 20:35.
KAWM NTXIV
Peb yuav tham seb vim li cas thiaj zoo rau peb tsis txhob cia peb tej hauj lwm los cuam tshuam peb txoj kev teev tiam Vajtswv thiab vim li cas peb yuav tsum txaus siab rau tej uas peb muaj.
4. Koj tes hauj lwm yuav tsum qhuas Yehauvas
Yog peb muaj kev sib raug zoo nrog Yehauvas ces peb yuav khwv kom txaus noj txaus haus xwb, peb yuav tsis mus khwv heev dhau lawm. Saib zaj YEEB YAJ KIAB thiab tham txog ob lo lus no:
Tsheej Xeeb coj li cas thaum nws nyob tom hauj lwm?
Nws ua li cas nws thiaj li muaj sij hawm los teev tiam Yehauvas?
Nyeem Kaulauxais 3:23, 24 thiab tham txog lo lus no:
Vim li cas thaum peb mus ua hauj lwm, peb yuav tsum rau siab ua?
Peb yuav tsum rau siab ntso mus khwv los yug peb tsev neeg tiam sis tsis txhob muab peb txoj hauj lwm saib tseem ceeb tshaj peb txoj kev teev tiam Yehauvas
5. Peb yuav zoo siab dua yog peb txaus siab rau tej uas peb muaj
Coob leej ntau tus rau siab khwv kom lawv muaj nyiaj txiag ntau, tiam sis phau Vajlugkub tsis qhia li ntawd. Nyeem 1 Timautes 6:6-8 thiab tham txog lo lus no:
Phau Vajlugkub txhawb kom peb ua li cas?
Txawm peb tsis muaj ntau los peb yeej tseem muaj tau kev zoo siab. Saib zaj YEEB YAJ KIAB thiab tham txog lo lus no:
Txawm tias ob tsev neeg no txom nyem tsis muaj nyiaj txiag ntau los vim li cas lawv tseem muaj kev zoo siab?
Peb yuav tsum ceev faj yog hais tias peb twb muaj txaus lawm los peb pheej tseem xav tau ntau ntxiv. Yexus hais ib zaj lus piv txwv txog qhov no hauv Lukas 12:15-21. Nyeem cov nqe Vajlugkub no thiab tham txog lo lus no:
Koj kawm tau dab tsi ntawm Yexus zaj lus piv txwv no?—Saib nqe 15.
Nyeem Pajlug 10:22 thiab 1 Timautes 6:10 ces tham txog ob lo lus no:
Dab tsi tseem ceeb dua, peb txoj kev sib raug zoo nrog Yehauvas los qhov uas peb muaj txiag nplua nuj?
Peb yuav ntsib teeb meem li cas yog hais tias peb pheej mus vuag nyiaj txiag?
6. Yehauvas yuav saib xyuas peb
Tseem ceeb rau peb tso siab rau Yehauvas thaum peb txom nyem tsis muaj nyiaj txiag los sis tsis muaj hauj lwm ua. Saib zaj YEEB YAJ KIAB seb peb yuav ua li cas yog peb ntsib kev nyuaj siab li no thiab tham txog ob lo lus no:
Tus kwv tij no ntsib teeb meem li cas?
Nws ua li cas nws thiaj peem dhau nws tej teeb meem?
Nyeem Mathais 6:25-34 thiab tham txog lo lus no:
Yehauvas cog lus li cas rau cov uas muab nws tso ua ntej hauv lawv lub neej?
IB TXHIA HAIS TIAS: “Kuv yuav tsum mus khwv los yug kuv tsev neeg, kuv thiaj mus tsis tau kev sib txoos txhua txhua lub lim tiam.”
Nqe Vajlugkub twg pab koj ntseeg tau tias qhov uas koj muab koj txoj kev teev tiam Yehauvas tso ua ntej yog qhov uas zoo tshaj plaws?
KOJ KAWM TAU DAB TSI
Kev khwv noj khwv haus thiab muaj nyiaj txiag yeej tseem ceeb kawg, tiam sis tsis txhob cia tej ntawd los cuam tshuam peb txoj kev teev tiam Yehauvas.
Rov Tham Dua
Yuav ua li cas peb thiaj tsis muab peb txoj hauj lwm saib tseem ceeb dua peb txoj kev teev tiam Yehauvas?
Yog peb txaus siab rau tej uas peb muaj yuav pab tau peb li cas?
Yog koj tso siab tias Yehauvas yeej yuav saib xyuas nws cov neeg, koj yuav ua li cas?
TSHAWB NTXIV
Saib seb phau Vajlugkub hais li cas txog nyiaj txiag.
“Puas Txhaum Yog Hais Tias Yus Muaj Nyiaj Muaj Txiaj?” (Nyeem hauv jw.org/hmn)
Saib seb peb siv peb tej nyiaj txiag li cas thiaj li haum Vajtswv siab.
“Phau Vajlugkub Qhia Li Cas Txog Qhov Uas Pub Rau Luag?” (Nyeem hauv jw.org/hmn)
Kev twv txiaj yuam pov puas phem?
“Vajtswv Txoj Lus Qhia—Kev Twv Txiaj” (Tsim Dheev! lub 3 Hlis xyoo 2015)
Saib seb tus txiv neej no ua li cas nws thiaj tso tau kev twv txiaj yuam pov thiab kev ua tub sab tub nyiag tseg.
“Kuv Nyiam Saib Lawv Tso Nees Sib Tw Khiav” (Phau Tsom Faj lub 11 Hlis tim 1 xyoo 2011)