Ua Li Cas Rau Cov Uas Tuag Lawd?

Thaum ib tug uas koj hlub tshua tag sim neej, yeej mob koj siab heev. Thaum ntawd, ntshe koj yuav xav paub tias, ‘Ua li cas rau cov uas tuag lawd? Peb puas yuav rov pom cov uas peb hlub dua?’ Hauv zaj kawm no thiab zaj tom ntej, kawm seb phau Vajlugkub hais li cas txog cov uas tuag lawd.

1. Ua li cas rau cov uas tuag lawd?

Phau Vajlugkub hais tias, “Cov neeg uas tuag lawm tsis paub dabtsi li.” (Nyeem Tej Lus Qhia 9:5.) Yexus kuj hais tias tus neeg tuag ces zoo ib yam li tus neeg tsaug zog lawm xwb. Thaum ib tug neeg tsaug zog looj hlias lawm ces nws yeej tsis paub thiab tsis hnov dab tsi li. Zoo ib yam li ntawd, thaum ib tug neeg tag sim neej lawm, nws yeej tsis hnov mob thiab tsis paub tshaib nqhis li.

2. Thaum peb paub qhov tseeb txog cov tuag, pab tau peb li cas?

Coob tus yeej ntshai tuag thiab yeej ntshai tsam cov tuag los ua phem rau lawv. Tiam sis tej uas phau Vajlugkub qhia txog cov tuag yuav nplig tau koj heev. Yexus hais tias, “Qhov tseeb . . . yuav tso nej dim.” (Yauhas 8:32) Lwm txoj kev ntseeg qhia tias thaum ib tug neeg tuag lawd, nws muaj ib tug plig uas tseem ciaj sia nyob. Tiam sis phau Vajlugkub qhia tias thaum ib tug neeg tuag lawd ces nws tsis paub dab tsi li lawm. Nws yeej tsis hnov mob thiab yeej ua tsis tau phem rau peb. Yog li ntawd, peb tsis tas pe hawm cov tuag los sis laig cov tuag kom lawv txhob ua phem rau peb.

Ib txhia hais tias lawv nrog tau cov tuag tham. Tiam sis tsis muaj tseeb li ntawd, rau qhov zoo li peb nyuam qhuav kawm tas, cov tuag yeej “tsis paub dabtsi li.” Cov uas xav tias lawv nrog cov tuag tham ces tej zaud yog lawv nrog cov dab uas ua txuj ua li lawv yog cov tuag tham xwb. Yog peb paub qhov tseeb txog cov tuag ces dab yuav ntxias tsis tau peb. Yehauvas ceeb toom kom peb tsis txhob nrog cov tuag tham rau qhov nws paub tias yog peb ua li ntawd ces dab yuav ua tau phem rau peb.​—Nyeem 2 Kevcai 18:10-12.

3. Kawm seb cov tuag zoo li cas tiag

Thoob ntiaj teb, tib neeg nyias yeej ntseeg nyias ib yam txog seb ua li cas rau cov uas tuag lawd. Tiam sis peb yeej hais tsis tau tias txhua yam uas sawv daws ntseeg txog cov tuag yeej muaj tseeb.

• Cov neeg hauv koj thaj tsam ntseeg li cas txog cov tuag?

YEEB YAJ KIAB: Cov Tuag Zoo Li Cas Lawd?​—Saib Ib Vuag (1:19)

Nyeem Tej Lus Qhia 3:20 thiab tham txog ob lo lus no:

• Raws li nqe Vajlugkub no, thaum ib tug neeg tuag, ua li cas rau nws lawm xwb?

• Nqe Vajlugkub no puas qhia tias neeg muaj ib yam uas tseem ciaj siab nyob tom qab nws tuag?

Phau Vajlugkub hais txog Yexus ib tug phooj ywg zoo hu ua Laxalus uas tuag lawm. Nyeem Yauhas 11:11-14 seb Yexus hais li cas txog Laxalus. Ces tham txog cov lus no:

• Yexus muab kev tuag piv rau dab tsi?

• Qhov no qhia peb li cas txog cov uas tuag lawd?

• Koj xav li cas xwb txog qhov uas phau Vajlugkub qhia txog cov tuag?

4. Paub qhov tseeb txog cov tuag yeej pab tau peb

Thaum peb paub qhov tseeb txog cov tuag ces peb yuav tsis ntshai lawv lawm. Nyeem Phau Ntawv Nkauj 146:4, thiab tham txog lo lus no:

• Cov tuag puas ua tau phem rau peb?

Qhov tseeb hauv phau Vajlugkub tiv thaiv tau peb ntawm qhov uas ntseeg tias peb yuav tau pe hawm los sis laig cov tuag. Nyeem Yaxayas 8:19 thiab Tshwmsim 4:11, thiab tham txog lo lus no:

• Koj xav Yehauvas puas nyiam thaum ib tug pe hawm los sis thov cov uas tuag lawd pab nws?

5. Paub qhov tseeb txog cov tuag yeej nplig tau peb

Coob leej ntseeg tias yog lawv ua phem ces thaum lawv tuag, lawv yuav raug tsim txom. Tiam sis phau Vajlugkub qhia tias cov uas tuag lawd tsis raug tsim txom, txawm lawv yuav yog ib tug uas tau ua phem heev. Nyeem Loos 6:7, thiab tham txog lo lus no:

• Phau Vajlugkub qhia tias tus uas tuag lawd twb dim nws lub txim lawm. Yog li ntawd, koj puas xav tias tus uas tuag lawd yuav raug tsim txom vim tej kev phem uas nws tau ua thaum nws tseem ua neej nyob?

Thaum peb paub Yehauvas zoo zuj zus ces peb yuav pom tias nws yeej tsis tsim txom cov uas tuag lawd. Nyeem 2 Kevcai 32:4 thiab 1 Yauhas 4:8, thiab tham txog ob lo lus no:

• Tus Vajtswv uas zoo npaum li ob nqes Vajlugkub no hais, puas yuav muab cov uas tuag lawd tsim txom?

• Thaum koj paub qhov tseeb txog cov tuag, puas nplig tau koj siab? Vim li cas koj hais li ntawd?

KOJ KAWM TAU DAB TSI

Thaum ib tug neeg tuag ces tag li ntawd lawm xwb. Cov tuag tsis hnov mob thiab ua tsis tau phem rau cov uas tseem ua neej nyob.

Rov Tham Dua

• Ua li cas rau cov uas tuag lawd?

• Qhov tseeb txog cov tuag pab tau peb li cas?

• Qhov tseeb txog cov tuag nplig tau peb li cas?

TSHAWB NTXIV

Kawm seb phau Vajlugkub puas hais tias neeg muaj ib tug plig uas tseem ciaj sia nyob tom qab nws tuag.

“Neeg Puas Muaj Ib Tug Plig Uas Tseem Ciaj Sia Nyob Tom Qab Nws Tuag?” (Nyeem hauv jw.org/hmn)

Kawm seb Vajtswv puas muab cov neeg phem pov rau hauv ntuj tawg.

Ntuj Tawg Puas Yog Ib Qho Chaw Tiag? (3:07)

Peb puas tas ntshai cov tuag?

Cov Tuag Tej Plig​—Lawv Puas Pab Tau Koj Los Sis Ua Phem Rau Koj? Puas Muaj Tej Plig Ntawd Tiag Tiag? (ntawv me)

Nyeem seb thaum tus txiv neej no paub tias ua li cas rau cov uas tuag lawd ho pab tau nws li cas.

“Phau Vajlugkub Qhia Muaj Hauv Paus Hauv Ntsis Thiab Raug Kuv Siab Heev” (Phau Tsom Faj lub 2 Hlis tim 1 xyoo 2015)