Vim Li Cas Thiaj Muaj Kev Phem Thiab Kev Txom Nyem?

Thaum muaj ib qho xwm txheej phem twg, peb kheev nug tias, “Vim li cas thiaj muaj li no?” Peb zoo siab kawg li uas phau Vajlugkub teb tau lo lus nug ntawd!

1. Xatas tau ua li cas thiaj muaj kev phem rau hauv lub ntiaj teb?

Xatas uas yog dab Ntxwg Nyoog tau ntxeev siab rau Vajtswv. Xatas xav ua tus kav, nws thiaj ntxias thawj nkawm niam txiv, Adas thiab Evas, kom nrog nws ntxeev siab rau Vajtswv thiab. (Chivkeeb 3:1-5) Xatas ua rau Evas ntseeg tias Yehauvas tau muab ib yam zoo zais tsis pub nws tau. Xatas hais li ntawd twb yog nws hais tias tib neeg yuav zoo siab dua yog lawv tsis mloog Vajtswv lus. Xatas tau dag thawj zaug thaum nws hais rau Evas tias Evas yeej yuav tsis tuag. Vim li ntawd, phau Vajlugkub thiaj muab Xatas hu ua “tus niag dag thiab nws yog txhua tus uas dag leej txiv.”​—Yauhas 8:44

2. Adas thiab Evas tau txiav txim siab ua li cas?

Vajtswv Yehauvas ua siab dawb siab zoo rau Adas thiab Evas nkawd. Nws hais tias nkawd noj tau txhua tsob ntoo hauv lub vaj Edees tej txiv tsuas tseg tib tsob nkawd thiaj noj tsis tau xwb. (Chivkeeb 2:15-17) Tiam sis nkawd txawm cia li txiav txim siab noj tsob ntawd tej txiv lawm thiab. Evas “txawm cev tes mus de cov txiv los noj.” Ces tom qab ntawd, Adas txawm “noj thiab.” (Chivkeeb 3:6) Nkawd tsis mloog Vajtswv lus. Vim Adas thiab Evas nkawd yog neeg zoo tiav, nkawd yeej muaj lub siab xib ua qhov zoo. Tiam sis nkawd txhob txwm tsis mloog Vajtswv lus. Thaum nkawd ua li no, nkawd thiaj ua txhaum Vajtswv thiab tsis yuav nws kav nkawd lawm. Vim nkawd txiav txim siab ua li ntawd nkawd thiaj li raug kev txom nyem​—Chivkeeb 3:16-19.

3. Qhov uas Adas thiab Evas txiav txim siab tsis mloog lus ho raug peb li cas?

Thaum Adas thiab Evas tau ua txhaum Vajtswv, nkawd thiaj zoo tsis tiav lawm. Twb yog vim li ntawd, nkawd tej xeeb leej xeeb ntxwv txhua tus thiaj zoo tsis tiav. Phau Vajlugkub hais txog Adas li no: “Vim ib tug xub ua txhaum, neeg ntiajteb txhua tus thiaj ua txhaum. Vim tus ntawd ua txhaum, tus ntawd thiaj tuag. Yog li ntawd, txhua haivneeg uas nyob hauv ntiajteb no thiaj txawj tuag.”​—Loos 5:12

Muaj ntau yam ua rau peb raug kev txom nyem. Tej thaud peb raug kev txom nyem vim peb tsis ua zoo txiav txim siab. Tej thaud peb raug kev txom nyem vim lwm tus txiav txim siab tsis zoo. Hos tej thaud yus mus ncaj lub sij hawm tsis zoo ces thiaj li ntsib kev txom nyem.​—Nyeem Tej Lus Qhia 9:12.

KAWM NTXIV

4. Tus uas ua rau peb raug kev txom nyem

Coob tus ntseeg tias Vajtswv yog tus tswj lub qab ntuj no. Puas muaj tseeb li ntawd tiag? Saib zaj YEEB YAJ KIAB.

YEEB YAJ KIAB: Leej Twg Yog Tus Kav Lub Ntiaj Teb? (1:24)

Nyeem Yakaunpaus 1:13 thiab 1 Yauhas 5:19, thiab tham txog lo lus no:

• Vajtswv puas yog tus tsim kev txom nyem thiab kev phem?

5. Tau muaj li cas txij thaum Xatas ua tus kav los

YEEB YAJ KIAB: Ua Li Cas Vajtswv Cia Muaj Kev Txom Nyem?​—Saib Ib Vuag (3:07)

Nyeem Chivkeeb 3:1-6, thiab tham txog cov lus no:

• Xatas tau dag li cas?​—Saib nqe 4 thiab 5.

• Xatas hais li cas xwb kom ua rau tib neeg xav tias Yehauvas tau muab ib yam zoo zais tsis pub lawv tau?

• Raws li Xatas hais, tib neeg puas cheem tsum Yehauvas ua tus Kav xwv lawv thiaj muaj kev zoo siab?

Nyeem Tej Lus Qhia 8:9, thiab tham txog lo lus no:

• Vim Yehauvas tsis yog tus kav lub qab ntuj no, tau muaj li cas xwb?

1. Adas thiab Evas zoo tiav thiab nyob rau hauv lub Vaj Kaj Siab. Tiam sis nkawd mloog Xatas lus thiab ntxeev siab rau Yehauvas

2. Tom qab Adas thiab Evas ntxeev siab, tsuas muaj kev txhaum, kev txom nyem, thiab kev ploj kev tuag puv ntia lub qab ntuj

3. Yehauvas yuav tshem kev txhaum, kev txom nyem, thiab kev ploj kev tuag mus. Tib neeg yuav rov zoo tiav thiab nyob hauv Vaj Kaj Siab.

6. Yehauvas yeej mob siab txog peb tej kev txom nyem

Vajtswv puas mob siab txog peb tej kev txom nyem? Mus nyeem tej uas Vajntxwv Daviv thiab tus tub txib Petus tau sau. Nyeem Phau Ntawv Nkauj 31:7 thiab 1 Petus 5:7, thiab tham txog lo lus no:

• Thaum koj paub tias Yehauvas yeej pom thiab mob siab txog peb tej kev txom nyem ho ua rau koj xav li cas?

KOJ KAWM TAU DAB TSI

Xatas dab Ntxwg Nyoog thiab thawj nkawm niam txiv yog cov uas tsim tej kev phem hauv lub qab ntuj no. Yehauvas mob siab txog peb tej kev txom nyem thiab yuav muab tshem sai sai mus.

Rov Tham Dua

• Xatas uas yog dab Ntxwg Nyoog tau dag Evas li cas?

• Vim Adas thiab Evas ntxeev siab rau Vajtswv tsim tau teeb meem li cas rau peb?

• Ua li cas peb thiaj paub tias Yehauvas mob siab txog peb tej kev txom nyem?

TSHAWB NTXIV

Mus kawm seb phau Vajlugkub qhia tias kev txhaum yog dab tsi.

“Kev Txhaum Yog Dab Tsi?” (Nyeem hauv jw.org/hmn)

Mus nyeem ntxiv txog qhov teeb meem uas Xatas dab Ntxwg Nyoog tau tsim hauv lub vaj Edees.

“Ua Li Cas Vajtswv Cia Muaj Kev Txom Nyem?” (Phau Tsom Faj lub 1 Hlis tim 1 xyoo 2014)

Nyeem cov lus teb rau ib lo lus nug uas nyuaj teb heev.

“Vim Li Cas Vajtswv Thiaj Cia Tsheej Plhom Tus Neeg Yudais Raug Tua?” (Nyeem hauv jw.org/hmn)

Mus saib seb ib tug txiv neej kawm tau li cas txog tej kev txom nyem uas nws pom ib ncig nws.

Kuv Tsis Nyob Kuv Ib Leeg Lawm Xwb (5:09)

Twb yog vim Adas thiab Evas nkawd tsis mloog Vajtswv lus es peb thiaj li muaj kev txhaum, muaj mob muaj nkeeg, thiab txawj laus txawj tuag.a Tiam sis Yehauvas hlub peb heev, nws thiaj li xa nws tib leeg tub Yexus Khetos los tuag cawm peb dim ntawm txoj kev txhaum thiab kev tuag. Phau Vajlugkub thiaj hais tias Yexus txoj kev tuag yog tus nqi txhiv. Tus nqi txhiv no yog ib yam khoom muaj nqis los sis nyiaj txiag uas ib tug neeg coj mus txhiv kom tau qhov uas nws ua poob lawm rov los. Yexus muab nws txoj sia ua tus nqi txhiv rau peb. (Nyeem Mathais 20:28.) Thaum Yexus zoo siab hlo muab nws txoj sia nyob mus ib txhis hauv ntiaj teb no los tuag txhiv peb, nws qhib tau txoj kev rau peb rov tau txhua yam uas Adas thiab Evas nkawd muab ua poob lawm. Qhov uas Yexus ua li no qhia tias Yexus thiab Yehauvas nkawd hlub peb kawg li. Zaj no kuj yuav pab kom koj paub ris txiaj ntsig rau Yexus txoj kev tuag thiab.

1. Yexus txoj kev tuag pab tau peb li cas niaj hnub no?

Vim peb yog neeg txhaum, peb yeej ua tau ntau tsav ntau yam tsis haum Yehauvas siab. Tiam sis yog peb paub tu siab rau peb tej kev txhaum thiab tuav Yexus lub npe thov Yehauvas zam txim, thiab yog peb ua li peb ua tau kom txhob rov mus ua txhaum ntxiv ces peb tseem yuav muaj tau ib txoj kev sib raug zoo nrog Yehauvas. (1 Yauhas 2:1) Phau Vajlugkub hais tias: “Rau qhov Yexus Khetos tuag tib zaug xwb txhiv tau sawvdaws lub txim lawm, nws yog tus ncaj ncees, nws tuag txhiv cov uas tsis ncaj ncees, nws ua li ntawd nws thiaj coj tau nej mus cuag Vajtswv.”​—1 Petus 3:18.

2. Yav tom hauv ntej, Yexus txoj kev tuag yuav pab tau peb li cas?

Yehauvas txib Yexus los tuag kom txhua “tus uas ntseeg nws Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis.” (Yauhas 3:16) Vim li no, yog peb ntseeg Yexus thiab tso siab rau nws tus nqi txhiv ces peb cia siab tias peb yuav tau nyob mus ib txhis hauv lub Vaj Kaj Siab hauv ntiaj teb no. Vim Yexus los tuag txhiv peb, Yehauvas yuav kho txhua yam kev phem uas peb raug vim Adas tsis mloog Vajtswv lus.​—Yaxayas 65:21-23.

KAWM NTXIV

3. Yexus txoj kev tuag cawm peb dim ntawm kev txhaum thiab kev tuag

YEEB YAJ KIAB: Vim Li Cas Yexus Thiaj Tuag?​—Ntu 1 (2:01)

• Thaum Adas tsis mloog Vajtswv lus, nws plam dab tsi?

Nyeem Loos 5:12, thiab tham txog lo lus no:

• Qhov uas Adas ua txhaum raug koj li cas?

Nyeem Yauhas 3:16, thiab tham txog lo lus no:

• Vim li cas Yehauvas thiaj txib nws leej tub Yexus los hauv ntiaj teb no?

1. Adas zoo tiav tiav tiam sis vim nws tsis mloog Vajtswv lus, nws thiaj ua rau tib neeg txhua tus muaj txim thiab txawj tuag

2. Vim Yexus zoo tiav tiav thiab mloog Vajtswv lus, nws thiaj pab tau tib neeg kom rov zoo tiav tiav thiab tau txoj sia nyob mus ib txhis

4. Yexus txoj kev tuag yeej pab tau txhua leej txhua tus

YEEB YAJ KIAB: Vim Li Cas Yexus Thiaj Tuag?​—Ntu 2 (2:00)

• Vim li cas ib tug tuag xwb ho cawm tau txhua tus?

Nyeem 1 Timautes 2:5, 6, thiab tham txog lo lus no:

• Adas yog ib tug neeg zoo tiav tiav, tiam sis thaum nws ua txhaum, txhua tus thiaj yog neeg txhaum thiab txawj tuag. Yexus yog ib tug neeg uas zoo tiav tiav ib yam li Adas. Yog li ntawd, Yexus txoj kev tuag thiaj cawm tau peb dim ntawm kev txhaum thiab kev tuag li cas?

5. Yexus tus nqi txhiv yog ib qho khoom pub uas Yehauvas muab pub rau koj

Cov uas nrog Yehauvas sib raug zoo yeej pom tias Yexus tus nqi txhiv yog ib qho khoom pub uas Yehauvas muab pub rau lawv. Nyeem Kalatias 2:20, thiab tham txog lo lus no:

• Ua li cas peb thiaj paub tias tus tub txib Povlauj ho pom tias Yexus tus nqi txhiv yog ib qho khoom pub uas Yehauvas muab pub rau nws?

Thaum Adas ua txhaum, nws thiab nws cov xeeb leej xeeb ntxwv puav leej raug kev txhaum thiab kev tuag. Tiam sis Yehauvas txib nws Leej Tub los tuag kom koj thiaj tau txoj sia nyob ntev dhawv mus ib txhis.

Thaum koj nyeem cov nqe Vajlugkub no, ua zoo xav seb thaum luag muab Yehauvas Leej Tub tsim txom mob nws siab npaum li cas. Nyeem Yauhas 19:1-7, 16-18, thiab tham txog lo lus no:

• Koj xav li cas xwb txog qhov uas Yehauvas thiab Yexus nkawd tau ua rau koj?

KOJ KAWM TAU DAB TSI

Vim Yexus tuag theej peb sawv daws lub txhoj, Yehauvas thiaj zam peb tej kev txhaum thiab peb thiaj nyob tau mus ib txhis.

Rov Tham Dua

• Ua li cas Yexus thiaj tuag?

• Yexus txoj kev tuag cawm tau peb dim ntawm kev txhaum thiab kev tuag li cas?

• Yexus txoj kev tuag pab tau koj li cas?

TSHAWB NTXIV

Kawm seb vim li cas thiaj muab Yexus txoj sia uas zoo tiav tiav hu ua tus nqi txhiv.

“Yexus Txoj Kev Tuag Txhiv Tau Coob Leej Li Cas?” (Nyeem hauv jw.org/hmn)

Kawm seb peb yuav tau ua li cas peb thiaj dim kev txhaum thiab kev tuag.

“Yexus Cawm Neeg Dim Li Cas?” (Nyeem hauv jw.org/hmn)

Yog peb ua txhaum loj, Yehauvas puas zam txim rau peb?

“Lus Nug Thiab Lus Teb Txog Phau Vajlugkub” (Phau Tsom Faj lub 5 Hlis tim 1 xyoo 2013)

Nyeem seb thaum ib tug txiv neej kawm txog Yexus tus nqi txhiv ho pab tau nws li cas.

“Kuv Tso Txoj Kev Ua Nruj Ua Tsiv Tseg” (Nyeem hauv jw.org/hmn)