Txojkev Hlub Uas Vajtswv Pub Dawb Tso Tau Peb Dim

1, 2. Loos 5:12 pab tau peb li cas?

LOOS 5:12 hais tias: “Lub txim tshwm los rau hauv lub ntiajteb yog tim tib leeg, thiab txojkev tuag tshwm los yog tim lub txim ntawd, thiab txojkev tuag kis mus rau ib tsoom neeg txhua tus vim yog neeg txhua tus ua txhaum muaj txim.” Sawvdaws yeej paub nqe Vajlugkub no zoo heev. Thaum peb mus tshaj tawm, peb kheev siv nqe no los qhia tibneeg.

² Nqe Vajlugkub ntawd tshwm ntau zaus hauv phau ntawv Phau Vajlugkub Qhia Txog Dabtsi Tiag? Thaum peb qhia peb cov menyuam thiab qhia lwm tus txog tshooj 3, 5, thiab 6 hauv phau ntawv no, peb kheev nyeem Loos 5:12. Nqe no pab cov uas peb qhia to taub tias ua cas lub ntiajteb ho muaj kev kub ntxhov, ua cas peb ho txawj laus txawj tuag, thiab ua cas peb ho cheem tsum tus nqe txhiv. Nqe no kuj pab peb li cas ntxiv thiab? Pab kom peb hajyam nco Yehauvas txiaj ntsig uas peb tau nrog nws sib raug zoo. Kuj ua rau peb yimhuab xav ua haum Yehauvas siab thiab kom peb tos ntsoov nws tej lus cog tseg.

3. Peb yuav tsum nco ntsoov tias peb yog neeg zoo li cas?

³ Peb yog noob txaug neeg txhaum xwb. Peb ua yuam kev txhua hnub. Yehauvas yeej paub li ntawd. Nws thiaj khuvleej peb thiab zoo siab hlo zam peb lub txim. (Ntawv Nkauj 103:13, 14) Yexus hais tias peb yuav tsum thov Vajtswv zam txim rau peb tej kev txhaum. (Luka 11:2-4) Thaum Yehauvas zam txim rau tej uas peb ua yav tas los, peb tsis tas yuav niaj hnub txhawj txog tej kev txhaum ntawd lawm. Cia peb kawm seb ua cas Yehauvas ho zam tau peb lub txim.

UA CAS YEHAUVAS HO ZAM TAU PEB LUB TXIM?

4, 5. (1) Yuav ua li cas peb thiaj nkag siab Loos 5:12? (2) “Txojkev hlub uas pub dawb” zoo li cas?

⁴ Yuav ua li cas peb thiaj nkag siab tus tubtxib Povlauj cov lus hauv Loos 5:12? Peb yuav tsum nyeem phau ntawv Loos. Tshooj uas pab tau peb tshaj yog tshooj 6. Yog peb kawm phau ntawv Loos ces yuav pab kom peb to taub tias ua cas Yehauvas ho zam tau peb lub txim. Tshooj 3 qhia rau peb tias “txhua tus puavleej muaj txim.” Povlauj thiaj piav li no: “Vajtswv muaj txojkev hlub thiaj pub dawb rau lawv ua tau tus ncaj ncees vim qhov uas Yexus Khetos txhiv lawv dim lub txim.” (Loos 3:23, 24) Ua cas Povlauj ho hais tias Vajtswv muab txojkev hlub “pub dawb” xwb? Rau qhov thaum xub sau nqe no, Povlauj siv lo lus Kili uas txhais tias luag hlub yus tsis yog vim yus ua zoo. Luag yeej hlub yus tawm hauv lub siab dawb paug tuaj, tsis tas yus yuav pauj.

⁵ Ib tug kws tshawb nrhiav Vajtswv Txojlus piav tias ntau zaus lo lus Kili ntawd yog hais txog qhov uas Vajtswv tso Yexus los tuag theej noob neej lub txhoj kom dim kev txhaum thiab kev tuag. Phau Vajlugkub Askiv New World Translation thiaj muab lo lus Kili ntawd txhais ua “txojkev hlub uas pub dawb.” Cia peb kawm txog cov lus nug no: Vajtswv tau ua dabtsi los pab peb? Txojkev hlub uas Vajtswv pub dawb pab tau peb li cas tamsim no? Thiab txojkev hlub ntawd pab tau peb muaj kev vam kev cia siab rau yav tom hauv ntej li cas?

6. Vajtswv txojkev hlub uas nws pub dawb pab tau leejtwg, thiab pab tau lawv li cas?

⁶ Vim Adas poob kev txhaum, txhua tus uas yug ntawm Adas los thiaj muaj kev txhaum thiab raug kev ploj kev tuag. Vim li ntawd, phau Vajlugkub thiaj hais tias “qhov uas ib tug ua txhaum ua rau txojkev tuag kav kiag ntawm tus ntawd los.” Tiamsis Yehauvas pub nws txojkev hlub dawb dawb rau peb, nws thiaj txib “ib tug uas yog Yexus Khetos” los tuag txhiv peb. (Loos 5:12, 15, 17) Yog li ntawd, phau Vajlugkub thiaj hais tias “qhov uas ib tug mloog lus kuj ua rau ib tsoom neeg ncaj ncees.” Cov ncaj ncees cia siab tias lawv yuav tau “txojsia ib txhis ntawm . . . Yexus Khetos.”​—Loos 5:19, 21.

7. Ua cas thiaj hais tias Vajtswv pub tus nqe txhiv dawb dawb rau peb?

⁷ Muab xav li no: Peb yog noob txaug neeg txhaum xwb, twb tsis tsim nyog Yehauvas pub nws tus Tub los tuag txhiv peb. Tiamsis vim nws hlub peb heev, nws thiaj npaj ib txojkev los cawm peb dim kev txhaum thiab kev tuag. Peb zoo siab kawg li uas muaj tus nqe txhiv, Vajtswv thiaj zam tau peb lub txim thiab pub txojsia ib txhis tsis kawg rau peb! Cia peb sawvdaws coj peb lub neej raws li nws lub siab nyiam thiaj qhia tias peb ris nws txiaj ntsig.

NCO VAJTSWV TXIAJ NTSIG RAU NWS TXOJKEV HLUB

8. Peb yuav tsum ceev faj tus cwj pwm twg?

⁸ Peb yog Adas cov xeeb ntxwv, peb lub siab thiaj ntxhi tas zog kom peb ua txhaum. Vajtswv yeej zam tau peb tej kev txhaum, tsis hais txhaum loj txhaum me. Tiamsis cia peb tsis txhob muab Vajtswv txojkev hlub ntxeev mus ua phem. Tsis zoo rau peb xav tias txawm peb coj phem li cas los Vajtswv yeej yuav zam txim rau peb. Nyob thawj 100 xyoo, thaum cov tubtxib tseem muaj sia nyob, muaj ib co Khixatia xav yuam kev li ntawd. (Nyeem Yuda 4.) Cia peb sawvdaws ceev faj nyob tsam lwm tus ho ntxias tau peb, lossis peb ho lam muaj ib nplooj siab xav yuam kev li ntawd.

9, 10. Ua cas Povlauj thiab cov Khixatia ho dim ntawm kev txhaum thiab kev tuag?

⁹ Povlauj qhia cov Khixatia kom lawv txhob xav yuam kev tias lawv ua txhaum npaum li cas los Vajtswv yuav zam huvsi. Povlauj hais tias lawv yuav tsum tsis txhob coj tus cwj pwm ntawd rau qhov lawv “twb tuag ntawm kev txhaum lawm.” (Nyeem Loos 6:1, 2.) Ua cas Povlauj ho hais li ntawd?

¹⁰ Vim muaj tus nqe txhiv Vajtswv thiaj zam txim rau Povlauj thiab cov Khixatia uas nyob thawj 100 xyoo. Yehauvas zam lawv lub txim thiab pub lub hwj huam dawb huv rau lawv, saws lawv ua nws cov tub. Yog lawv muab siab npuab Vajtswv lawv yuav tau mus nyob saum ntuj nrog Khetos ua vajntxwv kav. Tiamsis lawv twb tsis tau tuag, ua cas Povlauj ho hais tias lawv “tuag ntawm kev txhaum lawm”? Povlauj hais li ntawd rau qhov nws xav kom lawv pom tias lawv lub neej twb hloov lawm. Povlauj qhia tias lawv zoo ib yam li Yexus. Thaum Yexus tuag Vajtswv tsa nws sawv ua ib tug plig uas tsis txawj tuag li lawm. Yog li ntawd, kev tuag “tsis muaj hwjchim kav nws lawm.” Cov Khixatia los kuj zoo ib yam li ntawd thiab. Txawm lawv tseem ua neej nyob los, vim lawv tsis cia kev txhaum kav lawv, ces kuj zoo li lawv lub neej qub tuag lawm. Txij thaum ntawd los, lawv ua lub neej tshiab uas haum Vajtswv siab lawm xwb. Thiaj hais tau tias lawv “tuag ntawm lub txim,” tiamsis lawv “muaj txojsia hauv Yexus Khetos nyob rau Vajtswv.”​—Loos 6:9, 11.

11. Cov Khixatia uas muaj kev cia siab nyob hauv ntiajteb “twb tuag ntawm kev txhaum” li cas lawm?

¹¹ Ua li peb cov uas muaj kev cia siab nyob hauv lub ntiajteb no ne? Peb “twb tuag ntawm kev txhaum” li cas lawm thiab? Yav tas los, thaum peb tsis paub Vajtswv, peb tau ua ntau yam tsis zoo. Peb twb tsis paub xyov peb hla Vajtswv txojcai los tsis hla. Phau Vajlugkub thiaj hais tias peb “ua kev phem kev qias li qhev” lossis “ua lub txim li qhev.” (Loos 6:19, 20) Tiamsis thaum peb kawm Vajlugkub, peb mam li pom tias Vajtswv xav kom peb coj li cas. Peb thiaj hloov peb lub neej, muab peb tus kheej cob rau Vajtswv, thiab ua kevcai raus dej. Txij thaum ntawd los, peb muaj lub siab kub lug xav mloog Yehauvas lus thiab ua haum nws siab xwb. Vim li no thiaj hais tau tias peb “dim lub txim lawm.” Peb tsuas “ua txojkev ncaj ncees li qhev” lawm xwb.​—Loos 6:17, 18.

12. Peb txhua tus yuav tsum txiav txim siab li cas?

¹² Peb txhua tus yuav tsum txiav txim siab seb peb puas cia kev txhaum kav peb. Povlauj hais tias: “Tsis txhob kheev lub txim kav nej lub cev uas txawj tuag kom nej ua raws li tej kev phem uas nej lub cev nqaij ntshaw.” (Loos 6:12) Peb yuav tsum txiav txim siab seb peb yuav tswj tej uas peb lub siab ntshaw, los yog cia tej uas peb lub siab ntshaw tswj peb. Xav txog cov lus nug no: ‘Thaum kuv lub siab ntshaw tej yam tsis zoo, kuv puas tswj kuv lub siab tamsid? Los yog kuv yuav cia tej uas kuv lub siab ntshaw ntawd coj kuv mus ua txhaum?’ Yog peb saib txojkev hlub uas Vajtswv pub dawb rau nqe ces peb yuav ua txhua yam kom haum nws siab.

KOJ YUAV TAWM TSAM YEEJ KEV TXHAUM

13. Ua cas peb ho paub tias peb txhua tus yeej hloov tau peb lub neej?

¹³ Nyob thawj 100 xyoo, cov neeg hauv Khaulee ib txhia coj li cas xwb? Lawv ua tub sab tub nyiag, deev luag poj luag txiv, teev dab teev mlom, quav dej quav cawv, thiab yog cov neeg uas txivneej deev txivneej. Thaum lawv kawm txog Yehauvas thiab hlub nws lawd, lawv txaj muag rau tej kev phem uas lawv tau ua, lawv thiaj hloov lawv lub neej. (Loos 6:21; 1 Khaulee 6:9-11) Cov Khixatia hauv Loos kuj hloov ib yam li ntawd. Povlauj thiaj hais li no rau lawv: “Tsis txhob muab nej lub cev ib qho ua cuab yeej pub rau lub txim siv ua phem, tiamsis nej yuav tsum muab nej tus kheej uas zoo li cov neeg uas raug tsa sawv hauv qhov tuag rov los ntawd pub rau Vajtswv siv thiab muab nej lub cev txhua yam ua tej cuab yeej uas siv ua haujlwm ncaj ncees pub rau Vajtswv.” (Loos 6:13) Povlauj tso siab tias cov Khixatia yeej ua tau neeg dawb huv xwb. Nws paub tias txojkev hlub uas Vajtswv pub dawb yuav pab tau lawv.

14, 15. Peb yuav tsum xav txog 2 lo lus nug twg?

¹⁴ Niaj hnub no, peb cov kwvtij nkauj muam ib txhia kuj tau ua ntau yam kev phem ib yam li cov ntseeg hauv Khaulee. Tiamsis thaum lawv los paub Yehauvas, lawv kuj muab lawv tej kev txhaum tso tseg. Nimno zoo ib yam li lawv twb raug ntxuav dawb huv lawm. Txawm peb tsis tau ua tej kev txhaum loj los, peb txhua tus yeej hloov kom thiaj ua tau haum Vajtswv siab. Ua li peb puas nco Vajtswv txiaj ntsig rau txojkev hlub uas nws pub dawb rau peb? Cia peb yeej meem tswj peb lub siab kom tsis txhob qaug rau tej kev phem, thiab cia peb siv peb lub neej los teev tiam Yehauvas.

¹⁵ Peb yuav tsum tsis txhob ua tej kev txhaum loj li cov ntseeg hauv Khaulee tau ua. Yog peb ua tej kev txhaum loj zoo li ntawd tsis tseg ces txojkev hlub uas Vajtswv pub dawb yuav pab tsis tau peb, thiab Vajtswv yuav tsis zam peb lub txim. Txawm tias peb tsis ua tej kev txhaum loj los, peb puas ua tej kev txhaum uas lwm tus xav tias tsis loj ua luaj twg? Peb puas yuav zoo siab hlo mloog Vajtswv lus txhua lub sijhawm?​—Loos 6:14, 17.

16. Puas yog tsuav peb tsis ua tej kev txhaum loj hauv 1 Khaulee 6:9-11 xwb ces zoo txaus lawm?

¹⁶ Xav txog tus tubtxib Povlauj. Nws tsis tau ua tej kev txhaum loj zoo li hais hauv 1 Khaulee 6:9-11 los, nws tseem hais li no: “Kuv yog nqaij tawv kuv thiaj raug muab muag ua kev txhaum li qhev. Kuv tsis nkag siab tej uas kuv ua. Rau qhov kuv tsis ua yam uas kuv xav ua, kuv ho ua yam uas kuv ntxub xwb.” (Loos 7:14, 15) Povlauj cov lus qhia tias kuj muaj lwm yam kev txhaum uas ua rau nws nyuaj siab heev. Nws thiaj tswj qees nws lub siab kom ua raws li Vajtswv lub siab nyiam. (Nyeem Loos 7:21-23.) Txawm peb tsis ua tej kev txhaum loj los, cia peb xyaum Povlauj es ua txhua yam kom haum Yehauvas siab.

17. Ua cas ho zoo rau peb coj ncaj rau txhua fab?

¹⁷ Cia peb kawm seb peb yuav ua li cas peb thiaj ua tau txhua yam haum Yehauvas siab. Peb paub tias Vajtswv xav kom cov Khixatia coj ncaj thiab hais lus tseeb xwb. (Nyeem Paj Lug 14:5; Efexau 4:25.) Phau Vajlugkub ceeb toom kom peb txhob coj zoo li Xatas uas yog “cov uas dag leej txiv.” Phau Vajlugkub kuj qhia tias Anania thiab nws tus pojniam tau tuag vim nkawd dag. Yog li ntawd, tsis zoo rau peb hais lus dag. (Yauhas 8:44; Tubtxib Tes Haujlwm 5:1-11) Puas yog Vajtswv ceeb toom kom peb tsis txhob hais lus dag xwb? Tsis yog. Peb yuav tsum coj ncaj rau txhua fab. Yog peb ua li ntawd thiaj qhia tias peb nco Vajtswv txiaj ntsig rau txojkev hlub uas nws pub dawb.

18, 19. Tus neeg coj ncaj coj li cas?

¹⁸ Ib txhia kuj tsis hais lus dag kiag rau lwm tus tiamsis lawv kuj tsis qhia siab tag tag thiab. Nco ntsoov tias Yehauvas xav kom peb coj ncaj rau txhua fab. Yehauvas thiaj hais rau cov Yixayee li no: “Nej tsis txhob ua tub sab, tsis txhob ntxo luag, tsis txhob sib dag kiag li.” Vim li cas lawv yuav tsum coj ncaj li ntawd? Rau qhov lawv tus Vajtswv Yehauvas “yog tus dawb huv.” (Levi Tej Kevcai 19:2, 11) Yog li ntawd, txawm peb tsis hais lus dag kiag rau lwm tus los, yog peb ua tej yam zais ntshis thiab peb tsis qhia siab tag tag ces kuj yog peb dag lawm thiab.

¹⁹ Muab ua piv txwv li no: Muaj ib tug txivneej nyob tom chaw haujlwm ua txuj hais rau nws tus lospav tias nws yuav tsum mus tsev ntxov vim nws yuav mus ntsib kws kho mob. Tiamsis nws tsuas mus nqa tshuaj lossis mus them kws kho mob mentsis xwb. Qhov tseeb tiag, nws xav mus tsev ntxov kom nws tau mus ua si xwb. Tus txivneej no puas coj ncaj? Los yog nws dag nws tus lospav lawm? Tus txivneej no tsis tau hais lus dag kiag, tiamsis nws qhia siab tsis tag ces twb yog nws dag lawm. Vim li cas? Vim nws ua rau nws tus lospav ntseeg tias nws yuav mus ntsib kws kho mob. Muaj ib txhia dag kom ntxias tau lwm tus. Hos ib txhia dag vim lawv tsis xav raug cem. Txawm li cas los, peb yuav tsum nco ntsoov Yehauvas cov lus kom txhob ua neeg dag. Peb yuav tsum ua txhua yam kom ncaj ncees thiab dawb huv raws li Vajtswv lub siab nyiam.​—Loos 6:19.

20, 21. Yog peb nco Vajtswv txiaj ntsig rau txojkev hlub uas nws pub dawb, peb yuav ua li cas?

²⁰ Peb yeej tsis mus tham luag poj luag txiv, mus haus dej hauv cawv kom qaug, lossis ua lwm yam kev txhaum loj. Tiamsis puas yog peb tsuas zam tej kev txhaum loj zoo li ntawd xwb? Tsis yog. Peb yuav tsum zam txhua yam uas Yehauvas ntxub. Piv txwv li no: Tsis yog peb tsis mus ua kev nkauj kev nraug xwb, tiamsis peb kuj tsis saib tej yeeb yaj kiab uas ntsig txog kev nkauj kev nraug thiab. Tsis yog peb tsis mus haus dej haus cawv kom qaug xwb, tiamsis peb kuj tsis haus kom yuav luag qaug thiab. Tej zaum tsis yoojyim rau peb coj li no, tiamsis yog peb kam tiag peb yeej yuav ua tau haum Vajtswv siab.

²¹ Cia peb txiav txim siab coj raws li Povlauj tau hais no: “Tsis txhob kheev lub txim kav nej lub cev uas txawj tuag kom nej ua raws li tej kev phem uas nej lub cev nqaij ntshaw.” (Loos 6:12; 7:18-20) Peb yog neeg txhaum, ntau zaus peb yuav ua yuam kev. Tiamsis yog peb tawm tsam txojkev txhaum ntawd, ces qhia tias peb yeej nco Vajtswv thiab Khetos txiaj ntsig uas nkawd tau pub nkawd txojkev hlub dawb dawb rau peb.

22. Vim muaj txojkev hlub uas Vajtswv pub dawb, peb yuav tau nqe zog dabtsi?

²² Yehauvas twb zam peb lub txim lawm thiab tseem yuav zam rau yav tom hauv ntej. Cia peb nco Yehauvas txiaj ntsig rau txojkev hlub uas nws tau pub dawb ntawd! Txav deb ntawm tej yam uas tsis haum Yehauvas siab, txawm tias lwm tus xav tias tsis txhaum leejtwg. Yog peb ua li ntawd, Vajtswv yuav pub nqe zog rau peb. Povlauj hais tias: “Nimno nej twb dim qhov uas ua lub txim li qhev thiab tig los ua Vajtswv li qhev lawm, mas nuj nqes uas nej tau yog qhov uas muab nej cais ua dawb huv thiab thaum kawg yog txojsia ib txhis tsis kawg.”​—Loos 6:22.